ບົດທີ 14
ຄວາມຊົ່ວຮ້າຍຂອງຜູ້ຄົນນຳຄວາມສາບແຊ່ງມາສູ່ແຜ່ນດິນ—ໂຄຣິອານທະເມີເຂົ້າຮ່ວມເຮັດສົງຄາມຕໍ່ຕ້ານກີເລອາດ, ແລ້ວຕໍ່ຕ້ານລິບ, ແລະ ຫລັງຈາກນັ້ນຕໍ່ຕ້ານຊີດ—ເລືອດ ແລະ ການຂ້າຟັນກັນມີຢູ່ທົ່ວແຜ່ນດິນ.
1 ແລະ ບັດນີ້ມັນເລີ່ມມີຄຳ ສາບແຊ່ງອັນໃຫຍ່ຫລວງທົ່ວແຜ່ນດິນ ເພາະຄວາມຊົ່ວຮ້າຍຂອງຜູ້ຄົນ, ຊຶ່ງໃນຄຳສາບແຊ່ງນັ້ນ, ຖ້າຫາກຜູ້ໃດຈະວາງອາວຸດ ຫລື ດາບໄວ້ເທິງຮ້ານ ຫລື ເກັບມ້ຽນໄວ້ບ່ອນທີ່ຕົນເຄີຍເອົາໄວ້, ຈົ່ງເບິ່ງ, ໃນມື້ຕໍ່ມາ, ພວກເຂົາຈະຫາມັນບໍ່ພົບ, ເພາະວ່າຄຳສາບແຊ່ງທົ່ວແຜ່ນດິນນັ້ນໃຫຍ່ຫລວງທີ່ສຸດ.
2 ດັ່ງນັ້ນ ທຸກໆຄົນຈຶ່ງເກັບກຳສິ່ງທີ່ຕົນເປັນເຈົ້າຂອງໄວ້ໃກ້ມື, ແລະ ຈະບໍ່ຢືມຂອງຜູ້ໃດ, ທັງບໍ່ເອົາໃຫ້ຜູ້ໃດຢືມ; ທຸກໆຄົນໄດ້ຈັບດ້າມດາບຂອງຕົນໄວ້ໃນມືຂວາ, ເພື່ອປ້ອງກັນຊັບສົມບັດຂອງຕົນ, ແລະ ຊີວິດຂອງຕົນ ພ້ອມທັງເມຍຂອງຕົນ ແລະ ລູກຂອງຕົນ.
3 ແລະ ບັດນີ້, ຫລັງຈາກສອງປີຜ່ານໄປ, ແລະ ຫລັງຈາກການຕາຍຂອງເຊເຣັດ, ຈົ່ງເບິ່ງ, ນ້ອງຊາຍຂອງເຊເຣັດໄດ້ຍົກທັບມາ ແລະ ລາວໄດ້ສູ້ຮົບກັບໂຄຣິອານທະເມີ, ຊຶ່ງເປັນເຫດໃຫ້ໂຄຣິອານທະເມີໄດ້ຮັບໄຊຊະນະ ແລະ ໄດ້ໄລ່ຕິດຕາມລາວໄປໃນຖິ່ນແຫ້ງແລ້ງກັນດານເອຄິດ.
4 ແລະ ເຫດການໄດ້ບັງເກີດຂຶ້ນຄື ນ້ອງຊາຍຂອງເຊເຣັດໄດ້ສູ້ຮົບກັບລາວຢູ່ໃນຖິ່ນແຫ້ງແລ້ງກັນດານເອຄິດ, ແລະ ການສູ້ຮົບນັ້ນຮ້າຍແຮງທີ່ສຸດ, ແລະ ຄົນເປັນຈຳນວນຫລາຍພັນຄົນໄດ້ລົ້ມຕາຍໄປດ້ວຍດາບ.
