Lix Hu laj Helaman

1 Ut anajwan k’ehomaq reetal, kik’ulman sa’ xtiklajik li xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi, ki’ok chi wank jun li nimla ch’a’ajkilal sa’ xyanq lix tenamiteb’ laj Nefita.

2 Xb’aan naq k’ehomaq reetal, ak kikam laj Pahoran, ut xikenaq sa’ li b’e naxik wi’ chixjunil li ruchich’och’; jo’kan naq ki’ok chi wank jun li nimla wech’ok-ib’ chirix ani taak’uluq re li raqleb’aal aatin sa’ xyanqeb’ li as iitz’inb’ej, li ralaleb’ laj Pahoran.

3 Anajwan a’ineb’ xk’ab’a’ li ke’xyal ru re xk’ulb’al li raqleb’aal aatin, ut xb’aan wi’ ke’xwech’ rib’ li tenamit: laj Pahoran, laj Paanji, ut laj Pakumeni.

4 Anajwan maawa’eb’ a’in chixjunileb’ li ralal laj Pahoran (xb’aan naq k’iheb’), a’b’an a’ineb’ li ke’xyal ru re xk’ulb’al li raqleb’aal aatin; jo’kan naq ke’kana li tenamit chi jachjo ru sa’ oxib’ jachal.

5 A’b’anan kik’ulman naq laj Pahoran kixaqab’aak xb’aan xyaab’ xkux li tenamit re taawanq choq’ xb’eenil aj raqol aatin ut aj jolominel sa’ xb’een lix tenamit laj Nefi.

6 Ut kik’ulman naq laj Pakumeni, naq kiril naq ink’a’ kiru chixtawb’al li raqleb’aal aatin, a’an kixjunaji rib’ rik’in xyaab’ xkux li tenamit.

7 A’b’an k’ehomaq reetal, laj Paanji, ut li jun raqal chi tenamit li ke’ajok re naq taawanq a’an choq’ xjolomineleb’, kichal xjosq’il chi numtajenaq; jo’kan naq ok raj re chixq’unb’esinkil xch’ooleb’ li winq a’an chi wakliik sa’ po’resink ch’oolej rik’ineb’ li ras riitz’ineb’.

8 Ut naq ok raj re chixb’aanunkil a’in, k’ehomaq reetal, kik’ulman naq kichape’, ut kiraqe’ aatin chirix jo’ chanru xyaab’ xkux li tenamit, ut kiteneb’aak li kamk sa’ xb’een; xb’aan naq kixwaklesi chaq rib’ sa’ li po’resink ch’oolej, ut kixsik’ xsachb’al li ach’ab’aak wankeb’ wi’ li tenamit.

9 Anajwan naq eb’ li winq a’an li ke’ajok re naq taawanq choq’ xjolomineleb’ ke’ril naq teneb’anb’il li kamk sa’ xb’een, chi jo’kan ke’josq’o’, ut k’ehomaq reetal, ke’xtaqla jun aj Kixkumen xk’ab’a’, toj sa’ lix raqleb’aal aatin laj Pahoran, ut kixkamsi laj Pahoran naq chunchu sa’ xb’een li raqleb’aal aatin.

10 Ut a’an kitaaqeek xb’aaneb’ lix moos laj Pahoran; a’b’an k’ehomaq reetal, q’axal sa’ junpaat reelelik chaq laj Kixkumen, jo’kan naq maajun winq kiru chixtawb’al.

11 Ut a’an xko’o rik’ineb’ li ke’taqlan chaq re, ut ke’ok chixjunileb’ sa’ jun sumwank, relik chi yaal, ke’xxaqab’ aatin sa’ xk’ab’a’ laj Yiib’ahom reheb’ li maak’a’ roso’jik, naq maajun winq taayehe’q re xb’aaneb’ naq laj Kixkumen kikamsink chaq re laj Pahoran.

12 Jo’kan naq laj Kixkumen moko kinawe’ ta ru sa’ xyanq lix tenamit laj Nefi, xb’aan naq jaljo ru rilob’aal sa’ li kutan naq kixkamsi laj Pahoran. Ut laj Kixkumen ut lix molam, li ke’ok sa’ sumwank rochb’een, ke’xjek’i rib’ sa’ xyanq li tenamit, jo’kan naq moko chixjunil ta ke’ru ta chi tawe’k; a’ut jo’ k’ihaleb’ li ke’tawe’ kiteneb’aak li kamk sa’ xb’eeneb’.

