1 Iwe iei non ewe fansoun non ewe fik me ruen ierin muun ekkewe sou apung pwe ewe anini fengen a napeno, ina popun pwe a wor maun non unusen ewe fonu me nein ekkewe aramasen Nifai meinisin.

2 Iwe ina ei mwichen chon sona mi monomon ewe a sopweno ei angangen kiteter me fofforungaw. Iwe ei maun a soposopono unusen ena ier; iwe non ewe fik me unungatin ier a pwan soposopono.

3 Iwe non ewe fansoun pwe non ei ier Nifai a sio ngeni ewe Samon, a apasa:

4 O Samon, kosap mutata pwe ekkei aramas repwe ninnino me ren ewe ketinas; nge O Samon, kopwe fen mutata epwe wor nengita non ewe fonu, pwe epwe amwasangereta non achechemenien ewe Samon ar Kot, me eni repwe aier me kun ngonuk.

5 Iwe a wesino, anongonong won ekkewe kapas an Nifai. Iwe a wor ew weiresin nengita won ewe fonu, me nein ekkewe aramasen Nifai meinisin. Iwe iei non ewe fik me ruanun ier ewe nengita a soposopono, iwe ewe angangen kiteter a kouno me ren ewe ketinas nge a eriaffouno me ren nengita.

6 Iwe ei angangen kiteter a pwan soposopono non ewe fik me nimuen ier. Pun kinikinin ewe neni a osukosuk pwe a pwas, me ese opwuku grain non ewe fansoun grain; iwe unusen kinikinin ewe neni a osukosuk, pwan mwo nein ekkewe chon Leiman usun chok me nein ekkewe chon Nifai, iwe pwe ra wichiwich iwe ra mano ren ukukun ngorow non ewe watten kinikinin ewe fonu.

7 Iwe non ewe fansoun pwe ekkewe aramas ra kuna pwe ita repwene mano me ren nengita, iwe ra poputa ne chechemeni ewe Samon ar Kot; iwe ra poputa ne chechemeni ekkewe kapas an Nifai.

8 Iwe ekkewe aramas ra poputa ne sio ngeni nour kewe sou apung mi nap me nour kewe sou emmwen, pwe repwe apasa ngeni Nifai: Nengeni, am mi sinei pwe en emon mwanin Kot, iwe iei minne sio ngeni ewe Samon ach Kot pwe epwe akkouno senikich ei nengita, pwe am aua nuokus ika ekkewe kapas meinisin minne ka fen apasa usun am kiteter epwe pwonueta.

9 Iwe non ewe fansoun pwe ekkewe sou apung ra apasa ngeni Nifai, anongonong won ekkewe kapas minne ekkewe aramas ra fen mochen. Iwe non ewe fansoun pwe nupwen Nifai a kuna pwe ekkewe aramas ra aier me ra etipetekisona inisir non mangakun netipeta, a sio sefan ngeni ewe Samon, a apasa:

10 O Samon, nengeni ekkei aramas ra aier; iwe ra fen aturano ewe mwichen Katianton seni me neir ina popun pwe rese chiwen fis, iwe ra fen opano ar kewe kokkot mi monomon non ewe puun.

11 Iei, O Samon, pokiten ei ar tipetekison kose mochen akunnano om song, me mutata om song epwe menemenoch non kiteterinon ekkewe mwan mi ngaw minne ka fen nireno.

12 O Samon, kose mochen akunnano om song, ewer, om song mi pochokun, me annuku pwe ei nengita epwe tongeni kouno me non ei fonu.

13 O Samon, kose mochen ausening ngeniei, me annuku pwe epwe tongeni fisino anongonong won ai kewe kapas, me tinato pungun ran won unungen ewe fonufan, pwe epwe tongeni opwuku uwan, me an grain non ewe fansoun grain.

14 O Samon, ka fen ausening ngeni ai kewe kapas nupwen ua apasa, Mutata epwe wor ew nengita, pwe ewe kiteterin ewe ketinas epwe tongeni kouno; me ngang mi sinei pwe kopwe fori, pwan mwo atun ei fansoun, ausening ngeni ai kewe kapas, pun ka apasa pwe: Ika ekkei aramas repwe aier upwe angaser.

15 Ewer, O Samon, me ka kuna pwe ra fen aier, pokiten ewe nengita me ewe samau me kiteter minne a fen feito ngeni ir.

16 Iwe iei, O Samon, kose mochen akunnano om song, me sossot sefan ika repwe angang ngonuk? Iwe ika epwe ina, O Samon, kopwe tongeni efeiochur anongonong won om kewe kapas minne ka fen apasa.

17 Iwe non ewe fansoun pwe non ewe fik me wonuen ier ewe Samon a akunnano an we song seni ekkewe aramas, me annuku pwe pungun ran epwe pungutiw won ewe neni, ina popun pwe a opwuku uwan non ewe fansoun uwan kewe. Iwe non ewe fansoun pwe a opwuku an kewe grain non ewe fansoun an grain.

18 Iwe nengeni, ekkewe aramas ra pwapwa me mwareiti Kot, me unusen unungen ewe fonu a ureno ren pwapwa; iwe rese chiwen sotuni ar repwe nieno Nifai, nge ra asufonu i usun emon soufos mi napanap, me emon mwanin Kot, a wor an manaman me mumuta mi napanap a kawor ngeni i seni Kot.

