1 Iwe non ewe fansoun pwe nupwen ewe wone me ruen ierin muun ekkewe sou apung a muchuno, ekkei mettoch meinisin ra fen fis iwe ekkewe chon Leiman ra winiti, ewe watten kinikinin me neir, ew aramas mi tupwon, tori ukukun pwe ar wenechar a nap seni an ekkewe chon Nifai, pokiten ar pochokun me ar tipepos non ewe nuku.

2 Pun nengeni, mi chommong me nein ekkewe chon Nifai ekkewe ra tipe pochokun me aucho me fokkun ngaw, ina popun pwe ra aturano ewe kapasen Kot me ekkewe afanafan me osini meinisin minne ra fis me neir.

3 Nge inamo, ekkewe aramasen ewe mwichefen a wor ar ennetin pwapwa pokiten ewe siwin an ekkewe chon Leiman, ewer, pokiten ewe mwichefenin Kot, minne a fen foruta me neir. Iwe ra chiechi emon ngeni pwan emon, me ra pwapwa emon ngeni pwan emon, me a wor ar ennetin pwapwa.

4 Iwe non ewe fansoun pwe chommong me nein ekkewe chon Leiman ra feitiw ngeni non ewe fonuen Saraemla, me ra affata ngeni ekkewe aramasen ekkewe chon Nifai napanapen ar siwin, me ra peser ngeni nuku me aier.

5 Ewer, iwe chommong ra afanafan ren fokkun manaman me mumuta mi napanap, tori an esenipato chommong me neir ngeni non anonnonen tipetekison, pwe repwe chon tapweno mi tipetekison mwirin Kot me ewe Nam.

6 Iwe non ewe fansoun pwe chommong me nein ekkewe chon Leiman ra feino non ewe fonu ennefen; me pwan Nifai me Liai ra feino non ewe fonu ennefen, pwe repwe afanafan ngeni ekkewe aramas. Iwe iei a muchuno ewe wone me unungatin ier.

7 Iwe nengeni, mi wor kinamwe non unusen ewe fonu, ina popun pwe ekkewe chon Nifai ra feino ngeni met chok kinikinin ewe fonu ra tongeni, ika epwe nein ekkewe chon Nifai are ekkewe chon Leiman.

8 Iwe non ewe fansoun pwe ekkewe chon Leiman ra pwan feino ian chok ra tongeni, ika epwe nein ekkewe chon Leiman are nein ekkewe chon Nifai; iwe iei a wor ar mwokutukut fengen nefiner ese aukuk emon ngeni pwan emon, ar repwe kamö are amömö, me ar repwe pisekisekino, anongonong won ar mochen.

9 Iwe non ewe fansoun pwe ra fokkun pisekisekino, ekkewe chon Leiman me ekkewe chon Nifai; iwe a wor ar ew fokkun chommongun gold, me chommongun silver, me chommongun sokopaten meinisin auchean mecha, non ewe fonu eor me pwan non ewe fonu ennefen.

10 Iei ewe fonu eor a iteni Liai, me ewe fonu ennefen a iteni Mulek, minne a eiteit mwirin ewe noun Zedekiah; pun ewe Samon a uwei Mulek ngeni non ewe fonu ennefen, me Liai ngeni non ewe fonu eor.

11 Iwe nengeni, mi wor sokopaten meinisin gold non ir me ru ekkei fonu, me sokopaten silver, me sokopaten auchean mecha seni sokopaten nikinik; me mi pwan wor mwan mi murino fofforun ar angang, ekkewe ra anganga sokopaten mecha meinisin me ra nimeti; iwe iei ra fokkun pisekisek.

12 Ra amari chommong grain, non ennefen me pwan non eor; iwe ra fokkun marioch, non ennefen me pwan non eor. Iwe ra chommongono me fokkun pochokununo me non ewe fonu. Iwe ra amari chommong penen man me pwin mwan, ewer, chommong kitinupun man.

13 Nengeni nour kewe fefin ra angang weires me for terech, me for sokopaten napanapen uf, seni auchean mangaku me uf seni sokopaten nikinik, pwe repwe aufoufa ar seneno. Iwe iei ewe wone me ruanun ier a wesino non kinamwe.

14 Iwe non we wone me nimuen ier a pwan wor ar ennetin pwapwa me kinamwe, ewer, watten afanafan me chommong osini usun met minne epwe fis. Iwe iei a wesino ewe wone me nimuen ier.

