1 Im kiiō eaar jino wōr juon lia eļap ioon aolepān āneo kōnke jero̧wiwi an armej ro, ilo eo, eļan̄n̄e juon armej eaar likūt kein jerbal ko an ak jāje eo an ilo jikin, ak ioon jikin eo ekkar bwe en kar doore ie, lo, ilo raan eo ilju, eaar jab maron̄ lo e, jon̄an ļap in lia eo ioon āneo.

2 Kōn menin aolep em̧m̧aan eaar kanooj dāpij men eo eaar an, kōn pein, im kar jab bidikai im ekar jab kōņaan leļo̧k; im aolep em̧m̧aan eaar likūt wōt jurōn jāje eo an ilo anbwijmaron̄ in, ilo jojomar kōn men ko m̧weien im mour eo an make im an kōrā ro pāleen im ajri ro nejin.

3 Im kiiō, ālikin tōrean in ruo iiō ko, im ālikin mej an Shared, lo, eaar jerkaktok ļeo jatin Shared im eaar leļo̧k pata n̄an Koriantumur, eo ilo e Koriantumur eaar m̧ane e im kar lukwarkwar e n̄an āne jem̧aden eo an Akis.

4 Im ālikin men kein ļeo jatin Shared eaar leļo̧k pata n̄an e ilo āne jem̧aden in Akis; im pata eo eaar kōmetak otem kōmetak, im elōn̄ to̧ujin ko rekar wōtlo̧k jān jāje eo.

5 Im ālikin men kein Koriantumur eaar jepooļe āne jem̧aden eo; im ļeo jatin Shared eaar m̧aajļo̧k jān ilujeen āne jem̧aden eo ilo bon̄, im iabon̄e juon m̧ōttan in jarin tariņae eo an Koriantumur, ke rekar kadek.

6 Im eaar ilo̧k n̄an āneen Moron, im kar likūt e make ioon tūroon eo an Koriantumur.

7 Im ālikin men kein Koriantumur eaar pād ippān jarin tariņae eo an ilo āne jem̧aden kōn tōrean in ruo iiō ko, ko ilo er eaar po eļap kajoor n̄an jarin tariņae eo an.

8 Kiiō ļeo jatin Shared, e etan eaar Giliad, eaar barāinwōt bōk eļap kajoor n̄an jarin tariņae eo an, kōnke kanejnej ittino ko.

9 Im ālikin men kein pris utiej eo an eaar uror e ke eaar jijet ioon tūroon eo an.

10 Im ālikin men kein juon iaan kanejnej ittino ko raar bōk uror e ilo iaļ eo ittino, im bōk n̄an e make aelōn̄ in kiin̄ eo; im etan eaar Lib; im Lib eaar juon em̧m̧aan eineea, eļapļo̧k jān jabdewōt bar em̧m̧aan ilubwiljin aolep armej ro.

11 Im ālikin men kein ilo iiō eo m̧oktata in Lib, Koriantumur eaar wanlōn̄ļo̧k n̄an āneen Moron, im kar leļo̧k pata n̄an Lib.

12 Im ālikin men kein eaar ire ippān Lib, ilo eo Lib eaar den̄ļo̧ke ioon pein jon̄an eaar kinejnej; mekarta, jarin tariņae eo an Koriantumur eaar m̧urm̧ur m̧aanļo̧k ioon Lib, jon̄an eaar ko n̄an tōrerein ko ioon parijet.

13 Im ālikin men kein Koriantumur eaar lukwarkware e; im Lib eaar leļo̧k pata n̄an e ioon parijet.

14 Im ālikin men kein Lib eaar m̧an jarin tariņae eo an Koriantumur, bwe ren bar ko n̄an āne jem̧aden in Akis.

15 Im ālikin men kein Lib eaar lukwarkware e m̧ae eaar itok n̄an meļaaj ko in Akos. Im Koriantumur eaar bōk aolep armej ro ippān ļeo ke eaar ko im̧aan Lib ilo m̧ōttan eo in āneo n̄an ijo eaar ko.

16 Im ke eaar itok n̄an meļaaj ko in Akos eaar leļo̧k pata n̄an Lib, im eaar den̄ļo̧ke e m̧ae an kar mej; mekarta, ļeo jatin Lib eaar itok ņae Koriantumur ilo ijo jikin, im pata eo eaar kanooj bwiltōn̄tōn̄ otem bwiltōn̄tōn̄, ilo eo Koriantumur eaar bar ko im̧aan jarin tariņae eo an ļeo jatin Lib.

17 Kiiō etan ļeo jatin Lib eaar Siz. Im ālikin men kein Siz eaar lukwarkwareļo̧k Koriantumur, im eaar kawōtlo̧k elōn̄ jikin kwelo̧k ko, im eaar m̧an jim̧or kōrā ro im ajri ro, im eaar tile jikin kwelo̧k ko.

