1 Iwe iei non ewe fansoun pwe Samuel, ewe chon Leiman, a osini fokkun pwan chommong mettoch minne rese tongeni makketiw.

2 Iwe nengeni, a apasa ngeni ir: Nengeni, ua ngenikemi ew esisin; pun pwan nimu ier repwe feito, iwe nengeni, mwirin a wareto ewe Noun Kot pwe epwe angasa meinisin ekkewe repwe nuku non itan we.

3 Iwe nengeni, ei upwe ngenikemi pwe epwe ew esisin atun ewe fansoun an wareto; pun nengeni, epwe wor saram chapur non nang, ina popun pwe non ewe pwinin me mwen an wareto esap wor rochopwak, non ukukun pwe usun me ren aramas pwe neran.

4 Iei minne, epwe wor ew ran me ew pwin me ewe ran, usun ita pwe ir ew chok ran me ese wor pwin; iwe ei epwe ngenikemi pwe ew esisin; pun oupwe sinei usun totan ewe akkar me pwan tupunon we; iei minne repwe sinei usun ennetin pwe epwe wor ru ran me ew pwin; nge inamo ewe pwin esap rochono; iwe epwe ina ewe pwin me mwen epwe uputiw.

5 Iwe nengeni, epwe wor efou fu sofo epwe pwato, efou sokkun ouse kukuna akkom; iwe ei epwe pwan ew esisin ngenikemi.

6 Iwe nengeni esap ikkei meinisin, epwe chommong esisin me manaman non nang.

7 Iwe ewe fansoun epwe feito pwe ami meinisin oupwe ingeno, me mairu, ina popun pwe oupwe turuno ngeni ewe puun.

8 Iwe ewe fansoun epwe feito pwe ion chok epwe nuku non ewe Noun Kot, i ewe pwan chok epwe angei manau esemuch.

9 Iwe nengeni, iei ewe Samon a fen annuku ngeniei, me ren noun chon nang, pwe upwe feito me apasa ekkei mettoch ngenikemi; ewer, a fen annuku pwe upwe osini ekkei mettoch ngenikemi; ewer, a fen apasa ngeniei: Sio ngeni ekkei aramas, aier me amonnata ewe aanen ewe Samon.

10 Iwe iei, pokiten ngang emon chon Leiman, me ua fen apasa ngenikemi ekkewe kapas minne ewe Samon a fen annuku ngeniei, me pokiten a weires ngenikemi, oua song rei me kutta pwe oupwe nieino, me oua fen oturaeiu me neimi.

11 Iwe oupwe rongorong ai kewe kapas, pun, ren ei popun ua fen tota won ekkewe tittin ei teninimw, pwe oupwe tongeni rong me sinei usun ekkewe kapungun Kot minne ra awitiwiti kemi pokiten ami angangangaw, me pwan pwe oupwe tongeni sinei ekkewe apungupungun aier;

12 Me pwan pwe oupwe tongeni sinei usun wareton Jises Kraist, ewe Noun Kot, ewe Semen nang me semen fonufan, ewe Chon Fori mettoch meinisin seni nepoputan; me pwe oupwe tongeni sinei usun ekkewe esisinen an wareto, ren ewe popun pwe oupwe tongeni nuku non itan we.

13 Iwe ika oupwe nuku non itan we oupwe aier seni ami kewe tipis meinisin, ren ewe popun oupwe angei omusomuser me non an kewe nimenimochun foffor.

14 Iwe nengeni, sefan, pwan ew esisin ua ngenikemi, ewer, ew esisinen an we mano.

15 Pun nengeni, i epwe ennetin mano pwe amanau epwe fis; ewer, mi namot seni i me auchea pwe i epwe mano, pwe epwe efisi ewe manausefanin ekkewe mi mano, ren ewe popun pwe aramas repwe tongeni emmwenito me mwen mesen ewe Samon.

16 Ewer, nengeni, ei mano a efisi ewe manausefan, me angasa aramas meinisin seni ewe aewin mano—ewe manon ngun; pokiten aramas meinisin, me ren turutiwen Adam we ra pokupokuno seni me mwen mesen ewe Samon, ra nom non nikinikin mano, ren mettochun fonufan me pwan ren mettochun ngun.

17 Nge nengeni, ewe manausefanin Kraist a angasa aramas, ewer, pwan me aramas meinisin, me uweireto sefan ngeni ne mesen ewe Samon.

