1 Mo nao mi, Moronae, i gohed wetem histri blong mi. From hemia, luk, i bin hapen se from ol sikret grup blong Akis mo ol fren blong hem, luk, oli sakemaot kingdom blong Oma.

2 Be, Lod i bin gat sore long Oma, mo tu, long ol boe blong hem mo long ol gel blong hem we oli no lukaotem ded blong hem.

3 Mo Lod i bin wonem Oma long wan drim se hem i mas aot long graon; taswe, Oma i aot long graon wetem famli blong hem, mo i wokbaot blong plante dei, mo oli kam mo pas kolosap long hil blong Sim, mo oli kam kolosap long ples we oli kilimded Ol Man blong Nifae, mo stat long ples ia i go long Is, mo oli kam long wan ples we oli singaotem Ablom, kolosap long so blong solwota, mo long ples ia hem i stanemap tenet blong hem, mo tu, ol boe blong hem mo ol gel blong hem, mo evriwan insaed long haos blong hem, be i no Jared mo famli blong hem.

4 Mo i bin hapen se oli anoentem Jared blong kam king ova long ol pipol, tru long han blong fasin nogud; mo long Akis, hem i givim gel blong hem blong i kam waef blong hem.

5 Mo i bin hapen se Akis i wantem tekemaot laef blong papa blong woman blong hem; mo hem i askem long olgeta we hem i bin mekem olgeta ol promes tru long strong promes blong olgeta blong bifo, mo oli kasem hed blong papa blong woman blong hem, taem we hem i sidaon long bigfala jea blong hem, hem i stap givim janis long ol pipol blong hem blong toktok long fored blong hem.

6 From nogud mo sikret grup ia i bin go long plante ples tumas, nao hem i rabisim gud hat blong evri pipol; from hemia, oli kilimded Jared long bigfala jea blong hem, mo Akis i rul long ples blong hem.

7 Mo i bin hapen se Akis i stat blong stap jalus long boe blong hem, from hemia, hem i sarem hem long kalabus, mo hem i mekem se hem i kakae smol nomo o no kakae nating kasem taem we hem i safa gogo i ded.

8 Mo nao brata blong hem we i safa gogo i ded, (mo nem blong hem i Nimraha) i bin kros long papa blong hem from samting ia we papa blong hem i mekem long brata blong hem.

9 Mo i bin hapen se Nimraha i karem i kam tugeta, wan smol namba blong ol man, mo oli ronwe oli aot long graon, mo i kam mo stap wetem Oma.

10 Mo i bin hapen se Akis i gat ol narafala boe, mo oli winim hat blong ol pipol, i nomata we oli promes strong long hem blong mekem evri kaen rabis fasin folem wanem we hem i wantem.

11 Nao ol pipol blong Akis oli wantem blong kasem mane, semmak olsem we Akis i bin wantem paoa; taswe, ol boe blong Akis oli givim mane long olgeta, tru long ol wei ia nao oli winim tingting blong bigfala pat blong pipol blong folem olgeta.

12 Mo i bin stat blong gat wan faet bitwin ol boe blong Akis mo Akis, we i gohed blong spes blong plante yia, yes, kasem taem we oli kilimded kolosap evri pipol blong kingdom, yes, we i evriwan, be teti sol nomo, wetem olgeta we oli bin ronwe wetem haos blong Oma.

13 Taswe, Oma i bin kambak bakegen long graon blong hem we i kam long ol papa.

14 Mo i bin hapen se Oma i stat blong kam olfala; be, long olfala yia blong hem, hem i gat Ima; mo hem i anoentem Ima blong kam king blong rul long ples blong hem.

15 Mo afta we hem i anoentem Ima blong kam king, hem i luk pis long graon blong spes blong tu yia, mo hem i ded, afta we hem i luk plante dei tumas, we oli fulap long bigfala harem nogud. Mo i bin hapen se Ima i rul long ples blong hem, mo i folem ol wokbaot blong papa blong hem.

16 Mo Lod i stat bakegen blong tekemaot strong nogud tok we hem i sakem long graon, mo haos blong Ima i kam antap gud tumas andanit long rul blong Ima; mo long spes blong siksti mo tu yia oli kam strong tumas, inaf blong mekem se oli kam rij tumas—

17 Oli bin gat evri kaen frut, mo sid, mo ol kaliko blong silk, mo ol naes kaliko, mo gol, mo silva, mo ol gudgudfala samting;

18 Mo tu, evri kaen buluk, ol buluk, mo ol kao, mo ol sipsip, mo ol pig, mo ol nanigot, mo tu, plante narafala kaen animol we i gud blong yusum blong kaekae blong man.

19 Mo tu, oli bin gat ol hos, mo ol dongki, mo i gat ol elefen, mo ol kurilom mo ol kumom; evriwan long olgeta ia, man i save yusum, mo moa speseli ol elefen, mo ol kurilom mo ol kumom.

