1 ’E i muri a’era, ’ua fa’atere Oriha i te ha’avāra’a ma te parauti’a i ni’a i te fenua ē hope roa a’e tōna pu’e mahana, ’e e mea maoro tōna ra pu’e mahana.

2 ’E ’ua fānau ho’i ’oia i te mau tamari’i tamāroa ’e te mau tamari’i tamāhine ; ’oia ïa, ’ua fānau ’oia e toru ’ahuru ’e ma hō’ē, ’e i rotopū ia rātou tē vai ra e piti ’ahuru ’e ma toru mau tamari’i tamāroa.

3 ’E i muri a’era, ’ua fānau fa’ahou ihora tāna ’o Kiba i tōna ruhiruhiāra’a. ’E i muri a’era, ’ua fa’atere ihora ’o Kiba ’ei mono nōna ; ’e ’ua fānau a’era tā Kiba ’o Korihora.

4 ’E ’ia tae a’era tō Korihora matahiti i te toru ’ahuru ’e ma piti ’ua ’ōrurehau ihora ’oia i tōna metua tāne, ’e ’ua haere atu ra ’oia ’e ’ua pārahi ihora i te fenua ra nō Nehora ; ’e ’ua fānau ihora ’oia i te mau tamari’i tamāroa ’e te mau tamari’i tamāhine ; ’e ’ua riro rātou ’ei mea nehenehe roa ; nō reira ’ua arata’i ’ē atu ra Korihora i te mau ta’ata e rave rahi nā muri iāna.

5 ’E i muri iho i tōna ha’aputuputura’a mai i te hō’ē nu’u fa’ehau, ’ua haere mai ra ’oia i te fenua ra nō Morona, tei reira te ari’i i te fa’aeara’a, ’e ’ua arata’i atu ra ’oia iāna ’ei tītī, ’e ’ua tupu mau atu ra te parau a te taea’e o Iareda, ’oia ho’i e arata’ihia rātou i roto i te fa’atītīra’a.

6 I teienei e mea fātata te fenua ra nō Morona, te fenua i pārahi te ari’i, i te fenua i parauhia e te mau ’āti Nephi ’o Ano.

7 ’E i muri a’era, ’ua ora noa a’era Kiba ’e tōna ra mau ta’ata i roto i te fa’atītīra’a i raro a’e i te fa’aterera’a a tāna ra tamaiti ’o Korihora, ē tae noa atu ’ua rū’au roa ’oia ; noa atu rā ’ua fānau mai Kiba ia Sule i tōna ra ruhiruhiāra’a, ’a ora noa ai ’oia i roto i te fa’atītīra’a.

8 ’E i muri a’era, ’ua riri a’era Sule i tōna ra taea’e, ’e ’ua tupu a’era ’oia i te rahi ’e ’ua riro atu ra ’ei ta’ata pūai i te pūai o te ta’ata ra ; ’e ’ua riro ato’a a’era ’oia ’ei ta’ata pūai i te ha’avā.

9 Nō reira, ’ua haere mai ra ’oia i te ’āivi ra o Epheraima, ’e ’ua hāmani ihora ’oia i te mau ’o’e i te ’āuri i fa’atarapapehia mai roto mai i te ’āivi ra, nā te feiā e pe’e mai iāna ra ; ’e i muri iho i tōna hāmanira’a i te ’o’e nā rātou ’ua ho’i mai ra rātou i te ’oire ra nō Nehora, ’e ’ua ’aro atu ra i tōna tua’ana ra ia Korihora, ’e ’ua haru mai ra i te bāsileia ’e ’ua fa’aho’i atu ra i te reira i tōna ra metua tāne ia Kiba.

10 ’E i teienei, nō te mea tā Sule i rave, ’ua hōro’a atu ra tōna metua tāne i te bāsileia nōna ; nō reira ’ua ha’amata ihora ’oia i te fa’atere ’ei mono i tōna ra metua tāne.

11 ’E i muri a’era, ’ua rave a’era ’oia i te ’ohipa ha’avāra’a ma te parauti’a ; ’e ’ua fa’arahi ’oia i tōna bāsileia i ni’a i te fenua ē ’ati noa a’e, ’e ’ua rahi roa te mau ta’ata.

12 ’E i muri a’era, ’ua fānau ato’a ihora Sule i te mau tamari’i tamāroa ’e te mau tamari’i tamāhine e rave rahi.

13 ’E ’ua tātarahapa ihora Korihora i te mau mea ’ī’ino e rave rahi tāna i rave ; nō reira ’ua hōro’a atu ra Sule i te hō’ē mana iāna i roto i tōna ra bāsileia.

14 ’E i muri a’era, e rave rahi tā Korihora tamari’i tamāroa ’e tamari’i tamāhine. ’E i rotopū i te mau tamari’i tamāroa a Korihora tē vai ra te hō’ē ’o Noa tōna i’oa.

