Introdukshon

E Buki di Mormon ta un volumen di skritura santu komparabel na e Beibel. Ta un registro di Dios su tratonan ku e abitantenan antiguo di e kontinente merikano i ta kontené, manera e Beibel, e plenitut di e evangelio eterno.

E buki a wòrdu skirbí dor di hopi profetanan antiguo pa medio di e Spiritu di profesía i revelashon. Nan palabranan, skirbí riba plachinan di oro, a wòrdu kopiá i kompendiá pa un profeta-historiador yamá Mormon. E registro ta duna un relato di dos sivilisashonnan grandi. Unu a bini for di Jerusalem na aña 600 A.C., i despues a separá den dos nashon, konosí manera e nefitanan i e lamanitanan. E otro a bini hopi mas promé ora Señor a konfundí e lenganan na e Toren di Babel. E grupo aki ta wòrdu konosí manera e jareditanan. Despues di miles di aña, tur a wòrdu destruí eksepto e lamanitanan, i nan ta e ansestronan prinsipal di e indjannan merikano.

E evento prinsipal registrá den e Buki di Mormon ta e ministerio personal di Señor Jesucristo entre e nefitanan poko despues di su resurekshon. E ta splika e doktrinanan di evangelio, resumí e plan di salbashon, i ta bisa hende loke nan tin ku hasi pa haña pas den e bida aki i salbashon eterno den e bida ku ta bini.

Despues ku Mormon a kompletá su eskritonan, el a entregá e relato na su yu Moroni, ku a añadí algun palabranan di su mes i a skonde e plachinan na e seru di Kumora. Riba 21 di sèptèmber, 1823, e mesun Moroni, e ora ei un ser glorifiká, i resusitá, a parse na e Profeta José Smith, i a dun’é instrukshon tokante e registro antiguo i su tradukshon destiná na e idioma ingles.

Na su debido tempu e plachinan a wòrdu entregá na José Smith, kende a tradusinan pa e don i poder di Dios. E registro awor aki ta publiká den varios idioma manera un testigu nobo i adishonal ku Jesucristo ta e Yu di e Dios bibu i ku tur esnan ku bini na dje i obedesé e lèinan i ordenansanan di su evangelio por optené salbashon.

Tokante e registro aki e Profeta José Smith a bisa: “Mi a bisa e rumannan ku e Buki di Mormon tabata e mas korekto di kualke buki riba mundu, i e klave di nos religion, i un hende lo aserká mas na Dios pa medio di warda su preseptonan, ku pa medio di kualke otro buki.”

Ademas di José Smith, e Señor a proveé pa diesun otro wak e plachinan di oro pa nan mes, i pa ta testigunan spesial di e verasidat i divinidat di e Buki di Mormon. Nan testimonio skirbí ta wòrdu inkluí akinan manera “E Testimonio di e tres testigunan” i “E Testimonio di e Ocho Testigunan.”

Nos ta invitá tur hende na tur kaminda pa lesa e Buki di Mormon, meditá den nan kurason e mensahe ku e ta kontené, i e ora ei pa puntra Dios, e Tata Eterno, den e nòmber di Cristo si e buki ta bèrdat. Esnan ku sigui e kurso aki i pidi ku fe lo haña un testimonio di su verasidat i divinidat pa e poder di Spiritu Santu (Wak Moroni 10:3–5.)

Esnan ku haña e evidensia divino aki for di Spiritu Santu pa medio di e mesun poder lo haña sa tambe ku Jesucristo ta e Salvador di mundu, ku José Smith ta su revelador i profeta den e delaster dianan aki, i ku e Iglesia di Jesucristo di e Santunan di e Delaster Dianan ta e rèino di Señor stablesé un biaha mas riba mundu, preparatorio na e di dos binida di e Mesías.