1 Mo nao mi, Moronae, mi bin raetemdaon ol toktok we Lod i givim oda long mi blong raetemdaon, folem memori blong mi; mo mi bin talem long yufala ol samting we mi bin silim; from hemia, no tajem olgeta, blong yu save transletem; from mi blokem samting ia long yu, be afta nomo, taem bae God i luk se hemia i wan waes tingting.

2 Mo luk, bae yu save gat janis blong soem ol buk ia long olgeta we bae oli help blong karem wok ia i kam;

3 Mo bae oli soemaot olgeta long trifala tru long paoa blong God; taswe, bae oli save stret, se ol samting ia oli tru.

4 Mo tru long maot blong trifala witnes, bae ol samting ia oli stanap; mo testemoni blong trifala, mo wok ia, we tru long hem bae oli soemaot paoa blong God, mo tu, toktok blong hem, we Papa, mo Pikinini, mo Tabu Spirit i witnesem—mo evri samting ia bae i stap olsem wan testemoni agensem wol long las dei.

5 Mo sapos i olsem se oli sakem sin mo kam long Papa long nem blong Jisas, bae oli akseptem olgeta long kingdom blong God.

6 Mo nao, sapos mi no gat eni raet long ol samting ia, yufala i jajem, from bae yufala i save se mi mi gat raet ia, taem we bae yufala i luk mi, mo bae yumi stanap long fored blong God long las dei. Amen.