1 Ut anajwan laa’in, aj Moroni, nin’ok wi’chik chixtz’iib’ankil resil laj Jared ut li ras.

2 Xb’aan naq kik’ulman chirix naq li Qaawa’ kixkawresiheb’ li pek li kixk’am li ras laj Jared chiru li tzuul, li ras laj Jared kikub’e chaq chiru li tzuul, ut kixk’eheb’ li pek sa’eb’ li jukub’ li kawresinb’ileb’, jun sa’ xka’pak’alil li ru’uj; ut k’ehomaq reetal, ke’xk’e xsaqenkileb’ li jukub’.

3 Ut chi jo’kan li Qaawa’ kixk’eheb’ li pek chi lemtz’unk sa’ q’ojyin, re xk’eeb’al li saqen reheb’ li winq, li ixq, ut li kok’al, re naq ink’a’ te’xq’ax ru li ninqi ha’ sa’ q’ojyin.

4 Ut kik’ulman naq chirix naq ke’xkawresi li k’iila paay chi tzakemq, re naq rik’in a’an taaruuq taawanq k’a’ru te’xtzeka chiru li ha’, ut tzakemq ajwi’ choq’ reheb’ lix ketomq ut lix teep chi xul; ut li k’a’ruhaq chi ketomq ut chi xulil ut chi xul napurik li te’xk’am chirixeb’—ut kik’ulman naq chirix naq ke’xb’aanu chixjunil li k’a’aq re ru a’in, ke’ok sa’eb’ lix jukub’, malaj eb’ lix k’amonel jukub’, ut ke’ok chi b’eek chiru palaw, ut ke’xk’e rib’ sa’ ruq’ li Qaawa’ lix Dios.

5 Ut kik’ulman naq li Qaawa’ Dios kixk’e jun iq’ numtajenaq xkawil chi apunk chiru lix b’een li ha’, sa’ xjayal li yeechi’inb’il ch’och’; ut chi jo’kan ke’qujleek chiru xb’oolam li palaw chiru li iq’.

6 Ut kik’ulman naq k’iila sut ke’sub’e’ sa’ xchamal li palaw, xb’aan li tzuulil b’oolam li neke’pujujnak sa’ xb’eeneb’, ut jo’kan ajwi’ li nimla xuwajel kaq-sut-iq’ li kiwan xb’aan xnimal li iq’.

7 Ut naq ke’sub’e’ sa’ li chamal ha’ kik’ulman naq maajun ha’ wan li kiru chi rahob’tesink reheb’, rik’in naq tz’aptz’o ru lix jukub’eb’ chanchan jun sek’, ut tz’aptz’ookeb’ ajwi’ ru chanchan lix jukub’ kab’l laj Noe; jo’kan ut, naq sutsuukeb’ xb’aan xk’ihal li ha’ ke’elajin chiru li Qaawa’, ut a’an kixk’ameb’ wi’chik sa’ xb’een li ha’.

8 Ut kik’ulman naq li iq’ maajun wa kixkanab’ apunk sa’ xjayal li yeechi’inb’il ch’och’ naq wankeb’ chiru li ha’; ut chi jo’kan ke’tiikisiik chiru li iq’.

9 Ut ke’b’ichan re xnimankil ru li Qaawa’; relik chi yaal, li ras laj Jared kib’ichan re xnimankil ru li Qaawa’, ut kib’antioxink ut kixnima ru li Qaawa’ chiru chixjunil li kutan; ut naq ki’ok q’ojyin, ink’a’ ke’xkanab’ xnimankil ru li Qaawa’.

10 Ut chi jo’kan ke’tiikisiik; ut maajun josq’ aj xul re palaw kiru chi toqok reheb’, chi moko nimla kar li kiru chi rahob’tesink reheb’; ut kiwan xsaqenkileb’ rajlal; sa’ xb’een li ha’ jo’ ajwi’ rub’el li ha’.

11 Ut chi jo’kan ke’tiikisiik, oxib’ cient rik’in kaahib’ roxk’aal kutan chiru li ha’.

12 Ut ke’wulak sa’ xmaril li yeechi’inb’il ch’och’. Ut chirix naq ke’xk’e li roq sa’ xb’een xmaril li yeechi’inb’il ch’och’ ke’xkub’si rib’eb’ chiru lix b’een li ch’och’, ut ke’xtuulanob’resi rib’eb’ chiru li Qaawa’, ut ke’el xya’aleb’ ru xb’aan xsahileb’ xch’ool chiru li Qaawa’, xb’aan xk’ihal lix q’unil uxtaan sa’ xb’eeneb’.