15 ’E i muri a’era, ’ua ’ōrurehau a’era Noa i te ari’i ra ia Sule, ’e i tōna metua tāne ato’a ra ia Korihora, ’e ’ua arata’i ’ē atu ra i tōna taea’e ra ia Kohora, ’e tōna mau taea’e ato’a, ’e te tahi mau ta’ata e rave rahi ’ia pe’e mai iāna.

16 ’E ’ua ’aro atu ra rātou i te ari’i ra ia Sule, ’e ’ua roa’a ihora iāna tō rātou fenua ’āi’a mātāmua ; ’e ’ua riro ihora ’oia ’ei ari’i i taua tufa’a fenua ra.

17 ’E i muri a’era, ’ua ’aro fa’ahou atu ra ’oia i te ari’i ra ia Sule ; ’e ’ua rave a’era ’oia i te ari’i ra ia Sule, ’e ’ua hōpoi tītī atu ra iāna i Morona.

18 ’E i muri a’era, ’a fātata ai ’oia i te taparahi iāna, ’ua ne’e mai ra te mau tamari’i tamāroa a Sule i roto i te fare o Noa i te pō ’e ’ua taparahi ihora iāna, ’e ’ua vāvāhi ihora i te ’ōpani o te fare tāpe’ara’a ’e ’ua rave mai ra i tō rātou metua tāne, ’e ’ua tu’u ihora rātou iāna i ni’a iho i te terōno o tōna ihora bāsileia.

19 Nō reira, ’ua riro ihora te tamaiti a Noa ’ei mono nōna i te patura’a i tōna ra bāsileia ; noa atu rā i te reira ’aita rātou i fāri’i i te mana hau atu i ni’a i te ari’i ra ia Sule ; ’e te feiā i raro a’e i te fa’aterera’a a te ari’i ra ’o Sule, ’ua manuia rahi ïa rātou ’e ’ua tupu atu ra i te rahi.

20 ’E ’ua ’āmahamaha ihora tō te fenua ; ’e ’ua tupu ihora e piti bāsileia, ’o te bāsileia o Sule, ’e te bāsileia o Kohora, te tamaiti a Noa.

21 ’E ’ua fa’atupu ihora Kohora, te tamaiti a Noa, i te hina’aro i roto i tōna mau ta’ata ’ia ’aro atu ia Sule, ’e ’ua pau rātou ia Sule, ’e ’ua taparahi ’oia ia Kohora.

22 ’E i teienei e tamaiti tā Kohora ’o tei parauhia ’o Nimeroda ; ’e ’ua hōro’a atu ra Nimeroda i te bāsileia o Kohora ia Sule, ’e ’ua herehia a’era ’oia e Sule ; nō reira ’ua hōro’a atu ra Sule i te tahi mau mea maitata’i nāna, ’e ’ua rave noa atu ra ’oia i tōna iho hina’aro i roto i te bāsileia o Sule.

23 ’E i te taime ato’a nō te fa’aterera’a a te ari’i ra ’o Sule ’ua tae mai ra te mau peropheta i rotopū i te mau ta’ata, ’e ’ua tonohia mai ho’i rātou e te Fatu, ma te tohura’a ē, tē fa’atae mai ra te mau ’ohipa ’ī’ino ’e te ha’amorira’a ’īdolo a te mau ta’ata i te ’anatemara’a i ni’a iho i te fenua, ’e e ha’amouhia ho’i rātou ’ia ’ore rātou ’ia tātarahapa.

24 ’E i muri a’era, ’ua fa’a’ino atu ra te mau ta’ata i te mau peropheta, ’e ’ua vahavaha atu ra ia rātou. ’E i muri a’era, ’ua ha’avā ihora Sule ia rātou pā’āto’a ’o tei fa’a’ino i te mau peropheta.

25 ’E ’ua fa’aoti ihora ’oia i te hō’ē ture i ni’a i te fenua ē ’ati noa a’e, ’e nā te reira i hōro’a i te mana i te mau peropheta ’ia haere noa i te mau vāhi tā rātou e hina’aro ; ’e nā te reira i fa’atupu i te tātarahapa i roto i te mau ta’ata.

26 ’E nō te mea ’ua tātarahapa te mau ta’ata i tā rātou mau ’ohipa ’ī’ino ’e tā rātou mau ha’amorira’a ’īdolo ’ua fa’aora te Fatu ia rātou, ’e ’ua ha’amata rātou i te manuia fa’ahou i ni’a i te fenua. ’E i muri a’era, ’ua fānau a’era Sule i te mau tamari’i tamāroa ’e te mau tamari’i tamāhine i tōna ruhiruhiāra’a.

27 ’E ’aita te mau tama’ira’a i tupu fa’ahou i te mau mahana o Sule ; ’e ’ua ha’amana’o noa ’oia i te mau mea rahi tā te Fatu i rave nō tōna mau metua, i te ’āfa’ira’a mai ia rātou nā ni’a i te moana hōhonu rahi i te fenua i fafauhia ra ; nō reira ’ua fa’atupu ’oia i te ’ohipa ha’avāra’a ma te parauti’a i te tā’āto’ara’a o tōna ra mau mahana.