1 ’E ’ua tae mai e rave rahi peropheta i te mau mahana o Koma, ’e ’ua tohu rātou e ha’amouhia taua feiā rahi ra, maori rā ’ia tātarahapa rātou, ’e ’ia fāriu mai i te Fatu, ’e ’ia vaiiho i tā rātou mau ’ohipa taparahi ta’ata ’e te mau ’ohipa ’ī’ino.

2 ’E i muri a’era, ’ua pāto’i te mau ta’ata i te mau peropheta, ’e ’ua horo atu ra rātou ia Koma ra nō te pārurura’a ; nō te mea ’ua tītau te mau ta’ata ’ia ha’apohe ia rātou.

3 ’E ’ua tohu a’era rātou i te mau mea e rave rahi ia Koma ; ’e ’ua ha’amaita’ihia ’oia i te tā’āto’ara’a nō te toe’a o tōna ra mau mahana.

4 ’E ’ua ora noa ’oia ē tae noa atu i tōna ruhiruhiāra’a, ’e ’ua fānau mai ’oia ia Sibeloma ; ’e ’ua fa’atere ’o Sibeloma ’ei mono nōna. ’E ’ua ’ōrurehau mai ra te taea’e o Sibeloma iāna, ’e ’ua tupu ihora te hō’ē ’arora’a rahi roa i ni’a i te fenua tā’āto’a.

5 ’E i muri a’era, ’ua fa’aue atu ra te taea’e o Sibeloma ’ia taparahihia te mau peropheta ato’a ’o tei tohu nō ni’a i te ha’amoura’a o te mau ta’ata.

6 ’E ’ua tupu ihora te hō’ē ’ati rahi i ni’a i te fenua tā’āto’a, ’e ’ua fa’a’ite pāpū mai ho’i rātou ē e tae mai te hō’ē ’anatemara’a rahi i ni’a i te fenua, ’e i ni’a ato’a i te mau ta’ata, ’e e tupu te hō’ē ha’amoura’a rahi i rotopū ia rātou, te hō’ē ’o tei ’ore ā i ’itehia i ni’a i te fenua nei ; ’e e riro ho’i tō rātou mau ivi mai te mau ha’apu’era’a repo i ni’a i te fenua, maori rā ’ia tātarahapa rātou i tā rātou mau ’ohipa ’ī’ino.

7 ’E ’aita rātou i ha’apa’o atu i te parau a te Fatu, nō tā rātou mau pupu ’ohipa parauti’a ’ore ; nō reira ’ua tupu noa te mau ’arora’a ’e te mau mārōra’a i ni’a i te fenua tā’āto’a, ē tae noa atu e rave rahi mau o’e ’e te mau ma’i ; ’e nō reira ho’i ’ua tupu te pau rahi mai tei ’ore i ’itea na i ni’a i te fenua nei ; ’e ’ua tupu teie mau mea ato’a i te mau mahana o Sibeloma.

8 ’E ’ua ha’amata ihora te mau ta’ata i te tātarahapa i tā rātou mau ’ohipa ’ī’ino ; ’e ’ia nā reira rātou, ’ua aroha mai te Fatu ia rātou.

9 ’E i muri a’era, ’ua taparahihia ihora Sibeloma, ’e ’ua fa’atītīhia a’era Seta, ’e ’ua ora noa ’oia i roto i te fa’atītīra’a i te mau mahana ato’a nō tōna orara’a.

10 ’E i muri a’era, ’ua roa’a ihora te bāsileia i tāna tamaiti ra ia Aha ; ’e ’ua fa’atere a’era ’oia i ni’a i te mau ta’ata ē hope roa a’e tōna ra mau mahana. ’E ’ua rave noa ho’i ’oia i te mau huru ’ohipa ’ī’ino ato’a i tōna ra mau mahana, ’e nā roto i te reira ’ua ha’amani’i rahi ’oia i te toto ; ’e e mea iti roa ho’i tōna ra pu’e mahana.

11 ’E ’ua roa’a te bāsileia ia Etema, ’e e hua’ai ho’i ’oia nō Aha ; ’e ’ua rave ato’a ho’i ’oia i te mau ’ohipa parauti’a ’ore i tōna ra mau mahana.

