ບົດທີ 8
ບັນດາຜູ້ຕັດສິນທີ່ເສື່ອມຊາມພະຍາຍາມທີ່ຈະຍຸຍົງຜູ້ຄົນໃຫ້ຕໍ່ຕ້ານນີໄຟ—ອັບຣາຮາມ, ໂມເຊ, ຊີນັດ, ຊີໂນກ, ອີໄຊອັດ, ເອຊາຢາ, ເຢເຣມີຢາ, ລີໄຮ, ແລະ ນີໄຟ ຕ່າງກໍໄດ້ໃຫ້ຖ້ອຍຄຳເຖິງພຣະຄຣິດ—ໂດຍການດົນໃຈ ນີໄຟປະກາດເຖິງການຄາດຕະກຳຫົວໜ້າຜູ້ຕັດສິນ. ປະມານ 23–21 ປີ ກ່ອນ ຄ.ສ.
1 ແລະ ບັດນີ້ເຫດການໄດ້ບັງເກີດຂຶ້ນຄື ເວລານີໄຟກ່າວຂໍ້ຄວາມນີ້ແລ້ວ, ຈົ່ງເບິ່ງ, ມີຄົນທີ່ເປັນຜູ້ຕັດສິນຊຶ່ງເປັນຂອງພັກລັບຂອງແກດີອານທັນ, ແລະ ພວກເຂົາຄຽດແຄ້ນ ແລະ ພວກເຂົາໄດ້ຮ້ອງຂັດຄ້ານເພິ່ນ, ໂດຍການຮ້ອງຕໍ່ຜູ້ຄົນວ່າ: ເປັນຫຍັງພວກທ່ານຈຶ່ງບໍ່ຈັບເອົາຄົນຜູ້ນີ້ ແລະ ເອົາລາວມາເພື່ອຈະໄດ້ກ່າວໂທດລາວຕາມຄວາມຜິດທີ່ລາວເຮັດມາ?
2 ເປັນດ້ວຍເຫດໃດພວກທ່ານຍັງເບິ່ງ ແລະ ຟັງຄົນຜູ້ນີ້ໝິ່ນປະໝາດຜູ້ຄົນພວກນີ້ ແລະ ຕໍ່ຕ້ານກົດໝາຍຂອງພວກເຮົາຢູ່?
3 ເພາະຈົ່ງເບິ່ງ, ນີໄຟໄດ້ເວົ້າກັບພວກເຂົາກ່ຽວກັບການເສື່ອມໂຊມຂອງກົດໝາຍຂອງພວກເຂົາ; ແທ້ຈິງແລ້ວ, ນີໄຟໄດ້ເວົ້າຫລາຍເລື່ອງຊຶ່ງຂຽນໄວ້ບໍ່ໄດ້; ແລະ ບໍ່ມີສິ່ງໃດທີ່ເພິ່ນໄດ້ກ່າວໄປກົງກັນຂ້າມກັບພຣະບັນຍັດຂອງພຣະເຈົ້າ.
4 ແລະ ຜູ້ຕັດສິນເຫລົ່ານັ້ນຄຽດແຄ້ນໃຫ້ເພິ່ນຍ້ອນວ່າເພິ່ນໄດ້ ເວົ້າຢ່າງແຈ່ມແຈ້ງກັບພວກເຂົາກ່ຽວກັບວຽກງານລັບແຫ່ງຄວາມມືດຂອງພວກເຂົາ; ເຖິງຢ່າງໃດກໍຕາມ, ພວກເຂົາຍັງບໍ່ກ້າຈັບເພິ່ນເພາະຄວາມຢ້ານກົວວ່າຜູ້ຄົນຈະຮ້ອງຂັດຄ້ານພວກເຂົາ.
