Lix Hu laj Eter

1 Ut anajwan laa’in, aj Moroni, nin’ok chixk’eeb’al jun esilal chirixeb’ a’an li ke’wan chaq najter, li ke’sache’ chaq xb’aan ruq’ li Qaawa’ chiru lix b’een li ch’och’ a’in sa’ xnim li saq’e.

2 Ut nawisi chaq li esil nink’e sa’ li kaahib’ xka’k’aal perel chi ch’iich’ oor li ke’tawe’ xb’aan lix tenamit laj Limhi, a’an lix Hu laj Eter xk’ab’a’.

3 Ut jo’ nink’oxla naq li xb’een raqal re li tz’iib’anb’il esil a’in, li na’aatinak chirix lix yo’ob’tesinkil li ruchich’och’, ut chirix ajwi’ laj Adan, ut jun esilal chalen chaq sa’ li kutan a’an toj sa’ li najt xteramil kab’l, ut jo’ k’ihal li k’a’aq re ru kik’ulman sa’ xyanqeb’ li ralal xk’ajoleb’ li winq toj sa’ li kutan a’an, ak natawman sa’ xyanqeb’ laj Judio—

4 Chi jo’kan moko nintz’iib’a ta li k’a’aq re ru kik’ulman chalen chaq sa’ xkutankil laj Adan toj sa’ li kutan a’an; a’ut natawman chiruheb’ li perel ch’iich’; ut ani natawok re, a’an ajwi’ taak’ehe’q xwankil re taaruuq tixk’ul li esilal chi tz’aqal.

5 A’b’an k’ehomaq reetal, ink’a’ nink’e li esilal chi tz’aqal; jun raqal b’an li esilal nink’e, chalen chaq sa’ li najt xteramil kab’l toj reetal naq ke’sache’.

6 Ut jo’ka’in naq nink’e li esilal. Li kitz’iib’ank re li esil a’in, a’an laj Eter, ut a’an chaq ralal xk’ajol laj Koriantor.

7 Laj Koriantor ralal chaq laj Moron.

8 Ut laj Moron ralal chaq laj Etem.

9 Ut laj Etem ralal chaq laj Ahah.

10 Ut laj Ahah ralal chaq laj Set.

11 Ut laj Set ralal chaq laj Xiblon.

12 Ut laj Xiblon ralal chaq laj Kom.

13 Ut laj Kom ralal chaq laj Koriantum.

14 Ut laj Koriantum ralal chaq laj Amnigaddah.

15 Ut laj Amnigaddah ralal chaq laj Aaron.

16 Ut laj Aaron ralal xk’ajol chaq laj Het, a’an ralal chaq laj Heartom.

17 Ut laj Heartom ralal chaq laj Lib.

18 Ut laj Lib ralal chaq laj Kix.

19 Ut laj Kix ralal chaq laj Korom.

20 Ut laj Korom ralal chaq laj Levi.

21 Ut laj Levi ralal chaq laj Kim.

22 Ut laj Kim ralal chaq laj Morianton.

23 Ut laj Morianton ralal xk’ajol chaq laj Riplakix.

24 Ut laj Riplakix ralal chaq laj Xez.

25 Ut laj Xez ralal chaq laj Het.

26 Ut laj Het ralal chaq laj Kom.

27 Ut laj Kom ralal chaq laj Koriantum.

28 Ut laj Koriantum ralal chaq laj Emer.

29 Ut laj Emer ralal chaq laj Omer.

30 Ut laj Omer ralal chaq laj Xuul.

31 Ut laj Xuul ralal chaq laj Kib.

32 Ut laj Kib ralal chaq laj Orihah, a’an ralal chaq laj Jared;

33 Ut laj Jared a’an kichal chaq rochb’een li ras ut eb’ lix junkab’al, rochb’een junjunq chik ut lix junkab’aleb’ a’an, sa’ li najt xteramil kab’l, sa’ li kutan naq li Qaawa’ kixsach raatinob’aaleb’ li tenamit, ut kixxaqab’ aatin sa’ xjosq’il naq te’jek’imanq chiru chixjunil li xb’een li ch’och’; ut jo’ chanru li raatin li Qaawa’ ke’jek’iman li tenamit.