12 ’E i muri a’era, ’ua tae mai ra te mau peropheta e rave rahi i te mau mahana o Etema, ’e ’ua tohu fa’ahou mai rātou i te mau ta’ata ; ’oia ïa, ’ua tohu rātou ē, e ha’amou roa te Fatu ia rātou mai ni’a atu i te fenua nei, maori rā ’ia tātarahapa rātou i tā rātou mau ’ohipa ’ī’ino.

13 ’E i muri a’era, ’ua fa’a’eta’eta atu te mau ta’ata i tō rātou ’ā’au, ’e ’aita rātou i ha’apa’o atu i tā rātou parau ; ’e ’ua ’oto ihora te mau peropheta ’e ’ua fa’aātea ’ē atu ra ia rātou mai rotopū atu i te mau ta’ata.

14 ’E i muri a’era, ’ua fa’atere a’era Etema i te ’ohipa ha’avāra’a ma te parauti’a ’ore ē hope roa a’e tōna ra mau mahana ; ’e ’ua fānau mai ra ’oia ia Morona. ’E i muri a’era, ’ua fa’atere a’era ’o Morona ’ei mono nōna ; ’e ’ua rave Morona i te mau ’ohipa ’ī’ino i mua i te Fatu.

15 ’E i muri a’era, ’ua tupu a’era te ’ōrurera’a hau i rotopū i te mau ta’ata, nō te mea tē vai ra taua pupu ’ohipa huna ’o tei fa’ati’ahia ’ia roa’a te mana ’e te tao’a ; ’e ’ua ti’a mai ra te hō’ē ta’ata pūai i te rave i te mau ’ohipa ’ī’ino i rotopū ia rātou, ’e ’ua ’aro atu ra ’oia ia Morona, ’e nā roto i te reira ’ua ha’avī ihora ’oia i te ’āfara’a o te bāsileia ; ’e ’ua tāpe’a noa atu ra ’oia i te ’āfara’a o te bāsileia nō te mau matahiti e rave rahi.

16 ’E i muri a’era, ’ua ha’avīhia a’era ’oia e Morona, ’e ’ua roa’a fa’ahou mai te bāsileia iāna.

17 ’E i muri a’era, ’ua ti’a mai ra te tahi ta’ata pūai ; ’e e hua’ai ’oia nō te taea’e o Iareda.

18 ’E i muri a’era, ’ua vī ihora Morona iāna, ’e ’ua roa’a a’era te bāsileia iāna ; nō reira, ’ua ora noa ihora Morona i roto i te fa’atītīra’a i te toe’a o tōna ra mau mahana ; e fānau ihora ’oia ia Korianetora.

19 ’E i muri a’era, ’ua ora noa ihora Korianetora i roto i te fa’atītīra’a ē hope roa a’e tōna ra mau mahana.

20 ’E i te mau mahana o Korianetora ’ua tae fa’ahou mai ra te tahi mau peropheta e rave rahi, ’e ’ua tohu mai ra i te tahi mau mea rahi ’e te māere, ’e ’ua a’o mai ra i te parau nō te tātarahapa i te mau ta’ata, ’e ’ia ’ore rātou ’ia tātarahapa, e fa’atae atu te Fatu te Atua i te ha’avāra’a i ni’a ia rātou ē tae noa atu i tō rātou ha’amoura’a.

21 ’E e tono mai ’e ’aore rā e fa’atae mai te Fatu te Atua nā roto i tōna ra mana i te tahi atu nūna’a nō te fatu i te fenua, mai te au i te huru nō tāna arata’ira’a mai i tō rātou mau metua.

22 ’E ’ua pāto’i atu rātou i te mau parau ato’a a te mau peropheta, nō tā rātou pupu ’ohipa huna ’e te mau ’ohipa vi’ivi’i roa.

23 ’E i muri a’era, ’ua fānau a’era tā Korianetora ’o Etera, ’e ’ua pohe a’era ’oia, ’e i ora noa ra ho’i ’oia i roto i te fa’atītīra’a i tōna ra mau pu’e mahana ato’a.