5 ສະນັ້ນ ພວກເຂົາຈຶ່ງໄດ້ຮ້ອງຕໍ່ຜູ້ຄົນ, ມີຄວາມວ່າ: ດ້ວຍເຫດໃດພວກທ່ານຈຶ່ງຍອມໃຫ້ຄົນຜູ້ນີ້ໝິ່ນປະໝາດພວກເຮົາ? ເພາະຈົ່ງເບິ່ງ, ລາວໄດ້ກ່າວໂທດໃສ່ຜູ້ຄົນພວກນີ້ທັງໝົດຈົນເຖິງຄວາມພິນາດ; ແທ້ຈິງແລ້ວ, ແລະ ເວົ້າວ່າເມືອງໃຫຍ່ເຫລົ່ານີ້ຂອງພວກເຮົາຈະຖືກຍຶດເອົາໄປຈາກພວກເຮົານຳອີກ, ວ່າພວກເຮົາຈະບໍ່ມີບ່ອນຢູ່ອາໄສໃນນັ້ນ.
6 ແລະ ບັດນີ້ພວກເຮົາຮູ້ຈັກວ່າມັນເປັນໄປບໍ່ໄດ້, ເພາະຈົ່ງເບິ່ງ, ພວກເຮົາມີກຳລັງອັນເຂັ້ມແຂງ, ແລະ ເມືອງຂອງພວກເຮົາກໍຍິ່ງໃຫຍ່, ສະນັ້ນ ສັດຕູຂອງພວກເຮົາຈະມີກຳລັງເໜືອກວ່າພວກເຮົາບໍ່ໄດ້.
7 ແລະ ເຫດການໄດ້ບັງເກີດຂຶ້ນຄື ພວກເຂົາໄດ້ຍຸຍົງໃຫ້ຜູ້ຄົນຄຽດແຄ້ນໃຫ້ນີໄຟດັ່ງນີ້, ແລະ ເຮັດໃຫ້ເກີດການຂັດແຍ້ງກັນຂຶ້ນໃນບັນດາພວກເຂົາ; ເພາະວ່າມີບາງຄົນໄດ້ຮ້ອງຂຶ້ນວ່າ, ຢ່າຫຍຸ້ງກັບຄົນຜູ້ນີ້ເລີຍ ເພາະວ່າເພິ່ນເປັນຄົນດີ, ແລະ ເລື່ອງທັງໝົດທີ່ເພິ່ນໄດ້ກ່າວມານັ້ນຈະເກີດຂຶ້ນຢ່າງແນ່ນອນ ຖ້າຫາກພວກເຮົາບໍ່ກັບໃຈ;
8 ແທ້ຈິງແລ້ວ, ຈົ່ງເບິ່ງ, ການຕັດສິນທັງໝົດຊຶ່ງເພິ່ນໄດ້ໃຫ້ຖ້ອຍຄຳແກ່ພວກເຮົາຈະມາຫາພວກເຮົາ; ເພາະວ່າພວກເຮົາຮູ້ຈັກວ່າ ເພິ່ນໄດ້ໃຫ້ຖ້ອຍຄຳທີ່ຖືກຕ້ອງຕໍ່ພວກເຮົາກ່ຽວກັບຄວາມຊົ່ວຮ້າຍຂອງພວກເຮົາ. ແລະ ຈົ່ງເບິ່ງ ມັນມີຢູ່ຢ່າງຫລວງຫລາຍ, ແລະ ເພິ່ນ ຮູ້ຈັກເລື່ອງທັງໝົດທີ່ຈະເກີດກັບພວກເຮົາເຊັ່ນດຽວກັບທີ່ເພິ່ນຮູ້ຈັກເຖິງຄວາມຊົ່ວຮ້າຍຂອງພວກເຮົາ;
9 ແທ້ຈິງແລ້ວ, ແລະ ຈົ່ງເບິ່ງ, ຖ້າຫາກເພິ່ນບໍ່ໄດ້ເປັນສາດສະດາແລ້ວ ເພິ່ນຈະບໍ່ສາມາດໃຫ້ຖ້ອຍຄຳກ່ຽວກັບເລື່ອງເຫລົ່ານີ້ໄດ້ດອກ.
