1 Áádóó kʼad nááná Samuel, Laman bidineʼé nilíinii, ląʼígo náásgóó ádahodooníłígíí yaa nááhoolneʼ éí éí doo bikááʼ náájiyóozóóh átʼéii da.

2 Jó áádóó, iiłní: Jó, bee ééhózinii łaʼ nihił ííshją́ą́ áshłééh; ashdlaʼ nináádoohah, jó áádóó, Diyin God biyeʼ doogááł tʼáá ałtso bízhiʼ dayoodlánígíí shónéidoołtʼééł.

3 Jó áádóó, díí bee ééhózinii nihił ííshją́ą́ ádeeshłííł áadi níyáago; jó áko, yádiłhił biyiʼ ayóó bitsʼádaʼdeezdíin dooleeł, áko índa díí tłʼééʼ yigháahgo doo chahodoołhił da, áko índa diné bichʼįʼgo éí tʼóó jį́ dooleeł.

4 Éí bąą, łaʼ ajį́ dóó łaʼ atłʼééʼ dóó łaʼajį́ adooleeł, áko átʼáo tʼááłaʼajíní dooleeł dóó tłʼéʼę́ę éí ádin dooleeł nahalin; dóó díí éí bee ééhózinii nihichʼįʼ kólyaii átʼée dooleeł; jóhonaaʼéí hanádááh dóó anádaahgo nihił bééhózin dooleeł; éí bąą tʼáá aaníí bił béédahózin dooleeł naaki jį́ dóó łaʼ atłʼééʼ áhóótʼįįdígíí; ákótʼée ndi łaʼ atłʼééʼ éí doo chahodoołhił da; dóó yiską́ bidiʼdoochíiłgo bitłʼééʼ kódoonííł.

5 Jó áádóó, sǫʼ ániidígíí łaʼ hadoogááł, éí sǫʼ tsʼídá tʼah doo daoohłtséhígíí; dóó díí ałdóʼ bee ééhózinii hádasídóoʼį́įʼ dooleeł.

6 Jó áádóó díí éí doo ałtso da, tʼóó ahayóí ałʼąą átʼéego bee éédahózinii dóó ayóó ádaatʼéii yá biyiʼ.

7 Áádóó tʼáá ánółtso bee nihiyaa hodiʼdoolyis, dóó nihił ayóó ádahodoonííł, áko niʼjįʼ adínóodah.

8 Áádóó tʼáá háíshį́į́ Diyin God biyeʼ yoosdląądígíí, éí hoolʼáágóó iiná baa doolyééł.

9 Jó áádóó, ákótʼéego Bóhólníihii kóshiłníigo, bá naalʼaʼii yee shił dahaneʼgo, baa díínááł dóó díí bee bił hodíílnih shidííniid; aooʼ, díí tʼáadoo leʼé náásgóó ádahodooníłígíí baa hodíílnih shidííniid; aooʼ, kóshidííniid: Yéigo hodiitsʼaʼgo díí diné, niheʼiinaʼ łahgo áńdaahdlééh dóó Bóhólníihii doogáłígíí bibaʼ hashtʼeʼádadółnééh bididííniił shidííniid.

10 Dóó kʼad, Laman bidineʼé nishłínígíí biniinaa, dóó Bóhólníihii saad yee shił hoolneʼígíí bee nihichʼįʼ haasdzííʼ, dóó bikeʼeshchʼíiʼgo nihikʼijįʼ haadzíʼígíí biniinaa, shichʼįʼ nihá dahachįʼ dóó dadiyiilyééł dashíínóhʼní, dóó nihitahdóó chʼídashininoołchą́ą́ʼ.

11 Shizaad dadidoohtsʼį́į́ł, háálá, díí biniiyé díí tsé kinshijaaʼígíí binázʼáhígíí bikááʼ hasisnaʼ, Diyin God bibee ánihwiitʼaahii dadidoohtsʼį́į́ł dóó nihił béédahodoozįįł biniiyé éí bąąhági ádadoohníłígíí biniinaa nihibaʼ, dóó ałdóʼ iiná łahgo áńdaalnéhígíí bídadéétʼiʼígíí nihił béédahodoozįįł biniiyé.

