1 Iwe iei non ewe fansoun non ewe wanik me wonuen ier, ekkewe chon Nifai ra chok nonnom non fofforungaw, ewer, non unusen fofforungaw, nupwen ekkewe chon Leiman ra tichik ne achocho ne aneasochisi ekkewe annukun Kot, anongonong won ewe annukun Moses.

2 Iwe non ewe fansoun pwe non ei ier mi wor emon Samuel, emon chon Leiman, a feito non ewe fonuen Saraemla, me poputa ne afanafan ngeni ekkewe aramas. Iwe non ewe fansoun pwe a afanafan, chommong ran, aier ngeni ekkewe aramas, iwe ra aturau i, iwe ita epwene niwin ngeni pwisin fonuan we.

3 Nge nengeni, mongungun ewe Samon a feito ren, pwe i epwe niwin sefan, me osini ngeni ekkewe aramas met chok mettoch epwe tonong non netipan.

4 Iwe non ewe fansoun pwe rese mutata pwe i epwe tonong non ewe teninimw; iei minne a feino me tota won tittin we, me eitieu poun me sio ren ew neuwomongun mongungu, me osini ngeni ekkewe aramas met chok mettoch ewe Samon a wanong non netipan.

5 Iwe a apasa ngeni ir: Nengeni, ngang, Samuel, emon chon Leiman, ua apasa ekkewe kapas an ewe Samon minne a wanong non netipei; iwe nengeni a wanong non netipei pwe upwe apasa ngeni ekkei aramas pwe ewe ketinasen pungoch a ittiw won ekkei aramas; iwe fopuku ier ese mwo wesino tiwenon chok ewe ketinasen pungoch epwe turutiw won ekkei aramas.

6 Ewer, watten kiteter a ewitiwiti ekkei aramas, me a ennetin fis ngeni ekkei aramas, iwe ese wor mettoch a tongeni angasa ekkei aramas tiwenon chok ika epwe aier me nuku non ewe Samon Jises Kraist, ewe epwe ennetin wareto ngeni ewe fonufan, me epwe riaffouni chommong mettoch me epwe ninnino fan iten ekkei aramas.

7 Iwe nengeni, emon chon nangin ewe Samon a fen affata ngeniei, me a fen wato porousen pwapwa ngeni nguni. Iwe nengeni, ua titito ngenikemi pwe upwe pwan affata ngenikemi, pwe oupwe tongeni angei porousen pwapwa; nge nengeni ouse etiwaei.

8 Iei minne, iei anon ewe Samon: Pokiten pochokunen netipen ekkewe aramasen chon Nifai, tiwenon chok ika repwe aier upwe angeiano ai kapas seni ir, iwe upwe angeisefan Nguni seni ir, iwe usap chiwen engino ngeni ir, iwe upwe akunnu netipen pwir kewe ngeni ir.

9 Iwe fopuku ier esap wesino me mwen upwe efisi pwe repwe wichiwich; ewer, upwe churir ren ewe ketinas me ren nengita me ren samau.

10 Ewer, upwe churir non ai song mi pochokun, iwe epwe wor ekkewe ir seni ewe aruwanun tappin fansoun ekkewe repwe manau, seni ekkewe chon koum ngenikemi, pwe repwe kuna ami unusen kiteter; iwe ei epwe ennetin fis tiwenon chok ika oupwe aier, anon ewe Samon; iwe ekkewe seni ewe aruwanun tappin fansoun repwe churi ami kiteter.

11 Nge ika oupwe aier me niwin ngeni ewe Samon ami Kot upwe akunnano ai song, anon ewe Samon; ewer, iei anon ewe Samon, feioch ir ekkewe repwe aier me kunuto ngeniei, nge riaffou ngeni i ewe esap aier.

12 Ewer, riaffou ngeni ei teninimwen Saraemla mi napanap; pun nengeni, pokiten ir ekkewe mi tupwon ina popun a tumun; ewer, riaffou ngeni ei teninimw mi napanap, pun ua weweiti, anon ewe Samon, pwe mi wor chommong, ewer, pwan mwo watten kinikinin ei teninimw mi napanap, repwe apochokunano netiper ngeniei, anon ewe Samon.

13 Nge feioch ir ekkewe repwe aier, pun ir upwe angaser. Nge nengeni, ika esap ren ekkewe mi tupwon ekkewe ra nom non ei teninimw mi napanap, nengeni, upwe efisi pwe ekkei epwe feitiw seni nang me atano.

