1 Mo nao, i bin hapen se i gat plante we oli harem ol toktok blong Samuel, we i Man blong Leman, we hem i talemaot antap long ol wol blong bigtaon. Mo olgeta we oli biliv long toktok blong hem, oli go aot mo oli lukaotem Nifae; mo taem we oli kam mo oli faenem hem, oli talemaot long hem ol sin blong olgeta, mo oli no tanem baksaed, from oli wantem blong kasem baptaes long Lod.

2 Be olgeta we oli stap we oli no biliv long ol toktok blong Samuel, oli kros long hem; mo oli sakem ol ston long hem antap long wol, mo tu, plante oli sutum ol ara long hem long taem we hem i stap stanap long wol; be Spirit blong Lod i stap wetem hem, inaf we i mekem se oli no save kasem hem wetem ol ston blong olgeta o wetem ol ara blong olgeta.

3 Nao taem we oli luk se oli no save kasem hem, i gat plante moa we oli biliv long ol toktok blong hem, inaf we i mekem se oli gowe, oli go long Nifae blong kasem baptaes.

4 From luk, Nifae i stap mekem baptaes, mo i stap talemaot profesi, mo i stap prij, hem i talemaot fasin blong sakem sin long ol pipol, i soemaot ol saen mo ol sapraes, i mekem ol merikel long medel blong ol pipol, blong oli save gat save se Kraes bae i kam i no longtaem—

5 Hem i stap talem long olgeta ol samting we bae i kam i no longtaem, blong oli save gat save mo tingbaot long taem ia we ol samting ia oli stap kam, se oli bin talemaot long olgeta fastaem, blong mekem se oli save biliv; from hemia, olgeta we oli bilivim ol toktok blong Samuel, oli go long hem blong kasem baptaes, from oli kam we oli stap sakem mo talemaot ol sin blong olgeta.

6 Be bigfala namba blong olgeta oli no bin biliv long ol toktok blong Samuel; from hemia, taem we oli luk se oli no save kasem hem wetem ol ston blong olgeta mo ol ara blong olgeta, oli singaot long ol kapten blong olgeta, oli talem: “Holem man ia mo fasemtaet hem, from luk hem i gat wan devel; mo from paoa blong devel we i stap long hem, mifala i no save kasem hem wetem ol ston blong mifala mo ol ara blong mifala; from hemia, holem hem mo fasemtaet hem, mo tekem hem i go.”

7 Mo taem we oli go blong putum han blong olgeta long hem, luk, hem i jiamaot long wol i go daon, mo hem i ronwe, i aot long ol graon blong olgeta, yes, hem i go kasem kantri blong hem, mo hem i stat blong prij mo profesae long medel blong ol pipol blong hem.

8 Mo luk, Ol Man blong Nifae oli neva harem eni samting moa long medel blong olgeta long saed blong hem; mo olsem ia nao i bin laef blong ol pipol.

9 Mo olsem ia nao eiti mo sikis yia blong rul blong ol jaj ova long ol pipol blong Nifae i bin en.

10 Mo olsem ia nao eiti mo seven yia blong rul blong ol jaj i bin en tu, bigfala pat blong ol pipol oli stap yet long ol hae tingting blong olgeta mo fasin nogud, mo smol pat i wokbaot sloslo long fored blong God.

11 Mo ol samting oli bin stap olsem ia tu, long eiti mo eit yia blong rul blong ol jaj.

12 Mo i bin gat be smol jenis nomo long ol samting blong ol pipol, be ol pipol oli stat blong kam moa strong long rabis fasin, mo mekem moa mo moa samting we i go agensem ol komanmen blong God, long eiti mo naen yia blong ol rul blong ol jaj.

13 Be i bin hapen se long naenti yia blong ol rul blong ol jaj, i gat ol bigfala saen i go long ol pipol, mo ol sapraes; mo ol toktok blong ol profet oli stat blong hapen.

14 Mo ol enjel oli kamaot long ol man, ol waes man, mo oli talemaot long olgeta ol gudnius blong bigfala glad; olsem ia nao long yia ia ol skripja oli stat blong hapen.

15 Be, ol pipol oli bin stat blong mekem hat blong olgeta i kam strong, olgeta evriwan be nomo olgeta we oli bin biliv moa strong, tugeta, Ol Man blong Nifae wetem long Ol Man blong Leman, mo oli stat blong dipen long paoa blong olgeta nomo, mo long ol waes tingting blong olgeta nomo, mo stap talem se:

16 “Samfala samting, maet oli talem stret, aot long plante olsem; be luk, mifala i save se evri bigfala mo gudfala wok ia i no save hapen, folem ol samting we oli bin tokbaot.”

17 Mo oli stat blong tokbaot mo rao wetem wanwan long olgeta bakegen, mo talem:

18 “Hemia i no wan stret tingting se wan man olsem wan Kraes bae i kam; sapos i olsem, mo hem i Pikinini blong God, Papa blong heven mo blong wol, olsem we oli bin tokbaot, ?from wanem bae hem i no soem hemwan long yumi semmak olsem we hem i soem hem long olgeta we oli stap long Jerusalem?

19 Yes, ?from wanem bae hem i no soem hemwan long graon ia semmak olsem long graon blong Jerusalem?

20 Be luk, mifala i save se hemia i wan nogud kastom, we oli pasem daon long mifala tru long ol papa blong mifala, blong mekem se mifala i mas biliv long sam bigfala mo gudfala samting we bae i kam blong hapen, be i no long medel blong mifala, be long wan graon we i longwe tumas, wan graon we mifala i no save; from hemia, oli save holem mifala we mifala i no save wan samting nating, from mifala i no save witnesem wetem ol ae blong mifala se oli tru.

21 Mo bae oli, tru long ol trik mo defren wok blong nogud wan, wokem wan bigfala sikret we mifala i no save andastanem, we bae i holem daon mifala blong stap ol wokman blong ol toktok blong olgeta, mo tu, ol wokman blong olgeta, from mifala i dipen long olgeta blong oli tijim mifala trutok, mo olsem ia nao bae oli holem mifala we mifala i no save wan samting nating, sapos bae mifala i lego mifala long olgeta, evri dei blong laef blong mifala.”

22 Mo plante moa samting ol pipol oli tingbaot long hat blong olgeta, we i krangke mo samting we i blong nating; mo oli wari tumas from Setan i tanem tingting blong olgeta blong mekem nogud fasin oltaem; yes, hem i go olbaot blong talem ol giaman toktok mo ol rao long ful fes blong graon, blong hem i save mekem hat blong ol pipol i kam strong agensem samting we i bin gud mo agensem ol samting we bae i kam.

23 Mo i nomata long ol saen mo ol sapraes we oli bin hapen long medel blong ol pipol blong Lod, mo ol plante merikel we oli bin mekem, Setan i tekem bigfala kontrol long hat blong ol pipol long ful fes blong graon.

24 Mo olsem ia nao naenti yia ia blong rul blong ol jaj ova long ol pipol blong Nifae i bin en.

25 Mo olsem ia nao buk blong Hileman i bin en, folem histri blong Hileman mo ol boe blong hem.