1 ’E i muri a’era, ’ua haere atu ra Iareda ’e tōna taea’e, ’e tō rāua nā ’utuāfare, ’e te mau hoa o Iareda ’e tō tōna taea’e, ’e tō rātou mau ’utuāfare i raro i te peho i te pae apato’erau, (’e te i’oa o taua peho ra ’o Nimeroda ïa, ’oia te i’oa o te ta’ata a’ua’u ’ānimara rahi) ’e tā rātou mau nana ’o tā rātou i ha’aputuputu ’āmui ra, te oni ’e te ufa nō te mau huru ’ānimara ato’a ra.

2 ’E ’ua tu’u ato’a rātou i te mau mārei ’e ’ua noa’a te mau manu o te reva, ’e ’ua hāmani rātou i te hō’ē fāri’i nō te hōpoi nā muri ia rātou i te mau i’a nō roto mai i te mau pape.

3 ’E ’ua hōpoi ato’a rātou nā muri iho ia rātou i te desereta, tōna aura’a ’ia ’īritihia, e manu hāmani meli ; ’e ’ua nā reira rātou i te hōpoi atu i te mau manu hāmani meli, ’e te mau huru mea ato’a i ni’a i te fenua nei, ’e te mau huru huero ato’a.

4 ’E i muri a’era, ’ia tae a’era rātou i raro i te peho ra o Nimeroda, ’ua pou mai ra te Fatu ’e ’ua paraparau mai ra i te taea’e o Iareda ; ’e tei roto ho’i ’oia i te hō’ē ata, ’e ’aita te taea’e o Iareda i ’ite atu iāna.

5 ’E i muri a’era, ’ua fa’aue mai ra te Fatu ia rātou ’ia haere atu i roto i te mēdēbara, ’oia ïa, i te vāhi ’aore roa i taehia na e te ta’ata. ’E i muri a’era, ’ua haere atu te Fatu nā mua ia rātou, ’e ’ua paraparau mai ’oia ia rātou ’a ti’a noa ai ’oia i roto i te hō’ē ata, ’e ’ua fa’a’ite mai ia rātou i te vāhi tā rātou e haere atu.

6 ’E i muri a’era, ’ua haere atu ra rātou i roto i te mēdēbara, ’e ’ua hāmani ihora i te mau pahī, ’e ’ua tere atu nā ni’a i te mau pape e rave rahi, ma te arata’i-tāmau-hia e te rima o te Fatu.

7 ’E ’aita te Fatu i fa’ati’a ia rātou ’ia tāpe’a i te tahi atu pae o te miti i roto i te mēdēbara, ’ua hina’aro rā ’oia ’ia haere roa atu rātou i te fenua i fafauhia ra, ’o tei hau atu i te maita’i i te tahi atu mau fenua ato’a, ’e ’o tei fa’ahereherehia e te Fatu te Atua nō te hō’ē nūna’a parauti’a.

8 ’E ’ua tapu ho’i ’oia i te taea’e o Iareda i roto i tōna riri ’ū’ana ē, e mea ti’a roa i te mau ta’ata ’o tē fāri’i i teie nei fenua fafauhia, ’ia tāvini iāna, te Atua hō’ē roa ’e te parau mau, mai taua taime ra ē a muri noa atu, ’e mai te mea ’aita ra, e tāpū-’ē-hia atu ïa rātou i te taime e tae mai ai te ’īra’a nō tōna riri ’ū’ana i ni’a iho ia rātou.

9 ’E i teienei, tē ’ite nei tātou i te mau fa’auera’a mana a te Atua nō ni’a i teie nei fenua, ’oia ho’i e fenua fafauhia ; ’e e mea ti’a roa i te nūna’a ’o tē pārahi i ni’a i teie nei fenua ’ia tāvini i te Atua, ’e mai te mea ’aita ra, e tāpū-’ē-hia ïa rātou i te taime e tae mai ai te ’īra’a nō tōna riri ’ū’ana i ni’a iho ia rātou. ’E e tae mai te ’īra’a nō tōna riri ’ū’ana i ni’a ia rātou i te taime ’ua ’ī roa rātou i te mau ’ohipa ’ī’ino.

10 Inaha ho’i, ’ua hau atu teie fenua i te maita’i i te tahi atu mau fenua ato’a ; nō reira ’o ’oia ’o tē pārahi i ni’a i teie fenua e mea ti’a roa iāna ’ia tāvini i te Atua, ’e mai te mea ’aita ra, e tāpū-’ē-hia ïa ’oia ; e fa’auera’a mana mure ’ore teie nā te Atua. ’E ’aita rātou e tāpū-’ē-hia ē tae roa ’ua ’ī roa te mau ’ohipa ’ī’ino i rotopū i te mau tamari’i o te fenua nei.

