1 ’E i muri a’era, ’ia hope a’era te ono ’ahuru ’e ma piti o te matahiti nō te fa’aterera’a a te mau ha’avā, ’ua tupu ihora teie nei mau mea, ’e ’ua riro ihora te pae rahi o te mau ’āti Lamana ’ei feiā parauti’a, ’e nō reira ho’i ’ua hau atu tō rātou parauti’a i tō te mau ’āti Nephi, nō tō rātou ha’apa’o maita’i ’e tō rātou itoito i roto i te fa’aro’o.

2 Inaha ho’i, e rave rahi tō te mau ’āti Nephi tei riro ’ei feiā ’eta’eta ’e te tātarahapa ’ore ’e te parauti’a ’ore, ’e nō reira ho’i ’ua pāto’i rātou i te parau a te Atua ’e te mau parau ato’a i a’ohia ’e i tohuhia ’o tei tae mai i rotopū ia rātou.

3 ’Āre’a rā, ’ua rahi roa te ’oa’oa o te mau ta’ata o te ’ēkālesia nō te mea ’ua fa’afāriuhia mai te mau ’āti Lamana ; ’oia ïa, nō te mea ’ua fa’ati’ahia te ’ēkālesia a te Atua i rotopū ia rātou. ’E ’ua aupuru rātou te tahi i te tahi, ’e ’ua ’oa’oa te tahi i te tahi, ’e ’ua fāri’i i te ’oa’oa rahi.

4 ’E i muri a’era, ’ua tae mai ra te mau ’āti Lamana e rave rahi i raro i te fenua ra nō Zarahemela, ’e ’ua fa’a’ite mai ra i te mau ta’ata o te mau ’āti Nephi i te huru o tō rātou fa’afāriura’ahia mai, ’e ’ua a’o mai ra ia rātou ’ia fāri’i i te fa’aro’o ’e ’ia tātarahapa.

5 ’Oia ïa, e rave rahi tei a’o mai ma te mana rahi ’e te ha’amanara’a rahi, ē tae roa atu ’ua fa’ahaerehia e rave rahi i raro roa i te ha’eha’a, ’ia riro ’ei mau ta’ata ha’eha’a ’o tei pe’e atu i te Atua ’e te ’Ārenio.

6 ’E i muri a’era, e rave rahi te mau ’āti Lamana tei haere i te fenua i te pae apato’erau ; ’e ’ua haere ato’a atu ’o Nephi rāua ’o Lehi i te fenua i te pae apato’erau nō te a’o atu i te mau ta’ata. ’E nō reira ’o te hope’a te reira nō te ono ’ahuru ’e ma toru o te matahiti.

7 ’E inaha, ’ua tupu te hau i ni’a i te fenua tā’āto’a, ’e nō reira ho’i ’ua haere noa te mau ’āti Nephi i te mau vāhi ato’a ’o tā rātou i hina’aro, i rotopū ānei i te mau ’āti Nephi ’e ’aore rā i rotopū i te mau ’āti Lamana.

8 ’E i muri a’era, ’ua haere ato’a te mau ’āti Lamana i te mau vāhi tā rātou i hina’aro, i rotopū ānei i te mau ’āti Lamana ’e ’aore rā i rotopū i te mau ’āti Nephi ; ’e nō reira ’ua fārerei noa atu te tahi i te tahi, ’ua ho’o mai ’e ’ua ho’o atu, ’e ’ua noa’a te tao’a mai te au i tō rātou hina’aro.

9 ’E i muri a’era, ’ua riro atu ra rātou ’ei feiā tao’a rahi, te mau ’āti Lamana ’e te mau ’āti Nephi ato’a ho’i ; ’e ’ua rahi roa tā rātou ’auro, ’e te ’ārio, ’e te mau huru metalo maitata’i ato’a, i te fenua i te pae apato’a ’e i te fenua i te pae apato’erau ato’a ho’i.

