1 Inaha, i teienei, i muri a’era, ’ia oti a’era tā Nephi paraura’a atu i teie mau parau, ’ua horo atu ra te tahi mau ta’ata mai rotopū atu ia rātou i te pārahira’a ha’avāra’a ; ’oia ïa, e pae ho’i tei haere atu, ’e ’ua nā ’ō ihora rātou i rotopū ia rātou iho, ’a haere atu ai rātou :

2 Inaha, i teienei, e ’ite pāpū tātou ē, e peropheta ānei teie ta’ata ’e ’ua fa’aue ānei te Atua iāna ’ia tohu i teie mau mea ta’a ’ē ia tātou nei. Inaha, ’aita tātou i ti’aturi ē, ’ua nā reira ’oia ; ’oia ïa, ’aita ho’i tātou i ti’aturi ē, e peropheta ’oia ; ’āre’a rā, mai te mea e parau mau teie mea ’o tāna i parau iho nei nō ni’a i te ha’avā rahi, ’oia ho’i ’ua pohe ’oia, i reira e ti’aturi ïa tātou ē e parau mau te tahi atu mau parau tāna i parau mai.

3 ’E i muri a’era, ’ua horo pūai atu ra rātou ē tae atu ra i te pārahira’a ha’avāra’a ; ’e inaha, ’ua ma’iri te ha’avā rahi i raro i te repo, ’e tē tārava ra ’oia i roto i tōna toto.

4 ’E i teienei, inaha, ’ia ’ite a’era rātou i te reira, ’ua māere roa ihora rātou, ’e nō reira ho’i ’ua ma’iri ihora rātou i raro i te repo ; ’aita ho’i rātou i ti’aturi na i te mau parau tā Nephi i parau mai nō ni’a i te ha’avā rahi.

5 ’Āre’a rā i teienei, i tō rātou ’itera’a ’ua ti’aturi ihora rātou, ’e ’ua tae mai ra te mata’u i ni’a ia rātou, ’o te tae mai te mau ha’avāra’a i parauhia mai e Nephi i ni’a iho i te mau ta’ata ; nō reira ’ua rurutaina ihora rātou, ’e ’ua ma’iri ihora rātou i raro i te repo.

6 I teienei, i muri noa iho i tō te ha’avā taparahira’ahia—i pātiahia ho’i ’oia e tōna taea’e ’o tei ’ō’omo i te ’ahu nō te huna i tōna hōho’a mata, ’e ’ua horo ’ē atu ra ’oia, ’e ’ua horo atu ra ho’i te mau tāvini ’e ’ua fa’a’ite atu ra i te mau ta’ata, ma te pi’i haere i te parau nō te taparahira’a ta’ata i tupu i rotopū ia rātou ra.

7 ’E inaha ’ua ha’aputuputu ’āmui ihora te mau ta’ata ia rātou i te vāhi nō te pārahira’a ha’avāra’a—’e inaha, ’ua ’ite atu ra rātou ma te māere i taua mau ta’ata ra e pae ’o tei ma’iri i raro i te repo.

8 ’E i teienei, inaha, ’aita roa te mau ta’ata i ’ite nō ni’a i taua rahira’a ta’ata i ha’aputuputu mai i te ’ō nō Nephi ra ; nō reira ’ua parau a’era rātou i rotopū ia rātou iho ē : Teie te mau ta’ata tei taparahi i te ha’avā, ’e nā te Atua i tā’iri ia rātou ’ia ’ore rātou ’ia horo ’ē atu ia tātou nei.

9 ’E i muri a’era, ’ua haru atu ra rātou ia rātou, ’e ’ua ru’uru’u ihora ia rātou ’e ’ua huri atu ra ia rātou i roto i te fare tāpe’ara’a. ’E ’ua fa’ataehia atu ra te hō’ē parau fa’a’ite ē ’ati noa a’e ē ’ua taparahihia te ha’avā, ’e ’ua haruhia mai te mau ta’ata i taparahi iāna ’e ’ua hurihia rātou i roto i te fare tāpe’ara’a.