13 Ut anajwan k’ehomaq reetal, kixaqab’aak laj Pakumeni, jo’ chanru xyaab’eb’ xkux li tenamit, re taawanq choq’ aj raqol aatin ut aj jolominel sa’ xb’een li tenamit, re taa’awa’b’ejinq sa’ xna’aj laj Pahoran li ras; ut kiwan jo’ chanru xk’ulub’. Ut chixjunil a’in kib’aanuman sa’ xka’k’aal chihab’ rawa’b’ejileb’ laj raqol aatin, ut kiwan xraqik a’an.

14 Ut kik’ulman sa’ li xb’een roxk’aal chihab’ rawa’b’ejileb’ laj raqol aatin, naq eb’ laj Lamanita ke’xch’utub’ chaq jun teep chi winq maak’a’ rajlankileb’, ut ke’xkawresiheb’ rik’in yok’leb’ ch’iich’, ut rik’in k’onk’ookil ch’iich’, ut rik’in tzimaj, ut rik’in roq tzimaj, ut rik’in xramb’al jolomej, ut rik’in xramb’al ru ch’oolej, ut rik’in li k’iila paay chi ramleb’, li jar raqal wan.

15 Ut ke’kub’e chaq wi’chik re te’ruuq chi ok sa’ pleet rik’ineb’ laj Nefita. Ut jolominb’ileb’ xb’aan jun winq aj Koriantumr xk’ab’a’, ut a’an ralal xk’ajol laj Tzarahemla; ut risihom chaq rib’ sa’ xyanqeb’ laj Nefita; ut a’an jun winq nim ut kaw xmetz’ew.

16 Jo’kan naq lix reyeb’ laj Lamanita, aj Tubalot xk’ab’a’, ralal laj Ammoron, kixk’oxla naq laj Koriantumr, rik’in naq a’an jun winq kaw xmetz’ew, taaruuq chi xaqliik chiruheb’ laj Nefita, rik’in xnimal xmetz’ew ut rik’in ajwi’ xnimal xna’leb’, jo’kan naq rik’in xtaqlankil aran, a’an tixtaw xwankil sa’ xb’eeneb’ laj Nefita—

17 Jo’kan naq kireek’asiheb’ chi josq’o’k, ut kixch’utub’eb’ lix teep aj pleet, ut kixxaqab’ laj Koriantumr re taawanq choq’ xjolomineleb’, ut kixtaqla naq te’b’eeq taq’a sa’ li ch’och’ Tzarahemla re xpleetinkileb’ laj Nefita.

18 Ut kik’ulman naq sa’ xk’ab’a’ xnimal li wech’ok-ib’ ut xnimal li ch’a’ajkilal sa’ xjolomil li tenamit, naq moko tz’aqaleb’ ta laj k’aak’alenel ke’xkanab’ sa’ li ch’och’ Tzarahemla; xb’aan naq sa’ xch’ooleb’ a’an naq eb’ laj Lamanita maak’a’aqeb’ xch’ool chi ok sa’ xyi li ch’och’ re xpleetinkil li xnimal ru tenamit Tzarahemla.

19 A’b’anan kik’ulman naq laj Koriantumr koxb’eeq sa’ xjolomil lix k’iila teep, ut kichal sa’ xb’eeneb’ li wankeb’ sa’ li tenamit a’an, ut q’axal nim xseeb’al lix b’eenikeb’, jo’kan naq moko tz’aqal ta li hoonal choq’ reheb’ laj Nefita re xch’utub’ankileb’ lix teep aj pleet.

20 Jo’kan naq laj Koriantumr kixt’aneb’ laj k’aak’alenel chire rokeb’aal li tenamit, ut koxo’b’eeq sa’ li tenamit rochb’een chixjunil lix teep aj pleet, ut ke’xkamsi chixjunqaleb’ li ke’pleetink reheb’, jo’kan naq ke’reechani chixjunil li tenamit.

21 Ut kik’ulman naq laj Pakumeni, li kiwan choq’ xb’eenil aj raqol aatin, ki’eelelik chiru laj Koriantumr, toj chire xtz’akil li tenamit. Ut kik’ulman naq laj Koriantumr kooxsak’ chiru li xaqxookil tz’ak, jo’kan naq kikam. Ut chi jo’kan kiraqe’ xkutan laj Pakumeni.

22 Anajwan ut, naq kiril laj Koriantumr naq ak reechanihom li tenamit Tzarahemla, ut kiril naq ke’eelelik chaq laj Nefita chiruheb’, ut kamsinb’ileb’, ut chapb’ileb’, ut tz’apb’ileb’ sa’ tz’alam, ut naq ak xreechani li na’ajej q’axal kaw sa’ chixjunil li ch’och’, kichal xkawil xch’ool, jo’kan naq xik raj re chixpleetinkil chixjunil li ch’och’.