10 I teienei, ’ua pi’ihia te fenua i te pae apato’a ’o Lehi, ’e ’ua pi’ihia te fenua i te pae apato’erau ’o Muleka, ’ia au i te i’oa o te tamaiti a Zedekia ; ’e ’ua arata’i mai ho’i te Fatu ia Muleka i te fenua i te pae apato’erau, ’e ’ia Lehi i te fenua i te pae apato’a.

11 ’E inaha, tē vai ra te mau huru ’auro ato’a i ni’a i teie nā fenua e piti, ’e te ’ārio, ’e te mau huru ’ōfa’i metalo ato’a ; ’e tei reira ato’a te mau ta’ata ’aravihi i te rave i te ’ohipa, ’e ’ua ’ohipa rātou i te mau huru ’ōfa’i metalo ato’a ’e ’ua tāmā roa i te reira ; ’e nō reira ’ua riro rātou ’ei feiā ’ona.

12 ’E ’ua fa’a’apu rahi rātou i te sītona i te fenua i te pae apato’erau ’e i te pae apato’a ato’a ; ’e ’ua ruperupe maita’i te reira i te fenua i te pae apato’erau ’e i te pae apato’a ato’a ho’i. ’E ’ua tupu rātou i te rahi ’e i te pūai roa i ni’a i te fenua. ’E ’ua fa’a’amu rātou e rave rahi mau nana māmoe ’e mau nana pua’atoro, ’oia ïa, ’e e rave rahi mau pua’atoro poria.

13 Inaha, ’ua rave tā rātou mau vahine i te ’ohipa ’e ’ua nino rātou, ’e ’ua hāmani rātou i te mau huru ’ahu ato’a, ’e te ’ahu paruai maita’i roa ’e te mau huru ’ahu ato’a nō te fa’a’ahu i tō rātou tino vai taha’a noa. ’E nō reira ’ua hope a’era te ono ’ahuru ’e ma maha o te matahiti ma te hau.

14 ’E ’ia tae a’era i te ono ’ahuru ’e ma pae o te matahiti ’ua fāri’i rātou i te ’oa’oa rahi ’e te hau ; ’oia ïa, te mau a’ora’a e rave rahi ’e te mau tohura’a e rave rahi nō ni’a i te mau mea e tupu a muri atu. ’E nō reira ’ua hope a’era te ono ’ahuru ’e ma pae o te matahiti.

15 ’E i muri a’era, ’ia tae a’era i te ono ’ahuru ’e ma ono o te matahiti nō te fa’aterera’a a te mau ha’avā, inaha, ’ua taparahihia ihora Kezorama e te rima ’itea-’ore-hia ’a pārahi noa ai ’oia i ni’a i te pārahira’a ha’avāra’a. ’E i muri a’era, i taua ato’a iho matahiti ra, ’ua taparahi-ato’a-hia tāna tamaiti, ’o tei mā’itihia e te mau ta’ata ’ei mono nōna. ’E nō reira ’ua hope a’era te ono ’ahuru ’e ma ono o te matahiti.

16 ’E i te ha’amatara’a nō te ono ’ahuru ’e ma hitu o te matahiti, ’ua ha’amata te ta’ata i te pūai fa’ahou i roto i te parauti’a ’ore roa.

17 Inaha ho’i, ’ua ha’amaita’i maoro te Fatu ia rātou i te mau tao’a rahi nō teie nei ao, ’e ’aita ho’i rātou i fa’ati’arepuhia ’ia fa’atupu i te riri, i te mau tama’i, ’e i te ha’amani’i i te toto ; nō reira, ’ua ha’amata ihora tō rātou ’ā’au i te nounou i tā rātou iho mau tao’a ; ’oia ïa, ’e ’ua ha’amata ihora rātou i te tītau rahi atu ā i te faufa’a ’ia fa’ateiteihia rātou te tahi i ni’a a’e i te tahi ; nō reira ’ua ha’amata ihora rātou i te taparahi huna noa i te ta’ata, ’e i te rave huna noa ’e i te haru noa, ’ia roa’a tā rātou faufa’a.