10 ’E i muri a’era, ’ia po’ipo’i a’era ’ua ha’aputuputu ’āmui ihora te mau ta’ata ia rātou nō te ’oto ’e nō te ha’apae i te mā’a, i te hunara’a o te ha’avā rahi ’o tei taparahihia.

11 ’E ’ua nā reira ato’a taua mau ha’avā ra ’o tei pārahi na i te ’ō o Nephi ra, ’e ’ua fa’aro’o rātou i tāna mau parau, ’e ’ua ha’aputuputu ’āmui ato’a mai rātou i te vāhi hunara’a.

12 ’E i muri a’era, ’ua ani atu ra rātou i te mau ta’ata, i te nā-’ō-ra’a ē : Tei hea atu ra te mau ta’ata e pae i tonohia nō te ui i te parau nō te ha’avā rahi ē, ’ua pohe ānei ’oia ? ’E ’ua pāhono mai ra rātou, nā ’ō mai ra : Nō nia i teie e pae ’o tā ’outou i parau mai ē ’ua tono mai ’outou, ’aita roa mātou i ’ite ; tē vai nei rā e pae ’o tei taparahi iāna, ’e ’o tā mātou i huri atu i roto i te fare tāpe’ara’a.

13 ’E i muri a’era, ’ua hina’aro ihora te mau ha’avā ’ia arata’ihia mai rātou ; ’e ’ua arata’ihia mai ra rātou, ’e inaha ’o rātou teie e pae i tonohia mai ; ’e inaha ’ua ui atu ra te mau ha’avā ia rātou nō ni’a i te mea i tupu, ’e ’ua fa’a’ite mai ra rātou ia rātou i tā rātou i rave, i te nā-’ō-ra’a mai ē :

14 ’Ua horo atu mātou ’e ’ua tae atu ra i te vāhi nō te pārahira’a ha’avāra’a, ’e i tō mātou ’itera’a i te mau mea ato’a i tupu mai tā Nephi i fa’a’ite mai, ’ua māere ihora mātou, ’e nō reira ho’i ’ua ma’iri ihora mātou i raro i te repo ; ’e ’ia ara a’era mātou i tō mātou māere rahi, inaha, ’ua huri ihora rātou ia mātou i roto i te fare tāpe’ara’a.

15 I teienei, nō te ta’ata i taparahi i teie nei ta’ata, ’aita roa mātou i ’ite ē ’o vai tei rave i te reira, tīrārā te vāhi tā mātou i ’ite, ’ua horo atu mātou ’e tae atu ra i reira mai tā ’outou i hina’aro, ’e inaha ’ua pohe roa ’oia, mai te au i te mau parau a Nephi.

16 ’E i teienei, inaha, ’ua ha’amāramarama atu ra te mau ha’avā i taua mea ra i te mau ta’ata, ’e ’ua pari atu ra ia Nephi, nā ’ō atu ra : Inaha, ’ua ’ite mātou ē, ’ua fa’aau na Nephi i te parau i te hō’ē ta’ata ’ia taparahi i te ha’avā, ’e i muri iho ’a fa’a’ite mai ai ia tātou, ’ia ti’a iāna ’ia fa’afāriu atu ia tātou i tāna ra ha’apa’ora’a, ’e ’ia ti’a iāna ’ia fa’ateitei iāna iho ’ei ta’ata rahi, ’ei mea mā’itihia e te Atua, ’e ’ei peropheta.

17 ’E i teienei, inaha, e hi’opo’a mātou i teie nei ta’ata, ’e e fā’i mai ’oia i tāna ra hapa ’e e fa’a’ite ato’a mai ia tātou i te ta’ata mau i taparahi i taua ha’avā ra.