15 Iwe non ewe fansoun pwe non ewe wone me wonuen ierin muun ekkewe sou apung, nengeni, Cezoram a ninnino me ren poun emon ese fat nupwen an mwomwot won ewe nenien mwottun kapung. Iwe non ewe fansoun pwe non ewe pwan chok ier, pwe noun we anuon, ewe a fen kefinita me ren ekkewe aramas non nenian we, a pwan ninnino. Iwe iei a muchuno ewe wone me wonuen ier.

16 Iw non nepoputan ewe wone me fisuen ier ekkewe aramas ra poputa ne fokkun ngaw sefan.

17 Pun nengeni, ewe Samon a fen efeiochur non nangatam ren pisekisekin ewe fonufan ina pwata rese mwo fen mwasangasangeta ne song, ne maun, are ne assuku cha; iei minne ra poputa ne wata netiper won ar kewe pisekisek; ewer, ra poputa ne achocho ar repwe pisekisek pwe repwe tongeni nuapas nap seni pwan emon; iei minne ra poputa ne nii manau mi monomon, me ne sona me angemwan, pwe repwe tongeni pisekisek.

18 Iwe iei nengeni, ekkewe chon nii manau me chon angemwan ir ew mwicheich ra fen foruta me ren Kiskuman me Katianton. Iwe iei non ewe fansoun pwe mi wor chommong, pwan mwo nein ekkewe chon Nifai, seni ewe mwicheichen Katianton. Nge nengeni, ra kon chommong me nein ewe kinikinin ekkewe chon Leiman mi kon ngaw. Iwe ra iteni noun Katianton chon sona me chon nii manau.

19 Iwe ir ekkewe ra nii manauen ewe sou apung mi nap Cezoram, me noun we anuon, nupwen ir mi nom non ewe nenien mwottun kapung; iwe nengeni, rese pwá.

20 Iwe iei non ewe fansoun pwe nupwen ekkewe chon Leiman ra kuna pwe mi wor chon sona me neir ra fokkun uren netipechou; iwe ra aea napanap meinisin non ar tongeni pwe repwe nireno seni unungen ewe fonufan.

21 Nge nengeni, Setan a amwasangata netipen ewe watten kinikinin ekkewe chon Nifai, ina popun pwe ra chufengen ngeni ekkewe mwicheichen ekkewe chon sona, me ra tonong non ar kewe pwon mi pin me ar pwon ra akkaponu, pwe repwe tumunu me eppeti emon me emon non met chok nonnom mi weires repwe katonong non, pwe resap riaffou ren ar nii manau, me ar angemwan, me ar sona.

22 Iwe non ewe fansoun pwe a wor ar kewe esisin, ewer, ar kewe esisin mi monomon, me ar kewe kapas mi monomon; iwe ei pwe repwe tongeni esinna emon pwir ewe a fen tonong non ewe pwon, pwe met chok fofforungaw pwin we epwe fori i esap feiengaw me ren pwin we emon, are me ren ekkewe ra choni an we mwicheich, ekkewe ra fen angei ei pwon.

23 Iwe iei repwe tongeni nii manau, me angemwan, me sona, me fori angangen nisou me sokopaten fofforungaw meinisin, mi ungeni ekkewe annukun fonuer we me pwan ekkewe annukun ar Kot.

24 Iwe ion chok me nein ekkewe ra choni ar we mwicheich epwe pwarano ngeni ewe fonufan usun ar fofforungaw me ar angang mi anieput, epwe sossot, esap anongonong won ekkewe annukun fonuer we, nge anongonong won ekkewe annukun ar angangangaw, minne a fen kawor me ren Katianton me Kiskuman.

25 Iwe nengeni, iei ekkei monomonen pwon ra akkaponu me pwon mi pin minne Alma a annuku noun we anuon pwe esap feino ngeni ewe fonufan, ren nuokusun ika repwe och pisek ne uweiatiw ekkewe aramas ngeni kiteter.

26 Iei nengeni, ekkena monomonen pwon ra akkaponu me pwon mi pin rese feito ngeni Katianton seni ekkewe uruo minne ra kawor ngeni Ilaman; nge nengeni, ra kaworenong non netipen Katianton me ren ena chok pwan aramas ewe a fen atupano aewin semach me inach kewe pwe repwe ochoch seni ewe foun ira mi annuk—

27 Ewer, ena pwan chok aramas ewe a kokkot ngeni Cain, pwe ika epwe nieno pwiin we Abel esap pwano ngeni ewe fonufan. Iwe i a kokkot ngeni Cain me noun kewe chon tapweno mwirin seni ena fansoun feino.

