1 Im kiiō n̄a, Moronai, ij wōnm̧aanļo̧k kōn ļo̧o̧k eo aō. Kōn menin, lo, ālikin men kein kōnke kumi ittino kein an Akis im ro jeran, lo, rekar kajeepepļo̧k aelōn̄ eo an Omer.

2 Mekarta, Irooj eaar tūriam̧o n̄an Omer, im barāinwōt n̄an ļōm̧aro nejin im n̄an lim̧aro nejin ro rekar jab kappukot ko̧kkure eo an.

3 Im Irooj eaar kakkōl Omer ilo juon tōņak bwe en diwōjļo̧k jān āneo; kōn menin Omer eaar diwōjļo̧k jān āneo ippān baam̧le eo an, im ito-itak elōn̄ raan ko, im ilo̧k im eļļā iturinļo̧k bat in Sim, im ilo̧k iturin jikin eo riNipai ro rekar mej ie, im jān ijo taļo̧k, im ilo̧k n̄an jikin eo kar etan Ablom, iturin parijet, im ijo eaar kajutak im̧ōn kōppād eo an, im barāinwōt ļōm̧aro nejin im lim̧aro nejin, im aolep m̧weo im̧ōn, ijello̧kun wōt kar Jered im baam̧le eo an.

4 Im ālikin men kein Jered kar kāālet e kiin̄ ioon armej ro, jān pein nana; im eaar leļo̧k n̄an Akis lio nejin n̄an pāleen.

5 Im ālikin men kein Akis eaar kappukot mour eo an ļeo jelpān jemān; im eaar akweļap n̄an ro eaar kallim̧ur kōn kanejnej eo an ro etto, im raar bōk bōran jemān-ilo-kien, ke eaar jijet ioon an tūroon, im kadeļo̧n̄ļo̧k armej ro an.

6 Bwe ekanooj ļap kar ajeeded eo an jukjuk in pād in ittino jon̄an eaar kaankekeik būruōn aolep armej ro; kōn menin Jered kar m̧ane ioon tūroon eo an, im Akis eaar irooj ilo ijo jikin.

7 Im ālikin men kein Akis eaar jino in kam̧o kōn ļeo nejin, kōn menin eaar kalbuuj e ilo kalbuuj, im dāpij e kōn edik ak ejjeļo̧k kanooj m̧ae eaar en̄taan im mej.

8 Im kiiō ļeo jatin eo eaar mej, (im etan eaar Nimra) eaar illu ippān jemān kōnke men eo jemān eaar kōm̧m̧an n̄an ļeo jein.

9 Im ālikin men kein Nimra eaar aintok ippān doon juon oran em̧m̧aan edik, im koļo̧k jān āneo, im ilo̧k im jokwe ippān Omer.

10 Im ālikin men kein Akis eaar keotak m̧an ro nejin jet, im raar karreel būruōn armej ro, mekarta n̄e raar kallim̧ur n̄an e n̄an kōm̧m̧an aolep wāween nana otemjeļo̧k ekkar n̄an men eo raar ikdeelel e.

11 Kiiō armej ro an Akis rekar kōņaan n̄an bōk ļapļo̧k, em̧ool āinwōt Akis eaar kōņaan maron̄; kōn menin, ļōm̧aro nejin Akis rekar leļo̧k n̄an er m̧ani, eo jān wāween in rekar kan̄ōlļo̧k eļapļo̧k m̧ōttan armej ro ilo̧kaerļo̧k.

12 Im eaar jino wōr juon tariņae ikōtaan ļōm̧aro nejin Akis im Akis, eo eaar tōrean elōn̄ iiō ko, aaet, n̄an jako eo an enan̄in aolep armej ro ilo aelōn̄ eo, aaet, em̧ool aolep, ijello̧kun wōr kar jiln̄uul armej, im ro raar ko ippān m̧weo im̧ōn Omer.

13 Kōn menin, Omer kar bar kōjepļaakļo̧k n̄an āneen jolōt eo an.

14 Im ālikin men kein Omer eaar jino in bwijwoļā; mekarta, ilo dettan eo an ebwijwoļā eaar keotake Emer; im eaar kapit Emer n̄an kiin̄ n̄an irooj ilo ijo jikin.

15 Im ālikin eaar kapit Emer n̄an kiin̄ eaar lo aenōm̧m̧an ilo āneo n̄an tōrean in ruo iiō, im eaar mej, ālikin an kar lo elōn̄ otem lōn̄ raan, ko rekar obrak kōn būrom̧ōj. Im ālikin men kein Emer eaar irooj ilo ijo jikin, im kar ļoor bun̄tōn ne ko an jemān.

16 Im Irooj eaar bar jino n̄an bōk lia eo ļo̧k jān āneo, im m̧weo im̧ōn Emer eaar jeraam̧m̧an otem jeraam̧m̧an ium̧win tōl an Emer; im ilo tōrean in jiljinon̄oul im ruo iiō ko rekar erom kajoor otem kajoor, jon̄an rekar erom m̧weie otem m̧weie—

17 Im eaar wōr aer wāween leen wōjke otemjeļo̧k, im in grain, im in silk ko, im in nuknuk aidik iden ko, im in gold, im in silver, im in mennin aorōk ko;

18 Im barāinwōt wāween kattle otemjeļo̧k, im in oxen, im kau ko, im in sip, im in piik, im goat ko, im barāinwōt elōn̄ mennin mour rot ko jet ko rekar wōr tokjāer n̄an kijen armej.

19 Im eaar wōr aer o̧o̧j barāinwōt, im donkey ko, im eaar wōr eļbōn ko im kurelōm ko im kum̧ōm̧ ko; aolep ko rekar wōr tokjāer n̄an armej, im eļapļo̧k tata eļbōn ko im kurelōm ko im kum̧ōm̧ ko.