18 ’E i teienei inaha, nō roto mai teie mau ta’ata taparahi ta’ata ’e teie mau ta’ata ’eiā haru i te hō’ē pupu ta’ata i fa’anahonahohia e Kisakumena rāua ’o Gadianetona. ’E i teienei, i muri a’era, tē vai nei e rave rahi ta’ata, ē tae noa atu i rotopū i te mau ’āti Nephi iho, nō roto mai i te pupu a Gadianetona. Inaha rā, te pae rahi roa o taua mau ta’ata ra, nō roto ïa i te feiā parauti’a ’ore roa o te mau ’āti Lamana. ’E ’ua parauhia rātou te mau ta’ata ’eiā haru ’e te mau ta’ata taparahi ta’ata nā Gadianetona.

19 ’E nā rātou ho’i i taparahi i te ha’avā rahi ra ’o Kezorama, ’e tāna ho’i tamaiti, ’a pārahi noa ai rāua i ni’a i te pārahira’a ha’avāra’a ; ’e inaha, ’aita roa rātou i ’itehia.

20 ’E i teienei, i muri a’era, ’ia ’ite a’era te mau ’āti Lamana ē, tē vai ra te feiā ’eiā haru i rotopū ia rātou ’ua ’oto roa ihora rātou ; ’e ’ua fa’a’ohipa rātou i te mau rāve’a ato’a i roto i tō rātou mana nō te ha’amou ia rātou mai ni’a atu i te fenua nei.

21 Inaha rā, ’ua fa’ati’arepu Sātane i te ’ā’au o te pae rahi o te mau ’āti Nephi, ’e nō reira ho’i ’ua ’āmui atu ra rātou i te mau pupu ’eiā haru, ’e ’ua fa’aau ihora i tā rātou mau fafaura’a ’e tā rātou mau tapura’a, ’ia pāruru ’e ’ia fa’aora te tahi i te tahi i te mau vāhi i fifihia ai rātou ra, ’e ’ia ’ore rātou ’ia tāho’ohia nō tā rātou mau taparahira’a ta’ata, ’e tā rātou mau ’eiā-haru-ra’a, ’e tā rātou mau ’eiāra’a.

22 ’E i muri a’era, tē vai ra tā rātou mau tāpa’o, ’oia ïa, tā rātou mau tāpa’o huna, ’e tā rātou mau parau huna ; ’e ’ua ravehia te reira ’ia ti’a ia rātou ’ia ’ite pāpū i te taea’e i tomo atu i roto i te fafaura’a, ’e ’ia rave noa atu tōna taea’e i te parauti’a ’ore ’aita ’oia e tāho’ohia e tōna taea’e, ’e ’aita ato’a ’oia e tāho’ohia e te mau ta’ata i roto i tāna pupu, ’o tei fa’aoti ato’a i teie fafaura’a.

23 ’E nō reira ’ua ti’a ia rātou ’ia taparahi noa i te ta’ata, ’ia ’eiā haru, ’ia ’eiā, ’e ’ia rave i te mau ’ohipa tai’ata ’e te mau huru ’ohipa ’ī’ino ato’a, ’o tei ’ore i au i te mau ture nō tō rātou fenua ’e i te mau ture ato’a a tō rātou Atua.

24 ’E te ta’ata i roto i tā rātou pupu ’o tē fa’a’ite i tā rātou mau ’ohipa ’ī’ino ’e te mau ’ohipa vi’ivi’i i tō te ao nei, e ha’avāhia ïa ’oia, ’eiaha ’ia au i te mau ture nō tō rātou fenua, ’ia au rā i te mau ture nō tā rātou mau ’ohipa ’ī’ino, ’o tei hōro’ahia mai e Gadianetona rāua ’o Kisakumena.