23 Anajwan ut moko kikana ta sa’ li ch’och’ Tzarahemla; koxb’eeq b’an rochb’een jun nimla teep aj pleet, toj sa’ xjayal li tenamit Naab’alil; xb’aan naq k’eek’o xch’ool chi xik ut chixteeb’al xb’e rik’in yok’leb’ ch’iich’, re taaruuq chireechaninkil li jar raqal chi ch’och’ sa’ xnim li saq’e.

24 Ut xb’aan naq kixk’oxla naq lix nimaleb’ xmetz’ew wan sa’ xyi li ch’och’, chi jo’kan koxb’eeq, ut ink’a’ kixk’e xhoonaleb’ re te’xch’utub’ rib’, ka’ajwi’ sa’eb’ li kok’ ch’uut; ut chi jo’ka’in ke’t’ane’ sa’ xb’eeneb’ ut ke’xt’aneb’ chi ch’och’.

25 A’b’an k’ehomaq reetal, lix b’eenik laj Koriantumr chiru xyi li ch’och’ kixk’e re laj Moronihah nimla wankilal sa’ xb’eeneb’, us ta k’a’jo’ xnimal rajlankileb’ laj Nefita li ke’kamsiik.

26 Xb’aan naq k’ehomaq reetal, laj Moronihah kixk’oxla naq eb’ laj Lamanita maak’a’aqeb’ xch’ool chi chalk sa’ xyi li ch’och’, naq te’xpleeti b’an eb’ li tenamit chixsutam sa’eb’ li nub’aal jo’ ke’xb’aanu chaq junxil; jo’kan naq laj Moronihah kixtaqla naq eb’ lix kawil teep aj pleet te’xk’uula xwankil sa’ xb’een li jar raqal a’an chi ch’och’ li wankeb’ chixsutam sa’eb’ li nub’aal.

27 A’b’an k’ehomaq reetal, eb’ laj Lamanita moko ke’xuwak ta jo’ chanru li rajom; ke’ok b’an sa’ xyi li ch’och’, ut ke’xchap li jolomil tenamit, a’an li tenamit Tzarahemla, ut yookeb’ chi b’eek chiruheb’ li jolomil raqal re li ch’och’, ut chixkamsinkileb’ li tenamit rik’in nimla kamsink, li winq jo’ ajwi’ li ixq ut kok’al, ut yookeb’ chireechaninkil k’iila tenamit ut k’iila kawil na’ajej.

28 A’ut naq laj Moronihah kixk’e reetal a’in, tikto kixtaqla laj Lehi rochb’een jun teep aj pleet chirix xsutameb’ re xramb’aleb’ naq maji’ neke’wulak sa’ li ch’och’ Naab’alil.

29 Ut jo’kan kixb’aanu, ut kixrameb’ chi maji’ neke’wulak sa’ li ch’och’ Naab’alil, ut ki’ok sa’ pleet rik’ineb’, jo’kan naq eb’ a’an ke’ok chixsutq’isinkil rib’ sa’ xjayal li ch’och’ Tzarahemla.

30 Ut kik’ulman naq laj Moronihah kixrameb’ ru sa’ xsutq’ijikeb’, ut ki’ok sa’ pleet rik’ineb’, jo’kan naq ki’ok choq’ jun pleet nahoyman wi’ li kik’ chi numtajenaq; relik chi yaal, ke’kamsiik naab’al, ut sa’ xyanq rajlankileb’ li kamenaq kitawman ajwi’ laj Koriantumr.

31 Ut anajwan, k’ehomaq reetal, maab’ar ke’ru laj Lamanita chixsutq’isinkil rib’, moko sa’ xnim ta li saq’e chi moko sa’ xtz’e, chi moko sa’ releb’ li saq’e chi moko sa’ rokeb’aal, xb’aan naq sutsuukeb’ rix yalaq b’ar xb’aaneb’ laj Nefita.

32 Ut chi jo’kan laj Koriantumr kixtiikisiheb’ laj Lamanita sa’ xyiheb’ laj Nefita; jo’kan naq wankeb’ rub’el xwankileb’ laj Nefita, ut a’an ajwi’ kikamsiik, ut eb’ laj Lamanita ke’xq’axtesi rib’ sa’ ruq’eb’ laj Nefita.

33 Ut kik’ulman naq laj Moronihah kireechani wi’chik li tenamit Tzarahemla, ut kixkanab’ naq eb’ laj Lamanita li ke’chape’ chaq choq’ preex te’elq chaq sa’ li ch’och’ sa’ tuqtuukilal.

34 Ut chi jo’kan kiraqe’ li xb’een roxk’aal chihab’ rawa’b’ejileb’ laj raqol aatin.