1 Faauta, o’u uso e, tou te lē manatua lo outou faitauina o upu a le perofeta o Senosa, na ia fetalai atu i le aiga o Isaraelu, e faapea:

2 Faalogo mai ia, E, outou e le aiga o Isaraelu, ma faalogo mai i a’u upu, o se perofeta a le Alii.

3 Auā faauta, ua faapea ona fetalai mai o le Alii, o le a Ou faatusaina oe, E, le aiga e o Isaraelu, i se laau olive fanua, na ave e se tagata ma tausi i lona togāolive; ma ua tupu a’e, ma faasolo ina matua, ma amata ona pala.

4 Ma sa oo ina alu atu le matai o le togāolive, ma sa vaai atu o ia ua amata ona pala o lana laau olive; ma sa fai ifo o ia: O le a ou teuina, ma eli faataamilo ai, ma tausi i ai, atonu o le a mafai ona fotu mai ai ni lālā laiti ma mu’amu’a, ma lē mate ai.

5 Ma sa oo ina teu e ia le laau, ma eli faataamilo ai, ma tausi e tusa ma lana upu.

6 Ma sa oo ina ua mavae ni aso e tele, sa amata ona totogo a’e ai lava ni nai lālā laiti, fou ma mu’amu’a; ae faauta, sa amata ona mate lona tauluulu.

7 Ma sa oo ina vaai atu i ai le matai o le togāolive, ona fai atu lea o ia i lana auauna: Ou te faanoanoa nei ma’umau atu lenei laau mai ia te a’u; o le mea lea, alu atu ia ma fa’i mai ni lālā mai se laau olive vao, ma aumai iinei ia te a’u; ma o le a tafa’i ese mua’i lālā na ua amata ona mamae, ma ta’ua lafoina i le afi ina ia susunuina ai i latou.

8 Ma faauta, ua fetalai mai ai le Alii o le togāolive, Ou te ave le tele o lālā laiti ma mu’amu’a nei, ma o le a ou suluina i latou i soo se mea ou te loto i ai; ma o le a lē afaina ai pe afai e mate le a’a o le laau lenei, ina ia mafai ona ou faasaoina lona fua mo a’u. O le mea lea, o le a ou ave nei lālā laiti ma mu’amu’a, ma o le a ou suluina i latou i soo se mea ou te loto i ai.

9 Ia e ave lālā o le laau olive vao, ma sulu i totonu, e sui ai; ma o lālā nei ua ou aveesea o le a ou lafoina i le afi ma susunu i latou, ina ia lē faagaogaosā ai le fanua o lo’u togāolive.

10 Ma sa oo ina faia e le auauna a le Alii o le togāolive e tusa ma le afioga a le Alii o le togāolive, ma ia sulu i totonu lālā o le laau olive vao.

11 Ma sa faatonu e le Alii o le togāolive ia eli faataamilo ai, ma teu, ma tausi, ma fai atu i lana auauna: Ou te faanoanoa ne’i ma’umau atu lenei laau mai ia te a’u; o le mea lea, atonu ina ia mafai ona ou faasaoina ona a’a ina ia lē mamate, ina ia mafai ona ou faasaoina i latou mo a’u lava, o lea ua ou faia ai lenei mea.

12 O le mea lea, alu ia i lou ala; vaavaai le laau, ma tausi i ai, e tusa ma a’u upu.

13 Ma o lālā nei, o le a ou tuu i se vaega aupito mamao ese o lo’u togāolive, i soo se mea ou te loto i ai, e te lē popole i ai; ma ou te faia lenei mea ina ia mafai ona ou faasaoina mo a’u lava lālā moni o le laau; o lenei foi, ina ia mafai ona ou teuina o latou fua mo le isi vaitau, mo a’u lava; ona ou te faanoanoa ne’i ma’umau atu mai ia te a’u lenei laau ma ona fua.

14 Ma sa oo ina maliu ese atu le Alii o le togāolive i lona ala, ma natia lālā moni o le laau olive fanua i vaega e sili ona mamao ese o le togāolive, o ni isi i se tasi mea, ma ni isi i se isi mea, e tusa ma lona faamoemoe ma lona finagalo.

15 Ma sa oo ina mavae atu se taimi umi lava, ona fetalai atu lea o le Alii o le togāolive i lana auauna: Sau ia, ta o ifo i le togāolive, ina ia ta galulue i le togāolive.