10 ແລະ ເຫດການໄດ້ບັງເກີດຂຶ້ນຄື ຜູ້ຄົນທີ່ພະຍາຍາມທຳລາຍນີໄຟ ຈຶ່ງຖືກບັງຄັບບໍ່ໃຫ້ຈັບນີໄຟ ແລະ ພວກເຂົາບໍ່ກ້າຈັບນີໄຟຍ້ອນວ່າພວກເຂົາມີຄວາມຢ້ານກົວ; ສະນັ້ນ ເພິ່ນຈຶ່ງເລີ່ມກ່າວກັບພວກເຂົາອີກ ໂດຍທີ່ເຫັນວ່າເພິ່ນໄດ້ຮັບຄວາມນິຍົມໃນສາຍຕາຂອງຄົນບາງຄົນ ເຖິງຂະໜາດທີ່ຜູ້ຄົນທີ່ເຫລືອຢູ່ນັ້ນເກີດມີຄວາມຢ້ານກົວຂຶ້ນມາ.
11 ສະນັ້ນ ເພິ່ນຈຶ່ງຖືກບັງຄັບໃຫ້ກ່າວກັບພວກເຂົາຕື່ມອີກ ມີຄວາມວ່າ: ຈົ່ງເບິ່ງ, ພີ່ນ້ອງຂອງຂ້າພະເຈົ້າ, ພວກທ່ານບໍ່ເຄີຍອ່ານບໍວ່າ ພຣະເຈົ້າໄດ້ມອບອຳນາດໃຫ້ແກ່ຊາຍຄົນໜຶ່ງ ແມ່ນແຕ່ໂມເຊໃຫ້ຕີນ້ຳໃນ ທະເລແດງ ແລະ ມັນກໍແຍກອອກໄປທາງນັ້ນ ແລະ ທາງນີ້, ເຖິງຂະໜາດທີ່ຊາວອິດສະຣາເອນຜູ້ເປັນບັນພະບຸລຸດຂອງພວກເຮົາໄດ້ຜ່ານໄປເທິງແຜ່ນດິນແຫ້ງ, ແລະ ນ້ຳໄດ້ໄຫລກັບ ແລະ ຖ້ວມກອງທັບຂອງຊາວເອຢິບ ແລະ ໄດ້ກືນກິນພວກເຂົາໃຫ້ໝົດສິ້ນໄປ?
12 ແລະ ບັດນີ້ຈົ່ງເບິ່ງ, ຖ້າຫາກພຣະເຈົ້າໄດ້ມອບອຳນາດໃຫ້ຄົນຜູ້ນີ້ແລ້ວ ເຫດໃດພວກທ່ານຈຶ່ງໂຕ້ຖຽງກັນອີກ, ແລະ ກ່າວວ່າພຣະອົງບໍ່ໄດ້ມອບອຳນາດໃຫ້ແກ່ຂ້າພະເຈົ້າ ຊຶ່ງໂດຍອຳນາດນັ້ນ ຂ້າພະເຈົ້າຈະຮູ້ຈັກກ່ຽວກັບການຕັດສິນທີ່ຈະມາຫາພວກທ່ານ ຖ້າຫາກພວກທ່ານບໍ່ກັບໃຈ?
13 ແຕ່ຈົ່ງເບິ່ງ, ບໍ່ພຽງແຕ່ພວກທ່ານປະຕິເສດຄຳເວົ້າຂອງຂ້າພະເຈົ້າເທົ່ານັ້ນ ແຕ່ພວກທ່ານຍັງໄດ້ປະຕິເສດຄຳເວົ້າທັງໝົດ ຊຶ່ງບັນພະບຸລຸດຂອງພວກເຮົາໄດ້ເວົ້າໄວ້, ແລະ ປະຕິເສດຄຳເວົ້າຂອງໂມເຊຄົນນີ້ອີກ ຜູ້ທີ່ໄດ້ຮັບອຳນາດອັນຍິ່ງໃຫຍ່, ແທ້ຈິງແລ້ວ, ພວກທ່ານໄດ້ປະຕິເສດຄຳເວົ້າ ຊຶ່ງໂມເຊໄດ້ເວົ້າກ່ຽວກັບການສະເດັດມາຂອງພຣະເມຊີອາ.
14 ແທ້ຈິງແລ້ວ, ໂມເຊບໍ່ໄດ້ໃຫ້ຖ້ອຍຄຳໄວ້ບໍວ່າ ພຣະບຸດຂອງພຣະເຈົ້າຈະສະເດັດມາ? ແລະ ເພິ່ນໄດ້ ຍົກງູທອງຂຶ້ນໃນຖິ່ນແຫ້ງແລ້ງກັນດານສັນໃດ, ຜູ້ທີ່ຈະສະເດັດມາຈະຖືກຍົກຂຶ້ນສັນນັ້ນ.