5 ແລະ ເຫດການໄດ້ບັງເກີດຂຶ້ນຄື ໂຄຣິອານທະເມີໄດ້ປິດລ້ອມຖິ່ນແຫ້ງແລ້ງກັນດານໄວ້; ແລະ ນ້ອງຊາຍຂອງເຊເຣັດໄດ້ຍົກທັບອອກຈາກຖິ່ນແຫ້ງແລ້ງກັນດານໃນເວລາກາງຄືນ, ແລະ ໄດ້ຂ້າຄົນໃນກອງທັບຂອງໂຄຣິອານທະເມີສ່ວນໜຶ່ງ, ໃນຂະນະທີ່ພວກເຂົາເມົາເຫລົ້າຢູ່.
6 ແລະ ລາວໄດ້ຍົກທັບມາຮອດແຜ່ນດິນໂມຣັນ, ແລະ ໄດ້ຂຶ້ນນັ່ງບັນລັງແທນໂຄຣິອານທະເມີ.
7 ແລະ ເຫດການໄດ້ບັງເກີດຂຶ້ນຄື ໂຄຣິອານທະເມີໄດ້ອາໄສຢູ່ນຳກອງທັບຂອງລາວໃນຖິ່ນແຫ້ງແລ້ງກັນດານເປັນເວລາສອງປີ, ຊຶ່ງເປັນເຫດໃຫ້ລາວໄດ້ຮັບກຳລັງມາໃຫ້ກອງທັບຂອງລາວຫລາຍຂຶ້ນ.
8 ບັດນີ້ນ້ອງຊາຍຂອງເຊເຣັດ, ຊຶ່ງມີຊື່ວ່າ ກີເລອາດ, ກໍໄດ້ຮັບກຳລັງມາໃຫ້ກອງທັບຂອງລາວຫລາຍຂຶ້ນ, ຍ້ອນວ່າການມົ້ວສຸມລັບ.
9 ແລະ ເຫດການໄດ້ບັງເກີດຂຶ້ນຄື ມະຫາປະໂລຫິດຂອງລາວເອງໄດ້ລອບຂ້າລາວໃນຂະນະທີ່ລາວກຳລັງນັ່ງຢູ່ໃນບັນລັງ.
10 ແລະ ເຫດການໄດ້ບັງເກີດຂຶ້ນຄື ຄົນຜູ້ໜຶ່ງຂອງພວກມົ້ວສຸມລັບໄດ້ລອບຂ້າຄົນນັ້ນໃນທາງລັບ; ແລະ ໄດ້ຍຶດເອົາອານາຈັກມາເປັນຂອງຕົນ; ແລະ ລາວມີຊື່ວ່າ ລິບ; ແລະ ລິບເປັນຄົນຮ່າງໃຫຍ່ກວ່າຄົນອື່ນໃນບັນດາຜູ້ຄົນທັງໝົດ.
11 ແລະ ເຫດການໄດ້ບັງເກີດຂຶ້ນຄື ໃນປີທຳອິດຂອງລິບ, ໂຄຣິອານທະເມີໄດ້ຍົກທັບມາຫາແຜ່ນດິນໂມຣັນ ແລະ ໄດ້ສູ້ຮົບກັບລິບ.
12 ແລະ ເຫດການໄດ້ບັງເກີດຂຶ້ນຄື ລາວໄດ້ສູ້ຮົບກັບລິບ, ຊຶ່ງໃນການສູ້ຮົບນັ້ນລິບໄດ້ຟັນແຂນຂອງລາວ ຈົນລາວໄດ້ຮັບບາດເຈັບ; ເຖິງຢ່າງໃດກໍຕາມ, ກອງທັບຂອງໂຄຣິອານທະເມີຍັງໄດ້ມຸ້ງໜ້າເຂົ້າຫາລິບອີກ, ຈົນວ່າລາວໄດ້ປົບໜີໄປເຖິງຊາຍແດນແຄມຝັ່ງທະເລ.