16 Ma sa oo ina maliu ifo le Alii o le togāolive, ma le auauna foi, i lalo i le togāolive e galulue ai. Ma sa oo ina fai mai le auauna i lona matai: Faauta, tagai ia; faauta i le laau.

17 Ma sa oo ina silasila ma tagai atu le Alii o le togāolive i le laau na sulu i ai lālā o le olive vao; ma ua ola talaulau ma ua amata ona fua mai. Ma sa silasila atu o ia ua lelei; ma o lona fua ua pei lava o le fua moni.

18 Ma sa fetalai atu o ia i le auauna: Faauta, ua maua e lālā o le olive vao le suavai mai a’a o le olive fanua, ma ua maua e ona a’a le malosi tele; ma ona o le malolosi tele o ona a’a ua fua mai ai e lālā olive vao fua fanua. O lenei, a na ta lē suluina i totonu nei lālā, po ua mate le laau. Ma o lenei, faauta, o le a ou teuina fua e tele, ua fua mai e lenei laau; ma o ona fua o le a ou teuina mo a’u lava, auā le isi vaitau.

19 Ma sa oo ina fetalai atu le Alii o le togāolive i le auauna: Sau ia, ta o i le vaega aupito mamao ese o le togāolive, ma vaai pe lei fua mai foi e lālā moni o le laau ni fua e tele, ina ia mafai ona ou teuina ni o latou fua mo a’u lava, auā le isi vaitau.

20 Ma sa oo ina la o atu i le mea na natia ai e le matai lālā moni o le laau, ma sa fai atu o ia i le auauna: Tagai ia; ma sa vaai atu o ia i le lālā muamua, ua fua mai ai ni fua e tele; ma sa vaai atu foi o ia ua lelei. Ma sa fai atu o ia i le auauna: Ave ni ona fua, ma teu auā le isi vaitau, ina ia mafai ona ou faasaoina mo a’u lava; auā faauta, ua fai mai o ia, sa ou tausia i lenei taimi umi, ma ua fua mai ai fua e tele.

21 Ma sa oo ina fai mai le auauna i lona matai: Aisea na e afio mai ai iinei e toto ai le laau lenei, po o le lālā lenei o le laau? Auā faauta, o le fasi eleele lenei sa sili ona lafulafuā i le fanua atoa o lou togāolive.

22 Ma sa fetalai atu le Alii o le togāolive ia te ia: Aua e te faatonu mai ia te a’u; sa ou iloa lava o se vaega lafulafuā lenei o le eleele; o le mea lea, na ou fai atu ai ia te oe, na ou tausia ai i lenei taimi umi lava, ma ua e vaai ua fua mai ai ni fua e tele.

23 Ma sa oo ina fetalai atu le Alii o le togāolive i lana auauna: Tagai iinei; faauta, sa ou totoina ai foi se isi lālā o le laau; ma ua e iloa ua sili atu ona lafulafuā o lenei fasi eleele nai lo le muamua. Ae, faauta i le laau. Sa ou tausia i lenei taimi umi, ma ua fua mai ai ni fua e tele; o lea, ia tau mai, ma teu auā le isi vaitau, ina ia mafai ona ou faasaoina mo a’u lava.

24 Ma sa oo ina toe fetalai atu le Alii o le togāolive i lana auauna: Tagai mai iinei, ma silasila i le isi foi lālā, na ou totoina; faauta sa ou tausia foi, ma ua fua mai ai ni fua.

25 Ma sa fetalai atu o ia i le auauna: Tagai mai iinei ma silasila i le lālā mulimuli. Faauta, sa ou totoina lenei lala i se fasi eleele lelei; ma sa ou tausia i lenei taimi umi, ae ua nao se vaega o le laau ua fua mai i fua olive fanua, ae o le isi vaega o le laau ua fua mai i fua olive vao; faauta, sa ou tausia lenei laau e pei lava o isi laau.

26 Ma sa oo ina fetalai atu le Alii o le togāolive i le auauna: Ia fa’i ese lālā ua lē fua mai ai ni fua lelei, ma lafoaiina i le afi.

