1 Ut ke’chal ajwi’ sa’ xkutankil laj Kom k’iila profeet, ut ke’xch’olob’ jo’ profeet xsachlijik li nimla tenamit a’an wi ink’a’ te’xjal xk’a’uxl, ut te’sutq’iiq rik’in li Qaawa’, ut te’xkanab’ li kamsink ut lix maa’usilaleb’.

2 Ut kik’ulman naq eb’ li profeet ke’tz’eqtaanaak xb’aaneb’ li tenamit, ut ke’eelelik rik’in laj Kom re te’kole’q rix, xb’aan naq eb’ li tenamit ke’xsik’ xsachb’aleb’.

3 Ut ke’xch’olob’ jo’ profeet chiru laj Kom k’iila na’leb’; ut a’an ki’osob’tesiik chiru chixjunil rela’ lix kutan.

4 Ut kiwan xyu’am toj reetal naq tz’aqal naab’al xchihab’, ut kiyo’la laj Xiblom choq’ ralal; ut laj Xiblom ki’awa’b’ejin sa’ xna’aj. Ut li ras laj Xiblom kixpo’resi xch’ool chiru, ut ki’ok chi wank jun pleet numtajenaq xnimal sa’ chixjunil li ch’och’.

5 Ut kik’ulman naq li ras laj Xiblom kixk’e chi kamsiik chixjunileb’ li profeet li ke’xch’olob’ jo’ profeet naq taasache’q li tenamit;

6 Ut kiwan nimla rahilal chiru chixjunil li ch’och’, xb’aan naq eb’ a’an ke’xch’olob’ chaq naq taachalq jun nimla majewank sa’ xb’een li ch’och’, ut sa’ xb’een ajwi’ li tenamit, ut naq taawanq jun nimla sache’k sa’ xyanqeb’, jo’ li maajun wa wanjenaq chiru lix b’een li ruchich’och’, ut lix b’aqeleb’ te’wanq chanchan li tuub’anb’il ch’och’ chiru lix b’een li ch’och’ wi ink’a’ te’xjal xk’a’uxl chirix lix maa’usilaleb’.

7 Ut moko ke’ab’in ta chiru lix yaab’ xkux li Qaawa’, xb’aaneb’ lix maa’us aj molam; jo’kan ut, ke’ok chi wank li pleet ut li wech’ok-ib’ sa’ chixjunil li ch’och’, ut jo’kan ajwi’ naab’al li we’ej ut li yajel, jo’kan naq kiwan jun nimla sache’k, jo’ li maajun wa nawb’il chaq chiru lix b’een li ch’och’; ut chixjunil a’in kik’ulman sa’ xkutankil laj Xiblom.

8 Ut eb’ li tenamit ke’ok chixjalb’al xk’a’uxl chirix lix maa’usilaleb’, ut a’ yaal jo’ ke’xjal xk’a’uxl li Qaawa’ kiruxtaanaheb’ ru.

9 Ut kik’ulman naq kikamsiik laj Xiblom, ut laj Set kik’ame’ chi preexil, ut kiwan chixjunil lix kutan sa’ preexil.

10 Ut kik’ulman naq laj Ahah, li ralal, kixtaw li awa’b’ejihom, ut ki’awa’b’ejin sa’ xb’een li tenamit chixjunil lix kutan. Ut kixb’aanu li k’iila paay chi maa’usilal sa’ xkutankil, ut rik’in a’an kixk’e chi hoymank naab’al li kik’; ut moko k’i ta lix kutan.

11 Ut laj Etem, rik’in naq ralal xk’ajol chaq laj Ahah, kixtaw li awa’b’ejihom, ut kixb’aanu ajwi’ li k’a’ru ink’a’ us sa’ lix kutan.

12 Ut kik’ulman naq sa’ xkutankil laj Etem ke’chal k’iila profeet, ut ke’aatinak wi’chik chiru li tenamit jo’ profeet; relik chi yaal, ke’xch’olob’ jo’ profeet naq li Qaawa’ tixsacheb’ chaq chi junajwa sa’ xb’een li ch’och’ wi ink’a’ te’xjal xk’a’uxl chirix lix maa’usilaleb’.

13 Ut kik’ulman naq eb’ li tenamit ke’xkawob’resi li raameb’, ut ink’a’ ke’raj ab’ink chiru li raatineb’; ut eb’ li profeet ke’raho’ xch’ool ut ke’risi chaq rib’ sa’ xyanqeb’ li tenamit.

14 Ut kik’ulman naq laj Etem kixk’anjela li raqb’a-aatin sa’ maa’usilal chixjunil lix kutan, ut kiyo’la laj Moron choq’ ralal. Ut kik’ulman naq laj Moron ki’awa’b’ejin sa’ xna’aj; ut laj Moron kixb’aanu li k’a’ru ink’a’ us chiru li Qaawa’.

15 Ut kik’ulman naq kiwakli jun po’resink ch’oolej sa’ xyanqeb’ li tenamit, xb’aan li muqmuukil molam a’an li kiwaklesiman re xtawb’al wankilal ut tumin; ut kiwakli jun winq nim xmetz’ew sa’ xyanqeb’ sa’ li maa’usilal, ut a’an kixpleeti laj Moron, sa’ li kinumta wi’ sa’ xb’een xyijach li awa’b’ejihom, ut kixk’uula xwankil sa’ xb’een lix yijach li awa’b’ejihom chiru k’iila chihab’.

16 Ut kik’ulman naq laj Moron kinumta sa’ xb’een, ut kixtaw wi’chik li awa’b’ejihom.

17 Ut kik’ulman naq kiwakli jun chik li winq kaw xmetz’ew, ut a’an ralal xk’ajol li ras laj Jared.

18 Ut kik’ulman naq a’an kinumta sa’ xb’een laj Moron ut kixtaw li awa’b’ejihom; jo’kan ut, laj Moron kiwan sa’ preexil chixjunil li rela’ lix kutan, ut kiyo’la laj Koriantor choq’ ralal.

19 Ut kik’ulman naq laj Koriantor kiwan sa’ preexil chixjunil lix kutan.

20 Ut sa’ xkutankil laj Koriantor ke’chal ajwi’ k’iila profeet, ke’aatinak jo’ profeet chirix li xninqal ru ut sachb’a-ch’oolejil na’leb’, ut ke’xyaab’asi li jalb’a-k’a’uxlej chiruheb’ li tenamit, ut naq wi ink’a’ te’xjal xk’a’uxl, li Qaawa’ Dios tixk’anjela li raqb’a-aatin sa’ xb’eeneb’ re te’sache’q chi junajwa;

21 Ut naq li Qaawa’ Dios tixtaqla, malaj ut tixk’am chaq jun chik tenamit chireechaninkil li ch’och’, rik’in lix wankilal, jo’ chanru ajwi’ naq kixk’ameb’ chaq lix yuwa’eb’.

22 Ut eb’ a’an ke’xtz’eqtaana chixjunil li raatineb’ li profeet, xb’aan lix muqmuukil molameb’ ut lix maa’us aj tz’eqb’eetalileb’.

23 Ut kik’ulman naq laj Koriantor kiyo’la laj Eter choq’ ralal, ut kikam, chirix wank sa’ preexil chixjunil lix kutan.