1 Iwe iei non ewe fansoun pwe nupwen Nifai a apasa ekkei kapas, nengeni, mi wor mwan ir sou apung, ekkewe ra pwan choni ewe mwicheichen Katianton mi monomon, iwe ra song, iwe ra puchoruu ngeni i, ra apasa ngeni ekkewe aramas: Pwata ouse turufi ei mwan me uweieto, pwe i epwe kapung anongonong won ewe atai annuk minne a fen fori?

2 Pwata oua attona ei mwan, me rong ngeni an kapas mi ngaw ngeni ekkei aramas me ngeni ach we annuk?

3 Pun nengeni, Nifai a fen kapas ngeni ir usun ngawen ar we annuk; ewer, chommong mettoch Nifai a apasa minne rese makketiw; iwe ese wor met a apasa minne mi ungeni ekkewe annukun Kot.

4 Iwe ekkena sou apung ra song ren pokiten a kapas fatafatoch ngeni ir usun ar angangen rochopwak mi monomon; nge inamo, rese pwaracho ne wata pour won, pun ra nuokusiti ekkewe aramas ika repwe puchoruu ngeni ir.

5 Iei minne ra puchor ngeni ekkewe aramas, ra apasa: Pwata oua mutata pwe ei mwan epwe kapas mi ngaw ngenikich? Pun nengeni a fen etipisi ekkei aramas meinisin, pwan mwo ngeni kiteter; ewer, me pwan ach kei teninimw mi nap repwe no senikich, pwe esap wor neniach non ir.

6 Iwe iei sia sinei pwe ei ese tufich, pun nengeni, kich mi uren pochokun, me ach kewe teninimw mi napanap, iei minne ekkewe chon koum ngenikich rese tongeni wor ar pochokun woch.

7 Iwe non ewe fansoun pwe iei ra amwasangata ekkewe aramas ne song ngeni Nifai, me poputani anini fengen me neir; pun mi wor ekkoch ekkewe ra puchoruu: Oupwe nikitano i, pun i emon mwan mi öch, iwe ekkewe mettoch minne a apasa repwe ennetin fis tiwenon chok ika sipwe aier;

8 Ewer, nengeni, ekkewe kapung meinisin repwe feito woch minne a fen pwarata ngenikich; pun kich mi sinei pwe i a fen pung ne pwarata ngenikich usun ach angangangaw. Iwe nengeni ir mi chommong, iwe i mi sineiochu mettoch meinisin minne repwe fis ngenikich usun an sinei usun ach angangangaw.

9 Ewer, iwe nengeni, ika i esap fen emon soufos i ese tongeni fen pwarata usun ekkei mettoch.

10 Iwe non ewe fansoun pwe ekkena aramas ekkewe ra sotuni ne nieno Nifai ra echimw pokiten ar nuokus, iwe rese wata pour won; iei minne a poputa sefan ne kapas ngeni ir, pokiten ra kuna pwe a ketiw me ne mesen ekkoch, ina popun pwe ekkewe nusun me neir ra nuokus.

11 Iei minne a pesepes ne pwan kapas ngeni ir a apasa: Nengeni, ami pwi, ouse mwo fen anneani pwe Kot a fang manaman ngeni emon mwan, pwan mwo Moses, pwe epwe wichi won ekkewe konikin ewe Setipar, iwe ra keimufesen epek ngeni epek, ina popun pwe ekkewe chon Israel, ir semach kewe, ra feito won puun mi pwas, iwe ekkewe konik ra appunguno won ekkewe sounfiun ekkewe chon Egypt me oromireno?

12 Iwe iei nengeni, ika Kot a ngeni ei mwan sokkun manaman, iwe pwata oupwe anini neimi, me apasa pwe i ese ngeniei manaman ren minne upwe tongeni sinei usun ekkewe kapung minne repwe feito womi tiwenon chok ika oupwe aier?

13 Nge, nengeni, ouse chok amam ai kewe kapas, nge oua pwan amam ekkewe kapas meinisin minne ra fen affateno me ren semach kewe, me pwan ekkewe kapas minne ra affateno me ren ei mwan, Moses, ewe a wor sokkun manaman mi napanap a kawor ngeni i, ewer, ekkewe kapas minne i a fen apasa usun wareton ewe Messiah.

14 Ewer, ese pwarata pwe ewe Noun Kot epwe wareto? Iwe usun chok an ekieta ewe niosun serepenit mecha me non ewe fonu pon, pwan mwo ina usun an epwe ekieta i ewe epwe wareto.