28 Me pwan ina i ewe chok aramas a wanong non netipen aramas pwe repwe aueta ew tower epwe naf tekian pwe repwe tongeni tori nang. Me ina ena pwan chok aramas ewe a atupano ekkewe aramas ra feito seni ena tower ngeni non ei fonu; ewe a acheewano angangen rochopwak me angang mi anieput won unusen unungen ewe fonu, tori an etekinietiw ekkewe aramas ngeni ew unusen kiteter, me ngeni ew hell esemuch.

29 Ewer, ina i ewe pwan chok aramas ewe a wanong non netipen Katianton pwe epwe sopweno ewe angangen rochopwak, me angangen nii manau mi monomon; me i a uweiato seni nepoputan aramas pwan mwo tori ei fansoun.

30 Iwe nengeni, ina i ewe popun tipis meinisin. Iwe nengeni, a sopweno an kewe angangen rochopwak me nii manau mi monomon, me a eitietiw an kewe kokkot, me ar kewe pwon ra akkaponu, me ar kewe pwon, me ar kewe kokkoten anoninenin fofforungaw, seni tappin aramas ngeni tappin aramas anongonong won usun an tongeni kamwochuno netipen ekkewe noun aramas.

31 Iwe iei nengeni, a fen kamwochuno netipen ekkewe chon Nifai; ewer, ina popun pwe ra fokkun ngaw; ewer, ewe watten kinikinir we a fen tou seni ewe aanen wenechar, me ra puratiw fan pecher ekkewe annukun Kot, me ra kunnuno won pwisin aaner, me ra aueta ngeni ir pwisin niosun anu muan seni nour gold me nour silver.

32 Iwe non ewe fansoun pwe ekkei fofforungaw meinisin ra fis ngeni ir esap non ukukun chommong ier, ina popun pwe ew watten kinikinin we a fen fis ngeni ir non ewe wone me fisuen ierin muun ekkewe sou apung won ekkewe aramasen chon Nifai.

33 Iwe ra napeno non ar kewe fofforungaw non pwan ewe wone me wanuen ier, ngeni ennetin netipechoun me noninenin ekkewe mi tupwon.

34 Iwe iei sia kuna pwe ekkewe chon Nifai ra poputa ne kukkununo non ar nuku, me napeno non fofforungaw me angang mi anieput, nupwen ekkewe chon Leiman ra poputa ne fokkun napeno non ewe mirit usun ar Kot; ewer, ra poputa ne aneasochisi an kewe aurour me an kewe annuk, me ne fetan non ennet me wenechar me mwen i.

35 Iwe iei sia kuna pwe Ngunun ewe Samon a poputa ne mar seni ekkewe chon Nifai, pokiten fofforungawen me pochokunen netiper.

36 Iwe iei sia kuna pwe ewe Samon a poputa ne wau Ngunun won ekkewe chon Leiman, pokiten ar mecheres me mochen ne nuku non an kewe kapas.

37 Iwe non ewe fansoun pwe ekkewe chon Leiman ra kutta ewe mwichen chon sonan Katianton; iwe ra afanafana ewe kapasen Kot me nein ewe watten kinikinir mi ngaw, ina popun pwe ei mwichen chon sona a unusen wesino me nein ekkewe chon Leiman.

38 Iwe non ewe fansoun me won ewe pwan efoch pau, pwe ekkewe chon Nifai ra forireta me anisi ir, poputa me ren ewe watten kinikinir kewe, tori ar ra kon cheewno non unusen fonuen ekkewe chon Nifai, me ra atupano ewe watten kinikinin ekkewe mi tupwon tori ar kisitiw ne nuku non ar kewe angang me angei seni ar kewe pisek pisekin sona, me ne choni ir non ar kewe monomonen nii manau me monomon.

39 Iwe iei ra angei nemenem won mwokutukutun ewe government mi keimuno, ina popun pwe ra puratiw fan pecher me wichi me turunufasa me akunnano nukunuper ngeni ekkewe mi woungaw me ekkewe mi mosonoson, me ekkewe mi tipetekison chon tapweno mwirin Kot.

40 Iwe iei sia kuna pwe ra nom non ew anoninenin nikinik, me mwukono ngeni ew kiteter esemuch.

41 Iwe non ewe fansoun pwe iei a muchuno ewe wone me wanuen ierin muun ekkewe sou apung won ekkewe aramasen Nifai.