27 Ae faauta, ua fai mai le auauna ia te ia: Ia ta teuina, ma eli faataamilo ai, ma tausi mo sina taimi umi laitiiti atu, ina atonu e mafai ona fua mai ai ni fua lelei mo oe, e mafai ona e teuina auā le tau.

28 Ma sa oo ina tausi e le Alii o le togāolive ma le auauna a le Alii o le togāolive fua uma o le togāolive.

29 Ma sa oo ina mavae atu se taimi umi lava, ona fetalai atu lea o le Alii o le togāolive i lana auauna: Sau ia, ta o ifo i le togāolive, ina ia mafai ona ta toe galulue i le togāolive. Auā faauta, ua lata mai le taimi, ma ua lata ona oo mai o le iuga; o le mea lea, e ao ina ou teuina ai ni fua mo a’u lava, auā le isi vaitau.

30 Ma sa oo ina o ifo le Alii o le togāolive ma le auauna i lalo i le togāolive; ma la o atu i le laau sa fa’i ese ona lālā moni, ae sulu i ai i totonu lālā o le olive vao; ma faauta, ua fetiitii le laau i fua eseese uma.

31 Ma sa oo ina tofo e le Alii o le togāolive ia fua, o fua eseese taitasi e tusa ma lona aofai. Ma sa fetalai le Alii o le togāolive: Faauta, sa ta tausia lenei laau i lenei taimi umi, ma ua ou teuina mo a’u lava fua e tele auā le isi vaitau.

32 Ae faauta, o le taimi nei ua fua mai ai fua e tele, ae ua leai se fua e tasi ua lelei. Ma faauta, ua i ai ituaiga uma o fua leaga eseese; ma ua leai se aoga ia te a’u, e ui ia ta galuega uma; ma o lenei ua ou faanoanoa ne’i ma’umau atu lenei laau mai ia te a’u.

33 Ma sa fetalai atu le Alii o le togāolive i le auauna: O se a se mea ta te faia i le laau, ina ia mafai ona ou toe faasao ni ona fua lelei mo a’u lava?

34 Ma sa fai mai le auauna i lona matai: Faauta, ona sa e sulu i ai i totonu lālā o le laau olive vao, ua latou fafagaina a’a, ua ola ai i latou ma ua lē mamate ai; o le mea lea ua e silasila atu ai ua lelei pea i latou.

35 Ma sa oo ina fetalai atu le Alii o le togāolive i lana auauna: Ua leai se aoga o le laau ia te a’u, ma ua leai foi se aoga o ona a’a ia te a’u pe afai o le a fua mai ai pea fua leaga.

36 Ae ui i lea, ua ou iloa o loo lelei pea a’a, ma ua ou faasaoina i latou mo lo’u lava faamoemoe; ma ona o lo latou malolosi tele sa latou fua mai ai e oo mai i le taimi nei ni fua lelei, mai lālā o le olive vao.

37 Ae faauta, ua tutupu tetele lālā olive vao ma ua malolosi tele atu nai lo o ona a’a; ma ona ua manumalo lālā olive vao i ona a’a o lea ua fua mai ai i fua leaga e tele; ma ona ua fua mai ai fua leaga e tele naua ua e vaai atu ua amata ona mate; ma o le a vave ona matua, ma lafo ai i le afi, vaganā ua ta faia se mea i le laau e faasao ai.

38 Ma sa oo ina fetalai atu le Alii o le togāolive i lana auauna: Ta o i lalo i vaega aupito maualalalo o le togāolive, ma vaai pe ua fua mai foi e lālā moni fua leaga.

39 Ma sa oo ina la o ifo i vaega aupito maualalalo o le togāolive. Ma sa oo ina la silasila atu ua leaga foi fua o lālā moni; ioe, le lālā muamua ma le lona lua faapea foi ma le mulimuli; ma ua leaga uma i latou.

40 Ma o fua olive vao o le lālā mulimuli ua manumalo i le vaega lena o le laau sa fua mai ai fua lelei, ua oo lava ina mamae ai le lala ma pe.

41 Ma sa oo ina tutulu le Alii o le togāolive, ma fetalai atu i le auauna: O le a se isi mea sa tatau ona ou faia mo lo’u togāolive?

42 Faauta, na ou iloa o fua uma o le togāolive, vagana ai nei fua, ua leaga. Ae o lenei, o lālā nei sa fua muamua mai ai fua lelei, ua leaga foi; ma o lenei ua le aoga uma laau o lo’u togāolive vaganā ai le taina i lalo ma lafoina i le afi.