18 Ewer, me a efisi ewe apungupungun aier, pwe ion chok epwe aier i ewe pwan chok esap pokupokutiw me katurunong non ewe ekkei; nge ion chok esap aier epwe pokupokutiw me katurunong non ewe ekkei; iwe epwe feito sefan wor ew manon ngun, ewer, ew aruwen mano, pun ra pokupokuno sefan ren mettochun wenechar.

19 Iei minne oupwe aier, oupwe aier, ren nuokusun pwe ren ami sinei ekkei mettoch me ouse fori ir oupwe mutata inisimi an epwe nom fan kapung, iwe oupwe turutiw fan ei aruwen mano.

20 Nge nengeni, usun ua apasa ngenikemi usun pwan ew esisin, ew esisinen an we mano, nengeni, non ena ran pwe i epwe riaffouni mano ewe akkar epwe rochono me esap mochen asarama an saram ngonuk; me pwan ewe maran me ekkewe fu; iwe esap wor saram won unungen ei fonu, pwan mwo seni ewe fansoun i epwe riaffouni mano, ren ukukun unungat ran, tori ewe fansoun i epwe manausefan seni mano.

21 Ewer, atun ewe fansoun pwe i epwe fangeta ewe ngun epwe wor chopunap me inefi ren ukukun chommong awa, iwe ewe puun epwe chechech me chung; me ekkewe achaw minne ra nom won unungen ewe puun, minne ra nom won ewe pun me pwan fan, minne ami mi sinei atun ei fansoun pwe ir mi unusoch, are watten kinikinin mi ew unusochun wachemuken achaw, epwe tatakis;

22 Ewer, repwe keimufesen non ruepek, iwe mwirinon me feinfeino epwe pwá non mwokufesen me nangefesen, me non tatakisin kinikin me won unungen unusen fonufan, ewer, won nang me pwan fan.

23 Iwe nengeni, epwe wor pochokunen monumon, iwe epwe wor chommong chuk repwe sonosonochuno, usun ew nemonun chuk, iwe epwe wor chommong neni minne iei ir mi iteni nemonun chuk repwe winiti chuk, taman epwe fokkun tekia.

24 Iwe chommong aanenap repwe tatakis, me chommong teninimw repwe ponnuno.

25 Iwe chommong peias repwe suk, me repwe fangeta chommong ar kewe mi mano; iwe chommong souneng repwe pwá ngeni chommong.

26 Iwe nengeni, iei ewe chon nang a apasa ngeniei; pun a apasa ngeniei pwe epwe wor chopunap me inefi ren ukukun chommong awa.

27 Iwe a apasa ngeniei pwe nupwen ewe chopunap me ewe inefi epwe soposopono, me ewe monumon, pwe ekkei mettoch repwe fis, me rochopwak epwe pwonano unungen unusen fonufan ren ukukun unungat ran.

28 Iwe ewe chon nang a apasa ngeniei pwe chommong repwe kuna mettoch mi amwarar nap seni ekkei, ren ewe popun pwe repwe tongeni nuku pwe ekkei esisin me ekkei manaman repwe fis won unusen unungen ei fonu, ren ewe popun pwe esap wor popun nukunukumang me nein ekkewe noun aramas—

29 Iwe ei ren ewe popun pwe ion chok epwe nuku epwe tongeni manau, iwe pwe ion chok esap nuku, ew kapung mi wenechar epwe tongeni feito wor; me pwan ika ra tipis repwe wata pwisin won inisir ar pwisin kapung.

30 Iwe iei chechemeni, chechemeni, ami pwi, pwe ion chok epwe mano non ngun, epwe mano non ngun ngeni pwisin inisin; iwe ion chok a fori angangangaw, a fori ngeni pwisin inisin; pun nengeni, ami mi ngaseno; ami mi mumuta ne foffor fan pwisin asengesimi; pun nengeni, Kot a fen ngenikemi ew mirit me a fen forikemi pwe oupwe ngaseno.

31 A fen ngenikemi pwe oupwe tongeni sinei öch seni ngaw, me a fen ngenikemi pwe oupwe tongeni finata manau are mano; iwe oua tongeni fori öch me niwin ngeni met minne mi öch, are angei met minne mi öch epwe niwin ngenikemi; are oua tongeni fori ngaw, me angei met minne mi ngaw epwe niwin ngenikemi.