20 Im āindein Irooj eaar lutōkleplepļo̧k kōjeraam̧m̧an ko An ioon āne in, eo eaar makeļo̧k ioon aolep āne ko jet; im Eaar jiron̄ bwe jabdewōt eo enaaj bōk āne in ej aikuj bōk e n̄an Irooj, n̄e jab renaaj jako n̄e ren kar kalo ilo jero̧wiwi; bwe ioon rein, Irooj ej ba: Inaaj lutōkleplepļo̧k tarlep in Aō illu.

21 Im Emer eaar kōm̧m̧an ekajet ilo jim̧we aolep raan ko an, im eaar keotak elōn̄ nejin m̧aan im kōrā; im eaar keotak Koriantōm, im eaar kapit Koriantōm n̄an irooj ilo ijo jikin.

22 Im ālikin eaar kapit Koriantōm n̄an irooj ilo ijo jikin eaar mour emān iiō, im eaar lo aenōm̧m̧an ilo āneo; aaet, im e em̧ool eaar lo Nejin Weeppān, im kar m̧ōņōņō im wōj ilo raan ko an; im eaar mej ilo aenōm̧m̧an.

23 Im ālikin men kein Koriantōm eaar etetal ilo bun̄tōn ko an jemān, im kar kalōk elōn̄ jikin kwelo̧k ko reļļap, im kar leļo̧k men eo eaar em̧m̧an n̄an armej ro an ilo aolep raan ko an. Im ālikin men kein eaar ejjeļo̧k nejin em̧ool m̧ae eaar rūtto otem rūtto.

24 Im ālikin men kein lio pāleen eaar mej, bwe eaar jibukwi im ruo iiō rūttoun. Im ālikin men kein Koriantōm eaar bōk n̄an pāleen, ilo dettan erūtto, juon jiron̄ edik, im kar keotak m̧aan ro im kōrā ro; kōn menin eaar mour m̧ae eaar jibukwi im en̄oul im ruo iiō ko dettan.

25 Im ālikin men kein eaar keotak Kom, im Kom ar irooj ilo ijo jikin; im eaar irooj en̄oul im ruwatimjuon iiō, im eaar keotak Het; im eaar barāinwōt keotak m̧aan ro im kōrā ro jet nejin.

26 Im armej ro raar bar ajeeded ioon aolepān mejān āneo, im eaar jino wōr juon jero̧wiwi ekanooj ļap otem ļap ioon mejān āneo, im Het eaar jino in atbo̧kwōje karōk ittino ko in etto, n̄an ko̧kkure jemān.

27 Im ālikin men kein eaar jojān tūroon eo jemān, bwe eaar m̧ane kōn jāje eo an make; im eaar irooj ilo ijo jikin.

28 Im eaar itok rikanaan ro ilo āneo bar juon alen, im lam̧ōj ukeļo̧k n̄an er—bwe ren aikuj kōpooj iaļ eo an Irooj n̄e jaab enaaj itok juon kalia ioon mejān āneo; aaet, em̧ool en kar wōr juon n̄ūta eļap, eo ilo e ren kar jako eļan̄n̄e raar jab ukeļo̧k.

29 A armej raar jab tōmak naan ko an rikanaan ro, a raar kadiwōjļo̧k er; im jet iaer raar joļo̧k ilo ron̄ ko im likūt er n̄an jako. Im ālikin men kein raar kōm̧m̧ani aolep men kein ekkar n̄an naan in jiron̄ an kiin̄ eo, Het.

30 Im ālikin men kein eaar jino wōr juon n̄ūta ioon āneo, im ro ie raar kanooj jorrāān otem jorrāān m̧ōkaj kōnke n̄ūta eo, bwe eaar ejjeļo̧k wōt ioon mejān laļ.

31 Im eaar waļo̧ktok jedpānit ko repaijin barāinwōt ioon mejān āneo, im kar baijini elōn̄ armej. Im ālikin men kein bwijin in mennin mour ko rekar jino ko im̧aan jedpānit ko repaijin, ļo̧k n̄an āneo irōk, eo kar ņa etan jān riNipai ro Zaraemla.

32 Im ālikin men kein eaar wōr elōn̄ iaer rekar jako ilo iaļ eo; mekarta, eaar wōr jet rekar ko ilo āneo irōk.

33 Im ālikin men kein Irooj eaar kōm̧m̧an bwe jedpānit ko ren jab lukwarkwar er ļo̧k wōt, a bwe ren wōrwōre iaļ eo bwe armej ro ren jab eļļā, bwe jabdewōt eo ej kajjion̄ in eļļā en maron̄ wōtlo̧k jān jedpānit ko repaijin.

34 Im ālikin men kein armej ro raar ļoor iaļ eo an mennin mour awiia ko, im kar oran̄ļo̧k ānbwin mej ko an ro rekar wōtlo̧k ilo iaļ eo, m̧ae rekar oran̄ļo̧k er aolep. Kiiō ke armej ro raar lo bwe rej aikuj jako rekar jino ukeļo̧k jān jero̧wiwi ko aer im kūr n̄an Irooj.

35 Im ālikin men kein ke raar kōttāik er ebwe im̧aan Irooj Eaar jilkinļo̧k wōt ioon mejān laļ; im armej ro rekar jino in bar emmourur, im eaar jino wōr leen ilo āne ko ituiōn̄, im ilo aolep āne ko ipeļaakin ijo. Im Irooj eaar kwaļo̧kļo̧k An kajoor n̄an er ilo oņaake er jān n̄ūta.