1 ’E i teienei, e tō’u mau taea’e here, inaha, tē parau atu nei au ia ’outou na, ’ia ’ore ’outou e tātarahapa, e riro tō ’outou mau fare i te fa’aanohia nō ’outou.

2 ’Oia ïa, ’ia ’ore ’outou e tātarahapa, e fāri’i tā ’outou mau vahine i te ’oto rahi i te mahana rātou e fa’a’ote ai i te mau tamari’i ri’i ra ; e tāmata ho’i ’outou i te horo, ’e ’aita roa ho’i e vāhi nō te ha’apūra’a ; ’oia ïa, e ’ati ho’i tō te mau vahine hapū ra, e teiaha ho’i rātou ’e ’aita e mara’a ’ia horo ; nō reira, e ta’ata’ahihia rātou i raro ’a vaiiho-noa-hia ai ’ia pohe.

3 ’Oia ïa, e ’ati ho’i teie feiā i parauhia, te mau ta’ata o Nephi, maori rā ’ia tātarahapa rātou, ’a ’ite ai rātou i teie nei mau tāpa’o ’e teie mau ’ohipa ’ūmerehia ’o tē fa’a’itehia ia rātou ra ; inaha ho’i, i riro na rātou ’ei feiā mā’itihia nō te Fatu ; ’oia ïa, ’ua here ’oia i te mau ta’ata o Nephi, ’e ’ua ’avau ho’i ’oia ia rātou ; ’oia ïa, i te mau mahana ’a rave ai rātou i te mau ’ohipa ’ī’ino i ’avau ai ’oia ia rātou nō te mea ’ua here ’oia ia rātou.

4 Inaha rā, e tō’u mau taea’e, ’ua ’ino’ino ’oia i te mau ’āti Lamana nō te mea ’ua rave tāmau noa rātou i te mau ’ohipa ’ī’ino ; ’e teie te tumu nō te reira, ’oia ho’i nō te mau peu tumu ’ī’ino a tō rātou mau metua. Inaha rā, ’ua tae atu te fa’aorara’a ia rātou nā roto i te a’ora’a a te mau ’āti Nephi ; ’e ’o teie ho’i te tumu ’ua ha’amaoro te Fatu i tō rātou ra mau pu’e mahana.

5 ’E tē hina’aro nei au ’ia ’ite atu ’outou ia rātou, ’oia ho’i i te pae rahi ’o tē haere ra nā ni’a i te ’ē’a au i tā rātou ’ohipa, ’e tē haere ra rātou ma te ha’apa’o maita’i i mua i te Atua, ’e tē ha’apa’o ra rātou i tāna mau fa’auera’a, ’e tāna mau ture, ’e tāna mau fa’aotira’a mai te au i te ture a Mose.

6 ’Oia ïa, tē parau atu nei au ia ’outou, tē rave nei te pae rahi o rātou i te reira, ’e tē tūtava nei rātou ma te tu’utu’u ’ore ’e te itoito ’ia fa’a’ite i te parau mau i te toe’a o tō rātou mau taea’e ; nō reira tē ’āmui noa mai ra te mau ta’ata e rave rahi ia rātou i te mau mahana ato’a.

7 ’E inaha, ’o ’outou iho tei ’ite, ’e ’ua ’ite pāpū ’outou iho i te reira, ’e ’o rātou ’o tei fa’afāriuhia mai i te ’ite i te parau mau ra, ’e i te ’ite i te mau peu tumu parauti’a ’ore ’e te vi’ivi’i a tō rātou mau metua, ’e ’o rātou tei arata’ihia ’ia ti’aturi i te mau pāpa’ira’a mo’a ra, ’oia ïa, i te mau parau tohu a te mau peropheta mo’a ’o tei pāpa’ihia, ’e ’o tei arata’i ia rātou ’ia fāri’i i te fa’aro’o i te Fatu, ’e i te tātarahapara’a, ’e nā taua fa’aro’o ra ’e te tātarahapara’a ra e fa’atupu i te hō’ē tauira’a o te ’ā’au i roto ia rātou—

8 Nō reira, ’o rātou ’o tei fāri’i i te reira, ’ua ’ite ïa ’outou iho ē, ’ua tāpe’a māite rātou ma te ’āueue ’ore i te fa’aro’o ’e te mau mea i fa’ati’amā ia rātou.