43 Ma faauta i le laau mulimuli lenei, lea ua mamae lona lālā, sa ou totoina i se fasi eleele lelei; ioe, o se fasi eleele sa sili atu ona lelei ia te a’u nai lo isi vaega uma o le fanua o lo’u togāolive.

44 Ma sa e tagai foi sa ou tatuuina i lalo laau sa tumu ai lenei fasi eleele, ina ia mafai ona ou totoina ai o lenei laau i le mea sa i ai.

45 Ma ua e tagai o se tasi o lona vaega ua fua mai i fua lelei, ae o se isi o lona vaega ua fua mai i fua olive vao; ma ona sa ou le fa’iesea ona lālā leaga ma lafo i latou i le afi, faauta, ua manumalo i latou i le lālā lelei ua mamae ai.

46 Ma o lenei, faauta, e ui i tausiga uma sa ta faia i lo’u togāolive, ua leaga ona laau, ua latou le fua mai i ni fua lelei; ma o laau nei sa ou faamoemoe e faasaoina, ina ia teu ni o latou fua mo a’u lava, auā le isi vaitau Ae faauta, ua avea i latou e pei o le laau o le olive vao, ma ua leai so latou aoga ae na o le tatuu i lalo ma lafo i le afi; ma ou te faanoanoa ona o le a ma’umau atu i latou mai ia te a’u.

47 Ae o le a ea se isi mea sili atu sa tatau ona ou faia i lo’u togāolive? Pe sa ou faaitiitia ea lo’u taumafai, sa ou lē tausia ai? E leai, sa ou tausia, ma sa ou eli faataamilo ai, ma ou teuina, ma ou faasalalau i ai otaota o manu; ma sa ou faaloaloa atu i ai lo’u lima e toetoe o le aso atoa, ma ua latalata mai le iuga. Ma ua ou faanoanoa o le a tatau ona ou tatuu i lalo laau uma o lo’u togāolive, ma lafo i latou i le afi ina ia susunuina ai. O ai ea le ua ia faaleaga i lo’u togāolive?

48 Ma sa oo ina fai mai le auauna i lona matai: Pe lē o le maualuga ea o lou togāolive—pe ona ua lē manumalo ea lālā i a’a ua lelei? Ma ona ua manumalo lālā i o latou a’a, faauta ua vave tele atu lo latou tutupu nai lo le malolosi o a’a, ua tauave le malosi ia i latou lava. Faauta, ou te fai atu, pe lē o le pogai ea lenei ua faaleagaina ai laau o lou togāolive?

49 Ma sa oo ina fetalai atu le Alii o le togāolive i le auauna: Ta o atu ma tatuu i lalo laau o le togāolive ma lafo i latou i le afi, ina ia latou lē faagaogaosā ai le fanua o lo’u togāolive, ona ua uma ona ou faia o mea uma. O le a se isi mea sili atu sa tatau ona ou faia mo lo’u togāolive?

50 Ae faauta, sa fai mai le auauna a le Alii o le togāolive: Ia faasaosao pea mo sina taimi umiumi atu.

51 Ona fetalai mai lea o le Alii: Ioe, o le a ou faasaosaoina mo sina taimi umiumi atu, ona ou te faanoanoa ne’i ma’umau atu mai ia te a’u laau o lo’u togāolive.

52 O le mea lea, ia ta ave ni lālā mai nei lālā sa ou totoina i vaega aupito mamao o lo’u togāolive, ma ia ta suluina i latou i totonu o le laau na aumai ai i latou; ma ia ta fa’i ese mai le laau lālā na ua sili atu ona oona o latou fua, ae sulu i totonu lālā moni o le laau i le mea sa i ai.

53 Ma o le a ou faia lenei mea ina ia lē mate le laau, ina atonu e mafai ai ona ou faasaoina mo a’u lava ona a’a mo lo’u lava faamoemoe.