19 Iwe nengeni, Liai, pwin we, ese kisikis seni i ren pekin mettochun wenechar.

20 Iwe iei non ewe fansoun pwe ekkewe aramasen Nifai ra poputa ne feiochuno sefan non ewe fonu, me poputa ne aueta nenier kewe mi ponnuno, me poputa ne chommongono me toropas fetan, pwan mwo tori ar pwonueno unusen unungen ewe fonu, non ennefen me pwan non eor, seni ewe sat notou ngeni ewe sat otiw.

21 Iwe non ewe fansoun pwe ewe fik me wonuen ier a muchuno non kinamwe. Iwe ewe fik me fisuen ier a poputa non kinamwe; iwe ewe mwichefen a cheewno non unusen unungen ewe fonu; iwe napengeni ekkewe aramas, ekkewe chon Nifai me pwan ekkewe chon Leiman, ra choni ewe mwichefen; iwe a fokkun wor ar anonnonun kinamwe me non ewe fonu; iwe iei a muchuno ewe fik me fisuen ier.

22 Iwe a pwan wor ar kinamwe non ewe fik me wanuen ier, tiwenon chok ekkoch anini fengen usun ekkewe kinikinin nongonong mi ennet minne ra fen foruta me ren ekkewe soufos.

23 Iwe non ewe fik me tiuen ier a poputa ne wor anini. Nge non ewe fansoun pwe Nifai me Liai, me chommong me nein pwir kewe ekkewe ir mi sinei usun ennetin kinikinin nongonong mi ennet, pokiten ra angei chommong pwarata iteiten ran, iei minne ra afanafan ngeni ekkewe aramas, ina popun pwe ra akkouno ar anini non ena pwan chok ier.

24 Iwe non ewe fansoun pwe non ewe wanikken ierin muun ekkewe sou apung won ekkewe aramasen Nifai, mi wor ew sokkun chochon ekkewe chon rikino seni ekkewe aramasen Nifai, ekkewe mi wor rer ekkoch ier me mwen ar no ngeni ekkewe chon Leiman, me ra wata wor ewe iten ekkewe chon Leiman, me pwan ew sokkun chochon ekkewe ir ennetin mwirimwirin ekkewe chon Leiman, ra mwasangasangeta ne song me rer, are me ren ekkewe chon rikino, iei minne ra poputani ew maun ngeni pwir kewe.

25 Iwe ra fori nii manau me angemwan; iwe mwirin ra marsefan ngeni won ekkewe chuk, me non ewe fonu pon me neni mi monomon, ra opano inisir pwe resap tongeni pwá, ra angei ew kapach ngeni chochor iteiten ran, meinisin ekkewe chon rikino ra feino ngeni ir.

26 Iwe iei mwirin och fansoun, ewer, pwan mwo esap non ukukun chommong ier, ra winiti ew fokkun watten mwicheichen chon sona; iwe ra kutta meinisin ekkewe kokkot mi monomon an Katianton; iwe iei ra winiti chon sonan Katianton.

27 Iei nengeni, ekkei chon sona ra fori ennetin osukosuk, ewer, pwan mwo pochokunen kiteter me nein ekkewe aramasen Nifai, me pwan nein ekkewe aramasen ekkewe chon Leiman.

28 Iwe non ewe fansoun pwe a auchea pwe epwe wor ew kouno ngeni ei angangen kiteter; iei minne ra tinano ew mwichen sounfiun mwan mi pochokun non ewe fonu pon me won ekkewe chuk pwe repwe kutta ei mwichen chon sona, me pwe repwe nireno.

29 Nge nengeni, non ewe fansoun pwe non ena pwan chok ier ra su sefan pwan mwo ngeni pwisin fonuer kewe. Iwe iei a muchuno ewe wanikken ierin muun ekkewe sou apung won ekkewe aramasen Nifai.

30 Iwe non ewe fansoun non nepoputan ewe wanik me ewin ier ra feino sefan ne ungeni ei mwichen chon sona, me ra nieno chommong; me ra pwan chu me ren watten kiteter.

31 Iwe ra pwan echimw sefan ne niwiniu seni ewe fonu pon me seni ekkewe chuk ngeni pwisin fonuer kewe, pokiten fokkun watten chochon ekkewe chon sona ekkewe ra nom won ekkewe chuk me ewe fonu pon.

32 Iwe non ewe fansoun pwe iei a muchuno ei ier. Iwe ekkewe chon sona ra chok napeno me pochokununo, ina popun pwe ra ungeni unusen ekkewe sounfiun ekkewe chon Nifai, me pwan sounfiun ekkewe chon Leiman; iwe ra efisi ennetin nuokus epwe fis ngeni ekkewe aramas won unusen unungen ewe fonu.

33 Ewer, pun ra churi chommong kinikinin ewe fonu, me fori pochokunen kiteter ngeni ir; ewer, ra nieno chommong, me uweiano ekkoch ngeni fotek non ewe fonu pon, ewer, me akkaewin nour kewe fefin me nour kewe semirit.

34 Iei ei ennetin ngaw, minne a fis ngeni ekkewe aramas pokiten ar angangangaw, a amwasangereta sefan non achechemenien ewe Samon ar Kot.

35 Iwe iei a muchuno ewe wanik me ewin ierin muun ekkewe sou apung.

36 Iwe non ewe wanik me ruen ier ra poputa sefan ne monnuki ewe Samon ar Kot. Iwe non ewe wanik me unungatin ier ra poputa ne pochokununo non angangangaw. Iwe non ewe wanik me ruanun ier rese siwini eerenier kewe.

37 Iwe non ewe fansoun non ewe wanik me nimuen ier ra pochokununo me pochokununo non ar namanam tekia, me non ar fofforungaw; iwe iei ra mwukono sefan ngeni kiteter.

38 Iwe iei a muchuno ewe wanik me nimuen ier.