1 K’ehomaq reetal, kik’ulman anajwan sa’ li xb’ele xkaak’al chihab’ rawa’b’ejileb’ laj raqol aatin sa’ xb’een lix tenamiteb’ laj Nefita, naq laj Nefi, ralal laj Helaman, kisutq’i chaq sa’ li ch’och’ sa’ xjayal lix nim li saq’e toj sa’ li ch’och’ Tzarahemla.

2 Xb’aan naq ak xikenaq sa’ xyanqeb’ li ani wankeb’ sa’ li ch’och’ sa’ xjayal lix nim li saq’e, ut kixjultika li raatin li Dios chiruheb’, ut kixch’olob’ jo’ profeet k’iila na’leb’ reheb’;

3 Ut ke’xtz’eqtaana chixjunil li raatin, jo’kan naq ink’a’ kiru chi kanaak sa’ xyanqeb’; kisutq’i b’an sa’ xch’och’il lix yo’lajik.

4 Ut rik’in rilb’al li tenamit sa’ li xuwajel maa’usilal wankeb’ wi’, ut eb’ laj elq’ a’an re laj Gadianton chi chunlaak sa’eb’ li raqleb’aal aatin—ut ak ke’xmaq’ chaq li wankilal ut awa’b’ejil sa’ xb’een li ch’och’; ut ke’xkanab’ lix taqlahom li Dios, ut maajun chaab’ilal wankeb’ wi’ chiru a’an; ut maajun tiik ruhil na’leb’ neke’xb’aanu choq’ reheb’ li ralal xk’ajoleb’ li winq;

5 Neke’xk’e maak sa’ xb’een li tiikeb’ xch’ool xb’aan xtiikilaleb’ xch’ool, ink’a’ neke’xk’e tojb’a-maak sa’ xb’eeneb’ li wankeb’ xmaak ut li wankeb’ xmaa’usilal, xb’aan xtumineb’, ut jo’kan ajwi’ ke’kanab’aak sa’ xna’ajeb’ sa’ xjolomil li tenamit, re te’taqlanq ut te’xb’aanu jo’ chanru li rajomeb’ xch’ool, re naq taaruuq te’xk’ul li tumin ut te’nimaaq xloq’al xb’aan li ruchich’och’, ut jo’kan ajwi’, re naq ink’a’ taach’a’ajko’q chiruheb’ xb’aanunkil li muxuk sumsu, ut elq’ak, ut kamsink, ut xb’aanunkil jo’ chanru neke’raj sa’ xch’ool—

6 Anajwan kichal li nimla maa’usilal a’in sa’ xb’eeneb’ laj Nefita, chiru xnumik moko naab’al ta chihab’; ut naq qiril a’an laj Nefi, kiniman xch’ool sa’ li raam xb’aan xrahil, ut kixjap re chixyeeb’al sa’ xyot’ik li raam:

7 Aay, kiwan taxaq raj inkutan sa’ li kutan naq inyuwa’ aj Nefi kichal chaq xb’een wa sa’ li ch’och’ Jerusalen, re kiru raj kisaho’ inch’ool wochb’een a’an sa’ li yeechi’inb’il ch’och’; aran chaab’ileb’ chaq xch’ool lix tenamit chi taqlaak, xaqxookeb’ chaq chi kaw sa’ xpaab’ankil lix taqlahom li Dios, ut timileb’ chi k’ame’k chixb’aanunkil maa’usilal; ut seeb’eb’ chaq chi ab’ink chiru li raatin li Qaawa’—

8 Relik chi yaal, wi ta kiru raj kiwan inkutan sa’ li kutan a’an, kiwan raj xsahil li waam rik’in xtiikilaleb’ li was wiitz’in.

9 K’e b’an reetal, k’eeb’il we naq a’in lin kutan, ut naq taanujaq li waam rik’in rahilal xb’aan a’in, lix maa’usilaleb’ li was wiitz’in.

10 Ut k’ehomaq reetal, kik’ulman anajwan naq kiwan sa’ xb’een jun najt xteramil kab’l li kiwan sa’ rawimq laj Nefi, li wan chixk’atq li nimb’e li naxik sa’ li xb’eenil k’ayil, li wan sa’ li tenamit Tzarahemla; jo’kan ut, laj Nefi kixkub’si rib’ naq wan sa’ xb’een li najt xteramil kab’l li wan sa’ li rawimq, ut a’ kab’l a’an nach’ wan rik’in rokeb’aal li awimq b’ar nanume’ wi’ li nimb’e.

11 Ut kik’ulman naq wankeb’ junjunq li winq li yookeb’ chi nume’k ut ke’ril laj Nefi naq yoo chixhoyb’al li raam chiru li Dios sa’ xb’een chaq li najt xteramil kab’l; ut xkoheb’ sa’ aanil ut ke’xye re li tenamit li k’a’ru ke’ril chaq, ut ke’xch’utub’ rib’ li tenamit chi tub’tu re te’xnaw k’a’ut naq x’uxman xnimal li raho’k ch’oolej xb’aan xmaa’usilaleb’ li tenamit.

12 Ut anajwan, naq kiwakli laj Nefi kiril li tub’tuukil tenamit li ke’xch’utub’ chaq rib’.

13 Ut kik’ulman naq kixte xtz’uumal re ut kixye reheb’: K’ehomaq reetal, k’a’ut naq xech’utub’ eerib’? Ma re tinye eere chirix lee maa’usilal?

14 Relik chi yaal, xb’aan naq xintaqe’ sa’ xb’een innajt xteramil kab’l re tinhoy li waam chiru inDios, xb’aan xnumtajenaqil xrahil inch’ool, li wan xb’aan eemaa’usilal!

