1 Iwe non ewe fansoun non ewe nime me ruanu ier mi wor chommong etinepat me non ewe mwichefen, me mi pwan wor ew anini fengen me nein ekkewe aramas, ina popun pwe a wor watten assuku cha.

2 Iwe ewe kinikin mi kon ungeni ra ninnino me kasuu seni ewe fonu, iwe ra feino ngeni ewe kingen ekkewe chon Leiman.

3 Iwe non ewe fansoun pwe ra achocho ne amwasangata ekkewe chon Leiman pwe repwe maun ngeni ekkewe chon Nifai; nge nengeni, ekkewe chon Leiman ra fokkun nuokus, ina popun pwe rese ausening ngeni ekkewe kapas an ekkewe chon rikino.

4 Nge non ewe fansoun non ewe nime me wonuen ierin muun ekkewe sou apung, mi wor chon rikino ekkewe ra feita seni ekkewe chon Nifai ngeni ekkewe chon Leiman; iwe ra fisioch fiti ekkewe ekkoch ne amwasangereta ne song ngeni ekkewe chon Nifai; iwe ir meinisin non ena ier ra amonneta ngeni maun.

5 Iwe non ewe nime me fisuen ier ra feitiw ungeni ekkewe chon Nifai ne maun, iwe ra poputani ewe angangen mano; ewer, ina popun pwe non ewe nime me wanuen ierin muun ekkewe sou apung ra fisioch ne angei nemenem won ewe fonuen Saraemla; ewer, me pwan ekkewe fonu meinisin, pwan mwo ewe fonu minne a arap ngeni ewe fonu Fonuen ras.

6 Iwe ekkewe chon Nifai me ekkewe sounfiun Moronaia ra kasuno pwan mwo ngeni ewe Fonuen ras;

7 Iwe ikewe ra apochokunereno ngeni ekkewe chon Leiman, seni ewe sat notou, pwan mwo ngeni ewe sat otiw; a ukukun ew ranin sai ngeni emon chon Nifai, won ewe kinikin minne ra fen apochokunano me annomu nour kewe sounfiu pwe repwe eppeti fonuer we ennefen.

8 Iwe iei ekkena chon rikino seni ekkewe chon Nifai, fiti aninisin ew chommong mwichen sounfiun ekkewe chon Leiman, ra angei meinisin pisekin ekkewe chon Nifai minne a nom non ewe fonu eor. Iwe ekkei meinisin ra fis non ewe nime me wanuen me tiuwen ierin muun ekkewe sou apung.

9 Iwe non ewe fansoun non ewe wonen ierin muun ekkewe sou apung, Moronaia a fetanoch fiti noun kewe sounfiu ne angei chommong kinikinin ewe fonu; ewer, ra angei sefani chommong teninimw minne ra fen turunong ne poun ekkewe chon Leiman.

10 Iwe non ewe fansoun non ewe wone me ewin ierin muun ekkewe sou apung ra fetanoch ne angei sefani pwan mwo esopun fonuer kewe meinisin.

11 Iei ei watten chommong mi mano an ekkewe chon Nifai, me ewe watten wachemuken ninnino minne a fis neir, ita esap fen fis ika esap ren ar fofforungaw me ar angang mi anieput minne a fis neir; ewer, me a pwan fis nein ekkewe ra ara pwe ra choni ewe mwichefenin Kot.

12 Iwe ina pokiten ewe namanam tekian netiper, pokiten ar fokkun pisekisek, ewer, ina pokiten ar eriaffou ngeni ekkewe mi woungaw, ra amwochu aner mwongo seni ekkewe mi echik, ra amwochu ufer seni ekkewe mi seneno, me wichi pwir kewe mi tipetekison won saper, ra turunufasa met minne mi pin, ra amam ewe ngunun osini me ngunun pwarata, nii manau, angemwan, chofona, sona, fori angangen nisou, poputa non pochokunen anini fengen, me suno ngeni ewe fonuen Nifai, nein ekkewe chon Leiman—

13 Iwe pokiten ei ar fokkun fofforungaw, me ar sikaseni non pwisin ar pochokun, ra nikitino non ar pwisin pochokun; iei minne rese feioch, nge ra riaffou me wichiwich, me kasuno me mwen ekkewe chon Leiman, tori an turuseni ir arap ngeni meinisin nemenemen fonuer kewe.

