1 ’E i muri a’era, ’ua ora mai Korianetumera i tōna ra mau puta, ’ua ha’amana’o a’era ’oia i te mau parau tā Etera i parau mai iāna ra.

2 ’Ua ’ite a’era ’oia ’e ’ua fātata roa i te piti milioni o tōna mau ta’ata i pohe i te ’o’e, ’e ’ua ha’amata ihora ’oia i te ’oto i roto i tōna ’ā’au ; ’oia ïa, ’ua pohe te mau ta’ata ’aito e piti milioni, ’e tā rātou mau vahine ’e tā rātou mau tamari’i ato’a ho’i.

3 ’Ua ha’amata ihora ’oia i te tātarahapa i te ’ino tāna i rave ; ’ua ha’amata ihora ’oia i te ha’amana’o i te mau parau i parauhia mai e te vaha o te mau peropheta ato’a, ’e ’ua ’ite ’oia ē i tupu mau a’enei te reira, ’aita te hō’ē vāhi iti a’e i ’ore i tupu ; ’e ’ua ’oto ihora tōna vārua ’e ’ua pāto’i ’oia ’ia tāmāhanahanahia.

4 ’E i muri a’era, ’ua pāpa’i ihora ’oia i te hō’ē ’episetole ia Siza ma te hina’aro ’ia fa’aora noa ’oia i te mau ta’ata, ’e i reira e hōro’a atu ’oia i te bāsileia ’ia ora noa te mau ta’ata.

5 ’E i muri a’era, i tō Siza fāri’ira’a i taua ’episetole ra ’ua pāpa’i ihora ’oia i te hō’ē ’episetole ia Korianetumera, i te nā-’ō-ra’a ē, mai te mea e tu’u mai ’oia iāna iho ’ia taparahihia ’oia i tāna iho ’o’e, i reira e fa’aora noa ïa ’oia i te mau ta’ata.

6 ’E i muri a’era, ’aita te mau ta’ata i tātarahapa i tā rātou mau ’ohipa ’ī’ino ; ’e ’ua tupu a’era te riri rahi o te mau ta’ata o Korianetumera i te mau ta’ata o Siza ; ’e ’ua tupu ato’a a’era te riri rahi o te mau ta’ata o Siza i te mau ta’ata o Korianetumera ; nō reira, ’ua ’aro mai ra te mau ta’ata o Siza i te mau ta’ata o Korianetumera.

7 ’E ’ite a’era Korianetumera ’e ’ua fātata roa ’oia i te pau, ’ua horo ’ē fa’ahou atu ra ’oia mai mua atu i te mau ta’ata o Siza.

8 ’E i muri a’era, ’ua haere atu ra ’oia i te mau pape ra o Ripilianekuma, tōna aura’a ’ia ’īritihia, ’oia ho’i, rahi ’e ’aore rā hau atu i te mau mea ato’a ; nō reira, i tō rātou taera’a mai i taua mau pape ra, ’ua fa’ati’a ihora rātou i tō rātou mau ti’ahapa ; ’e ’ua fa’ati’a ato’a ihora Siza i tōna mau ti’ahapa fātata mai ia rātou ; e nō reira, ’ia ao a’era, ’ua ’aro ihora rātou.

9 ’E i muri a’era, ’ua ’aro ihora rātou i te ’arora’a pūai, ’e ’ua puta fa’ahou ihora Korianetumera, ’e ’ua matapōirihia ihora ’oia nō te rahi o tōna toto i pau.

10 ’E i muri a’era, ’ua ’aro pūai atu ra te mau nu’u fa’ehau o Korianetumera i te mau nu’u fa’ehau o Siza ’e ’ua pau ihora rātou, ’e ’ua tītau ihora rātou ia rātou ’ia horo ’ē atu mai mua atu ia rātou ; ’e ’ua horo ’ē atu ra rātou i te pae apato’a, ’e ’ua fa’ati’a ihora rātou i tō rātou mau ti’ahapa i te hō’ē vāhi i parauhia ’o Ogata.

11 ’E i muri a’era, ’ua fa’ati’a ato’a ihora te nu’u fa’ehau o Korianetumera i tō rātou mau ti’ahapa i te pae i pīha’i iho i te ’āivi ra ’o Rama ; ’e ’o teie ato’a te ’āivi tā tō’u metua tāne ra ’o Moromona i huna i te mau pāpa’a parau i te Fatu ra, ’e e mea mo’a ho’i te reira.