15 ແລະ ຫລາຍຕໍ່ຫລາຍຄົນຜູ້ທີ່ຫລຽວເບິ່ງງູນັ້ນຈະ ມີຊີວິດສັນໃດ, ຫລາຍຕໍ່ຫລາຍຄົນທີ່ຫລຽວເບິ່ງພຣະບຸດຂອງພຣະຜູ້ເປັນເຈົ້າດ້ວຍສັດທາ, ໂດຍມີວິນຍານທີ່ສຳນຶກຜິດຈະ ມີຊີວິດສັນນັ້ນ, ເຖິງແມ່ນຈົນໄປສູ່ຊີວິດນິລັນດອນ.
16 ແລະ ບັດນີ້ຈົ່ງເບິ່ງ, ບໍ່ແມ່ນແຕ່ໂມເຊຄົນດຽວເທົ່ານັ້ນທີ່ໄດ້ໃຫ້ຖ້ອຍຄຳກ່ຽວກັບເລື່ອງນີ້, ແຕ່ສາດສະດາຜູ້ບໍລິສຸດຄົນ ອື່ນໆກໍໄດ້ໃຫ້ຖ້ອຍຄຳໄວ້ຄືກັນ, ນັບຕັ້ງແຕ່ວັນເວລາຂອງເພິ່ນຄືນໄປຫາວັນເວລາຂອງອັບຣາຮາມ.
17 ແທ້ຈິງແລ້ວ, ແລະ ຈົ່ງເບິ່ງ, ອັບຣາຮາມໄດ້ເຫັນການສະເດັດມາຂອງພຣະອົງ, ແລະ ກໍໄດ້ເຕັມໄປດ້ວຍຄວາມຍິນດີ ແລະ ປິຕິຍິນດີຫລາຍ.
18 ແທ້ຈິງແລ້ວ, ແລະ ຈົ່ງເບິ່ງ ຂ້າພະເຈົ້າກ່າວກັບພວກທ່ານວ່າບໍ່ແມ່ນແຕ່ອັບຣາຮາມເທົ່ານັ້ນທີ່ຮູ້ຈັກເລື່ອງເຫລົ່ານີ້ ແຕ່ຍັງມີ ອີກຫລາຍທ່ານຜູ້ມີຊີວິດກ່ອນວັນເວລາຂອງອັບຣາຮາມຜູ້ທີ່ຖືກເອີ້ນໂດຍ ລະບຽບຂອງພຣະເຈົ້າ; ແທ້ຈິງແລ້ວ, ຕາມລະບຽບຂອງພຣະບຸດຂອງພຣະອົງ; ແລະ ມັນເປັນໄປດັ່ງນີ້ ເພື່ອຈະໄດ້ສະແດງໃຫ້ຜູ້ຄົນຮູ້ຈັກໄວ້ຫລາຍພັນປີກ່ອນການສະເດັດມາຂອງພຣະອົງ, ວ່າການໄຖ່ກໍຈະມາເຖິງພວກເຂົາ.
19 ແລະ ບັດນີ້ຂ້າພະເຈົ້າຢາກໃຫ້ພວກທ່ານຮູ້ໄວ້ວ່າ ນັບຕັ້ງແຕ່ວັນເວລາຂອງອັບຣາຮາມເປັນຕົ້ນມາ ມັນໄດ້ມີສາດສະດາຫລາຍທ່ານທີ່ໄດ້ໃຫ້ຖ້ອຍຄຳເຖິງເລື່ອງເຫລົ່ານີ້; ແທ້ຈິງແລ້ວ, ຈົ່ງເບິ່ງ, ສາດສະດາ ຊີນັດໄດ້ໃຫ້ຖ້ອຍຄຳຢ່າງກ້າຫານ; ຍ້ອນການກະທຳນີ້ ເພິ່ນຈຶ່ງຖືກຂ້າຕາຍ.
