1 Mo nao i bin hapen long nambaseventi mo tu yia blong rul blong ol jaj se ol rao oli kam moa bigwan, i bigwan mekem se i gat ol wo truaot evri graon long medel blong evri pipol blong Nifae.

2 Mo hem i sikret grup blong ol stilman we i mekem wok ia blong prapa spolem gud samting mo mekem fasin nogud. Mo faet ia i stap long ful yia ia; mo long seventi mo nambatri yia hem i stap tu.

3 Mo i bin hapen se long yia ia Nifae i prea long Lod, i talem se:

4 “O Lod, no letem se pipol ia i ded tru long naef blong faet; be O Lod, long ples blong samting ia, letem i gat wan hadtaem blong kasem kaekae long graon, blong mekem olgeta oli tingbaot Lod, God blong olgeta, mo maet bae oli sakem sin mo tanem olgeta long yu.”

5 Mo olsem ia nao i bin hapen, folem ol toktok blong Nifae. Mo i gat wan bigfala hadtaem blong kasem kaekae long graon, long medel blong evri pipol blong Nifae. Mo olsem ia nao long seventi mo fo yia hadtaem blong kasem kaekae ia i bin gohed, mo wok ia blong prapa spolem gud samting i stop tru long naef blong faet, be i bin kam moa nogud tru long hadtaem blong kasem kaekae.

6 Mo wok ia blong fasin blong prapa spolem gud samting i bin gohed tu long seventi mo faef yia. From Lod i kilim graon mekem se i drae, mo i no karem wit long taem blong wit; mo Lod i panisim ful graon, long medel blong Ol Man blong Leman semmak olsem long medel blong Ol Man blong Nifae, mekem se hadtaem blong kaekae i kilim gud olgeta mo ol taosen oli bin ded long ol pat blong graon we oli gat moa nogud fasin.

7 Mo i bin hapen se ol pipol oli bin luk se kolosap bae oli ded from hadtaem blong kasem kaekae, mo oli stat blong tingbaot Lod, God blong olgeta; mo oli stat blong tingbaot ol toktok blong Nifae.

8 Mo ol pipol oli stat blong oli plis long ol jif jaj blong olgeta mo ol lida blong olgeta, blong oli talem long Nifae: “Luk, mifala i save se yu yu wan man blong God, mo from hemia, yu prea long Lod, God blong yumi blong hem i tanem i gowe long mifala hadtaem ia blong kasem kaekae, from nogud ol toktok we yu bin talem long saed blong bigfala panis we bae mifala i kasem, i hapen.”

9 Mo i bin hapen se ol jaj oli toktok long Nifae, folem ol toktok we ol pipol oli wantem. Mo i bin hapen se taem we Nifae i luk se ol pipol oli sakem sin mo oli putum tingting blong olgeta i stap daon, mo oli werem ol pua klos, hem i prea bakegen long Lod, i talem se:

10 “O Lod, luk ol pipol ia oli sakem sin; mo oli bin aotem grup blong Gadianton aot long medel blong olgeta inaf blong mekem se oli nomo gat, mo oli haedem ol sikret plan blong olgeta insaed long graon.

11 Nao, O Lod, from hemia, we tingting blong olgeta i stap daon, bae yu tanem kros blong yu i gowe, mo letem kros blong yu i harem gud long panis blong ol man nogud we yu bin panisim finis.

12 O Lod, bae yu tanem kros blong yu i gowe, yes, strongfala kros blong yu, mo mekem se hadtaem ia blong kasem kaekae i stop long graon ia.

13 O Lod, bae yu lisin long mi, mo mekem se i save hapen folem ol toktok blong mi, mo sendem ren i go long fes blong graon, blong hem i save karem frut blong hem, mo i karem wit blong hem long taem blong wit.

14 O Lod, yu bin lisin long ol toktok blong mi taem we mi talem: ‘Letem se i gat wan hadtaem blong kasem kaekae blong mekem se sik blong naef blong faet i save stop;’ mo mi save se, long taem naoia, bambae yu lisin long ol toktok blong mi, from yu bin talem se: ‘Sapos pipol ia i sakem sin bae mi letem olgeta oli stap laef.’

15 Yes, O Lod, mo yu stap luk we oli bin sakem sin, from hadtaem blong kasem kaekae mo sik mo panis we i kam long olgeta.

16 Mo nao, O Lod, ?bae yu tanem kros blong yu i gowe, mo traem bakegen blong luk sapos bae oli wok blong yu? Mo sapos i olsem, O Lod, yu save blesem olgeta folem ol toktok we yu bin talem finis.”

17 Mo i bin hapen se long nambaseventi mo sikis yia Lod i tanem kros blong hem i gowe long ol pipol, mo i mekem se ren i mas foldaon long graon, inaf blong mekem se graon i karem ol frut blong hem long taem blong frut blong hem. Mo i bin hapen se graon i karem wit blong hem long taem blong wit.

18 Mo luk, ol pipol oli hapi mo presem God, mo ful fes blong graon i bin fulap wetem fasin blong stap hapi; mo oli nomo lukaotem blong prapa spolem gud Nifae, be oli tekem hem olsem wan bigfala profet, mo wan man blong God, we i gat bigfala paoa mo atoriti we God i bin givim long hem.