15 Ut sa’ xk’ab’a’ lix rahil inch’ool ut li yaab’ak ninb’aanu xech’utub’ eerib’, ut sachso eech’ool; relik chi yaal, ut aajel ru naq taasachq eech’ool xb’aan naq q’axtesinb’ilex toj reetal naq laj tza k’a’jo’ naq xru chixchapb’al eech’ool.

16 Relik chi yaal, chan tab’i’ ru kiru kekanab’ chi q’unb’esiik eech’ool xb’aan li nasik’ok re xtz’eqb’al eeraam taq’a sa’ li rahilal li junelik nakana, ut li rahil ch’oolejil li maak’a’ roso’jik?

17 Aay chejal eek’a’uxl, chejal eek’a’uxl! K’a’ut naq texkamq? Sutq’inqex, sutq’inqex rik’in lee Dios. K’a’ut naq a’an kexxkanab’ eejunes?

18 A’an xb’aan naq kekawob’resi eeraam; relik chi yaal, ink’a’ tex’ab’inq chiru xyaab’ xkux li chaab’il aj ilol karneer; relik chi yaal, keb’oq chaq xjosq’il sa’ eeb’een.

19 Ut k’ehomaq reetal, ruuchil eech’utub’ankil, wi ink’a’ nekejal eek’a’uxl, k’ehomaq reetal, a’an texxjek’i b’an chi najt re texwanq choq’ xtzakemqeb’ li tz’i’ ut li k’iche’ xul.

20 Aay, chan put ru kiru chi sachk sa’ eech’ool lee Dios sa’ li kutan ajwi’ naq kexxkol?

21 A’b’anan k’ehomaq reetal, a’an re xk’ulb’al tumin, re taanimaaq eeru xb’aaneb’ li winq, relik chi yaal, ut re teek’ul li oor ut li plaat. Ut xek’e eech’ool chirix li b’ihomal ut li jo’maajo’il k’a’aq re ru re li ruchich’och’ a’in, ut re xk’ulb’al a’an nekexkamsink, ut nekexpoqlenk, ut nekech’olob’ tik’ti’ aatin chirix lee ras eeriitz’in, ut nekeb’aanu li k’iila paay chi maa’usilal.

22 Ut xb’aan a’in rahilal taachalq sa’ eeb’een wi ink’a’ nekejal eek’a’uxl. Xb’aan naq wi ink’a’ nekejal eek’a’uxl, k’ehomaq reetal, li nimla tenamit a’in, ut jo’kan ajwi’ chixjunileb’ li ninqi tenamit li wankeb’ sa’ xsutam, li wankeb’ sa’ li ch’och’ eechaninb’il qab’aan, te’maq’e’q chaq re naq maak’a’aq eena’aj chi sa’; xb’aan naq k’ehomaq reetal, li Qaawa’ ink’a’ tixk’e chaq eemetz’ew, jo’ xb’aanu chaq junxil, re xaqliik chiruheb’ li xik’ neke’ilok eere.

23 Xb’aan naq k’ehomaq reetal, jo’ka’in naxye li Qaawa’: Ink’a’ tink’ut xkomon inmetz’ew reheb’ laj maak, li jun chi naab’al chiru li jun chik, ka’ajwi’ reheb’ li ani neke’xjal xk’a’uxl chirixeb’ lix maak, ut neke’ab’in chiru li waatin. Anajwan ut, nawaj raj naq teek’e reetal, ex was wiitz’in, naq usaq wi’chik choq’ reheb’ laj Lamanita cheru laa’ex wi ink’a’ nekejal eek’a’uxl.

24 Xb’aan naq k’ehomaq reetal, tiik wi’chik xch’ooleb’ a’an cheru laa’ex, xb’aan naq moko xe’maakob’ ta chiru li nimla na’leb’ a’an xek’ul laa’ex; jo’kan naq li Qaawa’ taaruxtaanaheb’ ru; relik chi yaal, tixnajtob’resi ru xkutaneb’ ut tixtamresi riyajileb’, us ta laa’ex texsache’q chi junajwa wi ink’a’ nekejal eek’a’uxl.

25 Relik chi yaal, rahilal chichalq sa’ eeb’een xb’aan li nimla tz’eqb’eetalil a’an li chalenaq sa’ eeyanq; ut laa’ex xejunaji eerib’ rik’in, relik chi yaal, rik’in li muqmuukil molam a’an, li kixaqab’aak xb’aan laj Gadianton!

26 Relik chi yaal, rahilal taachalq sa’ eeb’een xb’aan li q’etq’etil a’an li kekanab’ chi ok sa’ lee ch’ool, li nataqsink eere chi numenaq sa’ xb’een li k’a’ru chaab’il, xb’aan xnumtajenaqil lix nimal eeb’ihomal!

27 Relik chi yaal, rahilal chichalq sa’ eeb’een xb’aan lee maa’usilal ut tz’eqb’eetalil!

28 Ut wi ink’a’ nekejal eek’a’uxl tex’oso’q; relik chi yaal, taamaq’e’q ajwi’ lee ch’och’ cheru, ut texsache’q chaq chixb’een li ruchich’och’.

29 K’ehomaq reetal anajwan, moko ninye ta naq taawanq li k’a’aq re ru a’in yal injunes wib’, xb’aan naq moko injunes ta wib’ naq ninnaw li k’a’aq re ru a’in; k’ehomaq b’an reetal, ninnaw naq yaal li k’a’aq re ru a’in xb’aan naq li Qaawa’ Dios xk’e chinnaw, jo’kan naq ninch’olob’ naq te’wanq.