18 Im eaar ilo̧k juon lōļn̄o̧n̄ kōn Siz ilo aolepān āneo; aaet, juon kūr eaar ilo̧k iaolepān āneo—Wōn emaron̄ jutak im̧aan jarin tariņae eo an Siz? Lo, ej pooke bwidej eo im̧aan!

19 Im ālikin men kein armej ro rekar jino kukļo̧k ippān doon ilo jarin tariņae ko, iaolepān mejān āneo.

20 Im rekar ajej; im juon m̧ōttan in er eaar koļo̧k n̄an jarin tariņae eo an Siz, im juon m̧ōttan in er eaar ko n̄an jarin tariņae eo an Koriantumur.

21 Im eaar kanooj ļap im to kar pata eo, im ekanooj to jon̄an kōto̧o̧rļo̧k bōtōktōk im ibeebjauwe eo, jon̄an aolepān mejān āneo eaar meno̧kno̧k kōn ānbwin ro remej.

22 Im ekanooj innitōt im m̧ōkaj kar pata eo jon̄an eaar ejjeļo̧k eaar pād n̄an kalbwin ro remej, a rekar ilo̧k jān kōto̧o̧rļo̧k bōtōktōk n̄an kōto̧o̧rļo̧k bōtōktōk, likūti ānbwin ko in jim̧or em̧m̧aan ro, kōrā ro, im ajri ro reeojaļļo̧k ioon mejān āneo, n̄an erom kijen likaakrak ko an ānbwin.

23 Im nām eo eaar ilo̧k ioon mejān āneo, em̧ool ioon aolepān mejān āneo; ijoke armej ro rekar kanooj inepata ilo raan im ilo bon̄, kōnke kar nām eo.

24 Mekarta, Siz eaar jab bōjrak n̄an lukwarkware Koriantumur; bwe eaar kanejnej n̄an idenoņe e make ioon Koriantumur kōn bōtōktōkin ļeo jatin, eo kar m̧an e, im naan eo an Irooj eo eaar itok n̄an Ether bwe Koriantumur en jab wōtlo̧k jān jāje eo.

25 Im āindein jej lo bwe Irooj eaar loļo̧k er ilo dipiio in An illu, im jero̧wiwi ko im mennin jōjō ko aer rekar kōpooj juon iaļ n̄an ko̧kkure eo aer ejjeļo̧k jem̧ļo̧kin.

26 Im ālikin men kein Siz eaar lukwarkware Koriantumur taļo̧k, em̧ool n̄an tōrerein ko iturin parijet, im ijo eaar leļo̧k pata n̄an Siz ilo tōrean in jilu raan ko.

27 Im ekanooj kar nana ko̧kkure eo ilubwiljin jarin tariņae ko an Siz bwe armej ro rekar jino in mijak, im kar jino in ko im̧aan jarin tariņae ko an Koriantumur; im rekar ko n̄an āneen Korior, im m̧anļo̧k armej ro im̧aer, aolepān ro rekar jab kobaļo̧k ippāer.

28 Im rekar kajutak im̧ōn kōppād ko aer ilo kom̧laļ Korior; im Koriantumur eaar kajutak im̧ōn kōppād ko an ilo kom̧laļ in Surr. Kiiō kom̧laļ in Surr eaar epaake toļ Komnor; kōn menin, Koriantumur eaar ainļo̧k aolepān jarin tariņae ko an ippān doon ioon toļ Komnor, im kar kōjan̄ robba eo n̄an jarin tariņae ko an Siz n̄an karuwaineneikļo̧k er n̄an pata.

29 Im ālikin men kein rekar wōnm̧aanļo̧k, a kar bar lukwarkwareļo̧k er; im raar bar itok alen ruo, im kar bar lukwarkwareļo̧k er alen kein karuo. Im ālikin men kein rekar bar itok alen kajilu, im pata eo eaar bwiltōn̄tōn̄ otem bwiltōn̄tōn̄.

30 Im ālikin men kein Siz eaar den̄ļo̧ke Koriantumur bwe eaar leļo̧k n̄an e elōn̄ kinej ko rem̧wilaļ; im Koriantumur, kōnke eaar jako bōtōktōkin, eaar ļotļo̧k, im kar bōkļo̧k āinwōt n̄e eaar mej.

31 Kiiō jako in em̧m̧aan ro, kōrā ro, im ajri ilo aolep jar ko jim̧or eaar kanooj ļap jon̄an Siz eaar jiron̄ armej ro an bwe ren jab lukwarkware jarin tariņae ko an Koriantumur; kōn menin, raar ro̧o̧lļo̧k n̄an kāām eo aer.