20 Mo olsem ia nao Lod i bin kapsaetem ol blesing blong hem long graon ia, we i moa gud bitim evri narafala graon; mo hem i givim oda se eni man we bae i stap long graon, bae i stap long hem wetem Lod, o bae Lod i prapa spolem gud olgeta taem we oli kam raep long rabis fasin; from long olgeta olsem, Lod i talem: “Bae mi kapsaetem kros blong mi we i fulwan.”

21 Mo Ima i bin mekem jajmen long stret mo gud fasin long evri dei blong hem, mo hem i gat plante boe mo gel; mo hem i gat Koriantum, mo hem i anoentem Koriantum blong rul long ples blong hem.

22 Mo afta we hem i bin anoentem Koriantum blong rul long ples blong hem, hem i bin laef fo yia, mo hem i luk pis long graon; yes, mo tu, hem i luk Pikinini blong Stret mo Gud Fasin, mo hem i bin glad mo gat glori long dei blong hem; mo hem i ded wetem pis.

23 Mo i bin hapen se Koriantum i bin wokbaot folem wokbaot blong papa blong hem, mo hem i bildim plante strong bigtaon, mo hem i givim samting we i gud long ol pipol blong hem long evri dei blong hem. Mo i bin hapen se hem i no gat eni pikinini kasem taem tu we hem i olfala tumas.

24 Mo i bin hapen se waef blong hem i ded, taem we hem i gat wan handred mo tu yia. Mo i bin hapen se Koriantum i tekem olsem waef blong hem, long taem we hem i olfala, wan yangfala woman we i no mared yet, mo hem i gat ol boe mo ol gel; taswe, ia hem i bin laef kasem taem we hem i gat wan handred mo foti mo tu yia.

25 Mo i bin hapen se hem i gat Kom, mo Kom i rul long ples blong hem; mo hem i rul foti mo naen yia, mo hem i gat Het; mo tu, hem i gat ol narafala boe mo ol gel.

26 Mo ol pipol oli go olbaot bakegen ova long ful fes blong graon, mo oli stat bakegen blong gat wan bigfala fasin nogud we i bigwan tumas long fes blong graon, mo Het i stat blong folem ol sikret plan bakegen blong bifo, blong kilimded papa blong hem.

27 Mo i bin hapen se hem i aotem papa blong hem long bigfala jea blong hem, from hem i bin kilimded hem wetem naef blong faet blong hem; mo hem i rul long ples blong hem.

28 Mo ol profet oli bin kam long graon bakegen, oli taltalemaot fasin blong sakem sin long olgeta—se oli mas mekem rere rod blong Lod, o bae i gat wan strong nogud tok i kam long fes blong graon; yes, mo tu, bae i gat wan bigfala hadtaem blong kasem kaekae, tru long samting ia bae oli ded sapos oli no sakem sin.

29 Be ol pipol oli no bilivim ol toktok blong ol profet, be oli sakemaot olgeta; mo sam long olgeta, oli sakem olgeta long ol hol long graon mo oli livim olgeta oli ded. Mo i bin hapen se oli mekem evri samting folem komanmen blong king, Het.

30 Mo i bin hapen se i stat blong gat wan bigfala hadtaem blong kasem ol samting long graon, mo ol pipol we oli stap laef long graon ia oli stat blong ded kwiktaem tumas from hadtaem blong kasem ol samting, from i no gat eni ren long fes blong graon.

31 Mo ol posen snek oli kam tu long fes blong graon, mo oli posenem plante pipol. Mo i bin hapen se grup blong ol animol blong olgeta i stat blong ronwe long fored blong ol posen snek, oli go long graon long Saot, we Ol Man blong Nifae oli singaotem Sarahemla.

32 Mo i bin hapen se i bin gat plante long olgeta we oli ded long rod; be, i gat samfala we oli ronwe oli go long graon long Saot.

33 Mo i bin hapen se Lod i mekem ol snek blong oli no mas ronem olgeta moa, be oli mas blokem rod, blong mekem se ol pipol oli no save pas, blong mekem se huia we i traem blong pas, maet bae oli foldaon tru long ol posen snek.

34 Mo i bin hapen se ol pipol oli folem rod blong ol animol, mo oli kakae we oli kakae ol ded bodi blong ol animol we oli foldaon long rod, kasem taem we oli kakae we oli kakae olgeta evriwan. Nao taem we ol pipol oli luk se oli mas ded, nao oli stat blong sakem ol rabis fasin blong olgeta mo prea long Lod.

35 Mo i bin hapen se taem we oli putum tingting blong olgeta i stap daon inaf long fored blong Lod, hem i sendem ren long fes blong graon; mo ol pipol oli stat blong laef bakegen, mo i stat blong gat frut long ol kantri blong Not, mo long ol kantri raonabaot. Mo Lod i bin soemaot paoa blong hem long olgeta taem we hem i sevem olgeta aot long hadtaem blong kasem kaekae.