12 Dóó ałdóʼ díí Jesus Christ, Diyin God biYeʼ, Yáʼąąsh dóó nahasdzáán yiTaaʼ nilíinii, tʼáá ałtsoní hodeeyáádą́ą́ʼ Áyiilaaii doogáłígíí, nihił béédahózin biniiyé; dóó doogáałii bee ééhózinii nihił béédahodoozįįł, ákodashį́į́ bízhiʼ deidoodląął hwiinízingo.

13 Dóó bízhiʼ deisodlą́ągo éí tʼáá ałtso nihibąąhági átʼéii yóó adadidoohʼááł, áko éí binahjįʼ nihaa ndiʼdootʼááł ádzaaígíí binahjįʼ.

14 Jó áádóó, nááná, bee ééhózinii łaʼ nihił ííshją́ą́ ánáádeeshdlííł, aooʼ, éí daaztsą́ągo bee ééhózinii doo.

15 Jó áko, éí tʼáá aaníí dadootsaał áko yisdáʼiildéhígíí hodooleeł; aooʼ, dadootsaałígíí éí bee bá nihootʼáanii dóó nidiniih átʼé, áko daneesnánę́ę náádidoojah biniiyé, áko diné Bóhólníihii bidááhdę́ę́ʼ nihidootʼish.

16 Aooʼ, jó, díí daaztsánígíí éí binahjįʼ nááʼdiijeeh hazlį́į́ʼ, dóó tʼáá ałtso nihookááʼ dineʼé tsʼídá áłtsé anoonééłdę́ę́ʼ yá nináʼnídlá—éí díí ayiʼsizíiniikʼehgo anoonéłígíí; háálá tʼáá ałtso nihookááʼ dineʼé, Adam asiihgo adáátłizhígíí biniinaa Bóhólníihii hólǫ́ǫjįʼ doo naagháágóó ábiʼdiilyaa, éí atsʼíís dóó iiʼsizíiniikʼehgo, daneezná nahalingo baa ntsáhákees.

17 Jó ndi, Christ náádiidzáhígíí bee nihookááʼ dineʼé yá nináʼnídlá, áko, tʼáá ałtso nihookááʼ dineʼé, dóó Bóhólníihii bił hazʼą́ góneʼ yah anáhidootʼish.

18 Aooʼ, diné beʼiinaʼ hazhóʼó ánéidoodlíiłgo bee hooʼaʼ, áko tʼáá háiida beʼiinaʼ łahgo ánáyiidlaaígíí doo hidookał da dóó doo kǫʼ biiʼ hidoolghą́ął da; ndi doo beʼiinaʼ łahgo ánáyiidlaaígíí éí kʼíbidiʼdookał dóó kǫʼ biih hidoolghą́ą́ł; dóó iiʼsizíiniikʼehgo anoonééł bikʼi náánásdláa dooleeł, aooʼ, naaki góneʼ anoonéłígíí, háálá éí tʼáá ałtso tʼáá ákogi ádaatʼéii bitsʼą́ą́dóó nahjįʼ kʼíhidookał.

19 Éí bąą niheʼiinaʼ łahgo ádaahłééh, niheʼiinaʼ łahgo ádaahłééh, díí nihił bééhózinígíí dóó doo bidaʼołʼį́į́góó biniinaa nihikʼijįʼ yiidooltah, dóó díí naaki góneʼ ánoonéłígíí góneʼ konihiʼdidoonííł.

20 Jó ndi, nááná łaʼ bee ééhózinii dishnínę́ę, daaztsą́ągo bee ééhózinii, jó, daaztsą́ bijį́įdi jóhonaaʼéí yidoojį́į́ł dóó doo nihikʼi adiníłdíin da dooleeł; dóó ooljééʼ dóó sǫʼ ałdóʼ; dóó díí kéyah bikááʼgóó bee holʼínígíí ádin dooleeł, índa daaztsą́ą́dóó ákótʼée doo, tágí jį́, dóó náádiidzáajįʼ kótʼée dooleeł.