25 I teienei inaha, ’o teie te mau tapura’a huna ’e te mau fafaura’a huna ’o tā Alama i fa’aue i tāna tamaiti ’eiaha roa ’ia fa’ataehia nā roto i te ao, ’o te riro te reira ’ei rāve’a nō te ha’amou i te mau ta’ata.

26 I teienei inaha, ’aita taua mau tapura’a huna ’e te mau fafaura’a huna i tae mai ia Gadianetona nā roto mai i te mau pāpa’a parau i hōro’ahia mai ia Helamana ; inaha rā, ’ua tu’uhia mai te reira i roto i te ’ā’au o Gadianetona e taua iho ta’ata ra i fa’ahema i tō tātou nā metua mātāmua ’ia ’amu i te mā’a i rāhuihia ra—

27 ’Oia ïa, nā taua iho ta’ata ra ’o tei fa’aau i te ’ōpuara’a huna ia Kaina ē, mai te mea e taparahi ’oia i tōna taea’e ia Abela e’ita roa te reira e ’itehia e tō te ao nei. ’E ’ua fa’aau ’oia i te ’ōpuara’a huna ia Kaina ’e te mau ta’ata tei pe’e iāna mai te reira mai taime.

28 ’E ’oia ato’a nā taua iho ta’ata ra ’o tei tu’u i roto i te ’ā’au o te mau ta’ata ’ia patu i te hō’ē pare teitei roa ē tae atu ai rātou i ni’a i te ra’i. ’E nā taua iho ta’ata ra ’o tei arata’i ’ē i te mau ta’ata ’o tei haere mai nā taua pare ra i teie nei fenua ; ’o tei ha’aparare i te mau ’ohipa nō te pōiri ’e te mau ’ohipa vi’ivi’i i ni’a i te fenua tā’āto’a, ē tae noa atu ’ua ’ume ’oia i te mau ta’ata i raro ’ia ha’amouhia rātou pā’āto’a, ē tae atu ai i te hade mure ’ore.

29 ’Oia ïa, nā taua iho ta’ata ra ’o tei tu’u i roto i te ’ā’au o Gadianetona ’ia rave ā i te ’ohipa nō te pōiri, ’e nō te taparahi huna i te ta’ata ; ’e ’ua fa’atupu ’oia i te reira mai te ha’amatara’a mai o te ta’ata ē tae roa mai i teie taime.

30 ’E inaha, ’o ’oia te tumu nō te mau hara ato’a. ’E inaha, tē rave noa nei ā ’oia i tāna mau ’ohipa nō te pōiri ’e te taparahi huna i te ta’ata, ’e tē tu’u noa mai ra ’oia i tā rātou mau ’ōpuara’a huna, ’e tā rātou mau tapura’a, ’e tā rātou mau fafaura’a, ’e tā rātou mau ’ōpuara’a nō te parauti’a ’ore rahi, mai terā u’i i terā u’i mai te au i tōna mana ’ia haru i te ’ā’au o te mau tamari’i a te ta’ata nei.

31 ’E i teienei inaha, ’ua roa’a iāna te pae rahi o te ’ā’au o te mau ’āti Nephi ; ’oia ïa, ’e nō reira ho’i ’ua riro rātou ’ei feiā parauti’a ’ore roa ; ’oia ïa, ’ua fāriu ’ē atu tō rātou pae rahi i te ’ē’a nō te parauti’a, ’e ’ua ta’ata’ahi rātou i te mau fa’auera’a a te Atua i raro a’e i tō rātou ’āvae, ’e ’ua fāriu atu rātou i tō rātou ihora mau ’ē’a, ’e ’ua hāmani i te mau ’īdolo nō rātou iho i tā rātou ’auro ’e tā rātou ’ārio.

