1 Ekkewe kapas minne Jacob, ewe pwin Nifai, a apasa ngeni ekkewe aramasen Nifai, mwirin manon Nifai:

2 Iei, pwi achengicheng, ngang, Jacob, anongonong won ewe wiis minne ngang mi nom fan ngeni Kot, ai upwe apwonueta wiisei ren fatafatoch, iwe pwe upwe animenimochueno ufei kewe seni ami tipis, ua feita ngeni ewe tempel non ei ran pwe upwe afanafana ngenikemi ewe kapasen Kot.

3 Iwe ami mi pwisin sinei pwe ua fen achocho tori ei fansoun non wiisen ai kokko; nge ngang non ei ran ua chourek ren ewe watten mochen me aurek fan iten tufichin ngunumi nap seni ai ua fen fori akkom.

4 Pun nengeni, feito tori ei fansoun, oua fen aneasochis ngeni ewe kapasen ewe Samon, minne ua fen awora ngenikemi.

5 Nge nengeni, ausening ami ngeniei, me oupwe sinei pwe seni ewe aninisin ewe Chon Fori nang me fonufan mi unusen manaman ua tongeni erenikemi usun ami kewe ekiek, ifa usun oua poputa ne angang non tipis, ewe tipis mi pwano pwe mi fokkun anieput ngeniei, ewer, me mi anieput ngeni Kot.

6 Ewer, a enetipengawa ngunui me foriei ai upwe nurufengen ren saw me mwen mesen ai we Chon Fori, pwe upwe pwarata ngenikemi usun fofforungawen netipemi.

7 Iwe a pwan enetipengawaei pwe mi namwot ai upwe aea watten pochokunen kapas usumi, me mwen punuwemi kewe me noumi kewe, chommong me neir ar memef ra fokkun netip pwetete me nimenimoch me apwetete me mwen Kot, ewe mettoch mi apwapwa ngeni Kot;

8 Iwe ua ekieki pwe ra feita ikei pwe repwe rongorong ewe kapas mi apwapwa an Kot, ewer, ewe kapas minne a echikara ewe ngun mi feiengaw.

9 Ina minne, a achou ngunui ren ai upwe pesepes, pokiten ewe annuk mi tichik minne ua fen angei me ren Kot, ai upwe apungu kemi anongonong won ami kewe atai annuk, ai upwe anapano metekin ekkewe ra fen metek, me nukun ai upwe echipa me echikara metekir kewe; iwe ekkewe resemo fen metek, me nukun ar repwe kametip won ewe kapas mi apwapwa an Kot epwe wor saar an epwe pwereni ngunur me emeteki ar ekiek mi apwetete.

10 Nge, inamo ewe weiresin ewe angang, upwe fokkun fori anongonong won ekkewe annukun Kot mi tichik, me erenikemi usun ami fofforungaw me angang mi anieput, fan mesen ekkewe mi nimenimoch non netiper, me ekkewe mi netipechou, me fan kunaen nerikin anonnonun mesen ewe Kot mi Napanap.

11 Ina minne, upwe fokkun erenikemi ewe ennet anongonong won ewe fatafatochun ewe kapasen Kot. Pun nengeni, nupwen ai tingorei ewe Samon, iei a feito ewe kapas ngeniei, a apasa: Jacob, kopwe feita ngeni ewe tempel non ewe soran, me afanafana ewe kapas minne upwe awora ngonuk kopwe ngeni ekkei aramas.

12 Iwe iei nengeni, ami pwi, iei ewe kapas minne upwe afanafana ngenikemi, pwe chommong me neimi oua fen poputa ne kutta gold, me silver, me meinisin sokopaten napanapen mecha mi auchea, usun minne ei fonu, minne a ew fonuen pwon ngenikemi me ngeni mwirimwirimi kewe, a fokkun chommong ekkei mettoch me non.

13 Iwe poun ewe chon awora a emenimenitiw womi non unusen pwapwa, pwe oua fen angei chommong pisekisek; iwe pokiten ekkoch me neimi oua fen angei chommong nap seni ekkewe minne pwiumi kewe ra angei oua nuapas non namanam tekian netipemi, me oua pwarano uwemi mi kum me achifata chamwemi pokiten watten niwinin ufemi kewe, me oua ariaffou pwiumi kewe pokiten oua ekieki pwe oua nap seni ir.

14 Iwe iei, ami pwi, oua ekieki pwe Kot a epichikemino me non ei mettoch? Nengeni, ua apasa ngenikemi, Apw. Nge i a apungakemino pwe ami mi tipis, iwe ika oua soposopono non ekkei mettoch an we kapung epwe fokkun mwitir feito womi.

15 O amo i epwe pwar ngenikemi pwe i mi tongeni pwerenikemi, iwe ren ew nerikin mesan i a tongeni wichikemi ngeni ewe puun!

16 O amo i epwe angasakemino seni ei angangangaw me angang mi anieput. Iwe, O amo oupwe rongorong ngeni ewe kapasen an kewe annuk, me ousap mutata ei namanam tekian netipemi epwe atano ngunumi!

17 Ekieki usun pwiumi kewe usun oua pwisin ekiekikemi, me oupwe chiechioch ngeni meinisin me oupwe fangafangoch pisekimi kewe, pwe repwe pisekisek usumi.