13 ແລະ ເຫດການໄດ້ບັງເກີດຂຶ້ນຄື ໂຄຣິອານທະເມີໄດ້ໄລ່ຕາມລາວໄປ; ແລະ ລິບກໍໄດ້ຕໍ່ສູ້ກັບລາວໃນແຄມຝັ່ງທະເລນັ້ນ.
14 ແລະ ເຫດການໄດ້ບັງເກີດຂຶ້ນຄື ລິບໄດ້ຟາດຟັນກອງທັບຂອງໂຄຣິອານທະເມີ, ຈົນວ່າພວກເຂົາໄດ້ໜີໄປຫາຖິ່ນແຫ້ງແລ້ງກັນດານເອຄິດອີກ.
15 ແລະ ເຫດການໄດ້ບັງເກີດຂຶ້ນຄື ລິບໄດ້ໄລ່ຕາມໂຄຣິອານທະເມີໄປອີກຈົນຮອດທົ່ງພຽງອາກົດ. ແລະ ໂຄຣິອານທະເມີໄດ້ເອົາທຸກຄົນໄປນຳລາວ ຂະນະທີ່ລາວກຳລັງປົບໜີໄປທາງໜ້າລິບ ໄປຍັງແຜ່ນດິນສ່ວນນັ້ນບ່ອນທີ່ລາວໜີໄປ.
16 ແລະ ເວລາລາວໄດ້ມາຮອດທົ່ງພຽງອາກົດແລ້ວ, ລາວກໍໄດ້ສູ້ຮົບກັບລິບ, ແລະ ລາວໄດ້ຟາດຟັນລິບຈົນເຖິງແກ່ຄວາມຕາຍ; ເຖິງຢ່າງໃດກໍຕາມ, ນ້ອງຊາຍຂອງລິບກໍໄດ້ຍົກມາສູ້ຮົບກັບໂຄຣິອານທະເມີເປັນການແກ້ແຄ້ນ, ແລະ ການສູ້ຮົບນັ້ນຮ້າຍແຮງທີ່ສຸດ, ຈົນເຮັດໃຫ້ໂຄຣິອານທະເມີໜີໄປທາງໜ້າກອງທັບຂອງນ້ອງຊາຍຂອງລິບອີກ.
17 ບັດນີ້ນ້ອງຊາຍຂອງລິບມີຊື່ວ່າ ຊີດ. ແລະ ເຫດການໄດ້ບັງເກີດຂຶ້ນຄື ຊີດໄດ້ໄລ່ຕາມໂຄຣິອານທະເມີໄປ, ແລະ ລາວໄດ້ໂຄ່ນລົ້ມຫລາຍຫົວເມືອງ, ແລະ ລາວໄດ້ຂ້າທັງພວກແມ່ຍິງ ແລະ ເດັກນ້ອຍ, ແລະ ໄດ້ເຜົາບ້ານເມືອງຖິ້ມ.
18 ແລະ ຜູ້ຄົນຕະຫລອດທົ່ວແຜ່ນດິນມີຄວາມຢ້ານກົວຊີດ; ແທ້ຈິງແລ້ວ, ມີສຽງຮ້ອງໄປທົ່ວແຜ່ນດິນວ່າ—ຜູ້ໃດຈະສາມາດຢືນຢູ່ຕໍ່ໜ້າກອງທັບຂອງຊີດໄດ້? ຈົ່ງເບິ່ງ, ລາວໄດ້ກວາດລ້າງແຜ່ນດິນທີ່ຢູ່ຕໍ່ໜ້າລາວຈົນໝົດສິ້ນ!
19 ແລະ ເຫດການໄດ້ບັງເກີດຂຶ້ນຄື ຜູ້ຄົນເລີ່ມເຕົ້າໂຮມເຂົ້າກັນເປັນກອງທັບຕະຫລອດທົ່ວຜືນແຜ່ນດິນ.