15 Iwe meinisin ekkewe repwe neneta won ena serepenit repwe manau, pwan mwo usun meinisin ekkewe repwe neneta won ewe Noun Kot ren nuku, epwe wor rer netip niemam, repwe tongeni manau, pwan mwo ngeni ena manau minne esemuch.

16 Iwe iei nengeni, Moses ese chok pwarata usun ekkei mettoch, nge pwan ekkewe soufos mi fel meinisin, seni ranin kewe pwan mwo ngeni ekkewe ranin Abraham.

17 Ewer, iwe nengeni, Abraham mi kuna usun an wareto, me a ureno ren meseik me a pwapwa.

18 Ewer, iwe nengeni ua apasa ngenikemi, pwe esap chok Abraham a sinei usun ekkei mettoch, nge mi pwan chommong me mwen ekkewe ranin Abraham ekkewe ra kokko me ren ewe tettenin Kot; ewer, pwan mwo mwirin tettenin Noun we; iwe ei pwe epwe pwano ngeni ekkewe aramas, ew fokkun chommong ngorowun ier me mwen an wareto, pwe pwan ngaseno epwe fis ngeni ir.

19 Iwe iei ua mochen pwe oupwe sinei, pwe pwan mwo seni ekkewe ranin Abraham mi fen wor chommong soufos ra fen pwarata ekkei mettoch; ewer, nengeni, ewe soufos Sinos a pwaracho ne pwarata; ren minne i a ninnino.

20 Iwe nengeni, pwan Sinok, me pwan Ezias, me pwan Isaiah, me Jeremiah, (Jeremiah ewe pwan chok soufos a pwarata usun tanon Jerusalem) iwe iei sia sinei pwe Jerusalem a tano anongonong won ekkewe kapas an Jeremiah. O ika ina pwata ewe Noun Kot esap wareto, anongonong won an osini?

21 Iwe iei oupwe tipemwaramwarei pwe Jerusalem a tano? Oupwe apasa pwe ekkewe noun Zedekiah rese ninnino, meinisin tiwenon chok Mulek? Ewer, me ouse kuna pwe mwirimwirin Zedekiah kewe ra nom rech, me ra suu seni ewe fonuen Jerusalem? Nge nengeni, esap ikkei meinisin—

22 Semach we Liai a suu seni Jerusalem pokiten a pwarata usun ekkei mettoch. Nifai a pwan pwarata usun ekkei mettoch, me pwan arap ngeni meinisin semach kewe, pwan mwo feitiw ngeni ei fansoun; ewer, ra fen pwarata usun wareton Kraist, iwe ra fen esuku, me ra fen pwapwa non ranin we minne epwe wareto.

23 Iwe nengeni, i Kot, iwe i a nom rer, me a fen pwarano inisin ngeni ir, pwe repwe ngaseno me ren i; iwe ra ngeni i ning, pokiten met minne epwe feito.

24 Iwe iei, pokiten oua sinei ekkei mettoch me ouse tongeni amamer tiwenon chok ika oupwe chofona, iei minne non ei oua tipis, pun oua fen poutano ekkei mettoch meinisin, me nukun fokkun chommong pisekin pwarata minne oua fen angei; ewer, pwan mwo oua angei mettoch meinisin, mettoch non nang, me pwan mettoch meinisin minne ra nom non fonufan, usun emon chon pwarata pwe ir mi ennet.

25 Nge nengeni, oua fen poutano ewe ennet, me ungeni ami Kot mi fel; me pwan mwo non ei fansoun, me nukun ami isonano fan itemi pisek mi auchea non nang, ikewe ese wor mettoch a tongeni atai, me ikewe ese wor mettoch a tongeni feito minne mi nimengaw, oua achukuchukata fan itemi song ngeni ewe ranin kapung.

26 Ewer, pwan mwo non ei fansoun oua mwukono, pokiten ami nii manau me ami tipisin nisou me fofforungaw, ngeni kiteter esemuch; ewer, iwe tiwenon chok ika oupwe aier epwe mwitir feito womi.

27 Ewer, nengeni iei a fen fis ren asamemi; ewer, oupwe feino ngeni ewe nenien mwottun kapung, me attona; iwe nengeni, noumi we sou apung a ninnino, iwe a konono non chan; iwe a fen nii manau me ren pwin we, ewe a sotuni pwe epwe nenieni ewe nenien mwottun kapung.

28 Iwe nengeni, ir me ruomon ra choni ami we mwicheich mi monomon, ewe chon forata i Katianton me ewe emon mi ngaw ewe a sotuni ne nieno ngunun aramas.