1 Mo i bin hapen se long nambafoti mo tu yia long rul blong ol jaj, afta we Moronaeha i bin stanemap pis bakegen bitwin Ol Man blong Nifae mo Ol Man blong Leman, luk i no bin gat eni man blong tekem jea blong jajmen; from hemia i stat blong gat wan rao bakegen long medel blong ol pipol long saed blong huia bae i tekem jea blong jajmen.

2 Mo i bin hapen se Hileman, we i boe blong Hileman, ol pipol oli jusum hem blong tekem jea blong jajmen, folem voes blong ol pipol.

3 Be luk, Kiskumen, we i kilimded Pahoran, i stap haed blong kilimded Hileman tu; mo grup blong hem i bin sapotem hem, we oli mekem wan kavenan blong i no gat eni man we i save fasin nogud blong hem.

4 From i bin gat wan Gadianton, we hem i save yusum gud ol toktok, mo tu, long ol fasin blong trik blong hem, blong mekem ol sikret wok blong kilimded man mo long fasin blong stil; from hemia, hem i bin kam lida blong grup blong Kiskumen.

5 From hemia, hem i tok switim olgeta, mo tu, Kiskumen, se sapos oli putum hem long jea blong jajmen bae hem i givim long olgeta we oli blong grup ia blong bae oli putum olgeta long paoa mo raet long medel blong ol pipol; from hemia, Kiskumen i wantem kilimded Hileman.

6 Mo i bin hapen se taem we hem i stap go from jea blong jajmen blong kilimded Hileman, luk wan long ol wokman blong Hileman, from hem i bin aot long naet, mo from hem i kasem, tru long fasin blong haed, wan save long ol plan ia we grup ia i stap mekem blong kilimded Hileman—

7 Mo i bin hapen se hem i mitim Kiskumen, mo hem i givim long hem wan saen; from hemia, Kiskumen i talem long hem stamba tingting blong wanem we hem i wantem; hem i wantem se hem i lidim hem i go long jea blong jajmen blong hem i save kilimded Hileman.

8 Mo taem we wokman blong Hileman i bin save ful hat blong Kiskumen, mo we hem i plan blong hem blong kilim man i ded, mo tu, we i plan blong olgeta evriwan we oli blong grup blong hem blong kilim man i ded, mo blong stil, mo blong kasem paoa, (mo hemia i bin sikret plan blong olgeta, mo grup blong olgeta) wokman blong Hileman i talem long Kiskumen: “Bae yumitu go from jea blong jajmen.”

9 Nao samting ia i bin mekem Kiskumen i hapi tumas, from hem i ting se bae hem i finisim plan blong hem; be luk, wokman blong Hileman, taem we oli stap go from jea blong jajmen i stikim Kiskumen long hat, mekem se hem i foldaon ded be hem i no mekem wan noes. Mo tu, hem i ron mo i talem long Hileman evri samting we hem i bin luk, mo hem i harem, mo hem i mekem.

10 Mo i bin hapen se Hileman i sendem sam man oli go blong tekem grup ia blong ol stilman mo olgeta we oli kilim man i ded long sikret, blong oli save kilimded olgeta folem loa.

11 Be luk, taem we Gadianton i faenemaot se Kiskumen i no kambak, hem i fraet se bae oli panisim hem; from hemia, hem i mekem se grup blong hem i mas folem hem. Mo oli bin ronwe i go aot long kantri, folem wan sikret rod, i go long waelples; mo olsem ia nao taem we Hileman i sendem man i go blong tekem olgeta, oli no bin save faenem olgeta long eni ples.

12 Mo bae mi tokbaot moa yet long saed blong Gadianton afta. Mo olsem ia nao nambafoti mo tu yia blong rul blong ol jaj ova long ol pipol blong Nifae i bin en.

13 Mo luk, long en blong buk ia bae yufala i luk se Gadianton ia i kam blong winim, yes, kolosap i prapa spolem gud evriwan long ol pipol blong Nifae.

14 Luk mi no minim en blong buk blong Hileman, be mi minim en blong buk blong Nifae, we mi tekemaot evri histri long hem we mi bin raetem.