21 Aooʼ, biʼiiʼsizíinii yiʼníłniiʼgoʼ adadiʼní dóó ndaʼdilchʼilgo ląʼída ahéédaʼdoolkił, dóó nahasdzáán éí nahaʼná dóó ditłid dooleeł; áádóó tsé nahasdzáán bikááʼ hólóonii, nahasdzáán bikáaʼgi dóó biyiʼdi hólóonii, éí éí łaʼ bidziilgo nihił béédahózin, éí doodago kʼasdą́ą́ʼ tʼáá ńtʼę́ę́ʼ łaʼ bidziilgo siʼánígíí, éí nihidootǫǫł.

22 Aooʼ, éí nihidootǫǫł, dóó dootłʼis dóó nihidoodlał, dóó nahasdzáán bikááʼgóó ádaałtsʼísígo ndadeeztąąd dooleeł kodóó, aooʼ, nahasdzáán bikáaʼgi dóó biyiʼdi.

23 Jó áádóó, tʼáá íiyisíí níłtsą́ bił dooyoł, dóó ląʼída dził daniʼą́ą́góó deíldzis dooleeł, dóó łaʼ deíldzisę́ęgo dził daniʼá dooleeł, éí doo deeghánígóó yadaaʼáa dooleeł.

24 Dóó ląʼígo ndaʼastiinę́ę dadoochxǫǫł, dóó ląʼída kin hadaalʼáhą́ą tʼóó ádoodįįł.

25 Dóó ląʼída jishchááʼ ąą ádadoonííł, dóó ląʼída daneeznánę́ę ńdidoojah; dóó ląʼída Jesus yá naazínígíí daneeznánę́ę dahináago deidoołtsééł.

26 Jó áádóó, ákótʼéego diyin yá naalʼaʼii shichʼįʼ haadzííʼ; háálá adadiʼní dóó ndaʼdilchʼilgo ląʼí ahéédaʼdoolkił shidííniid.

27 Dóó kóshidííniid adadiʼní dóó ndaʼdilchʼilgo, dóó níłtsą́ bił níyolgo, áko díí ádahodoonííł, dóó chahałheeł ałtso nahasdzáán bikʼídooltih tʼáá ákótʼéego tágí jį́ adooleeł.

28 Dóó diyin yá naalʼaʼii kóshidííniid tʼah bilááhágo ląʼída tʼáadoo leʼé deidoołtsééł, díí bee ééhózinii dóó ayóó ádahoodzaaígíí tʼáá ałtso nahasdzáán bikááʼgóó ádahoodzaago binahjįʼ daʼiidoodląął biniiyé, diné tʼáá ałtso tʼáadoo binahjįʼ doo nááʼoodlą́hí da dooleeł biniiyé—

29 Dóó tʼáá háíshį́į́ iidoodląął dóó yisdádoogááł éí íiyisíí biniiyé, dóó tʼáá háiida doo oodlánígíí, tʼáá ákogi átʼéii ánihwiitʼaahígíí bikʼehgo bá nihodootʼááł, dóó ałdóʼ doo yáʼátʼééhgóó bá nihootʼą́ągo tʼáá bí éí ádaa ndahastʼą́ą dooleeł.

30 Dóó kʼad shidineʼé, béédaohłniih, béédaohłniih, tʼáá háiida ádin silį́įʼgo, tʼáá bí áʼdiisxį́į dooleeł; dóó tʼáá háiida bąąhági átʼéii yaa naagháago, tʼáá bí íinízingo yaa naagháa dooleeł; jó háálá, tʼáá nihí nihíhólnííh; tʼáá nihí nohsinígíí íidoolíiłgo nihaa deetʼą́; jó háálá, Diyin God nihił ééhózingo ánihiilaa dóó tʼáá nihí nihíhólníihgo ánihiilaa.

31 Yáʼátʼééh dóó doo yáʼádaatʼéhígíí nihił bééhózingo ánihiilaa, dóó iiná éí doodago anoonééł tʼáá háiida ńdidoodléełgo nihá áyiilaa; dóó yáʼátʼéehii baa nanináago dóó yáʼátʼéehii bee ánánihidiʼdoolnííł, éí doodago yáʼátʼéehii nánidoolyééł; éí doodago bąąhági átʼéii baa nanináago, dóó éí doo yáʼátʼéehii nánidoolyééł.