1 ’E i teienei, i muri a’era, e rave rahi tei fa’aro’o i te mau parau a Samuela, te ’āti Lamana, ’o tāna i parau atu ’a ti’a noa ai ’oia i ni’a iho i te mau patu o te ’oire. ’E te mau ta’ata e rave rahi ’o tei ti’aturi i tāna ra parau, ’ua haere atu ra ïa ’e ’ua ’imi ihora ia Nephi ; ’e ’ia ’itea a’era rātou iāna, ’ua fā’i atu ra rātou i tā rātou mau hara iāna ’e ’aore e vāhi i hunahia e rātou, ’e ’ua hina’aro rātou ’ia bāpetizohia i te Fatu.

2 ’E te mau ta’ata e rave rahi ’o tei ’ore i ti’aturi i te mau parau a Samuela, ’ua riri ïa rātou iāna ; ’e ’ua taora atu ra rātou i te mau ’ōfa’i i ni’a iāna a tia’i ’oia i ni’a iho i te patu, ’e e rave rahi ato’a tei te’a atu iāna a tia’i ’oia i ni’a iho i te patu ; ’āre’a rā tei pīha’i iho te Vārua o te Fatu iāna, ’e nō reira ho’i ’aita roa ’oia i tano ia rātou i tā rātou mau ’ōfa’i e tā rātou mau te’a.

3 I teienei, ’ia ’ite a’era rātou ē, ’aita ’oia e tano ia rātou, e rave rahi atu ā tei ti’aturi i tāna ra mau parau, ’e nō reira ho’i ’ua haere atu ra rātou ia Nephi ra ’ia bāpetizohia.

4 Inaha ho’i, tē bāpetizo ra Nephi, ’e tē tohu ra ho’i, ’e tē a’o ra ho’i, ’e tē poro ra i te parau nō te tātarahapara’a i te mau ta’ata ; ’e tē fa’a’ite ra i te mau tāpa’o ’e te mau ’ohipa ’ūmerehia ; ’e tē rave ra i te mau semeio i rotopū i te mau ta’ata, ’ia ’ite rātou ē, ’ua fātata roa te Mesia i te tae mai—

5 Tē fa’a’ite ato’a ra ’oia ia rātou i te mau mea ’o tei fātata roa i te tupu, ’ia ’ite ’e ’ia ha’amana’o rātou i te tau e tupu mai ai te reira, ’e ’ua fa’a’itehia na ia rātou taua mau mea ra nā mua roa, nō te mana’ora’a ē, e ti’aturi rātou ; nō reira, ’o rātou e rave rahi ’o tei ti’aturi i te mau parau a Samuela ra, ’ua haere atu ïa iāna ra ’ia bāpetizohia, ’e ’ua haere atu ra rātou ma te tātarahapa ’e te fā’i i tā rātou mau hara.

6 ’Āre’a rā, ’aita tō rātou pae rahi i ti’aturi i te mau parau a Samuela ; nō reira, ’ia ’ite a’era rātou ē, ’aita ’oia i tano i tā rātou mau ’ōfa’i ’e tā rātou mau te’a, ’ua pi’i atu ra rātou i tō rātou mau ra’atira, i te nā-’ō-ra’a atu ē : ’A rave atu i teie ta’ata ’e ’a ru’uru’u iāna, inaha ho’i, e diabolo tōna ; ’e nō te mana o te diabolo i roto iāna i ’ore ai ’oia i tano i tā tātou mau ’ōfa’i ’e tā tātou mau te’a ; nō reira, ’a rave iāna ’e ’a ru’uru’u iāna, ’e ’a hōpoi ’ē atu iāna.

7 E ’a haere atu ai rātou nō te haru iāna, inaha, ’ua ’ōu’a atu ra ’oia i raro mai ni’a mai i te patu, ’e ’ua horo ’ē atu ra i rāpae i tō rātou mau fenua, ’oia ïa, ’e tae atu ra i tōna ihora fenua mau, ’e ’ua ha’amata ihora i te a’o atu ’e i te tohu atu i rotopū i tōna ihora mau ta’ata.

8 ’E inaha, ’aita te hō’ē parau i fa’aro’o-fa’ahou-hia nō ni’a iāna i rotopū i te mau ’āti Nephi ; ’e teie ïa te huru nō te mau ’ohipa nō ni’a i taua feiā ra.

9 ’E ’o te hope’a te reira nō te va’u ’ahuru ’e ma ono o te matahiti nō te fa’aterera’a a te mau ha’avā i ni’a i te mau ta’ata o Nephi.

10 ’E ’o te hope’a te reira nō te va’u ’ahuru ’e ma hitu o te matahiti nō te fa’aterera’a a te mau ha’avā, ’e ’ua vai noa te pae rahi o te mau ta’ata i roto i tō rātou te’ote’o ’e te parauti’a ’ore, ’e te pae iti ra ’ua haere noa ïa ma te ha’apa’o maita’i i mua i te Atua.

11 ’E teie ato’a te mau huru i te va’u ’ahuru ’e ma va’u o te matahiti nō te fa’aterera’a a te mau ha’avā.

12 ’E i te va’u ’ahuru ’e ma iva o te matahiti nō te fa’aterera’a a te mau ha’avā, e mea iti roa te tauira’a nō ni’a i te huru nō te mau ’ohipa a te ta’ata, maori rā tē tupu ’eta’eta noa ra te mau ta’ata i roto i te mau ’ohipa ’ī’ino, ’e i te rave rahi atu i tei au ’ore i te mau fa’auera’a a te Atua.