54 Ma, faauta, o a’a o lālā moni o le laau sa ou totoina i soo se mea na ou loto i ai, o loo ola pea; o le mea lea, ina ia mafai ona ou faasaoina i latou mo lo’u lava faamoemoe, o le a ou ave ai ni isi o lālā o le laau lenei, ma o le a ou suluina i totonu o i latou. Ioe, o le a ou suluina i totonu o i latou lālā o lo latou mua’i laau, ina ia mafai ona ou faasaoina foi o a’a mo a’u lava, a oo ai ina lava lo latou malolosi, atonu o le a latou fua mai ni fua lelei mo a’u, ma oo ina mafai ona ou maua ai o le olioli i fua o lo’u togāolive.

55 Ma sa oo ina la ave ni lala mai le laau moni ua liu laau vao, ma sulu i totonu o laau moni, ia ua liu laau vao foi.

56 Ma sa la ave foi ni lala o laau moni ua liu laau vao, ma sulu i totonu o lo latou mua’i laau.

57 Ma sa fetalai atu le Alii o le togāolive i le auauna: Aua le fa’iesea lālāvao mai laau, tau o latou ua sili ona oona; ma ia e sulu i ai i totonu o i latou e tusa ma le mea na ou fai atu ai.

58 Ma o le a ta toe tausia laau o le togāolive, ma o le a ta teuina o latou lālā; ma o le a ta fa’i ese mai laau lālā ua matutua, ia o le a mamate, ma lafo i latou i le afi.

59 Ma ou te faia lenei mea, atonu e maua ai e o latou a’a le malosi ona o lo latou lelei; ma ona o le suiga o lālā, ia mafai ona manumalo ai o le lelei i le leaga.

60 Ma ona sa ou faasaoina lālā moni ma o latou a’a, ma ua ou toe suluina i totonu lālā moni i lo latou mua’i laau, ma ou faasaoina a’a o lo latou mua’i laau, ina atonu o le a mafai ona toe fua mai ai e laau o lo’u togāolive fua lelei; ma ina ia mafai ona ou toe maua ai o le olioli i fua o lo’u togāolive, ma, atonu e mafai ai ona ou olioli tele i lo’u faasaoina o a’a ma lālā o le fua muamua—

61 O le mea lea, ia e alu, ma valaaulia ni auauna, ina ia mafai ona tatou galulue i le togāolive ma le filigā ma lo tatou malosi, ina ia mafai ona tatou saunia le ala, ina ia mafai ona ou toe aumai ai le fua moni, le fua moni lea ua lelei ma silisili atu ona pele i lo isi fua uma.

62 O le mea lea, ia tatou o atu ma galulue ma lo tatou malosi i le taimi mulimuli lenei, auā faauta, ua lata mai le iuga, ma o le taimi mulimuli lenei o le a ou teuina ai lo’u togāolive.

63 Ia sulu lālā i totonu; amata i lālā mulimuli ina ia mafai ona muamua i latou, ma ina ia mafai ona mulimuli le muamua, ma eli faataamilomilo i laau, o laau matutua ma laau laiti, o le muamua ma le mulimuli; ma le mulimuli ma le muamua, ina ia mafai ona toe tausia uma i latou mo le taimi mulimuli.

64 O le mea lea, ia eli faataamilo ia te i latou, ma teu i latou, ma toe faasalalau tasi otaota o manu ia i latou, mo le taimi mulimuli, ona ua lata mai le iuga. Ma afai e tutupu mai nei lsulu mulimuli, ma fua mai ai le fua moni, ona outou saunia ai lea o le ala mo i latou, ina ia latou tutupu ae ai.

65 Ma a’o amata ona latou tutupu a’e ia outou aveese lālā e fua mai ai fua oona, e tusa ma le malolosi o lālā lelei ma lo latou tetele; ma ia outou lē aveeseina uma o latou lālā leaga i le taimi e tasi, ne’i malolosi tele atu o latou a’a i lālā ua sulu, ma mamate ai lālā ua sulu, ma ma’umau atu ai laau o lo’u togāolive mai ia te a’u.

66 Ona ou te faanoanoa ne’i ma’umau atu laau o lo’u togāolive mai ia te a’u; o le mea lea ia outou aveese ai lālā leaga e tusa ma le tutupu a’e o lālā lelei, ina ia tutusa le malolosi o a’a ma le tauluulu, sei oo ina manumalo le lelei i le leaga, ma tatuu i lalo lālā leaga ma lafo i le afi, ina ia latou lē faaotaotaina le fanua o lo’u togāolive; ma o le a faapea ona ou tafi ese ai o le leaga mai lo’u togāolive.

