1 Mo i bin hapen se long nambafifti mo fo yia, i gat plante fasin blong pulaot long jos, mo i bin gat tu wan rao long medel blong ol pipol, inaf blong mekem se plante blad i ron.

2 Mo olgeta ia, we oli go agens, oli kilimded olgeta mo oli ronem olgeta oli aot long graon, mo oli go long king blong Ol Man blong Leman.

3 Mo i bin hapen se oli traem blong tanem ol tingting blong Ol Man blong Leman blong faet agensem Ol Man blong Nifae; be luk, Ol Man blong Leman oli fraet tumas, inaf mekem se oli no save lisin long ol toktok blong olgeta we oli bin pulaot.

4 Be i bin hapen se long nambafifti mo sikis yia blong rul blong ol jaj, i gat olgeta ia we oli bin pulaot we oli go long Ol Man blong Leman; mo oli bin gat sakses wetem ol narafalawan blong tanem tingting blong olgeta blong kam kros agensem Ol Man blong Nifae; mo olgeta evriwan long yia ia, oli stap mekem rere blong wo.

5 Mo long nambafifti mo seven yia oli kam daon agensem Ol Man blong Nifae blong faet, mo oli statem wok blong kilim man i ded; yes, inaf mekem se long nambafifti mo eit yia blong rul blong ol jaj oli bin gat sakses blong tekem graon blong Sarahemla; yes, mo tu, evri graon, go kasem graon we i stap kolosap long graon ia, Plante.

6 Mo oli ronemaot Ol Man blong Nifae mo ol ami blong Moronaeha i go insaed long graon Plante;

7 Mo long ples ia oli mekem olgeta i kam strong agensem Ol Man blong Leman, stat long solwota blong Wes, go kasem long Is; we i wan dei wokbaot nomo blong wan Man blong Nifae, folem laen we oli bin mekem i kam strong, mo oli bin putum ol ami blong olgeta blong lukaotem gud kantri blong olgeta long Not.

8 Mo olsem ia nao olgeta ia we oli bin pulaot long Ol Man blong Nifae, wetem help blong wan bigfala namba blong ami blong Ol Man blong Leman, oli tekem evri samting blong Ol Man blong Nifae we i bin stap long graon long Saot. Mo evri samting ia i hapen long nambafifti mo eit mo naen yia blong rul blong ol jaj.

9 Mo i bin hapen long nambasiksti yia blong rul blong ol jaj, Moronaeha i gat sakses wetem ol ami blong hem blong tekem plante pat blong graon; yes, oli tekembak plante bigtaon we oli bin foldaon long ol han blong Ol Man blong Leman.

10 Mo i bin hapen se long nambasiksti mo wan yia blong rul blong ol jaj, oli gat sakses blong tekembak kasem haf blong ol samting blong olgeta.

11 Nao bigfala lus ia blong Ol Man blong Nifae, mo bigfala fasin blong kilim man i ded we i bin stap wetem olgeta, i no save hapen sapos i no from ol fasin nogud mo rabis sin blong olgeta we i bin stap long medel blong olgeta; yes, mo i bin stap tu long olgeta we oli talemaot se oli blong jos ia blong God.

12 Mo hem i from hae tingting blong hat blong olgeta, from ol rij samting blong olgeta we oli tumas, yes, hem i from fasin blong olgeta blong mekem ol puaman oli harem nogud, from oli holemtaet ol kaekae blong olgeta long olgeta we oli hanggri, oli holemtaet ol klos blong olgeta long olgeta we oli neked, mo from oli slapem fes blong ol brata blong olgeta we tingting blong olgeta i stap daon, oli jikim samting we i tabu, from oli tanem baksaed long spirit blong profesi mo blong revelesen, from oli kilim man i ded, oli stil long taem blong wo, oli giaman, oli stil, oli mekem adaltri, from oli girap long ol bigfala rao, mo from oli ronwe i go long graon blong Nifae, long medel blong Ol Man blong Leman—

13 Mo from hemia, bigfala fasin nogud ia blong olgeta, mo ol tokflas long paoa blong olgeta nomo, God i livim olgeta wetem paoa blong olgeta nomo; from hemia, oli no bin kam antap gud, be Ol Man blong Leman oli givim hadtaem long olgeta mo oli kilim olgeta, mo Ol Man blong Leman oli ronemaot olgeta, kasem taem we oli lusum kolosap evri graon blong olgeta.

