1 Ut kik’ulman naq laj Orihah kixk’anjela li raqb’a-aatin sa’ xb’een li ch’och’ sa’ tiikilal chixjunil lix kutan, ut numtajenaq xk’ihal lix kutan a’an.

2 Ut ke’yo’la ralal ut xrab’in; relik chi yaal, junlaju xka’k’aal ke’yo’la chiru, ut sa’ xyanqeb’ a’an wankeb’ oxib’ xka’k’aal li ralal.

3 Ut kik’ulman naq kiyo’la ajwi’ laj Kib choq’ ralal sa’ xtiixilal. Ut kik’ulman naq laj Kib ki’awa’b’ejin sa’ xna’aj, ut laj Kib kiyo’la laj Korihor choq’ ralal.

4 Ut naq kab’laju xka’k’aal chihab’ xyu’am laj Korihor, kixpo’resi xch’ool rik’in lix yuwa’, ut kiq’axon junpak’al ut kiwan sa’ li ch’och’ Nehor, ut ke’yo’la ralal ut xrab’in, ut numtajenaq xchaq’aleb’ ru ke’kana, jo’kan naq laj Korihor kixk’am naab’al li tenamit rik’in.

5 Ut chirix naq kixch’utub’ jun teep aj pleet kitaqe’ toj sa’ li ch’och’ Moron b’ar wan wi’ li rey, ut kixk’am chi preexil, ut chi jo’kan kik’ehe’ chi uxmank lix yehom li ras laj Jared naq te’k’ame’q chi preexil.

6 Anajwan li ch’och’ Moron, b’ar kiwan wi’ li rey, nach’ wan rik’in li ch’och’ Sachenaqil yeeb’il re xb’aaneb’ laj Nefita.

7 Ut kik’ulman naq laj Kib kiwan sa’ preexil, ut lix tenamit, rub’el xwankil laj Korihor li ralal, toj reetal naq q’axal kitix; a’b’an laj Kib kiyo’la laj Xuul choq’ ralal sa’ xtiixilal, naq toj wan chi preexil.

8 Ut kik’ulman naq laj Xuul kijosq’o’ rik’in li ras; ut laj Xuul kikawu xmetz’ew, ut nim xmetz’ew kikana jo’ chanru xmetz’eweb’ li winq, ut nim ajwi’ xmetz’ew chi raqok aatin.

9 Jo’kan naq kiwulak sa’ li tzuul Efrain, b’ar wi’ kixha’resi chaq xpekal li tzuul, ut kixyiib’ yok’leb’ ch’iich’ rik’in kawil ch’iich’ choq’ reheb’ li kixk’am chaq rik’in; ut chirix naq kixkawresiheb’ chaq rik’in yok’leb’ ch’iich’ kisutq’i sa’ li tenamit Nehor, ut kixpleeti laj Korihor li ras, ut rik’in a’an kixtaw li awa’b’ejihom ut kixk’e wi’chik re laj Kib lix yuwa’.

10 Ut anajwan sa’ xk’ab’a’ li k’a’ru kixb’aanu chaq laj Xuul, lix yuwa’ kixk’e li awa’b’ejihom sa’ xb’een, jo’kan naq a’an ki’ok chi awa’b’ejink sa’ xna’aj lix yuwa’.

11 Ut kik’ulman naq a’an kixk’anjela li raqb’a-aatin sa’ tiikilal, ut kixjek’i li rawa’b’ejihom chiru chixjunil lix b’een li ch’och’, xb’aan naq ke’niman chaq xk’ihal li tenamit chi numtajenaq.

12 Ut kik’ulman naq laj Xuul ke’yo’la ajwi’ naab’al li ralal ut xrab’in.

13 Ut laj Korihor kixjal xk’a’uxl chirix xk’ihal li ink’a’ us kixb’aanu chaq; jo’kan naq laj Xuul kixk’e re a’an wankilal sa’ li rawa’b’ejihom.

14 Ut kik’ulman naq laj Korihor ke’yo’la naab’al li ralal ut xrab’in. Ut sa’ xyanqeb’ li ralal laj Korihor kiwan jun aj Noe xk’ab’a’.

15 Ut kik’ulman naq laj Noe kixpo’resi xch’ool chiru laj Xuul, li rey, ut chiru ajwi’ laj Korihor lix yuwa’, ut kixk’am laj Kohor li riitz’in rik’in, jo’ ajwi’ chixjunileb’ li ras ut riitz’in ut naab’al reheb’ li tenamit.

