1 Ut anajwan, kik’ulman naq ke’wan naab’al li ke’ab’ink re li raatin laj Samuel, aj Lamanita, li kixye chaq chixb’een xtz’akil li tenamit. Ut jo’ k’ihal ke’paab’ank re li raatin, koxe’xsik’ laj Nefi; ut naq koxe’xtaw ke’xch’olob’ lix maakeb’ chiru ut ink’a’ ke’xmuq, ut ke’xtz’aama naq che’kub’siiq xha’ choq’ re li Qaawa’.

2 A’b’anan jo’ k’ihaleb’ li ke’wan li ink’a’ neke’paab’ank re li raatin laj Samuel ke’josq’o’ rik’in; ut ke’xkut rik’in pek sa’ xb’een li xaqxookil tz’ak, ut jo’kan ajwi’ naab’al ke’xkut rik’in tzimaj naq xaqxo sa’ xb’een li tz’ak; a’b’an lix Musiq’ li Qaawa’ kiwan rik’in, jo’kan naq ink’a’ ke’ru chixketb’al rik’in xpekeb’, chi moko rik’in xtzimajeb’.

3 Anajwan naq ke’ril naq ink’a’ neke’ru chixketb’al, wankeb’ chik naab’al li ke’paab’ank re li raatin, jo’kan naq xkoheb’ rik’in laj Nefi re te’kub’siiq xha’.

4 Xb’aan naq k’ehomaq reetal, laj Nefi yoo chaq chi kub’sink ha’, ut chi aatinak jo’ profeet, ut chi jultikank aatin, chixyaab’asinkil li jalb’a-k’a’uxlej chiruheb’ li tenamit, chixk’utb’al li eetalil ut sachb’a-ch’oolej, chixk’anjelankil sachb’a-ch’oolejil k’anjel sa’ xyanq li tenamit, re te’xnaw naq li Kristo tento taachalq chi seeb’—

5 Yoo chixyeeb’al reheb’ chirix li k’a’aq re ru tento taachalq chi seeb’, re te’xnaw ut taajultiko’q reheb’ sa’ li kutan taachalq wi’ naq k’eeb’il chixnaweb’ chi junxilaj, re naq te’ruuq chi paab’ank; jo’kan naq jo’ k’ihaleb’ li ke’paab’ank re li raatin laj Samuel, koxe’wulaq rik’in re te’kub’siiq xha’, xb’aan naq ke’chal chi jalb’ileb’ xk’a’uxl, ut ke’xch’olob’ lix maakeb’.

6 A’b’anan lix k’ihaleb’ ink’a’ ke’xpaab’ li raatin laj Samuel, jo’kan ut, naq ke’ril naq ink’a’ ke’ru chixketb’al rik’in xpekeb’ ut xtzimajeb’, ke’xjap re chiruheb’ li xb’eenileb’ aj pleet, chixyeeb’al: Chapomaq li winq a’in ut b’ak’omaq, xb’aan naq k’ehomaq reetal, wan aj tza rik’in; ut xb’aan xwankil laj tza li wan rik’in ink’a’ naru naqaket rik’in qapek ut qatzimaj; jo’kan ut chapomaq ut b’ak’omaq, ut chi’isiiq chaq.

7 Ut naq xkoheb’ chixk’eeb’al ruq’eb’ sa’ xb’een, k’ehomaq reetal, a’an kixkut chaq rib’ sa’ xb’een li xaqxookil tz’ak, ut ki’eelelik chaq sa’ xch’och’eb’, relik chi yaal, toj sa’ xch’och’ a’an, ut ki’ok chi jultikank aatin ut chi aatinak jo’ profeet sa’ xyanq lix tenamit a’an.

8 Ut k’ehomaq reetal, maajun wa chik ki’ab’iman resil sa’ xyanqeb’ laj Nefita; ut jo’ka’in li ki’uxman sa’ xyanq li tenamit.

9 Ut chi jo’kan kiraqe’ li xwaq ro’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

10 Ut chi jo’kan kiraqe’ ajwi’ li xwuq ro’k’aal chihab’ rawa’b’ejileb’ laj raqol aatin, ut lix k’ihaleb’ li tenamit toj wankeb’ chaq sa’ xq’etq’etileb’ ut xmaa’usilaleb’, ut lix ka’ch’inaleb’ xk’ihal neke’b’eek chi tiikeb’ wi’chik xk’a’uxl chiru li Dios.

11 Ut a’in ajwi’ li yoo chi k’ulmank sa’ li xwaqxaq ro’k’aal chihab’ rawa’b’ejileb’ laj raqol aatin.

12 Ut ka’ch’in xjalik li k’a’ru yoo chi uxmank sa’ xyanq li tenamit, ka’ajwi’ naq eb’ li tenamit ke’ok chi nimank xkawileb’ sa’ li maa’usilal, ut q’axal wi’chik chixb’aanunkil li k’a’ru moko naxk’am ta rib’ rik’in lix taqlahom li Dios, sa’ li xb’ele ro’k’aal chihab’ rawa’b’ejileb’ laj raqol aatin.