14 Be luk, Moronaeha i bin prijim plante samting long ol pipol from rabis fasin blong olgeta, mo tu, Nifae mo Lihae, we tufala i ol boe blong Hileman, oli bin prijim plante samting long ol pipol, yes, mo oli bin profesae plante samting long olgeta long saed blong ol rabis fasin blong olgeta, mo wanem bae i kam long olgeta sapos oli no sakem ol sin blong olgeta.

15 Mo i bin hapen se oli sakem sin, mo folem hamas we oli sakem sin, oli stat blong kam antap gud.

16 From taem we Moronaeha i luk se oli sakem sin, hem i traem blong lidim olgeta long wan ples i go long narafala ples, mo long wan bigtaon i go long narafala bigtaon, kasem taem we oli tekembak wan haf blong ol samting blong olgeta mo wan haf blong evri graon blong olgeta.

17 Mo olsem ia nao nambasiksti mo wan yia blong rul blong ol jaj i bin en.

18 Mo i bin hapen se long nambasiksti mo tu yia blong rul blong ol jaj, Moronaeha i no save kasem moa long ol samting long Ol Man blong Leman.

19 From hemia, oli bin lego plan blong olgeta blong kasem ol narafala graon blong olgeta, from namba blong Ol Man blong Leman i plante tumas, i mekem se i no gat janis blong Ol Man blong Nifae oli kasem moa paoa ova long olgeta; from hemia, Moronaeha i bin givim wok long evri ami blong hem blong lukaotem gud ol pat we hem i bin tekem.

20 Mo i bin hapen se, from namba blong Ol Man blong Leman i bigwan tumas, Ol Man blong Nifae oli fraet bigwan, oli fraet se Ol Man blong Leman i winim olgeta, mo oli purumbut long olgeta, mo oli kilimded olgeta, mo oli prapa spolem gud olgeta.

21 Yes, oli stat blong tingbaot ol profesi blong Alma, mo tu, ol toktok blong Mosaea; mo oli luk se oli stap olsem wan stronghed pipol, mo oli luk se oli ting nating long ol komanmen blong God;

22 Mo we oli jenisim mo oli purumbut, wetem ol leg blong olgeta, ol loa ia blong Mosaea, o hemia we Lod i bin givim oda long hem blong givim long ol pipol; mo oli luk se ol loa blong olgeta oli kam nogud, mo we oli kam wan nogud pipol, inaf we i mekem se oli stap nogud olsem Ol Man blong Leman.

23 Mo from ol nogud fasin blong olgeta jos i stat blong kam smol; mo oli stat blong no biliv long spirit blong profesi mo long spirit blong revelesen; mo ol jajmen blong God i bin lukluk olgeta stret long fes blong olgeta.

24 Mo oli bin luk se oli bin kam slak, olsem ol brata blong olgeta, Ol Man blong Leman, mo we Spirit blong Lod i nomo sevem olgeta; yes, i bin kamaot long olgeta from Spirit blong Lod i no stap long ol tempol we i no tabu—

25 From hemia, Lod i stop blong sevem olgeta wetem paoa blong hem we i gat merikel mo i bitim eni paoa, from oli foldaon long wan ples we oli no save gat bilif, mo long fasin nogud we i rabis stret; mo oli luk se Ol Man blong Leman oli moa plante tumas bitim olgeta, mo sapos oli no stap fetful long Lod, God blong olgeta, bae oli mas ded nomo.

26 From luk, oli luk se paoa blong Ol Man blong Leman i bigwan semmak olsem hemia blong olgeta, hem i olsem wan Man blong Leman i gat sem paoa olsem wan Man blong Nifae. Mo olsem ia nao oli bin foldaon long bigfala fasin blong brekem loa; yes, olsem ia nao oli kam slak, from ol fasin blong olgeta blong brekem loa, long spes blong ol yia we i no plante.