20 ແລະ ພວກເຂົາໄດ້ແບ່ງແຍກກັນອອກ; ແລະ ສ່ວນໜຶ່ງໄດ້ໜີໄປຫາກອງທັບຂອງຊີດ, ແລະ ອີກສ່ວນໜຶ່ງໄດ້ໜີໄປຫາກອງທັບຂອງໂຄຣິອານທະເມີ.
21 ແລະ ສົງຄາມນັ້ນຮ້າຍແຮງ ແລະ ຍືດເຍື້ອຍາວນານທີ່ສຸດ, ແລະ ພາບຂອງການນອງເລືອດ ແລະ ການຂ້າຟັນກັນນັ້ນມີຢູ່ຢ່າງດົນນານທີ່ສຸດ, ຈົນວ່າທັງຜືນແຜ່ນດິນເຕັມໄປດ້ວຍ ຊາກສົບຂອງຄົນຕາຍ.
22 ແລະ ສົງຄາມໄດ້ເກີດຂຶ້ນຢ່າງວ່ອງໄວ ແລະ ຮີບດ່ວນທີ່ສຸດ ຈົນວ່າບໍ່ມີຜູ້ໃດຢຸດຝັງຊາກສົບເລີຍ, ມີແຕ່ເດີນທັບຕໍ່ໄປຈາກການຂ້າຟັນບ່ອນນີ້ໄປຫາການຂ້າຟັນບ່ອນນັ້ນ, ໂດຍປະຖິ້ມຊາກສົບໄວ້ທັງຊາຍ ແລະ ຍິງ, ແລະ ເດັກນ້ອຍ ໃຫ້ກ່າຍກອງຢູ່ຕາມຜືນແຜ່ນດິນ ເພື່ອໃຫ້ ໂຕໜອນເຈາະກິນ.
23 ແລະ ຊາກສົບໄດ້ສົ່ງກິ່ນເໝັນໄປທົ່ວຜືນແຜ່ນດິນ ເຖິງແມ່ນຕະຫລອດທົ່ວຜືນແຜ່ນດິນ; ດັ່ງນັ້ນ ຜູ້ຄົນຈຶ່ງຖືກລົບກວນທັງກາງເວັນ ແລະ ກາງຄືນເພາະກິ່ນເໝັນນັ້ນ.
24 ເຖິງຢ່າງໃດກໍຕາມ, ຊີດຍັງບໍ່ຢຸດໃນການໄລ່ຕາມໂຄຣິອານທະເມີໄປ; ເພາະວ່າລາວສາບານວ່າ ຈະແກ້ແຄ້ນໂຄຣິອານທະເມີເອງ, ເພື່ອເລືອດຂອງອ້າຍລາວທີ່ຖືກຂ້າຕາຍ, ແລະ ພຣະຄຳຂອງພຣະຜູ້ເປັນເຈົ້າໄດ້ມາຫາອີເທີວ່າ ໂຄຣິອານທະເມີຈະບໍ່ຖືກຂ້າ.
25 ແລະ ພວກເຮົາຈຶ່ງເຫັນດັ່ງນັ້ນວ່າ ພຣະຜູ້ເປັນເຈົ້າໄດ້ສະເດັດມາຢ້ຽມຢາມພວກເຂົາເຫລົ່ານັ້ນໃນຄວາມບໍລິບູນແຫ່ງພຣະພິໂລດຂອງພຣະອົງ, ແລະ ຄວາມຊົ່ວຮ້າຍ ແລະ ຄວາມໜ້າກຽດຊັງນັ້ນໄດ້ຕຽມທາງໄວ້ໃຫ້ຄວາມພິນາດອັນເປັນນິດຂອງພວກເຂົາ.
26 ແລະ ເຫດການໄດ້ບັງເກີດຂຶ້ນຄື ຊີດໄດ້ໄລ່ຕາມໂຄຣິອານທະເມີໄປທາງຕາເວັນອອກ ຈົນມາຮອດຊາຍແດນແຄມຝັ່ງທະເລ, ແລະ ບ່ອນນັ້ນລາວໄດ້ສູ້ຮົບກັບຊີດເປັນເວລາສາມມື້.
