Buk blong Jekob
Brata blong Nifae

1 From luk, i bin hapen se fifti mo faef yia i bin pas finis long taem we Lihae i aot long Jerusalem; taswe, Nifae i bin givim long mi, Jekob, wan komanmen long saed blong ol smol buk we oli raetem olgeta samting ia long olgeta.

2 Mo hem i bin givim long mi, Jekob, wan komanmen, se mi mas raet long ol buk ia samfala samting we mi bin ting se oli gud tumas, we mi no mas tajem, be raetem lelebet nomo, long saed blong histri blong ol pipol ia we oli singaotem olgeta ol pipol blong Nifae.

3 From hem i bin talem se bae oli raetem histri blong ol pipol blong hem long ol narafala buk blong hem, mo se mi mas sevem ol buk ia mo pasem i go daon long ol pikinini blong mi, stat long wan jeneresen i go long narafala jeneresen.

4 Mo sapos i gat ol toktok we oli tabu, o revelesen we i bigwan, o profesi, mi mas raetem ol impoten samting long saed blong olgeta samting ia long ol buk ia, mo raetem plante samting long saed blong olgeta olsem we i save hapen, blong gud blong Kraes, mo blong helpem ol pipol blong yumi.

5 From fet mo bigfala wari, i tru we oli bin soemaot long mifala long saed blong ol pipol blong mifala, wanem nao sam samting we bae i hapen long olgeta.

6 Mo mifala tu i bin kasem plante revelesen, mo spirit blong plante profesi; taswe, mifala i bin save long Kraes mo kingdom blong hem, we bae i kam.

7 Taswe, mifala i bin wok strong wetem strong tingting long medel blong ol pipol blong mifala, blong mekem se mifala i save winim tingting blong olgeta blong kam long Kraes, mo tekem pat blong gud fasin blong God, blong oli save go insaed long kingdom blong hem, hem i fraet se bae hem i jaj long kros blong hem se bae oli no go insaed, semmak long ol dei blong rao mo temtesen taem we olgeta pikinini blong Isrel oli bin stap long waelples.

8 Taswe, mifala i wantem tumas long God se mifala i save winim tingting blong evri man blong oli no go agensem God, blong no mekem hem i kros, be blong evri man bae oli biliv long Kraes, mo tingbaot ded blong hem, mo safa blong karem kros blong hem mo blong tekem sem blong wol; taswe, mi, Jekob, mi tekem long mi blong mekem komanmen we i go long brata blong mi, Nifae, i hapen.

9 Nao Nifae i bin stat blong kam olfala, mo hem i bin luk se bae hem i mas ded i no longtaem; taswe, hem i bin anoentem wan man blong kam wan king mo wan man blong rul ova long ol pipol blong hem naoia, folem ol rul blong ol king.

10 From ol pipol i bin lavem Nifae tumas, from hem i bin wan bigfala man we i stap lukaotem gud olgeta, from hem i bin yusum naef blong faet blong Leban blong difendem olgeta, mo from hem i bin wok evri dei long laef blong hem from gudfala laef blong olgeta—

11 Taswe, ol pipol oli wantem blong tingbaot nem blong hem. Mo eni man we bae i rul long ples blong hem, ol pipol oli singaotem olgeta, nambatu Nifae, nambatri Nifae, mo i go olsem ia nao, folem ol rul blong ol king; mo olsem ia nao ol pipol oli bin singaotem olgeta, i nomata wanem nao nem blong olgeta.

12 Mo i bin hapen se Nifae i bin ded.

13 Nao ol pipol we oli no Ol Man blong Leman, oli Ol Man blong Nifae; be, oli bin singaotem olgeta ol laen blong Nifae, ol laen blong Jekob, ol laen blong Josef, ol laen blong Soram, ol laen blong Leman, ol laen blong Lemyul, mo ol laen blong Ismael.

14 Be mi, Jekob, afta long taem ia bae mi no singaotem olgeta wetem ol nem ia, be bae mi singaotem olgeta Ol Man blong Leman we oli stap lukaotem blong prapa spolem gud ol pipol blong Nifae, mo olgeta we oli mekem gud fren wetem Nifae, bae mi singaotem olgeta Ol Man blong Nifae, o ol pipol blong Nifae, folem ol rul blong ol king.

15 Mo nao i hapen se ol pipol blong Nifae, long taem we nambatu king i stap rul, i bin stat blong gro mo kam strong long hat blong olgeta, mo oli bin letem olgeta lelebet long ol fasin nogud, olsem Deved long bifo we i bin wantem plante waef blong hem mo ol narafala woman blong hem, mo tu, Solomon, boe blong hem.

16 Yes, mo tu, oli bin stat blong lukaotem plante gol mo silva, mo oli bin stat blong kam antap lelebet wetem hae tingting.

17 Taswe mi, Jekob, mi bin givim long olgeta ol toktok ia taem we mi bin tijim olgeta long tempol, be fastaem mi bin kasem wok blong mi long Lod.

18 From Nifae i bin konsekretem mi, Jekob, mo brata blong mi, Josef, i kam olsem ol pris mo ol tija blong ol pipol ia, wetem han blong hem.

19 Mo mitufala i bin givim ona mo wok strong long ofis blong mitufala i go long Lod, mo mitufala i bin tekem long mitufala stret wok ia, mo tekem ol panis blong ol sin blong ol pipol antap long hed blong mitufala sapos mitufala i no bin tijim gud olgeta long toktok blong God wetem strong tingting oltaem; taswe, taem mitufala i stap wok strong wetem paoa blong mitufala, blad blong olgeta bae i no save kam long ol klos blong mitufala; sapos no, blad blong olgeta bae i kam long ol klos blong mitufala, mo bae oli no faenem se mitufala i no gat mak long las dei.