1 Mo nao, ol brata blong mi we mi lavem tumas, luk, mi talemaot hemia nomo long yufala se, sapos yufala i no sakem sin, ol haos blong yufala bae oli lego olgeta oli stap emti blong yufala.

2 Yes, sapos nomo yufala i sakem sin, ol woman blong yufala bae oli gat wan bigfala stamba tingting blong krae sore long dei we bae oli givim titi; from bae yufala i traem blong ronwe mo bae i no gat eni ples blong haed long hem; yes, mo sore tumas long olgeta we oli gat bel, from bae oli hevi mo oli no save ronwe; from hemia, bae oli purumbut long olgeta mo bae oli livim olgeta blong oli ded.

3 Yes, sore tumas long ol pipol ia we oli singaotem olgeta ol pipol blong Nifae, be sapos nomo oli sakem sin, taem we bae oli luk ol saen ia mo ol sapraes we Lod bae i soem long olgeta; from luk, olgeta oli bin wan pipol we Lod i bin jusum; yes, ol pipol blong Nifae hem i bin lavem olgeta, mo tu, hem i bin stretem olgeta; yes, long ol dei blong ol nogud fasin blong olgeta hem i bin stretem olgeta from hem i lavem olgeta.

4 Be luk, ol brata blong mi, Ol Man blong Leman hem i no bin laekem, from ol fasin blong olgeta i nogud oltaem, mo hemia i from nogud fasin blong kastom blong ol papa blong olgeta. Be luk, fasin blong sevem man i kam long olgeta tru long prijing blong Ol Man blong Nifae; mo blong mekem samting ia, Lod i mekem ol dei blong olgeta i moa longfala.

5 Mo mi wantem se yufala i luk se bigfala pat blong olgeta i stap long rod blong stret wok, mo oli stap wokbaot sloslo long fes blong God, mo oli wokhad blong obei ol komanmen blong hem mo ol loa blong hem mo ol jajmen blong hem folem loa blong Moses.

6 Yes, mi talem long yufala se bigfala namba blong olgeta i stap mekem samting ia, mo oli no taed blong traehad oltaem, blong save tekem ol narafala brata blong olgeta we oli stap, blong kam long save blong trutok; from hemia, i gat plante we oli kam joenem ol namba blong olgeta evri dei.

7 Mo luk, yufalawan bakegen i save, from yufala i bin witnesem samting ia, se evriwan long olgeta we oli mekem olgeta oli kam blong save long trutok, mo blong save long nogud fasin mo ol rabis kastom blong ol papa blong olgeta, mo oli lidim olgeta blong bilivim ol tabu skripja, yes, ol profesi blong ol tabu profet, we oli bin raetem, we i lidim olgeta blong gat fet long Lod, mo long fasin blong sakem sin, we fet mo fasin blong sakem sin i karem wan jenis blong hat i kam long olgeta—

8 From hemia, olgeta we oli bin kam long samting ia, yufalawan bakegen i save, olgeta ia oli strong gud mo stanap strong long fet, mo long samting we i bin mekem olgeta oli kam fri.

9 Mo yufala i save tu we oli bin berem ol tul blong faet blong olgeta, mo oli fraet blong tekembak olgeta from oli fraet se long eni wei bae oli sin; yes, yufala i save luk se oli fraet blong sin—from luk bae oli letem olgeta bakegen blong ol enemi blong olgeta oli purumbut long olgeta mo kilimded olgeta, mo bae oli no leftemap ol naef blong faet blong olgeta agensem olgeta, mo hemia i from fet blong olgeta long Kraes.

10 Mo nao, from we oli stanap strong taem we oli stap biliv long samting ia we oli bilivim, from oli strong gud afta we oli bin kasem laet, luk, Lod bae i blesem olgeta mo mekem ol dei blong olgeta i kam longfala, i nomata long nogud fasin blong olgeta—

11 Yes, mo tu, sapos oli kam slak from we oli lusum bilif, be Lod bae i mekem ol dei blong olgeta i kam longfala, go kasem taem ia we bae i kam, we ol papa blong yumi oli bin tokbaot, mo tu, profet Sinos i tokbaot, mo plante narafala profet long saed blong kambak blong ol brata blong yumi, Ol Man blong Leman, kambak long save blong trutok—

12 Yes, mi talem long yufala, se long ol las taem, ol promes blong Lod oli go aot long ol brata blong yumi Ol Man blong Leman; mo i nomata ol plante hadtaem we bae oli kasem, mo i nomata se bae oli ronem olgeta i go ia mo i kam ia long fes blong graon, mo ol enemi blong olgeta bae oli lukaotem olgeta mo bae oli kilim olgeta mo seraotem olgeta olbaot, mo oli no gat ples blong haed, Lod bae i gat sore long olgeta.

13 Mo hemia i folem profesi, se bae oli kambak bakegen long tru save, we i save blong Ridima blong olgeta, mo bigfala mo tru masta blong olgeta blong lukaot long sipsip, mo hem i save kaontem olgeta wetem ol sipsip blong hem.

14 From hemia, mi talem long yufala, bae i moa gud long olgeta bitim yufala be nomo sapos yufala i sakem sin.

15 From luk, sapos oli soemaot ol bigfala wok long olgeta we oli bin soemaot long yufala, yes, long olgeta we oli stap slak from oli lusum bilif from ol kastom blong ol papa blong olgeta, yufala i save luk yufalawan bakegen se bae oli neva save bakegen kam slak from oli lusum bilif.

16 From hemia, Lod i talem: “Bae mi no prapa spolem gud olgeta evriwan, be bae mi mekem se long dei blong waes tingting blong mi, bae oli kambak bakegen long mi,” Lod i talem.

17 Mo nao luk, Lod i talem, long saed blong ol pipol blong Ol Man blong Nifae: “Sapos oli no wantem sakem sin, mo lukaot gud blong mekem wanem mi wantem, bae mi prapa spolem gud olgeta evriwan,” Lod i talem, “from oli no biliv, i nomata long ol plante bigfala wok we mi bin mekem long olgeta; mo olsem we i tru we Lod i stap laef, semmak bae ol samting ia oli hapen tru,” Lod i talem.