13 A’b’anan kik’ulman sa’ li xlaje ro’k’aal chihab’ rawa’b’ejileb’ laj raqol aatin, ke’wan ninqi eetalil k’eeb’il reheb’ li tenamit, ut sachb’a-ch’oolej; ut li raatineb’ li profeet ke’ok chi tz’aqlok ru.

14 Ut eb’ li anjel ke’xk’ut rib’ chiruheb’ li winq, li winq chaab’ileb’ xna’leb’, ut ke’xch’olob’ chiruheb’ sahil esilal re nimla sahil ch’oolejil; chi jo’kan sa’ li chihab’ a’in ke’ok chi tz’aqlok ru li loq’laj hu.

15 A’b’anan, eb’ li tenamit ke’ok chixkawob’resinkil li raameb’, ka’ajwi’ li jun raqal q’axal aj paab’anel ink’a’, xkomoneb’ laj Nefita jo’ ajwi’ xkomoneb’ laj Lamanita, ut ke’xtikib’ wank chi chapcho chiru tz’aqal lix metz’eweb’ ut tz’aqal lix na’leb’eb’, ut ke’xye:

16 Wan tana’ k’a’aq re ru ke’xq’ehi chi us, sa’ xyanq naab’al; a’b’an k’ehomaq reetal, naqanaw naq ink’a’ taaruuq taak’ulmanq chixjunil li xninqal ru ut sachb’a-ch’oolejil k’anjel a’in, li yeeb’il resil.

17 Ut ke’ok chi na’leb’ank ut chi wech’ok chirib’ileb’ rib’, ut ke’xye:

18 Naq maak’a’ xyaalal naq taachalq jun winq jo’ li Kristo; wi ta jo’kan, ut a’an Ralal li Dios, xYuwa’il li choxa ut ch’och’, jo’ chanru yeeb’il, k’a’ut naq ink’a’ tixk’ut rib’ chiqu laa’o jo’ chiruheb’ li te’wanq Jerusalen?

19 Relik chi yaal, k’a’ut naq ink’a’ tixk’ut rib’ sa’ li ch’och’ a’in jo’ ajwi’ sa’ li ch’och’ Jerusalen?

20 A’b’an k’ehomaq reetal, naqanaw naq a’in jun maa’us aj na’leb’, li kanab’anb’il chaq qe xb’aaneb’ li qayuwa’, re xk’eeb’al chiqapaab’ junaq xnimal ru ut sachb’a-ch’oolejil na’leb’ li taak’ulmanq, a’b’an moko sa’ qayanq ta laa’o; sa’ b’an jun ch’och’ jwal najt, jun ch’och’ moko nawb’il ta qab’aan; jo’kan naq te’ruuq chiqakanab’ankil chi maak’a’ qanawom, xb’aan naq moko naru ta naqil rik’in tz’aqal li qu naq yaal.

21 Ut eb’ a’an, rik’in lix b’alaq’ ut lix muqmuukil seeb’al li maa’us, te’xk’anjela junaq nimla muqmuukil na’leb’ li ink’a’ taaruuq taqataw ru, li taaramoq qawaklijik, re toowanq choq’ moos chiru li raatineb’, ut choq’ moos chiruheb’ ajwi’ a’an, xb’aan naq a’aneb’ li naqachap wi’ qib’ re te’xk’ut chiqu li aatin; ut chi jo’kan toohe’xkanab’ chi maak’a’ qanawom, wi naqaq’axtesi qib’ chiruheb’, chiru chixjunil xkutan li qayu’am.

22 Ut naab’al chik li k’a’aq re ru ke’xk’oxla li tenamit sa’ xch’ooleb’, li maak’a’ xyaalal ut jo’maajo’; ut k’a’jo’ naq ke’wan xk’a’uxleb’, xb’aan naq laj Satanas kireek’asiheb’ chixb’aanunkil li maa’usilal rajlal; relik chi yaal, a’an yoo chaq chi xik re xpuktesinkil li yoob’anb’il aatin ut li wech’ok-ib’ chiru chixjunil lix b’een li ch’och’, re taaruuq chixkawob’resinkil li raameb’ li tenamit chirix li k’a’ru chaab’il ut chirix li k’a’ru taachalq.

23 Ut us ta ke’k’anjelaman li eetalil ut li sachb’a-ch’oolej sa’ xyanq lix tenamit li Qaawa’, ut k’iila sachb’a-ch’oolejil k’anjel ke’xb’aanu, laj Satanas k’a’jo’ naq kiru chixchapb’al xch’ooleb’ li tenamit chiru chixjunil lix b’een li ch’och’.

24 Ut chi jo’kan kiraqe’ li xlaje ro’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

25 Ut chi jo’kan kiraqe’ lix hu laj Helaman, jo’ chanru li esil tz’iib’anb’il xb’aan laj Helaman ut eb’ li ralal.