11 ’E e tae mai teie nei parau ia ’outou, e te mau ’Ētene ē, ’ia ’ite ’outou i te mau fa’auera’a mana a te Atua—’ia tātarahapa ’outou, ’e ’ia ’ore ’outou ’ia tāmau noa i roto i tā ’outou mau ’ohipa ’ī’ino ē tae noa atu i te ’īra’a nō te reira, ’ia ’ore ’outou ’ia fa’atae mai i te ’īra’a nō te riri ’ū’ana o te Atua i ni’a iho ia ’outou, mai tā te feiā o te fenua i te ’anotau i ma’iri i nā reira.

12 Inaha, e fenua maita’i roa teie, ’e te nūna’a e pārahi i ni’a i teie nei fenua, e riro rātou ’ei feiā ti’amā i te tāvinira’a, ’e i te fa’atītīra’a, ’e i te mau nūna’a ato’a i raro a’e i te ra’i, mai te mea e tāvini rātou i te Atua o te fenua, ’oia ho’i ’o Iesu Mesia, ’o tei fa’a’itehia mai nā roto i te mau mea tā mātou i pāpa’i.

13 ’E i teienei, e pāpa’i ā vau i tā’u nei pāpa’a parau ; inaha ho’i, i muri a’era, ’ua arata’i mai te Fatu ia Iareda ’e tōna ra mau taea’e i te miti rahi i fa’ata’a ’ē i nā fenua ra. ’E ’ia tae a’era rātou i te miti rahi ra, ’ua fa’ati’a ihora rātou i tō rātou mau ti’ahapa ; ’e ’ua ma’irihia ihora rātou i te i’oa o taua vāhi ra ’o Morianekumera ; ’e ’ua pārahi noa ihora rātou i roto i te mau ti’ahapa, ’e ’ua pārahi noa rātou i roto i te mau ti’ahapa i tahatai nō te ārea e maha matahiti te maoro.

14 ’E i muri a’era, i te hope’a nō nā matahiti e maha ra, ’ua fā fa’ahou mai ra te Fatu i te taea’e o Iareda, ’e ’ua ti’a noa mai ra ’oia i roto i te hō’ē ata ’e ’ua paraparau mai ra iāna. ’E nō te ārea e toru hora te maoro ’ua paraparau noa mai te Fatu i te taea’e o Iareda, ’e ’ua ’avau mai ra iāna nō te mea ’aore ’oia i ha’amana’o ’ia ti’aoro atu i te i’oa o te Fatu.

15 ’E ’ua tātarahapa ihora te taea’e o Iareda i te ’ohipa ’ino tāna i rave, ’e ’ua ti’aoro atu ra i te i’oa o te Fatu nō tōna ra mau taea’e i pīha’i iho iāna ra. ’E ’ua parau mai ra te Fatu iāna : E fa’a’ore au i tā ’oe ra mau hara ’e i te mau hara a tō ’oe ra mau taea’e ; ’eiaha rā ’outou e hara fa’ahou, ’a ha’amana’o ho’i ’outou ē, e ’ore roa tō’u Vārua e tūtava noa ’e te ta’ata nei ē a muri noa atu ; nō reira, ’ia rave ’outou i te hara ē tae noa atu ’ua ’ī roa ’outou i te reira, e tāpū-’ē-hia ïa ’outou i te aro o te Fatu ra. ’E teie tō’u mau mana’o nō ni’a i te fenua ’o tā’u e hōro’a atu ’ei ’āi’a nō ’outou ; ’e e riro ho’i te reira ’ei fenua hau roa i te maita’i i te tahi atu mau fenua ato’a.

16 ’E ’ua parau mai ra te Fatu : ’A haere ’outou ’e ’a hāmani i te tahi mau pahī mai tā ’outou i hāmani na. ’E i muri a’era, ’ua haere atu ra te taea’e o Iareda nō te rave i te ’ohipa, ’e tōna mau taea’e ato’a, ’e ’ua hāmani ihora rātou i te mau pahī mai te au i tā rātou i hāmani na, mai te au ho’i i tā te Fatu ra mau ha’api’ira’a. ’E e mea hu’a te reira, ’e e mea huru māmā ho’i i ni’a i te pape, mai te māmā o te manu pererau i ni’a iho i te pape ra.