67 Ma o le a ou toe sulu lālā o le laau moni i totonu o le laau moni;

68 Ma o lālā o le laau moni o le a ou suluina i totonu o lālā moni o le laau; ma o le a faapea ona ou toe tuufaatasia o i latou, ina ia latou fua mai fua moni, ma o le a tasi i latou.

69 Ma o lālā leaga o le a lafo ese, ioe, i fafo lava o le fanua atoa o lo’u togāolive; aua faauta, o le toe taimi lenei e tasi o le a ou teuina ai lo’u togāolive.

70 Ma sa oo ina auina atu e le Alii o le togāolive lana auauna; ma sa alu atu le auauna ma faia e pei ona poloaiina ai o ia e le Alii, ma aumai e ia isi auauna; ma sa toaitiiti i latou.

71 Ma sa fetalai atu le Alii o le togāolive ia te i latou: O atu ia, ma galulue i le togāolive, ma lo outou malosi. Auā faauta, o le taimi mulimuli lenei o le a ou tausia ai lo’u togāolive; ona ua latalata mai le iuga, ma ua vave ona oo mai o le vaitau; ma afai tou te galulue ma lo outou malosi faatasi ma a’u o le a outou maua le olioli i le fua o le a ou teuina mo a’u lava auā ua vave ona oo mai le taimi.

72 Ma sa oo ina o atu auauna ma galulue ma lo latou malosi; ma sa galue foi le Alii o le togāolive faatasi ma i latou; ma sa latou usiusitai i poloaiga a le Alii o le togāolive i mea uma.

73 Ma sa amata ona toe i ai o fua moni i le togāolive; ma sa amata ona tutupu o lālā a moni ma lauolaola tele; ma sa amata ona fati ese o lālā vao ma lafo ese; ma sa latou tausia a’a ma o latou tauluulu ia tutusa, e tusa ma lo latou malolosi.

74 Ma sa faapea ona latou galulue, ma le filigā atoa, e tusa ma poloaiga a le Alii o le togāolive, seia oo lava ina uma ona lafo ese o lālā leaga i fafo mai le togāolive, ma ua faasaoina e le Alii mo ia lava, ua toe avea ai laau ma fua moni; ma sa avea i latou e peiseai o se tino e tasi; ma sa tutusa ia fua; ma ua faasaoina e le Alii o le togāolive mo ia lava le fua moni, sa sili ona pele ia te ia mai le amataga.

75 Ma sa oo ina ua silasila atu le Alii o le togāolive ua lelei lona fua, ma ua lē toe leaga lona togāolive, sa valaau atu o ia i ana auauna, ma fetalai atu ia te i latou: Faauta, sa tatou tausia mo le taimi mulimuli lenei lo’u togāolive; ma sa outou tagai sa ou faia e tusa ma lo’u loto; ma ua ou faasaoina le fua moni, ua lelei, e pei lava ona sa i ai i le amataga. Ma amuia outou ona talu ai sa outou filigā e galulue faatasi ma a’u i lo’u togāolive, ma tausi a’u poloaiga, ma toe aumai ia te a’u le fua moni, ma ua lē toe leaga lo’u togāolive, ma ua lafo ese le leaga, faauta, o le a outou maua le olioli faatasi ma a’u ona o le fua o lo’u togāolive.

76 Auā faauta, o le a ou teuina mo se taimi umi le fua o lo’u togāolive mo a’u lava auā le vaitau, lea ua vave ona oo mai; ma o le taimi mulimuli lenei ua ou tausia ai lo’u togāolive, ma teuina, ma eli faataamilo ai, ma faasalalau i ai otaota o manu; o le mea lea o le a ou teuina ai mo a’u lava ni ona fua, mo se taimi umi lava, e tusa ma le mea na ou tautala atu ai.

77 Ma a oo mai le taimi e toe oo mai ai lena fua leaga i lo’u togāolive, o le taimi lena o le a ou faia ai ia faaputuputu fua lelei ma fua leaga; ma o le fua lelei o le a ou faasaoina mo a’u lava, a’o le fua leaga o le a ou lafo ese i lona lava nofoaga. Ma ona oo mai ai lea o le vaitau ma le iuga; ma o lo’u togāolive o le a ou faia ia susunuina i le afi.