18 ’E i muri a’era, ’ua tu’uhia atu ra taua mau ta’ata e pae ra i te mahana nō te hunara’a. ’Āre’a rā, ’ua fa’ahapa atu ra rātou i te mau ha’avā i te mau parau tā rātou i pari atu ia Nephi ra, ’e ’ua mārō atu ra ia rātou tāta’itahi, ’e nō reira ho’i ’ua māmū ihora rātou.

19 ’Āre’a rā, ’ua fa’aue atu ra rātou ’ia tāpe’ahia ’e ’ia ru’uru’uhia Nephi, ’e ’ia ’āfa’ihia i mua i te mau ta’ata, ’e ’ua ha’amata ihora rātou i te uiui mai iāna i te mau huru uira’a e rave rahi ’ia ti’a ia rātou ’ia ha’afifi iāna, ’e ’ia roa’a tā rātou parira’a au nō te ha’apohe iāna—

20 I te nā-’ō-ra’a atu iāna : Tei roto ’oe i te hō’ē pupu ’ohipa huna ; ’o vai teie ta’ata i taparahi i teie nei ta’ata ? ’A fa’a’ite mai ia mātou, ’e ’a fā’i mai i tā ’oe ra hapa ; i te nā-’ō-ra’a mai ē, inaha, teie te moni, ’e e hōro’a atu ho’i mātou i tō ’oe ora mai te mea e fa’a’ite mai ’oe ia mātou, ’e e fā’i mai ho’i i te parau tā ’oe i fa’aau atu iāna ra.

21 ’Āre’a rā ’ua nā ’ō atu ra Nephi ia rātou : ’Auē ho’i ’outou e te mau ta’ata ma’ama’a ; ’outou e te feiā ’ā’au ’eta’eta ; ’outou e te mau ta’ata matapō, ’e ’outou e te feiā ’ā’au ’eta’eta, ’ua ’ite ānei ’outou i te maorora’a tā te Fatu te Atua e fa’ati’a ’ia haere noa ’outou nā tō ’outou ’ē’a hara ra ?

22 E mea ti’a roa ia ’outou ’ia ha’amata i te ’auē ’e i te ’oto nō te pohe rahi i fātata i te tae mai i ni’a ia ’outou, maori rā ’ia tātarahapa ’outou.

23 Inaha, tē parau nei ’outou ē, ’ua fa’aau vau i te parau i te hō’ē ta’ata ’ia taparahi ia Seezorama, tō ’outou ha’avā rahi. Inaha rā, tē parau atu nei au ia ’outou na, ’ua nā reira ’outou nō te mea ’ua fa’a’ite pāpū atu vau ia ’outou ’ia roa’a tō ’outou ’ite i taua mea ra ; ’oia ïa, ’e ’ia riro ho’i te reira ’ei fa’a’itera’a pāpū ia ’outou na, ’ua ’ite au i te ’ohipa ’ī’ino ’e te mau ’ohipa vi’ivi’i i rotopū ia ’outou na.

24 ’E nō te mea ’ua nā reira vau, nō reira ’ua parau mai ’outou ē, ’ua fa’aau vau i te parau i te hō’ē ta’ata ’ia rave i te reira ; ’oia ïa, nō te mea ’ua fa’a’ite atu vau ia ’outou i teie tāpa’o, ’ua riri ’outou iā’u, ’e ’ua tītau ’ia ha’amou i tō’u ora.

25 ’E i teienei, inaha, e fa’a’ite atu vau ia ’outou i te tahi atu ā tāpa’o, ’e i reira e ’ite ai au ē, e tītau ānei ’outou ’ia ha’apohe iā’u nō taua mea nei.

26 Inaha, tē parau atu nei au ia ’outou na : ’A haere atu i te fare o Seanetuma, i te taea’e o Seezorama, ’e ’a parau atu iāna—

27 ’Ua fa’aau ānei Nephi, te ta’ata fa’ahua peropheta, ’o tei tohu mai i te ’ino rahi nō ni’a i teie nei feiā, i te parau ia ’oe, nō reira ’oe i taparahi ai ia Seezorama, tō ’oe taea’e ?