14 Nge nengeni, Moronaia a afanafana chommong mettoch ngeni ekkewe aramas pokiten ar angangangaw, me pwan Nifai me Liai, ir ekkewe anuon noun Ilaman, ra afanafana chommong mettoch ngeni ekkewe aramas, ewer, me osini chommong mettoch ngeni ir usun ar angangangaw, me met epwe fis ngeni ir ika resap aier seni ar kewe tipis.

15 Iwe non ewe fansoun pwe ra aier, iwe ren ukukun ar aier ra poputa ne feiochuno.

16 Iwe nupwen Moronaia a kuna pwe ra aier a achocho ne emmweni ir seni neni ngeni neni, me seni teninimw me teninimw, pwan mwo tori ar angei sefani esopun pisekir kewe me esopun fonuer kewe meinisin.

17 Iwe iei a muchuno ewe wone me ewin ierin muun ekkewe sou apung.

18 Iwe non ewe fansoun non ewe wone me ruen ierin muun ekkewe sou apung, pwe Moronaia ese chiwen tongeni angei nemenem won ekkewe chon Leiman.

19 Iei minne ra fangeta ar we kokkot ne angei nussunon fonuer kewe, pokiten chommongun ekkewe chon Leiman pwe ese tufich ngeni an ekkewe chon Nifai ne angei pwan och nemenem wor; iei minne Moronaia a anganga noun kewe sounfiu meinisin ne eppeti ekkena kinikin minne a fen angei ir.

20 Iwe non ewe fansoun, pokiten watten chochon ekkewe chon Leiman ekkewe chon Nifai ra nom non ennetin nuokus, ren nuokusun ika pwe repwe kuf, me chapapetiw, me ninnino, me mano.

21 Ewer, ra poputa ne chechemeni ekkewe osini an Alma, me pwan ekkewe kapas an Mosaia; iwe ra kuna pwe ra fen ew aramas nukumach, me pwe rese aucheani ekkewe annukun Kot;

22 Me pwe ra fen siwini me achapapatiw fan pecher ekkewe annuk an Mosaia, are met minne ewe Samon a annuku ngeni i pwe epwe ngeni ekkewe aramas; iwe ra kuna pwe ar kewe annuk ra ngaweno, me ra winiti aramas mi ngaw, ina popun pwe ra ngaw pwan mwo usun ekkewe chon Leiman.

23 Iwe pokiten ar angangangaw ewe mwichefen a poputa ne kukkununo; iwe ra poputa ar rese chiwen nuku non ewe ngunun osini me non ewe ngunun pwarata; iwe ekkewe kapung an Kot ra nennenong ne meser.

24 Iwe ra kuna pwe ra apwangapwangeno, usun chok pwir kewe, ekkewe chon Leiman, me pwe ewe Ngunun ewe Samon ese chiwen tumunur; ewer, a fen su seni ir pokiten Ngunun ewe Samon ese nonnom non tempel ese pin—

25 Iei minne ewe Samon a kouno ne tumunur me ren an manaman mi amwarar me mi nap seni meinisin, pun ra fen turunong non ew nikinikin nukunukumang me anoninenin fofforungaw; iwe ra kuna pwe ekkewe chon Leiman ra kon fokkun chommong nap seni ir, iwe tiwenon chok ika repwe chok kamochunuk ngeni ewe Samon ar Kot repwe wesewesen fokkun mano.

26 Pun nengeni, ra kuna pwe pochokunen ekkewe chon Leiman a nonno ngeni usun chok ar pochokun, pwan mwo emon aramas ngeni emon aramas. Iwe iei ra turunong non ei ennetin atai annuk; ewer, iei ra apwangapwangeno, pokiten ar atai annuk, esap non ukukun chommong ier.