16 Ut kixpleeti laj Xuul, li rey, sa’ li kixk’ul wi’ xch’och’il li xb’een reechanihomeb’; ut ki’ok choq’ rey sa’ xb’een li jun raqal chi ch’och’ a’an.

17 Ut kik’ulman naq kixpleeti wi’chik laj Xuul, a’an li rey, ut kixchap laj Xuul, li rey, ut kixk’am chi preexil aran Moron.

18 Ut naq ok re chixk’eeb’al chi kamsiik, kik’ulman naq eb’ li ralal laj Xuul ke’ok xmuqb’esinkil rib’ sa’ rochoch laj Noe chi q’eq ut ke’xkamsi, ut ke’xt’an rokeb’aal li tz’alam ut ke’risi chaq lix yuwa’, ut ke’xk’ojob’ sa’ xb’een lix k’ojarib’aal sa’ tz’aqal li rawa’b’ejihom.

19 Jo’kan naq eb’ li ralal laj Noe ke’xwaklesi li rawa’b’ejihom sa’ xna’aj; a’b’anan ink’a’ chik ke’xtaw wankilal sa’ xb’een laj Xuul li rey, ut eb’ li tenamit li ke’wan rub’el rawa’b’ejil laj Xuul li rey ke’usa chi numtajenaq ut ke’niman xmetz’ew.

20 Ut kiwan chi jachjo ru li ch’och’; ut wiib’ li awa’b’ejihom ke’wan, li rawa’b’ejihom laj Xuul, ut li rawa’b’ejihom laj Kohor, ralal laj Noe.

21 Ut laj Kohor, ralal laj Noe, kixtaqla naq eb’ lix tenamit te’xpleeti laj Xuule, sa’ wi’ laj Xuule kixq’axeb’ ru ut kixkamsi laj Kohor.

22 Anajwan ut laj Kohor kiwan jun ralal aj Nimrod xk’ab’a’; ut laj Nimrod kixq’axtesi lix awa’b’ejihom laj Kohor re laj Xuul, ut kixtaw usilal sa’ rilob’aal laj Xuul, jo’kan naq laj Xuul kixk’e ninqi usilal sa’ xb’een, ut a’an kixb’aanu sa’ li rawa’b’ejihom laj Xuul jo’ chanru li naraj.

23 Ut jo’kan ajwi’ sa’ li rawa’b’ejil laj Xuul ke’chal li profeet sa’ xyanqeb’ li tenamit, li taqlanb’ileb’ chaq xb’aan li Qaawa’, ke’xch’olob’ jo’ profeet naq lix maa’usilaleb’ ut li loq’onink pak’b’il dios xb’aaneb’ li tenamit yoo chixk’amb’al chaq jun majewank sa’ xb’een li ch’och’, ut te’sache’q wi ink’a’ te’xjal xk’a’uxl.

24 Ut kik’ulman naq eb’ li tenamit ke’xhob’eb’ li profeet, ut ke’reetz’uheb’. Ut kik’ulman naq li rey aj Xuul kixk’anjela li raqb’a-aatin sa’ xb’eeneb’ chixjunil li ke’hob’ok reheb’ li profeet.

25 Ut kixk’anjela jun li chaq’rab’ chiru chixjunil li ch’och’, li kik’ehok wankilal reheb’ li profeet re te’xik yalaq b’ar te’raj; ut xb’aan a’in eb’ li tenamit ke’k’ame’ sa’ li jalb’a-k’a’uxlej.

26 Ut sa’ xk’ab’a’ naq eb’ li tenamit ke’xjal xk’a’uxl chirix lix maa’usilaleb’ ut li loq’onink pak’b’il dios, li Qaawa’ kixkoleb’ xyu’am, ut ke’ok wi’chik chi usaak sa’ li ch’och’. Ut kik’ulman naq laj Xuul ke’yo’la ralal ut xrab’in sa’ xtiixilal.

27 Ut maak’a’ chik li pleet sa’ xkutankil laj Xuul, ut a’an kijultiko’ re xninqal li k’a’aq re ru kixb’aanu chaq li Qaawa’ choq’ reheb’ lix yuwa’ sa’ xk’amb’aleb’ chaq chiru li nimla chamal ha’ toj sa’ li yeechi’inb’il ch’och’; jo’kan naq kixk’anjela li raqb’a-aatin sa’ tiikilal chixjunil lix kutan.