14 Nge nengeni, pun fan asengesin ekkewe mi tupwon ina popun a tumun. Nge nengeni, ewe fansoun a feito, anon ewe Samon, pwe nupwen oupwe aturau ekkewe mi tupwon me neimi, iwe mwirin oupwe mwukono ngeni kiteter; ewer, riaffou epwe ngeni ei teninimw mi napanap, pokiten ewe fofforungaw me angang mi anieput minne ra nom non.

15 Ewer, me riaffou epwe ngeni ewe teninimwen Gideon, pokiten ewe fofforungaw me angang mi anieput minne ra nom non.

16 Ewer, me riaffou epwe ngeni ekkewe teninimw meinisin minne ra nom non ewe fonu mi rokopwanieno, minne ra masow me ren ekkewe chon Nifai, pokiten ewe fofforungaw me angang mi anieput minne ra nom non ir.

17 Iwe nengeni, ew anumamau epwe feito won ewe fonu, anon ewe Samonun Mwicheichen Aramas, pokiten asengesin ekkewe aramas ra nom won ewe fonu, ewer, pokiten ar fofforungaw me ar angang mi anieput.

18 Iwe ewe fansoun epwe feito, anon ewe Samonun Mwicheichen Aramas, ewer, ach Kot mi napanap me ennet, pwe ion chok epwe opano pisek mi auchea non ewe puun esap chiwen kuner sefan, pokiten pochokunen anumamauen ewe fonu, tiwenon chok ika epwe emon aramas mi tupwon me epwe opano ngeni ewe Samon.

19 Pun ua mochen, anon ewe Samon, pwe repwe opano ar pisek mi auchea ngeniei; iwe anumamau ir ekkewe resap opano ar pisek mi auchea ngeniei; pun ese wor emon a opano ar pisek mi auchea ngeniei tiwenon chok ika epwe ekkewe mi tupwon; iwe i ewe esap opano an pisek mi auchea ngeni, anumamau i, me pwan ewe pisek mi auchea, iwe esap wor emon epwe angeisefani pokiten anumamauen ewe fonu.

20 Iwe ewe ran epwe feito pwe repwe opano ar kewe pisek mi auchea, pokiten ra fen wata netiper won pisekisek; iwe pokiten ra fen wata netiper won ar kewe pisekisek, iwe repwe opano ar pisek mi auchea nupwen repwe su me mwen ekkewe chon koum ngeni ir; pokiten resap opareno ngeniei, anumamau ir me pwan ar kewe pisek auchea; iwe non ena ran repwe wichiwich, anon ewe Samon.

21 Nengeni ami, ekkewe aramasen ei teninimw mi napanap, me ausening ngeni ai kewe kapas; ewer, ausening ngeni ekkewe kapas minne ewe Samon a apasa; pun nengeni, a apasa pwe oua anumamau pokiten ami kewe pisekisek, me pwan ami kewe pisekisek ra anumamau pokiten oua fen wata netipemi wor, me ouse ausening ngeni ekkewe kapas an i ewe a ngenikemi.

22 Ouse chechemeni ewe Samon ami Kot non ekkewe mettoch ren minne a fen efeiochukemi, nge oua chechemeni ami pisekisek fansoun meinisin, ouse chechemeni ami oupwe kinisou ngeni ewe Samon ami Kot fan iter; ewer, netipemi rese no ngeni ewe Samon, nge ra ureno ren unusen namanam tekia, ngeni nuapas, me ngeni wachemukenon song, nonowo, anini, mochenin efeiengaw, ninni, me nii manau, me sokopaten angangangaw meinisin.

23 Pun ei popun ewe Samon Kot a efisi pwe ew anumamau epwe feito won ewe fonu, me pwan won ar kewe pisekisek, iwe ei pokiten ami kewe angangangaw.

24 Ewer, riaffou ngeni ekkei aramas, pokiten ei fansoun minne a wareto, pwe oua aturau ekkewe soufos, me oua turunufaser, me monei ngeni ir fau, me oua nireno, me fori sokopaten angangangaw ngeni ir, pwan mwo usun ra fori me nom.

25 Iwe iei nupwen oua porous, oua apasa: Ika ranich kewe ra fen fis me non ranin semach kewe me nom, sisap fen nieno ekkewe soufos; sisap fen monei ngeni ir fau, me aturareu.