9 ’E ’ua ’ite ato’a ïa ’outou ē, ’ua huna rātou i tā rātou mau mauha’a tama’i i raro i te repo, ’e ’ua mata’u rātou ’ia rave fa’ahou i te reira, ’o te hara rātou ; ’oia ïa, tē ’ite ra ’outou i tō rātou ra mata’u ’ia rave i te hara—inaha ho’i, e fa’ati’a noa rātou ’ia ta’ata’ahi-noa-hia ’e ’ia taparahihia e tō rātou ra mau ’enemi, ’e ’aita roa rātou e rave i tā rātou mau ’o’e nō te ’aro atu ia rātou ; nō te mea tē vai ra tō rātou fa’aro’o i te Mesia.

10 ’E i teienei, nō tō rātou itoito i te ti’aturira’a i taua mea ra ’o tā rātou i ti’aturi na, ’e nō tō rātou ha’apa’o maita’i i muri iho i tō rātou ha’amāramaramara’ahia, inaha, e ha’amaita’i ’e e ha’amaoro te Fatu i tō rātou mau mahana, noa atu ā tā rātou mau ’ohipa ’ī’ino—

11 ’Oia ïa, noa atu ā te paruparu ra tō rātou fa’aro’o, e ha’amaoro ā te Fatu i tō rātou mau mahana, ē tae roa i te tau i parauhia e tō tātou ra mau metua, ’e ’oia ato’a e te peropheta ra ’o Zenosa, ’e e te tahi atu ā mau peropheta e rave rahi, nō ni’a i te fa’aho’ira’ahia o tō tātou mau taea’e, te mau ’āti Lamana, ’ia ’ite fa’ahou i te parau mau—

12 ’Oia ïa, tē parau atu nei au ia ’outou ē, i te mau tau hope’a ra e fa’ataehia mai te mau fafaura’a a te Fatu i tō tātou mau taea’e, te mau ’āti Lamana ; ’e noa atu ā te mau ’ati e rave rahi tā rātou e fāri’i, ’e noa atu ā e ha’apurarahia rātou i terā vāhi ’e i terā i ni’a i te fenua nei, e a’ua’uhia, e tā’irihia, ’e e ha’apurara-haere-hia, ’e ’aita e vāhi ha’apūra’a, e aroha mai iho ā te Fatu ia rātou.

13 ’E ’ua au teie i tei tohuhia mai, ’oia ho’i, e fa’afāriuhia mai rātou i te ’ite mau ra, ’oia ho’i i te ’ite i tō rātou Tāra’ehara, ’e tō rātou tīa’i māmoe rahi mau, ’e ’ia tai’ohia i rotopū i tāna ra mau māmoe.

14 Nō reira tē parau atu nei au ia ’outou, e mea maita’i a’e nō rātou, ’eiaha rā nō ’outou, maori rā ’ia tātarahapa ’outou.

15 Inaha ho’i, ’āhiri te mau ’ohipa rarahi i fa’a’itehia atu ia rātou, mai tei fa’a’itehia atu ia ’outou na, ’oia ïa, ’ia rātou ’o tei paruparu tō rātou fa’aro’o nō te mau peu tumu a tō rātou ra mau metua, e ’ite ïa ’outou iho ē, e ’ore roa rātou e topa fa’ahou i roto i te ti’aturi ’ore.

16 Nō reira, tē nā ’ō mai ra te Fatu : E ’ore roa vau e ha’amou roa ia rātou, ’āre’a rā i te mahana e au iā’u ra, e fa’aho’i fa’ahou mai au ia rātou iā’u nei, tē nā reira mai ra te Fatu.

17 ’E i teienei, inaha, tē nā ’ō mai ra te Fatu nō ni’a i te mau ta’ata o te mau ’āti Nephi : ’Ia ’ore rātou ’ia tātarahapa ’e ’ia ha’apa’o i tō’u ra hina’aro, e ha’amou roa vau ia rātou, tē nā reira mai ra te Fatu, nō tō rātou ti’aturi ’ore, noa atu ā te mau ’ohipa rarahi e rave rahi ’o tā’u i rave i rotopū ia rātou ra ; ’e mai te Fatu e ora ra, e tupu mau taua mau mea nei, tē nā reira mai ra te Fatu.