19 Mo luk, Lihae, brata blong hem, i bin semmak nomo olsem hem long saed blong ol samting blong stret mo gud fasin.

20 Mo olsem ia nao i bin kam blong hapen se ol pipol blong Nifae oli stat blong kam antap gud bakegen long graon, mo oli bin stat blong stanemap ol emti ples blong olgeta, mo oli stat blong kam plante mo go evri ples, kasem taem we oli kavremap ful fes blong graon, long Not tugeta wetem long Saot, stat long solwota blong Wes kasem solwota blong Is.

21 Mo i bin hapen se nambaseventi mo sikis yia i en wetem pis. Mo nambaseventi mo seven yia i stat wetem pis; mo jos i go evri ples truaot long fes blong evri graon; mo bigfala pat long ol pipol, Ol Man blong Nifae tugeta wetem Ol Man blong Leman, oli stap long jos; mo oli gat pis we i bigwan tumas long graon; mo olsem ia nao nambaseventi mo seven yia i en.

22 Mo tu, oli gat pis long nambaseventi mo eit yia, be i gat sam rao long saed blong ol poen blong doktrin nomo we ol profet oli bin putum.

23 Mo long seventi mo naen yia i stat blong gat plante rao. Be i bin hapen se Nifae mo Lihae, mo plante long ol brata blong tufala we oli save long saed blong ol tru poen blong doktrin, oli kasem plante revelesen evri dei, from hemia, oli prij long ol pipol, i gogo kasem we ol pipol oli stopem ol rao blong olgeta long semfala yia ia.

24 Mo i bin hapen se long nambaeiti yia blong rul blong ol jaj ova long ol pipol blong Nifae, i gat samfala long olgeta we oli pulaot long ol pipol blong Nifae, we long plante ia i pas finis, oli go long Ol Man blong Leman, mo oli tekem long olgeta bakegen nem blong Ol Man blong Leman, mo tu, samfala long olgeta we oli tru laen blong Ol Man blong Leman, from olgeta ia oli tanem tingting blong ol pipol ia blong kros, o tru long olgeta we oli bin pulaot, from hemia, oli statem wan faet wetem ol brata blong olgeta.

25 Mo oli kilim man i ded mo stilim ol samting long taem blong faet; mo afta bae oli gobak long ol bigfala hil, mo long waelples mo ol sikret ples, oli haedem olgeta bakegen blong mekem se oli no save faenem olgeta, evri dei oli kasem moa long ol namba blong olgeta, i semmak olsem olgeta we oli pulaot we oli bin go long olgeta.

26 Mo olsem ia nao, i no longtaem, yes, we i no tekem plante yia nating, oli kam wan bigfala grup tumas blong ol stilman; mo oli lukaotem evri sikret plan blong Gadianton; mo olsem ia nao oli kam ol stilman blong Gadianton.

27 Nao luk, ol stilman ia oli mekem bigfala trabol, yes, we i wan bigfala fasin blong prapa spolem gud ol pipol blong Nifae, mo tu, ol pipol blong Ol Man blong Leman.

28 Mo i bin hapen se i gat nid se ol pipol oli stopem wok ia blong fasin blong prapa spolem gud ol man mo samting; from hemia, oli sendem wan ami blong ol strong man i go long waelples mo long ol bigfala hil blong lukaotem grup ia blong ol stilman, mo blong kilim olgeta oli ded.

29 Be luk, i bin hapen se long sem yia ia ol stilman oli ronem olgeta oli gobak long ol graon blong olgeta bakegen. Mo olsem ia nao nambaeiti yia blong rul blong ol jaj ova long ol pipol blong Nifae i bin en.

30 Mo i bin hapen se long stat blong namba-eiti mo fas yia, oli go bakegen agensem grup ia blong ol stilman, mo oli kilimded plante; mo olgeta tu oli lusum plante long olgeta.

31 Mo bakegen oli mas kamaot long waelples, mo aot long ol bigfala hil, oli gobak long ol graon blong olgeta, from bigfala namba tumas blong ol stilman we oli stap long ol bigfala hil mo waelples.

32 Mo i bin hapen se olsem ia nao yia ia i bin en. Mo ol stilman oli gohed blong kam plante mo wok strong, inaf we i mekem se oli stanap strong agensem ol ful ami blong Ol Man blong Nifae, mo tu, blong Ol Man blong Leman; mo oli mekem se bigfala fraet i kam long ol pipol long ful fes blong graon.

33 Yes, from oli visitim plante ples blong graon, mo oli prapa spolem gud olgeta bigwan; yes, oli kilimded plante, mo oli tekem plante narafala oli go prisena long waelples, yes, mo plante long olgeta nao oli ol woman blong olgeta mo ol pikinini blong olgeta.

34 Nao bigfala nogud fasin ia, we i kam long ol pipol from nogud fasin blong olgeta, i bin tanem tingting blong olgeta bakegen blong tingbaot Lod, God blong olgeta.

35 Mo olsem ia nao nambaeiti mo fas yia blong rul blong ol jaj i bin en.

36 Mo long nambaeiti mo tu yia oli stat bakegen blong fogetem Lod, God blong olgeta. Mo long eiti mo tri yia oli stat blong kam strong long nogud fasin. Mo long nambaeiti mo fo yia oli no stretem ol fasin blong olgeta.

37 Mo i bin hapen se long nambaeiti mo faef yia, oli kam moa strong mo strong moa long hae tingting blong olgeta, mo long fasin nogud blong olgeta; mo olsem ia nao oli bin kam raep bakegen blong kasem panis.

38 Mo olsem ia nao nambaeiti mo faef yia i bin en.