13 Ut kik’ulman naq xkoheb’ chiru lix b’een li ch’och’, ut ke’ok chixk’anjelankil li ch’och’.

14 Ut laj Jared kaahib’ ralal ke’wan; ut a’aneb’ laj Jakom, laj Gilgah, ut laj Mahah, ut laj Orihah ke’xk’ab’a’in.

15 Ut li ras laj Jared ke’yo’la ajwi’ ralal ut xrab’in.

16 Ut eb’ li ke’ochb’eenink re laj Jared ut li ras a’aneb’ tana’ wiib’ xka’k’aal chi aamej rajlankileb’; ut ke’yo’la ajwi’ ralal ut xrab’ineb’ chi maji’ neke’wulak sa’ li yeechi’inb’il ch’och’, jo’kan naq ke’ok chi naab’alo’k.

17 Ut ke’tzole’ re te’b’eeq chi tuulan chiru li Qaawa’; ut ke’tzole’ ajwi’ chaq taqe’q.

18 Ut kik’ulman naq ke’ok chi jek’imank chiru lix b’een li ch’och’, ut chi k’ihank ut chixk’anjelankil li ch’och’, ut ke’kawu xmetz’eweb’ sa’ li ch’och’.

19 Ut li ras laj Jared ki’ok chi tixk, ut kiril naq chi seeb’ tento taakub’eeq sa’ li muqleb’aal kamenaq; jo’kan naq kixye re laj Jared: Chiqach’utub’ li qatenamit re taaruuq te’qak’e sa’ ajl, re naq taqanaw reheb’ k’a’ru te’raj qik’in naq maji’ nokokub’e sa’ li qamuqleb’aal.

20 Ut chi jo’kan ke’ch’utub’aak li tenamit. Ut li rajlankileb’ li ralal ut lix rab’in li ras laj Jared, a’an wiib’ xka’k’aal chi aamej, ut li rajlankileb’ li ralal ut xrab’in laj Jared, a’an kab’laju, ut kaahib’ li ralal ke’wan.

21 Ut kik’ulman naq ke’xk’eheb’ sa’ ajl lix tenamiteb’; ut chirix naq ke’xk’eheb’ sa’ ajl, ke’xpatz’ reheb’ k’a’ru li te’raj naq te’xb’aanu chi maji’ neke’kub’e sa’ xmuqleb’aaleb’.

22 Ut kik’ulman naq eb’ li tenamit ke’xtz’aama chiruheb’ naq te’xyul jun reheb’ li ralal re taawanq choq’ rey sa’ xb’eeneb’.

23 Anajwan ut k’ehomaq reetal, kiwan a’in choq’ rahil ch’oolejil chiruheb’. Ut li ras laj Jared kixye reheb’: Ch’olch’o naq li na’leb’ a’in taak’amoq sa’ li preexil.

24 A’b’an laj Jared kixye re li ras: Kanab’eb’ re taaruuq taawanq junaq xreyeb’. Jo’kan ut naq kixye reheb’: Sik’omaq chaq ru sa’ xyanqeb’ li qalal junaq rey, li ani teeraj.

25 Ut kik’ulman naq ke’xsik’ ru li xb’een li kiyo’la chaq chiru li ras laj Jared; ut aj Pagag xk’ab’a’. Ut kik’ulman naq a’an ink’a’ kiraj, ut kixye naq moko taawanq ta choq’ xreyeb’. Ut eb’ li tenamit ke’raj naq lix yuwa’ tixmin ru, a’b’an lix yuwa’ ink’a’ kiraj, ut kixtaqlaheb’ naq maajun winq te’xmin ru chi wank choq’ xreyeb’.

26 Ut kik’ulman naq ke’xsik’ ru chixjunileb’ li riitz’in laj Pagag, ut eb’ a’an ink’a’ ke’raj.

27 Ut kik’ulman naq ink’a’ ajwi’ ke’raj li ralal laj Jared, chixjunileb’, ka’ajwi’ li jun; ut laj Orihah kiyule’ chi wank choq’ rey sa’ xb’eeneb’ li tenamit.

28 Ut ki’ok chi awa’b’ejink, ut eb’ li tenamit ke’ok chi usaak, ut ke’b’ihomo’ chi numtajenaq.

29 Ut kik’ulman naq kikam laj Jared, ut jo’kan ajwi’ li ras.

30 Ut kik’ulman naq laj Orihah kib’eek chi tuulan chiru li Qaawa’, ut kijultiko’ re xnimal ru li k’a’aq re ru kixb’aanu chaq li Qaawa’ choq’ re lix yuwa’, ut kixtzoleb’ ajwi’ lix tenamit chirix xnimal li k’a’aq re ru kixb’aanu chaq li Qaawa’ choq’ reheb’ lix yuwa’eb’.