13 ’E i muri a’era, i te iva ’ahuru o te matahiti nō te fa’aterera’a a te mau ha’avā, e rave rahi mau tāpa’o rarahi ’e mau ’ohipa ’ūmerehia i fa’a’itehia mai i te mau ta’ata, ’e ’ua ha’amata ihora te mau parau a te mau peropheta i te tupu.

14 ’E ’ua fā mai ra te mau melahi i te mau ta’ata, i te feiā ’aravihi ra, ’e ’ua fa’a’ite mai ra i te mau parau ’oa’oa nō te ’oa’oa rahi ; nō reira i taua matahiti nei te tupura’a te mau parau i pāpa’ihia i roto i te mau pāpa’ira’a mo’a.

15 ’Āre’a rā, ’ua ha’amata ihora te mau ta’ata i te fa’a’eta’eta i tō rātou ’ā’au, ’o rātou pā’āto’a, maori rā te feiā tei roto ia rātou te fa’aro’o huru rahi, tō te mau ’āti Nephi ’e te mau ’āti Lamana ato’a ho’i, ’e ’ua ha’amata rātou i te ti’aturi i tō rātou iho pūai ’e tō rātou iho ’aravihi, i te nā-’ō-ra’a ē :

16 ’Ua tano paha te tahi mau mea i mana’o-noa-hia e rātou i roto i teie mau mea e rave rahi, inaha rā, ’ua ’ite pāpū tātou ē, e’ita roa teie mau ’ohipa rahi ’e te māere, ’o tei parauhia na, e ti’a ’ia tupu.

17 ’E ’ua ha’amata ihora rātou i te feruri ’e i te mārō i rotopū ia rātou iho, i te nā-’ō-ra’a ē :

18 E ’ere te reira i te mana’o ti’a ē e tae mai te hō’ē ta’ata mai te Mesia te huru ; ’āhiri e parau mau, ’e e Tamaiti ’oia nā te Atua, te Metua nō te ra’i ’e te fenua mai tei parauhia na, nō te aha ïa ’aita ’oia e fa’a’ite mai iāna iho ia tātou nei ’e ia rātou ato’a ’o tē pārahi ra i Ierusalema ?

19 ’Oia ïa, nō te aha ho’i ’aita ’oia e fa’a’ite mai iāna iho i ni’a i teie nei fenua ’e i te fenua ato’a nō Ierusalema ?

20 Inaha rā, ’ua ’ite tātou ē, e peu tumu parauti’a ’ore teie ’o tei tu’uhia mai ia tātou nei e tō tātou mau metua, nō te fa’atupu i tō tātou mana’o ’ia ti’aturi i te tahi mau mea rahi ’e te māere ’o tē tupu, ’eiaha i rotopū ia tātou nei, i ni’a rā i te hō’ē fenua ātea roa, te hō’ē fenua ’ite-’ore-hia e tātou nei ; nō reira e tāpe’a noa te reira ia tātou i roto i te pōiri, ’e e’ita ho’i e ti’a ia tātou ’ia hi’o mata atu ē e parau mau ānei te reira.

21 ’E e riro ato’a rātou, nā roto i te mau rāve’a pa’ari ’e te mau rāve’a mo’emo’e a te vārua ’ino ra, i te fa’atupu i te tahi mau mea rahi ’e te mo’emo’e ’o tei ’ore roa i ’itehia e tātou nei, e nā te reira e tāpe’a ia tātou i raro ’ei tāvini nō tā rātou mau parau, ’e ’ei mau tāvini ato’a nō rātou, ’e e ti’aturi ho’i tātou ia rātou nō te ha’api’i mai ia tātou i te parau ; ’e nā reira ho’i rātou i te tāpe’a ia tātou i roto i te pōiri i te mau mahana ato’a nō tō tātou nei orara’a, mai te mea e auraro tātou ia rātou.

22 ’E e rave rahi atu ā te mau mea tā te mau ta’ata i mana’o noa i roto i tō rātou ’ā’au, ’e e mau mea ma’ama’a ’e te faufa’a ’ore te reira ; ’e ’ua pe’ape’a rahi ho’i rātou, nō te mea ’ua fa’atupu Sātane i te mana’o i roto ia rātou ’ia rave tāmau noa i te mau ’ohipa ’ī’ino ; ’oia ïa, ’ua haere noa ’oia ma te ha’aparare i te mau parau ha’avare ’e te mau mārōra’a i ni’a i te fenua tā’āto’a, ’ia ti’a iāna ’ia fa’a’eta’eta i te ’ā’au o te mau ta’ata ’ia pāto’i atu i te maita’i ’e i te mau mea e tupu a muri atu.

23 ’E noa atu ā te mau tāpa’o ’e te mau ’ohipa ’ūmerehia i ravehia i rotopū i te mau ta’ata o te Fatu, ’e te mau semeio e rave rahi tā rātou i rave, ’ua roa’a iho ā ia Sātane te ’ā’au o te mau ta’ata i ni’a i te fenua.

24 ’E ’o te hope’a te reira nō te iva ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi.

25 ’E ’o te hope’a teie nō te buka a Helamana, mai te au i te pāpa’a parau a Helamana ’e tāna ra mau tamari’i tamāroa.