ບົດທີ 5
ພະຍານສາມຄົນ ແລະ ຜົນງານເອງຈະຢືນເປັນປະຈັກພະຍານເຖິງຄວາມຈິງອັນສົມບູນຂອງພຣະຄຳພີມໍມອນ.
1 ແລະ ບັດນີ້ຂ້າພະເຈົ້າໂມໂຣໄນໄດ້ຂຽນຂໍ້ຄວາມຊຶ່ງຂ້າພະເຈົ້າໄດ້ຮັບບັນຊາ, ຕາມຄວາມຈື່ຈຳຂອງຂ້າພະເຈົ້າ; ແລະ ຂ້າພະເຈົ້າໄດ້ບອກທ່ານແລ້ວກ່ຽວກັບເລື່ອງທີ່ຂ້າພະເຈົ້າໄດ້ ຜະນຶກໄວ້; ສະນັ້ນ ຢ່າໄດ້ແຕະຕ້ອງມັນເລີຍເພື່ອຈະແປ ເພາະວ່າທ່ານຖືກຫ້າມຈາກສິ່ງເຫລົ່ານັ້ນ, ເວັ້ນເສຍແຕ່ມັນຈະເປັນໄປໂດຍຄວາມສະຫລຽວສະຫລາດຂອງພຣະເຈົ້າໃນເວລາຕໍ່ໄປ.
2 ແລະ ຈົ່ງເບິ່ງ, ທ່ານອາດຈະໄດ້ຮັບສິດທິພິເສດເພື່ອຈະໄດ້ສະແດງແຜ່ນຈາລຶກແກ່ ຄົນເຫລົ່ານັ້ນຜູ້ທີ່ຈະຊ່ວຍນຳວຽກງານນີ້ອອກມາ;
3 ແລະ ຈະສະແດງຕໍ່ຄົນ ສາມຄົນໂດຍອຳນາດຂອງພຣະເຈົ້າ; ດັ່ງນັ້ນ ພວກເພິ່ນຈຶ່ງຈະ ຮູ້ຈັກເຖິງຄວາມແນ່ນອນວ່າ ສິ່ງເຫລົ່ານີ້ເປັນ ຄວາມຈິງ.
4 ແລະ ດ້ວຍປາກຂອງ ພະຍານສາມຄົນ ສິ່ງເຫລົ່ານີ້ຈະຖືກສະຖາປະນາຂຶ້ນ; ແລະ ປະຈັກພະຍານຂອງສາມຄົນ, ແລະ ວຽກງານນີ້ ຊຶ່ງເປັນວຽກງານທີ່ຈະສະແດງເຖິງອຳນາດຂອງພຣະເຈົ້າ ແລະ ຄຳຂອງພຣະອົງອີກ, ອັນເປັນສິ່ງທີ່ພຣະບິດາ, ແລະ ພຣະບຸດ, ແລະ ພຣະວິນຍານບໍລິສຸດເປັນພະຍານ—ແລະ ທັງໝົດນີ້ ຈະຢູ່ເປັນປະຈັກພະຍານກ່າວໂທດໂລກໃນວັນສຸດທ້າຍ.
5 ແລະ ຖ້າຫາກເປັນໄປວ່າ ພວກເຂົາກັບໃຈ ແລະ ເຂົ້າ ມາຫາພຣະບິດາໃນພຣະນາມຂອງພຣະເຢຊູ, ພວກເຂົາຈະຖືກຮັບເຂົ້າໃນອານາຈັກຂອງພຣະເຈົ້າ.
6 ແລະ ບັດນີ້, ຖ້າຫາກຂ້າພະເຈົ້າບໍ່ມີສິດອຳນາດໃນສິ່ງເຫລົ່ານີ້ແລ້ວ, ທ່ານຈົ່ງຕັດສິນເຖີດ; ເພາະວ່າທ່ານຈະຮູ້ຈັກວ່າ ຂ້າພະເຈົ້າມີສິດອຳນາດເວລາທ່ານເຫັນຂ້າພະເຈົ້າ, ແລະ ພວກເຮົາຈະຢືນຢູ່ຕໍ່ພຣະພັກຂອງພຣະເຈົ້າໃນວັນສຸດທ້າຍ. ອາແມນ.