1 Iwe iei ngang, Moronai, ua sopweno ne awesi ai kewe uruo usun kiteterinon ekkewe aramas usun ua fen makkei usur.

2 Pun nengeni, rese etiwa ekkewe kapas meinisin an Ether; pun a ennetin ureni ir usun mettoch meinisin, seni nepoputan aramas; me pwe mwirin an ekkewe konik ra mworesefan seni unungen ei fonu a winiti ew fonu mi kefinita nap seni pwan ekkoch fonu meinisin, ew fonu mi kefinita seni ewe Samon; ina minne ewe Samon a mochen pwe aramas meinisin repwe angang ngeni i ekkewe ra nonnom won unungan we;

3 Iwe pwe a ina ewe nenien ewe Minafon Jerusalem, minne epwe feitiw seni nang, me ewe nenien tumun mi fel an ewe Samon.

4 Nengeni, Ether a kuna ekkewe ranin Kraist, iwe a kapas usun ew Minafon Jerusalem won ei fonu.

5 Iwe a pwan kapas usun ewe imwen Israel, me ewe Jerusalem seni ikewe Liai epwe feito me ie—mwirin an epwe kiteterino epwe kauuta sefan, ew teninimw mi fel ngeni ewe Samon; ina minne, ese tongeni epwe ew minafon Jerusalem pun a fen fis non ew fansoun nom; nge epwe kauuta sefan, me winiti ew teninimw mi fel ngeni ewe Samon; iwe epwe kauuta ngeni ewe imwen Israel—

6 Iwe pwe ew Minafon Jerusalem epwe kauuta me won ei fonu, ngeni nussun mwirimwirin Joseph, pun minne mettoch a fen wor napanapan.

7 Pun usun chok Joseph a watiw seman we ngeni ewe fonu Egypt, pwan mwo usun a mano ikewe; ina minne, ewe Samon a wau ew nussun mwirimwirin Joseph seni ewe fonuen Jerusalem, pwe i epwe tongeni umoumoch ngeni mwirimwirin Joseph pwe resap mano, pwan mwo usun a umoumoch ngeni seman Joseph we pwe i esap mano.

8 Ina minne, ewe nussun mwirimwirin imwen Joseph epwe kauuta won ei fonu; iwe epwe ew fonuen ar kewe neuo; iwe repwe aueta ew teninimw mi fel ngeni ewe Samon, usun chok ewe Jerusalem minen nom; iwe resap chiwen nofit fengen, tori ewe nesoponon epwe feito nupwen ewe fonufan epwe morono.

9 Iwe epwe wor ew minafon nang me ew minafon fonufan; iwe repwe usun chok ewe minen nom tiwenon chok ewe minen nom a moreno, iwe mettoch meinisin ra winiti minafo.

10 Iwe mwirin epwe foruta ewe Minafon Jerusalem; iwe feioch ir ekkewe repwe nonnom non, pun ir ekkewe ufer a pwecheno me non chan ewe Nam; me ir ekkewe ra anneanong nein nussun mwirimwirin Joseph, ir ekkewe seni ewe imwen Israel.

11 Iwe mwirin epwe pwan foruta ewe Jerusalem minen nom; me aramasan kewe non, feioch ir, pun ra fen nimet me non chan ewe Nam; me ir ekkewe ra fen toropas fetan me ionfengeninong seni ekkewe ruanu kinikinin ewe fonufan, me seni ekkewe fonu ennefen, me ir chon angei feioch seni pwonuetan ewe pwon mi pin minne Kot a fen fori ngeni semer we, Abraham.

12 Iwe nupwen ekkei mettoch repwe fis, epwe efisi met ewe pukefel minne a apasa, mi wor ekkewe ir ra akkom, ir repwe kukumwir; me mi wor ekkewe ir ra kukumwir, ir repwe akkom.

13 Iwe ita upwe ne pwan makkei ekkoch, nge ua annuk pwe usap; nge auchea me amwarar ekkewe osini an Ether; nge ra ekieki pwe ese wor namotan, me ra aturau i; iwe a opano inisin non pwangen ew achaw fansoun neran, iwe fansoun nepwin a feino nenengeni ekkewe mettoch minne epwe fis won ekkewe aramas.

14 Iwe nupwen an nonnom non pwangen ew achaw a fori nussunon ei uruo, a nenengeni ewe kiteterino minne a fis won ekkewe aramas, fansoun nepwin.