32 ’E i muri a’era, ’aita i rahi te mau matahiti i muri iho, ’ua tae mai ra teie mau ’ohipa ’ī’ino ia rātou, ’e nō reira ho’i ’ua tae mai te pae rahi nō te reira ia rātou i te ono ’ahuru ’e ma hitu o te matahiti nō te fa’aterera’a a te mau ha’avā i ni’a i te mau ta’ata o Nephi.

33 ’E ’ua tupu rahi rātou i roto i tā rātou mau ’ohipa ’ī’ino i roto i te ono ’ahuru ’e ma va’u ato’a o te matahiti, i ’oto rahi ai ’e i auē ai te feiā parauti’a.

34 ’E nō reira tē ’ite nei tātou ē, ’ua ha’amata te fa’aro’o o te mau ’āti Nephi i te paruparu, ’e ’ua tupu rahi tō rātou parauti’a ’ore ’e tā rātou mau ’ohipa vi’ivi’i, ’āre’a te mau ’āti Lamana ’ua tupu rahi tō rātou ’ite i tō rātou Atua ; ’oia ïa, ’ua ha’amata rātou i te ha’apa’o maita’i i tāna mau ture ’e te mau fa’auera’a, ’e i te haere i roto i te parau mau ’e te parauti’a i mua iāna ra.

35 ’E nō reira tē ’ite nei tātou ē, ’ua ha’amata te Vārua o te Fatu i te fa’aātea ’ē atu i te mau ’āti Nephi, nō te parauti’a ’ore ’e te ’eta’eta o tō rātou ’ā’au.

36 ’E nō reira tē ’ite nei tātou ē, ’ua ha’amata te Fatu i te nīni’i mai i tōna Vārua i ni’a i te mau ’āti Lamana, nō tō rātou fa’aro’o ’ōhie ’e tō rātou hina’aro mau ’ia ti’aturi i tāna mau parau.

37 ’E i muri a’era, ’ua ’imi haere te mau ’āti Lamana i te pupu ’eiā haru o Gadianetona ; ’e ’ua a’o atu ra rātou i te parau a te Atua i rotopū ia rātou ’o tei hau atu i te parauti’a ’ore, ’e nō reira ho’i ’ua ha’amou-roa-hia teie pupu ’eiā haru mai rotopū atu i te mau ’āti Lamana.

38 ’E i muri a’era, i te vāhi ’ē, ’ua tauturu atu ’e ’ua pāturu atu te mau ’āti Nephi ia rātou, ma te ha’amata i te feiā parauti’a ’ore roa, ē tae roa ’ua ha’aparare rātou i te reira i ni’a i te fenua tā’āto’a o te mau ’āti Nephi, ’e ’ua ti’a ia rātou ’ia fa’ahema i te pae rahi o te feiā parauti’a ’ia ti’aturi i tā rātou mau ’ohipa ’e ’ia fāri’i i te mau tao’a haruhia mai e rātou ra, ’e ’ia ’āmui mai ia rātou i roto i tā rātou mau taparahi-huna-ra’a ta’ata ’e tā rātou mau pupu ’ohipa huna.

39 ’E nō reira ’ua noa’a ia rātou te fa’aterera’a tā’āto’a nō te hau fenua ; ’e nō reira ho’i ’ua ta’ata’ahi noa rātou i raro a’e i tō rātou ’āvae ’e ’ua tā’iri ’e ’ua hahae ’e ’ua fāriu ’ē atu i tō rātou tua i te feiā veve ’e te marū, ’e i te mau ta’ata ha’eha’a i pe’e atu i te Atua.

40 ’E nō reira tē ’ite nei tātou ē, tei roto rātou i te ti’ara’a ri’ari’a, ’e ’ua ineine roa nō te pohe mure ’ore.

41 ’E i muri a’era, ’o te hope’a te reira nō te ono ’ahuru ’e ma va’u o te matahiti nō te fa’aterera’a a te mau ha’avā i ni’a i te mau ta’ata o Nephi.