17 ’E ’ua hāmanihia te reira ’ei mea piri maita’i roa, ’e ’ia fāri’i ho’i i te pape mai te ’āu’a ra te huru ; ’e te rarora’a ra e mea piri ïa mai te ’āu’a ra te huru ; ’e nā pae ra e mea piri ato’a ïa mai te ’āu’a ra te huru ; ’e nā hope’a ra e mea huru ’oe’oe ïa ; ’e te tahua i ni’a ra e mea piri ïa mai te ’āu’a ra te huru ; ’e te roara’a ra e au ïa i te roara’a o te hō’ē tumu rā’au ; ’e te ’ōpani ra ’ia ’ōpanihia ra, e mea piri ïa mai te ’āu’a ra te huru.

18 ’E i muri a’era, ’ua ti’aoro atu ra te taea’e o Iareda i te Fatu, i te nā-’ō-ra’a ē : E te Fatu, ’ua rave au i te ’ohipa tā ’oe i fa’aue mai, ’e ’ua hāmani au i te mau pahī mai tā ’oe i parau mai iā’u ra.

19 ’E inaha, e te Fatu, ’aita e mōrī tō roto i teie mau pahī, e nāhea mātou i te fa’atere ? ’E e pohe ho’i mātou nō te mea ’aita e ti’a ia mātou ’ia huti i te aho, maori rā i te mata’i ana’e i roto i te mau pahī, nō reira e pohe roa mātou.

20 ’E ’ua parau mai ra te Fatu i te taea’e o Iareda : Inaha, e hāmani ’oe i te hō’ē ’āpo’o i te tahua i ni’a o te pahī, ’e i te rarora’a ato’a, ’e ’ia pau tō ’oe aho e ’īriti ’oe i te ’ōrei o te ’āpo’o ’ia roa’a mai te mata’i. ’E mai te mea e tahe mai te pape i ni’a ia ’oe, inaha, e ’ōrei ’oe i te ’āpo’o, ’ia ’ore ’outou ’ia pohe i roto i te miti ra.

21 ’E i muri a’era, ’ua nā reira ihora te taea’e o Iareda, mai tā te Fatu i fa’aue mai ra.

22 ’E ’ua ti’aoro fa’ahou atu ra ’oia i te Fatu, i te nā-’ō-ra’a ē : E te Fatu, inaha, ’ua rave au mai tā ’oe i fa’aue mai iā’u ra ; ’e ’ua fa’aineine au i te mau pahī nō tō’u ra mau ta’ata, ’e inaha, ’aita e māramarama tō roto i te mau pahī. Inaha, e te Fatu, e vaiiho ānei ’oe ia mātou ’ia haere i terā pae mai i teie pape rahi i roto i te pōiri ?

23 ’E ’ua parau mai ra te Fatu i te taea’e o Iareda : E aha tā ’oe i hina’aro iā’u ’ia rave ’ia roa’a mai te māramarama i roto i tō ’outou mau pahī ? Inaha ho’i, ’aita e ti’a ia ’outou ’ia hāmani i te mau ha’amāramarama, e hu’ahu’a roa ho’i te reira ; ’eiaha ato’a ’outou e ’āfa’i i te auahi nā muri ia ’outou, e’ita ho’i ’outou e haere ma te māramarama o te auahi.

24 Inaha ho’i, e riro tō ’outou mau pahī mai te tohorā i raro i te moana ra ; ’e e fati pūai mai ho’i te mau ’are miti mai te mou’a te teitei i ni’a iho ia ’outou na. ’Āre’a rā, e ’āfa’i fa’ahou mai au ia ’outou i ni’a mai raro mai i te mau vāhi hōhonu o te moana ra ; ’e ’ua reva atu ho’i te mau mata’i nō roto atu i tō’u nei vaha, ’e ’ua tu’u atu vau i te mau ua ’e te mau pape pu’e ra.

25 ’E inaha, tē fa’aineine nei au ia ’outou nō taua mau mea nei ; ’e ’aita roa e ti’a ia ’outou ’ia haere atu i terā pae mai o teie nei pape rahi, maori rā ’ia pāruru vau ia ’outou i te mau ’are o te miti ra, ’e i te mau mata’i i reva atu na, ’e i te mau pape pu’e ’o tē haere mai ra. Nō reira, e aha tā ’oe e hina’aro iā’u ’ia rave nō te fa’aineine ia ’outou ’ia roa’a mai te māramarama i te taime ’outou e horomi’ihia ai i roto i te mau vāhi hōhonu o te moana ra ?