27 ແລະ ຄວາມພິນາດໃນບັນດາກອງທັບຂອງຊີດເປັນໜ້າຢ້ານກົວທີ່ສຸດ ຈົນວ່າພວກທະຫານຂອງຊີດເລີ່ມ ຢ້ານຕົກໃຈ, ແລະ ເລີ່ມປົບໜີໄປທາງໜ້າຂອງກອງທັບຂອງໂຄຣິອານທະເມີ; ແລະ ພວກເຂົາໄດ້ແຕກໜີໄປຫາແຜ່ນດິນໂຄຣິຮໍ, ແລະ ໄດ້ກວາດລ້າງຜູ້ອາໄສຢູ່ທັງໝົດທີ່ບໍ່ຍອມເຂົ້າຮ່ວມກັບພວກເຂົາໄປຕໍ່ໜ້າພວກເຂົາ.
28 ແລະ ພວກເຂົາໄດ້ຕັ້ງຜ້າເຕັນຂຶ້ນໃນຮ່ອມພູໂຄຣິຮໍ; ແລະ ໂຄຣິອານທະເມີກໍໄດ້ຕັ້ງຜ້າເຕັນຂອງລາວຂຶ້ນໃນຮ່ອມພູເຊີ. ບັດນີ້ຮ່ອມພູເຊີນັ້ນຕັ້ງຢູ່ໃກ້ກັບເນີນພູຄອມນໍ; ດັ່ງນັ້ນ ໂຄຣິອານທະເມີຈຶ່ງໄດ້ເຕົ້າໂຮມກອງທັບຂອງລາວຢູ່ເທິງເນີນພູຄອມນໍ, ແລະ ໄດ້ເປົ່າແກດັງກ້ອງໄປຫາກອງທັບຂອງຊີດ ເພື່ອເຊື້ອເຊີນພວກເຂົາອອກມາສູ້ຮົບ.
29 ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ອອກມາ, ແຕ່ຖືກຂັບໄລ່ຄືນໄປ; ແລະ ພວກເຂົາໄດ້ຍົກທັບມາເປັນເທື່ອທີສອງ, ແລະ ພວກເຂົາໄດ້ຖືກຂັບໄລ່ຄືນໄປອີກ. ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ຍົກທັບມາອີກເປັນເທື່ອທີສາມ, ແລະ ການສູ້ຮົບນັ້ນຮ້າຍແຮງທີ່ສຸດ.
30 ແລະ ເຫດການໄດ້ບັງເກີດຂຶ້ນຄື ຊີດໄດ້ຟັນໂຄຣິອານທະເມີ ຈົນວ່າລາວມີບາດແຜເລິກຫລາຍບ່ອນ; ແລະ ໂຄຣິອານທະເມີ, ໂດຍທີ່ໄດ້ເສຍເລືອດຫລາຍຈົນວ່າໄດ້ສະຫລົບໄປ, ແລະ ຖືກຫາມໄປຖິ້ມຄືກັບວ່າລາວຕາຍແລ້ວ.
31 ບັດນີ້ການສູນເສຍທັງຜູ້ຊາຍ, ຜູ້ຍິງ ແລະ ເດັກນ້ອຍຂອງສອງຝ່າຍນັ້ນແມ່ນໃຫຍ່ຫລວງທີ່ສຸດ ຈົນວ່າຊີດຕ້ອງສັ່ງໃຫ້ກອງທັບຂອງລາວບໍ່ໃຫ້ໄລ່ຕາມກອງທັບຂອງໂຄຣິອານທະເມີໄປ; ດັ່ງນັ້ນ, ພວກເຂົາຈຶ່ງໄດ້ກັບຄືນໄປຫາຄ້າຍຂອງພວກເຂົາ.