1 Ut chi jo’kan naru naqak’e reetal chanru xmajelaleb’, ut chanru ajwi’ na’eek’asiman xch’ooleb’ li ralal xk’ajoleb’ li winq; relik chi yaal, naru naqil naq li Qaawa’ rik’in xnimal lix chaab’ilal maak’a’ roso’jik narosob’tesiheb’ ut naxk’e chi usaak li ani neke’xkanab’ rib’ chiru.

2 Relik chi yaal, ut naru naqil sa’ li kutan ajwi’ naq naxk’e chi usaak lix tenamit, relik chi yaal, rik’in xtamikeb’ lix ch’och’, lix ketomqeb’ ut lix teepeb’ chi xul, ut rik’in oor, ut rik’in plaat, ut rik’in k’iila paay li k’a’ru terto xtz’aq, li junjunq paay ut xyiib’ankil wan; rik’in xkolb’aleb’ xyu’am, ut xkolb’aleb’ chaq sa’ ruq’eb’ li xik’ neke’ilok reheb’; rik’in xq’unob’resinkil xch’ooleb’ li xik’ neke’ilok reheb’, re naq ink’a’ te’ok sa’ pleet rik’ineb’; relik ut chi yaal, rik’in xb’aanunkil chixjunil li k’a’aq re ru choq’ re xchaab’ilal ut xsahil xch’ool lix tenamit; relik chi yaal, a’an ajwi’ li kutan naq neke’xkawob’resi li raameb’, ut neke’sach sa’ xch’ool li Qaawa’ lix Dios, ut neke’xyeq’i li Santil Dios rub’el roqeb’—relik chi yaal, ut a’in xb’aan xmaak’a’il xch’a’ajkilaleb’, ut li usaak chi numtajenaq nim li neke’xk’ul.

3 Ut chi jo’kan naqil naq wi li Qaawa’ ink’a’ naxq’useb’ lix tenamit rik’in k’iila ch’a’ajkilal, relik chi yaal, wi ink’a’ narula’aniheb’ rik’in kamk ut rik’in nimla xiw, ut rik’in we’ej ut rik’in li k’iila paay chi yajel, a’an ink’a’ taajultiko’q reheb’.

4 Aay, k’a’jo’ xmajelal xna’leb’eb’, ut k’a’jo’ xjo’maajo’ileb’, ut k’a’jo’ xmaa’usilaleb’, ut rajtzahileb’, ut k’a’jo’ xseeb’aleb’ li ralal xk’ajoleb’ li winq chixb’aanunkil li maa’usilal, ut k’a’jo’ naq timileb’ chixb’aanunkil li chaab’il; relik chi yaal, k’a’jo’ xseeb’aleb’ chi ab’ink chiru raatin li maa’us, ut chixk’eeb’aleb’ xch’ool chirix li jo’maajo’il k’a’aq re ru re li ruchich’och’!

5 Relik chi yaal, k’a’jo’ xseeb’aleb’ chi taqsiik sa’ li q’etq’eetil; relik chi yaal, k’a’jo’ xseeb’aleb’ chixnimankil rib’ xjunes, ut chixb’aanunkil k’iila paay li k’a’ru maa’usilal, ut k’a’jo’ naq timileb’ chi jultiko’k reheb’ li Qaawa’ lix Dios, ut chixk’eeb’aleb’ xxik chirab’inkil li na’leb’ naxk’e, relik chi yaal, k’a’jo’ naq timileb’ chi b’eek sa’ xb’ehil li chaab’il na’leb’!

6 K’ehomaq reetal, ink’a’ neke’raj naq li Qaawa’ lix Dios, li kiyo’ob’tesink chaq reheb’, taataqlanq ut taa’awa’b’ejinq sa’ xb’eeneb’; us ta nim xchaab’ilal ut ruxtaan choq’ reheb’, neke’xk’ul chi yal jo’maajo’ li na’leb’ naxk’e, ut ink’a’ neke’raj naq taawanq a’an chi k’amok b’e chiruheb’.

7 Aay, k’a’jo’ xmaak’a’ileb’ li ralal xk’ajoleb’ li winq; relik chi yaal, moko wankeb’ ta xwankil yal ta jo’ lix poqsil li ch’och’.

8 Xb’aan naq k’ehomaq reetal, lix poqsil li ch’och’ nanume’ chi junpak’al ut chi junpak’al chik, re xjachb’al rib’ sa’ xyi, naq taqlanb’il xb’aan li qanimla Dios li junelik nawan.