26 Nengeni oua fen kon ngaw nap seni ir; pun usun ewe Samon mi manau, ika emon soufos a feito neimi me afanafana ngenikemi ewe kapasen ewe Samon, minne a pwarata usun ami tipis me angangangaw, oua song ren, me aturau i me kutta sokopaten napanap pwe oupwe nieno i; ewer, oupwe apasa pwe i emon soufos mi muan, me pwe i emon chon tipis, me seni ewe tefin, pokiten a pwarata pwe ami angang mi ngaw.

27 Nge nengeni, ika emon aramas epwe feito neimi me epwe apasa: Fori ei, iwe ese wor angangangaw; fori enan me ousap riaffou; ewer, i epwe apasa: Fetan mwirin namanamen tekian pwisin netipemi; ewer, fetan mwirin namanamen tekian ne mesemi, me fori met chok netipemi a mochen—me ika emon aramas epwe feito neimi me apasa ei, oupwe etiwa i, me apasa pwe i emon soufos.

28 Ewer, oupwe seikata, iwe oupwe ngeni i seni pisekimi kewe; oupwe ngeni i seni noumi gold, me seni noumi silver, me oupwe aufoufa i ren uf mi watte niwinin; iwe pokiten a apasa kapas mi eingeing ngenikemi, me a apasa pwe mettoch meinisin mi murino, iwe ousap kuna muan ren.

29 O ami ei tappin aramas mi ngaw me tipeforea; ami aramas mi pochokun me ami mi nukumach, ifa tamen ami oupwe ekieki pwe ewe Samon epwe engino ngeni kemi? Ewer, ifa tamen ami oupwe mutata inisimi pwe oupwe emmwen me ren emmwen mi puch me chun? Ewer, ifa tamen ami oupwe finata rochopwak nap seni saram?

30 Ewer, nengeni, songen ewe Samon a fen poputa ngeni ir; nengeni, a fen anumamaua ewe fonu pokiten ami angangangaw.

31 Iwe nengeni, ewe fansoun a wareto pwe a anumamaua ami pisekisek, pwe repwe mitino, pwe ousap tongeni amwochur; iwe non ekkewe ranin ami woungaw ousap tongeni annomur.

32 Iwe non ekkewe ranin ami woungaw oupwe sio ngeni ewe Samon; iwe non namotmwan oupwe sio, pun ami tatakis a fen feito womi, me ami kiteter a fen ennetin foruno; iwe mwirin oupwe kechiw me pupuchor non ena ran, anon ewe Samonun Mwicheichen Aramas. Iwe mwirin oupwe noninen, me apasa:

33 O amo ua fen aier, me use fen nieno ekkewe soufos, me monei ngeni ir fau, me aturareu. Ewer, non ena ran oupwe apasa: O amo sifen chechemeni ewe Samon ach Kot non ewe ran i a ngenikich ach pisekisek, iwe resap fen mitino pwe resap poutuno senikich; pun nengeni, ach kewe pisekisek ra no senikich.

34 Nengeni, sia isetiw ew pisekin angang ikei iwe non ewe soran ese chiwen nom; iwe nengeni, nouch kewe ketinas ra ono senikich non ewe ran sia kutter ren maun.

35 Ewer, sia fen opano ach pisek mi auchea iwe ra fen mitino senikich, pokiten ewe anumamauen ewe fonu.

36 O amo sia fen aier non ewe ran ewe kapasen ewe Samon a feito ngenikich; pun nengeni ewe fonu a anumamau, iwe mettoch meinisin ra mitino, iwe sise tongeni amwochur.

37 Nengeni, sia rokopwanino me ren ngun mi ngaw, ewer, sia rokopwanino me ren ekkewe chon nangin i ewe a kutta pwe epwe atano ngunuch. Nengeni, ach angangangaw ir mi ennet. O Samon, kose tongeni akunnano om song senikem? Iwe epwe iei ami kapas non ekkena ran.

38 Nge nengeni, ami kewe ranin sossot ra fen wesino; oua fen ammangano ewe ranin ami amanau tori an mang esemuch, iwe ami kiteter a fen ennetin foruno; ewer, pun oua fen kutta non meinisin ranin manauemi met minne ouse tongeni angei; me oua fen kutta pwapwa non fori angangangaw, minne mettoch mi ungeni auchean ewe wenechar minne mi nom non ach we Mokurenap mi Nap me Esemuch.

39 O ami aramasen ewe fonu, amo pwe oupwe rongorong ai kewe kapas! Iwe ua iotek pwe songen ewe Samon epwe kunnuno senikemi, me pwe oupwe mochen aier me manau.