15 Iwe non ewe fansoun pwe non ena pwan chok ier non minne a katuruu seni nein ekkewe aramas a poputa ne wor ew watten maun nein ekkewe aramas, pun a chommong ekkewe ra feito, ir mwan mi tekia, me ra kutta ar repwe nieno Koriantumer ren ar kokkoten fofforungaw mi monomon, usun minne ua fen apasa.

16 Iwe iei Koriantumer, a kaeo, pwisin, non angangen maun meinisin me ekkewe nikatuputupen ewe fonufan meinisin, ina minne a fiu ngeni ir ekkewe ra kutta ar repwe nieno i.

17 Nge ese aier, pwan noun kewe anuon me fopun mi atoch me nioch; pwan ekkewe anuon me fopun mi atoch me nioch noun Kohor; pwan ekkewe anuon me fopun mi atoch me nioch noun Korior; iwe amuchunon, ese wor nein ekkewe anuon me fopun mi atoch me nioch won unungen unusen ewe fonufan ra aier seni ar tipis.

18 Ina minne, non ewe fansoun pwe non ewe aewin ier minne Ether a nonnom non pwangen ew achaw, mi wor chommong aramas ekkewe ra ninnino me ren ewe ketinas noun ekkewe ir seni ekkewe mwicheich mi monomon, ekkewe ra fiu ngeni Koriantumer pwe repwe tongeni angei ewe muu.

19 Iwe non ewe fansoun pwe ekkewe anuon noun Koriantumer ra fiu fan chommong me watte char a puno seni ir.

20 Iwe non ewe aruwen ier ewe kapasen ewe Samon a feito ngeni Ether, pwe epwe feino me osini ngeni Koriantumer pwe, ika epwe aier, me chon non imwan we meinisin, ewe Samon epwe ngeni i muun we me amanaua ekkewe aramas—

21 Are esap ina iwe repwe ninnino, me chon non imwan we meinisin tiwenon pwisin i. Iwe i epwe chok manau pwe epwe kuna pwonuetan ekkewe osini minne ra fen affateno usun pwan ew aramas repwe angei ewe fonu pwe fonuer; iwe Koriantumer epwe peiaseno me rer; iwe ngun meinisin repwe ninnino tiwenon chok Koriantumer.

22 Iwe non ewe fansoun pwe Koriantumer ese aier, pwan chon non imwan we, pwan ekkewe aramas; iwe ekkewe maun rese kouno; iwe ra kutta ar repwe nieno Ether, nge a suno me mwer me opono sefan non pwangen ewe achaw.

23 Iwe non ewe fansoun pwe a pwato Seirut, iwe a pwan fiu ngeni Koriantumer; iwe a akkufu i, ina popun pwe non ewe aunungatin ier a uweienong i non fotek.

24 Iwe ekkewe anuon noun Koriantumer, non ewe aruwanun ier, ra akkufu Seirut, me angei ewe muu sefan ngeni semer we.

25 Iei a poputa ne wor ew maun won unusen unungen ewe fonu, emon me emon mwan fiti an mwicheich ra fiu fan iten met minne a mochen.

26 Iwe a wor chon sona, me amuchunon, sokopaten fofforungaw meinisin won unusen unungen ewe fonu.

27 Iwe non ewe fansoun pwe Koriantumer a fokkun song ren Seirut, iwe a feino ungeni i fiti noun kewe sounfiu ne maun; iwe ra chu non watten song, iwe ra chu non nemonun chukun Gilgal; iwe ewe maun a fokkun eriaffou.

28 Iwe non ewe fansoun pwe Seirut a fiu ngeni i ren ukukun unungat ran. Iwe non ewe fansoun pwe Koriantumer a akkufu i, me tapwei i tori an a feito ngeni sonosonochun Eslon.

29 Iwe non ewe fansoun pwe Seirut a maun sefan ngeni i me won ekkewe sonosonoch; iwe nengeni, a akkufu Koriantumer, me asusefani i ngeni nemonun chukun Gilgal.

30 Iwe Koriantumer a maun ngeni Seirut sefan me non nemonun chukun Gilgal, non minne a akkufu Seirut me nieno i.

31 Iwe Seirut a efeiengawa Koriantumer won pechen, iwe ese no maun sefan ren ukukun ru ier, non minne fansoun ekkewe aramas meinisin won unungen ewe fonu ra assuku cha, iwe ese wor emon a akounor