12 ’E i muri a’era, ’ua ha’aputuputu ’āmui mai ra rātou i te mau ta’ata ato’a i ni’a i te mau fenua tā’āto’a, ’o tei ’ore i taparahihia, maori rā ’o Etera ana’e.

13 ’E i muri a’era, ’ua ’ite ihora Etera i te mau mea ato’a i ravehia e te mau ta’ata ; ’e ’ua ’ite ’oia ’e ’ua ha’aputuputu ’āmui mai te mau ta’ata o Korianetumera i roto i te nu’u fa’ehau o Korianetumera ; ’e te mau ta’ata o Siza ’ua ha’aputuputu ’āmui ato’a rātou ia rātou i roto i te nu’u fa’ehau o Siza.

14 Nō reira, i roto i te ārea nō te maha matahiti te maoro ’ua ha’aputuputu ’āmui rātou i te mau ta’ata, ’ia roa’a ia rātou te mau ta’ata ato’a i ni’a i te fenua, ’e ’ia roa’a ho’i ia rātou te pūai rahi roa ’o tē ti’a ’ia roa’a mai ia rātou ra.

15 ’E i muri a’era, ’ia oti rātou pā’āto’a i te ha’aputuputuhia mai, te ta’ata tāta’itahi i roto i te nu’u fa’ehau ’o tāna i hina’aro, ’e tā rātou mau vahine ’e tā rātou mau tamari’i—’e ’ua fāri’i te mau tāne, ’e te mau vahine, ’e te mau tamari’i ato’a ho’i i te mau mauha’a tama’i, i te mau pāruru tama’i, ’e te mau pāruru ’ōuma, ’e te mau pāruru upo’o, ’e ’ua fa’a’ahuhia rātou mai te au i te huru nō te ’arora’a—’e i reira ’ua haere atu rātou e ’aro te tahi i te tahi ; ’e ’ua tama’i rātou i taua mahana tā’āto’a ra, ’e ’aita roa te hō’ē pae i vī.

16 ’E i muri a’era, ’ia pō ihora, ’ua rohirohi rātou, ’e ’ua ho’i atu ra i tō rātou mau pūhapara’a ; ’e ’ia tae a’era rātou i tō rātou mau pūhapara’a, ’ua tupu te ’auēra’a ’e te ’oto nō tō rātou mau ta’ata i pohe i te taparahihia ; ’e nō te rahi o tā rātou mau ta’i, ’e tā rātou mau auēra’a, ’e te mau ’oto, i mahae roa ai te reva nei.

17 ’E i muri a’era, ’ia ao a’era, ’ua haere fa’ahou atu ra rātou nō te ’aro, ’e e mahana rahi ’e te ri’ari’a te reira ; noa atu rā i te reira, ’aita roa rātou i vī, ’e ’ia tae mai te pō, ’ua hahae fa’ahou rātou i te reva i tā rātou mau ta’i, ’e tā rātou mau ’auēra’a, ’e tā rātou mau ’otora’a, nō tō rātou mau ta’ata i pohe i te taparahihia.

18 ’E i muri a’era, ’ua pāpa’i fa’ahou ihora Korianetumera i te hō’ē ’episetole ia Siza, ma te tītau iāna, ’eiaha ’oia e haere fa’ahou mai nō te ’aro, ’ia rave atu rā ’oia i te bāsileia ’e ’ia fa’aora noa i te mau ta’ata.

19 Inaha rā, ’ua fa’aea te Vārua o te Fatu i te tūtava ’e ’o rātou, ’e ’ua rahi roa tō Sātane mana i ni’a i te ’ā’au o te mau ta’ata, i vaiihohia ai te mau ta’ata i te ’eta’eta o tō rātou iho ’ā’au ’e i te pōiri o tō rātou mau mana’o ’ia ha’amouhia rātou ; nō reira ’ua haere fa’ahou atu rātou nō te ’aro.

20 ’E i muri a’era, ’ua tama’i rātou i taua mahana tā’āto’a ra, ’e ’ia tae mai te pō, ’ua ta’oto ihora rātou i ni’a iho i tā rātou mau ’o’e.

21 ’E ’ia po’ipo’i a’era, ’ua tama’i noa rātou ē tae noa atu i te pō.

22 ’E ’ia tae mai te pō ’ua ta’ero roa rātou i te riri, mai te hō’ē ta’ata i ta’ero i te uaina ra ; ’e ’ua ta’oto fa’ahou ihora rātou i ni’a iho i tā rātou mau ’o’e.