28 ’E inaha, e parau mai ’oia ia ’outou na ē, ’Aita roa.

29 ’E i reira, e parau atu ’outou iāna : ’Ua taparahi ānei ’oe i tō ’oe taea’e ?

30 ’E i reira, e ti’a noa mai ’oia ma te mata’u, ’e ’aita e ta’a iāna e aha tāna e parau mai. ’E inaha, e riro ’oia i te huna i mua ia ’outou ; ’e e fa’ahua māere rahi roa ’oia ; e parau mai rā ’oia ē, ’aita ’oia i hara.

31 Inaha rā, e hi’opo’a ’outou iāna, ’e e ’itea ia ’outou te toto i ni’a i tōna hiti ’ahu.

32 ’E ’ia ’itea te reira ia ’outou, ’a parau atu iāna : Nō hea mai teie nei toto ? ’Aita ānei mātou i ’ite ē, ’o te toto teie o tō ’oe ra taea’e ?

33 ’E i reira e rurutaina ’oia, ’e e māhe’ahe’a tōna mata mai te mea ra ē, ’ua tae mai te pohe i ni’a iāna.

34 ’E i reira ’outou e parau atu ai iāna : Nō tenā na mata’u ’e tenā na māhe’ahe’a i tae mai i ni’a i tō ’oe mata, inaha, ’ua ’ite mātou ē, ’ua hara mau ’oe.

35 ’E i reira e tae mai te mata’u rahi a’e i ni’a iāna ; ’e i reira ho’i ’oia e fā’i mai ai ia ’outou, ’e ’aita roa ’oia e huna fa’ahou ē nāna i taparahi iāna.

36 ’E i reira, e parau mai ’oia ia ’outou ē, ’aita vau, ’o Nephi, i ’ite i te hō’ē a’e mea nō ni’a i taua ’ohipa ra, maori rā ’ua fa’a’itehia mai te reira iā’u nā roto i te mana o te Atua. ’E i reira ’outou e ’ite pāpū ai ē, e ta’ata parau mau vau, ’e ’ua tonohia mai au ia ’outou nō ’ō mai i te Atua ra.

37 ’E i muri a’era, ’ua haere atu ra rātou ’e ’ua nā reira, mai te au i tā Nephi i parau atu ia rātou ra. ’E inaha, te mau parau tāna i parau ra, e parau mau ïa ; mai te au i tāna mau parau, ’ua huna ’oia ; ’e mai te au ato’a i tāna mau parau, ’ua fā’i mai ’oia.

38 ’E ’ua arata’ihia mai ra ’oia nō te fa’a’ite ē, nāna iho i taparahi, ’e nō reira ho’i ’ua tu’uhia atu ra nā ta’ata to’opae ’e ’o Nephi ato’a ho’i.

39 ’E tē vai ra te tahi pae o te mau ’āti Nephi i ti’aturi i te mau parau a Nephi ; ’e tē vai ato’a ra te tahi pae i ti’aturi nā roto i te ’itera’a pāpū o nā ta’ata to’opae ra, ’e ’ua fa’afāriuhia rātou ’a pārahi ai rātou i roto i te fare tāpe’ara’a.

40 ’E i teienei, tē vai ra te tahi pae i rotopū i te mau ta’ata ’o tei parau ē, e peropheta ’o Nephi.

41 ’E tē vai ra ho’i te tahi pae tei parau ē : Inaha, e atua ’oia, ’āhiri ho’i e’ita ’oia i te atua, ’aita ïa e ti’a iāna ’ia ’ite i te mau mea ato’a. Inaha ho’i, ’ua fa’a’ite mai ’oia i te mau mana’o o tō tātou nei ’ā’au, ’e ’ua fa’a’ite ato’a mai ’oia i te tahi mau mea ato’a ; ’e ’ua fa’a’ite ato’a mai ’oia i te ta’ata mau i taparahi i tō tātou ha’avā rahi.