34 Ut li ras laj Jared, rik’in naq a’an jun winq nim ut kaw xmetz’ew, ut jun li winq q’axal usilanb’il xb’aan li Qaawa’, laj Jared, li riitz’in, kixye re: Elajin chiru li Qaawa’, re naq ink’a’ tixsach qana’leb’ ut ink’a’ raj taaruuq taqataw ru li qaatin.

35 Ut kik’ulman naq li ras laj Jared ki’elajin chiru li Qaawa’, ut li Qaawa’ kixtoq’ob’a ru laj Jared; jo’kan naq ink’a’ kixsach li raatinob’aal laj Jared, ut laj Jared ut li ras ink’a’ ke’sache’ xna’leb’.

36 Toja’ naq laj Jared kixye re li ras: Elajin chiru li Qaawa’, ut maare taa’uxq naq tixsutq’isi chaq lix josq’il sa’ xb’eeneb’ li neke’ochb’eenink qe, re naq ink’a’ tixsach raatinob’aaleb’.

37 Ut kik’ulman naq li ras laj Jared ki’elajin chiru li Qaawa’, ut li Qaawa’ kixtoq’ob’aheb’ ru li ke’ochb’eenink reheb’ ut jo’kan ajwi’ lix junkab’aleb’, jo’kan naq ink’a’ ke’sache’ xna’leb’.

38 Ut kik’ulman naq laj Jared kiraatina wi’chik li ras, ut kixye: Ayu ut patz’ re li Qaawa’ ma toorisi chaq sa’ li ch’och’, ut wi toorisi chaq sa’ li ch’och’, elajin chiru b’ar tooxik. Ut ani nanawok re ma ink’a’ tooxk’am li Qaawa’ sa’ jun li ch’och’ li sik’b’il ru sa’ xb’een chixjunil li ch’och’? Ut wi taa’uxq chi jo’kan, tiikaqo chixpaab’ankil li Qaawa’, re taaruuq taqak’ul choq’ qeechanihom.

39 Ut kik’ulman naq li ras laj Jared ki’elajin chiru li Qaawa’ jo’ chanru li k’a’ru yeeb’il chaq xb’aan xtz’uumal re laj Jared.

40 Ut kik’ulman naq li Qaawa’ kirab’i li ras laj Jared, ut kixtoq’ob’a ru, ut kixye re:

41 Ayu ut ch’utub’eb’ laa ketomq, li teelom jo’ ajwi’ li ixqi xul, re li jar paay wan; ut jo’kan ajwi’ xkomon li riyajil li ch’och’ li jar paay wan; ut eb’ laa junkab’al; ut jo’kan ajwi’ laj Jared laa wiitz’in ut lix junkab’al, ut jo’kaneb’ ajwi’ li neke’ochb’eenink aawe ut lix junkab’aleb’, ut li neke’ochb’eenink re laj Jared ut lix junkab’aleb’.

42 Ut naq ak xab’aanu a’in tatkub’eeq sa’ xjolomileb’ sa’ li ru taq’a li wan sa’ xjayal lix nim li saq’e. Ut aran tatink’ul, ut tinxik chawu sa’ jun ch’och’ li sik’b’il ru sa’ xb’een chixjunileb’ li ch’och’ sa’ li ruchich’och’.

43 Ut aran tatwosob’tesi laa’at ut laa wiyajil, ut tinwaklesi choq’ we sa’ xyanqeb’ chaq laa wiyajil, ut li riyajil laa wiitz’in, ut eb’ li te’xik chawix, jun nimla tenamit. Ut maajun chik nimaq wi’chik ru chiru li tenamit li tinwaklesi chaq choq’ we sa’ xyanq laa wiyajil, chiru chixjunil lix b’een li ch’och’. Ut chi jo’kan tinb’aanu aawe xb’aan naq chiru li k’iila kutan a’in kat-elajin chiwu.