23 ’E ’ia po’ipo’i a’era, ’ua tama’i fa’ahou atu ra rātou ; ’e ’ia tae mai te pō, ’ua pau roa rātou ato’a i te ’o’e, maori rā te mau ta’ata e pae ’ahuru ’e ma piti o Korianetumera, ’e te mau ta’ata e ono ’ahuru ’e ma iva o Siza.

24 ’E i muri a’era, ’ua ta’oto ihora rātou i ni’a iho i tā rātou mau ’o’e i taua pō ra, ’e ’ia po’ipo’i a’era, ’ua tama’i fa’ahou atu ra rātou, ’e ’ua tama’i rātou ma tō rātou pūai ’e ma te fa’a’ohipa i tā rātou mau ’o’e ’e tā rātou mau pāruru tama’i i taua mahana tā’āto’a ra.

25 ’E ’ia tae mai te pō, ’ua toe mai tō Siza ’e toru ’ahuru ’e ma piti mau ta’ata, ’e tō Korianetumera e piti ’ahuru ’e ma hitu mau ta’ata.

26 ’E i muri a’era, ’ua tāmā’a ihora rātou ’e ’ua ta’oto ihora, ’e ’ua fa’aineine ia rātou iho nō te pohe ’ia po’ipo’i a’e. E mau ta’ata rarahi rātou ’e te ’aito mai te pūai o te ta’ata nei.

27 ’E i muri a’era, ’ua tama’i atu ra rātou nō te ārea e toru hora te maoro, ’e ’ua matapōirihia rātou nō te rahi o te toto i pau i te tahe.

28 ’E i muri a’era, i te roa’ara’a i te mau ta’ata o Korianetumera te pūai e ti’a ai ia rātou ’ia haere, ’e ’ua fātata ho’i rātou i te horo nō te pāruru i tō rātou iho ora, inaha rā, ’ua ti’a mai ra Siza ’e tōna ra mau ta’ata i ni’a, ’e ’ua tapu ihora ’oia i roto i tōna riri ’ū’ana ē e taparahi ’oia ia Korianetumera, ’e ’aore rā e pohe roa ’oia i te ’o’e.

29 Nō reira, ’ua a’ua’u ’oia ia rātou, ’e ’ia po’ipo’i a’era, ’ua ro’ohia ihora rātou iāna ; ’e ’ua tama’i fa’ahou ihora rātou i te ’o’e. ’E i muri a’era, ’ia pau a’era rātou pā’āto’a i te ’o’e, maori rā ’o Korianetumera rāua ’o Siza ana’e, ’e inaha, ’ua matapōirihia ’o Siza nō te pau rahi o te toto i te tahe.

30 ’E i muri a’era, i muri iho i tō Korianetumera tūru’ira’a i ni’a i tāna ’o’e ’ia maha ri’i te rohirohi, ’ua tāpū fa’ata’a ’ē ihora ’oia i te upo’o o Siza.

31 ’E i muri a’era, i muri iho i tōna tāpū-fa’ata’a-’ē-ra’a i te upo’o o Siza, ’ua ti’a ri’i a’era Siza i ni’a i tōna nā rima ’e ’ua topa ihora ; ’e i muri iho i tōna tāmatara’a ’ia roa’a te aho, ’ua pohe ihora ’oia.

32 ’E i muri a’era, ’ua ma’iri ihora Korianetumera i raro i te repo, ’e ’ua riro ihora ’oia mai te mea ra ē, ’aore tōna e ora.

33 ’E ’ua parau mai ra te Fatu ia Etera, ’e ’ua nā ’ō mai ra iāna : ’A haere atu. ’E ’ua haere atu ra ’oia ’e ’ua ’ite a’era ’oia ē, ’ua tupu mau tā te Fatu ra mau parau ; ’e ’ua fa’aoti a’era ’oia i tāna ra pāpa’a parau ; (’e ’aita vau i pāpa’i i te hō’ē a’e tufa’a nō te hānerera’a) ’e ’ua huna ihora ’oia i te reira i te vāhi e ’itehia ai e te mau ta’ata o Limehi ra.

34 I teienei, teie te mau parau hope’a i pāpa’ihia e Etera : Mai te mea noa atu ē tē hina’aro ra te Fatu ’ia fa’ahuru-’ē-hia vau, ’e ’aore rā tē hina’aro ra ’oia ’ia pohe au i te tino nei, ’aita e pe’ape’a nō te reira, ’ia fa’aorahia ra vau i roto i te bāsileia o te Atua ra. ’Āmene.