18 Nge me mwen oupwe kutta ekkewe pisekisek, oupwe kutta ewe muun Kot.

19 Iwe mwirin oua angei ew apinukunuk pokiten Kraist oupwe angei ekkewe pisekisek, ika oua kutter; iwe oupwe kutter ren ewe popun ami oupwe fori mi och—oupwe aufoufa ekkewe mi seneno, me amwongoni ekkewe mi echik, me angasano ekkewe mi fotek, me awora aninis ngeni ekkewe mi semwen me ekkewe mi riaffou.

20 Iwe iei, ami pwi, ua fen kapas ngenikemi usun namanam tekia; iwe ekkewe me neimi oua fen ariaffou chon orumi kewe, me oua ariaffou i pokiten oua namanam tekia non netipemi, usun ekkewe mettoch minne Kot a ngenikemi, met oupwe apasa usun ekkei mettoch?

21 Ouse ekieki pwe ekkena sokkun mettoch mi anieput ngeni i ewe a fori aion meinisin? Me ewe emon aramas mi auchea me ne mesan usun chok ewe pwan emon. Iwe aion meinisin ra seni ewe moromoren puun; iwe ren ewe pwan chok popun i a forireta, pwe repwe aneasochisi an kewe annuk me mwareiti i feinfeino chok.

22 Iwe iei ua osopwano ai kapas ngenikemi usun ei namanam tekia. Iwe ika ese namwot pwe upwe kapas ngenikemi usun ew atai annuk mi fokkun ngaw, netipei epwe fokkun pwapwa pokitemi.

23 Nge ewe kapasen Kot a achouwei pokiten ami kewe atai annuk mi fokkun ngaw. Pun nengeni, iei anon ewe Samon: Ekkei aramas ra poputa ne napeno non angangangaw; rese weweiti ekkewe pukefel, pun ra kutta ar repwe omusano pwisin ir ne fori nisou, pokiten ekkewe mettoch minne ra makketiw usun David, me Solomon noun we anuon.

24 Nengeni, David me Solomon ra ennetin chommong punuwer me nour nikomwir, ekkei mettoch mi anieput me mwei, anon ewe Samon.

25 Ina minne, iei anon ewe Samon, ua fen emmweni ekkei aramas seni ewe fonuen Jerusalem, me ren manamanen pei, pwe upwe tongeni seikata ngeniei ew mwich mi tupwon seni uwan nukanapan Joseph.

26 Ina minne, ngang ewe Samon Kot usap mutata pwe ekkei aramas repwe foffor usun ekkewe chon nom.

27 Ina minne, ami pwi, ausening ngeniei, me ausening ngeni ewe kapasen ewe Samon: Pun esap wor emon mwan me neimi epwe wor nap seni emon chok punuwan; me esap wor noun nikomwir;

28 Pun ngang, ewe Samon Kot, ua pwapwa non nimenimochun fefin. Iwe fofforun nisou mi angang anieput me mwei; iei anon ewe Samonun Mwicheichen Aramas.

29 Ina minne, ekkei aramas repwe aneasochisi ai kewe annuk, anon ewe Samonun Mwicheichen Aramas, are ewe fonu epwe anumamau fan asengesir.

30 Pun ika upwe, anon ewe Samonun Mwicheichen Aramas, seikata mwirimwirin aramas fan itei, upwe annuku nei kewe aramas; ika esap ina iwe repwe aneasochis ngeni ekkei mettoch.

31 Pun nengeni, ngang, ewe Samon, ua fen kuna ewe netipengaw, me rongorong netipetan ekkewe fopun noun nei kewe aramas non ewe fonuen Jerusalem, ewer, me non meinisin ekkewe fonuen nei kewe aramas, pokiten ewe fofforungaw me angang mi anieput an punuwer kewe.

32 Iwe usap mutata, anon ewe Samonun Mwicheichen Aramas, pwe sion ekkewe fopun mi nioch noun ekkei aramas, minne ua fen emmwenireu seni ewe fonuen Jerusalem, repwe feita ngeniei ar repwe ungeni ekkewe mwanin nei kewe aramas, anon ewe Samonun Mwicheichen Aramas.

33 Pun resap emmwenireno non fotek ekkewe fopun noun nei kewe aramas pokiten ar pwetete, tiwenon chok ika upwe churir ren ew anumamau mi ariaffou, pwan mwo tori kiteterinor; pun resap fori nisou, usun ekkewe chon nom, anon ewe Samonun Mwicheichen Aramas.

34 Iwe iei nengeni, ami pwi, oua sinei pwe ekkei annuk ra kawor ngeni semach we, Liai; ina minne, oua fen sinei ir me akkom; iwe oua fen feito ngeni kapung mi pochokun; pun oua fen fori ekkei mettoch minne ita ousap fen fori.

35 Nengeni, oua fen fori ennetin fofforungaw nap seni ekkewe chon Leiman, pwich kewe. Oua fen enetipechou netipen punuwemi kewe mi netip pwetete, me a turusenikemi apinukunukun noumi kewe, pokiten ami nenien appiru mi ngaw me mwer; me kechiwengawen netiper a feita ngeni Kot pwe repwe ungenikemi. Iwe pokiten tichikin ewe kapasen Kot, minne a feitiw epwe ungenikemi, chommong netip ra mano, ra pwer me ren ammetekin memef.