20 ແລະ ຈົ່ງເບິ່ງ, ຊີໂນກນຳອີກ. ແລະ ອີໄຊອັດນຳອີກ, ແລະ ເອຊາຢານຳອີກ, ແລະ ເຢເຣມີຢາ, (ເຢເຣມີຢາຄືສາດສະດາຜູ້ທີ່ໃຫ້ຖ້ອຍຄຳເຖິງການທຳລາຍຂອງ ເຢຣູຊາເລັມ) ແລະ ບັດນີ້ພວກເຮົາຮູ້ຈັກແລ້ວວ່າ ເຢຣູຊາເລັມໄດ້ຖືກທຳລາຍໄປແລ້ວຕາມຄຳເວົ້າຂອງເຢເຣມີຢາ. ໂອ້ ເຫດສັນໃດພຣະບຸດຂອງພຣະເຈົ້າຈະບໍ່ສະເດັດມາຕາມຄຳທຳນາຍຂອງເພິ່ນ?
21 ແລະ ບັດນີ້ພວກທ່ານຍັງຈະໂຕ້ຖຽງກັນຢູ່ບໍວ່າ ເຢຣູຊາເລັມໄດ້ຖືກທຳລາຍແລ້ວຫລືບໍ່? ພວກທ່ານຍັງຈະເວົ້າຢູ່ບໍວ່າ ພວກລູກຊາຍຂອງເຊເດກີຢາບໍ່ໄດ້ຖືກຂ້າຕາຍໝົດທຸກຄົນ ນອກຈາກ ມິວເລັກເທົ່ານັ້ນ? ແທ້ຈິງແລ້ວ, ແລະ ພວກທ່ານບໍ່ເຫັນບໍວ່າ ລູກຫລານຂອງເຊເດກີຢາຢູ່ນຳພວກເຮົາ, ແລະ ພວກເຂົາໄດ້ຖືກຂັບໄລ່ອອກມາຈາກແຜ່ນດິນເຢຣູຊາເລັມ? ແຕ່ຈົ່ງເບິ່ງ, ນີ້ຍັງບໍ່ໝົດ—
22 ລີໄຮບັນພະບຸລຸດຂອງພວກເຮົາກໍໄດ້ຖືກໄລ່ອອກມາຈາກເຢຣູຊາເລັມ ຍ້ອນວ່າເພິ່ນໄດ້ໃຫ້ຖ້ອຍຄຳກ່ຽວກັບສິ່ງເຫລົ່ານີ້, ແລະ ນີໄຟກໍໄດ້ໃຫ້ຖ້ອຍຄຳກ່ຽວກັບສິ່ງເຫລົ່ານີ້ຄືກັນ, ແລະ ບັນພະບຸລຸດຂອງພວກເຮົາເກືອບທັງໝົດນຳອີກຈົນລົງມາເຖິງເວລານີ້; ແທ້ຈິງແລ້ວ, ພວກເພິ່ນໄດ້ໃຫ້ຖ້ອຍຄຳເຖິງ ການສະເດັດມາຂອງພຣະຄຣິດ, ແລະ ໄດ້ລໍຖ້າ, ແລະ ປິຕິຍິນດີໃນວັນເວລາຂອງພຣະອົງ ຊຶ່ງກຳລັງຈະມາເຖິງ.
23 ແລະ ຈົ່ງເບິ່ງ, ພຣະອົງຄືພຣະເຈົ້າ, ແລະ ພຣະອົງສະຖິດຢູ່ນຳພວກເພິ່ນ, ແລະ ພຣະອົງໄດ້ສະແດງພຣະອົງເອງໃຫ້ປະຈັກແກ່ພວກເພິ່ນ, ວ່າພວກເພິ່ນຖືກໄຖ່ໂດຍພຣະອົງ; ແລະ ພວກເພິ່ນໄດ້ສັນລະເສີນພຣະອົງເພາະສິ່ງທີ່ຈະມາເຖິງນັ້ນ.