9 Relik chi yaal, k’ehomaq reetal naq rik’in xyaab’ xkux a’an, li tzuul ut li b’ool neke’chiq’chot ut neke’hiikan.

10 Ut rik’in xwankil lix yaab’ xkux neke’kana chi jorb’il, ut neke’ch’anaak ru, relik chi yaal, chanchan ajwi’ jun ru taq’a.

11 Relik chi yaal, rik’in xwankil lix yaab’ xkux nachiq’ok chixjunil li ch’och’;

12 Relik chi yaal, rik’in xwankil lix yaab’ xkux, nachiiq’an li k’ojob’anb’il wi’, toj tz’aqal sa’ xyi.

13 Relik chi yaal, wi ut a’an tixye re li ruchich’och’—Chatnume’q—nanumsiik.

14 Relik chi yaal, wi a’an tixye re li ruchich’och’—Tatsutq’iiq chawix, re taanajto’q ru li kutan chiru k’iila hoonal—nab’aanuman;

15 Ut chi jo’kan, jo’ chanru li raatin li ruchich’och’ nasutq’i chirix, ut chiru li winq chanchan naq ink’a’ nab’eek li saq’e; relik chi yaal, ut k’ehomaq reetal, jo’kan wan; xb’aan naq ch’olch’o naq a’an li ruchich’och’ li nab’eek, ut ink’a’ li saq’e.

16 Ut k’ehomaq ajwi’ reetal, wi a’an tixye re xha’il li nimla chamal ha’—chatchaqiq—nab’aanuman.

17 K’ehomaq reetal, wi a’an naxye re li tzuul a’in—Chattaqsiiq, ut chatnume’q ut chatt’ane’q sa’ xb’een li tenamit a’an re taamuqmanq—k’ehomaq reetal nab’aanuman.

18 Ut k’ehomaq reetal, wi jun li winq tixmuq jun b’ihomal sa’ li ch’och’, ut li Qaawa’ tixye—Chimajewaaq a’an, xb’aan xmaa’usilal li xmuquk chaq re—k’ehomaq reetal, namajewaak.

19 Ut wi li Qaawa’ tixye—Chatmajewaaq, re naq maajun winq taatawoq aawe chalen chaq sa’ li kutan a’in toj chi junelik—k’ehomaq reetal, maajun winq nak’uluk re chalen chaq sa’ li kutan a’in toj chi junelik.

20 Ut k’ehomaq reetal, wi li Qaawa’ tixye re jun li winq—Xb’aan laa maa’usilal, tatmajewaaq chi junelik—taab’aanumanq.

21 Ut wi li Qaawa’ tixye—Xb’aan aamaa’usilal tat-isiiq chaq chiwu—tixk’e chi uxmank chi jo’kan.

22 Ut rahilal sa’ xb’een li ani aj-e tixye a’in, xb’aan naq taa’uxmanq re li taa’ajoq re xb’aanunkil li maa’usilal, ut ink’a’ naru nakole’ a’an; jo’kan ut, xb’aan a’in, re naq taaruuq te’kole’q li winq, xch’olob’aman li jalb’a-k’a’uxlej.

23 Jo’kan ut, osob’tesinb’ileb’ li te’xjal xk’a’uxl ut te’ab’inq chiru xyaab’ xkux li Qaawa’ lix Dios; xb’aan naq a’aneb’ a’in li te’kole’q.

24 Ut li Dios chixk’ehaq, sa’ xnimal lix tz’aqalil ru, naq te’k’ame’q li winq sa’ li jalb’a-k’a’uxlej ut li chaab’il k’anjel, re naq taaruuq te’k’ojob’aaq wi’chik sa’ li usilal choq’ reeqaj li usilal, jo’ chanru xk’anjeleb’.

25 Ut nawaj raj naq chixjunileb’ li winq te’ruuq chi kole’k. A’b’anan naqil chi tz’iib’anb’il naq sa’ li xnimal ru ut roso’jikil kutan te’wanq ani li te’isiiq chaq, relik chi yaal, li te’tz’eqe’q chaq chiru li Qaawa’;

26 Relik chi yaal, li te’k’ehe’q sa’ jun wanjik re rahilal maak’a’ roso’jik, re xtz’aqob’resinkil ru li aatin li naxye: Eb’ li ke’b’aanunk re li us te’wanq lix yu’am li junelik taakanaaq; ut eb’ li ke’b’aanunk re li ink’a’ us te’wanq lix tojb’a-maak li junelik taakanaaq. Ut jo’kan naq wan. Amen.