24 ແລະ ບັດນີ້, ໂດຍທີ່ເຫັນວ່າພວກທ່ານຮູ້ຈັກເລື່ອງເຫລົ່ານີ້ແລ້ວ ແລະ ຈະປະຕິເສດມັນບໍ່ໄດ້ນອກຈາກວ່າພວກທ່ານຈະເວົ້າຕົວະເທົ່ານັ້ນ, ສະນັ້ນ ຖ້າຫາກພວກທ່ານເວົ້າຕົວະພວກທ່ານກໍຈະເປັນຜູ້ເຮັດບາບ ຍ້ອນວ່າພວກທ່ານປະຕິເສດເລື່ອງທັງໝົດນີ້ ທັງໆທີ່ມີຫລັກຖານຢູ່ຢ່າງພຽງພໍ ຊຶ່ງພວກທ່ານໄດ້ເຫັນມາ; ແທ້ຈິງແລ້ວ, ພວກທ່ານໄດ້ເຫັນ ທຸກສິ່ງທຸກຢ່າງ, ທັງສິ່ງຢູ່ໃນສະຫວັນ, ແລະ ທັງທຸກສິ່ງທຸກຢ່າງຢູ່ໃນໂລກກໍໄດ້ເປັນພະຍານວ່າ ສິ່ງເຫລົ່ານີ້ເປັນຄວາມຈິງ.
25 ແຕ່ຈົ່ງເບິ່ງ, ພວກທ່ານໄດ້ປະຕິເສດຄວາມຈິງ ແລະ ກະບົດຕໍ່ພຣະເຈົ້າຜູ້ບໍລິສຸດຂອງພວກທ່ານ ແລະ ໃນເວລານີ້ ແທນທີ່ພວກທ່ານຈະ ສະສົມຊັບສົມບັດໄວ້ໃນສະຫວັນເພື່ອຕົນເອງ ຊຶ່ງບ່ອນນັ້ນບໍ່ມີສິ່ງໃດທີ່ຈະເນົ່າເປື່ອຍໄດ້, ແລະ ຢູ່ບ່ອນນັ້ນບໍ່ມີສິ່ງໃດທີ່ບໍ່ສະອາດຈະເຂົ້າໄປໄດ້, ແຕ່ພວກທ່ານກຳລັງກອບໂກຍເອົາພຣະພິໂລດໄວ້ເພື່ອຕົນເອງໃນວັນແຫ່ງ ການພິພາກສາ.
26 ແທ້ຈິງແລ້ວ, ໃນເວລານີ້ ພວກທ່ານກຳລັງສຸກ ເພາະຄວາມພິນາດອັນເປັນນິດ ສຳລັບການຄາດຕະກຳຂອງພວກທ່ານ ແລະ ການລ່ວງປະເວນີ ແລະ ການຊົ່ວຮ້າຍຂອງພວກທ່ານ; ແທ້ຈິງແລ້ວ, ແລະ ຖ້າຫາກພວກທ່ານບໍ່ກັບໃຈ ມັນຈະມາເຖິງພວກທ່ານໃນບໍ່ຊ້ານີ້.
27 ແທ້ຈິງແລ້ວ, ຈົ່ງເບິ່ງບັດນີ້ ມັນຢູ່ໃກ້ໆປະຕູຂອງທ່ານ; ແທ້ຈິງແລ້ວ, ໃຫ້ພວກທ່ານໄປຫາບັນລັງຕັດສິນ ແລະ ຄົ້ນເບິ່ງ; ແລະ ຈົ່ງເບິ່ງ, ຜູ້ຕັດສິນຂອງພວກທ່ານໄດ້ຖືກລອບຂ້າ ແລະ ເພິ່ນກຳລັງ ນອນຈົມກອງເລືອດຂອງເພິ່ນຢູ່; ແລະ ເພິ່ນຖືກລອບຂ້າ ໂດຍນ້ອງຊາຍຂອງເພິ່ນ, ຜູ້ຊຶ່ງຢາກນັ່ງບັນລັງຕັດສິນແທນ.
28 ແລະ ຈົ່ງເບິ່ງ, ທັງສອງເປັນຄົນຂອງພັກລັບຂອງພວກທ່ານນັ້ນເອງ, ຊຶ່ງຜູ້ ຕັ້ງມັນຄືແກດີອານທັນ ແລະ ມານຮ້າຍຜູ້ພະຍາຍາມທີ່ຈະທຳລາຍຈິດວິນຍານຂອງມະນຸດ.