1 Nengeni, ami pwi, met ouse chechemeni pwe oua fen anneani ekkewe kapas an ewe soufos Sinos, minne i a apasa ngeni ewe imwen Israel, a apasa:

2 Ausening, O ami chon imwen Israel, me rongorong ekkewe kapas seniei, emon soufosun ewe Samon.

3 Pun nengeni, iei anon ewe Samon, upwe anonno kemi, O imwen Israel, oua usun efoch ira olif mi mwotuk, minne emon a angei me tumunu me non an we atake; iwe a marita, me chinnapeno, me poputa ne apwangapwangeno.

4 Iwe non ewe fansoun ewe mastan ewe atake a feino, iwe a kuna pwe fatan we ira olif a poputa ne apwangapwangeno; iwe a apasa: Upwene fichi panan, me tuu fetanei nepekin, me tumunu, pwe ita epwe tongeni appwukata panan mi kukkun me pwetete, me esap mano.

5 Iwe non ewe fansoun i a fichi panan, me tuu fetanei nepekin, me tumunu anongonong won an kapas.

6 Iwe non ewe fansoun mwirin chommong ran a poputa ne appwukata ekis, panan mi kukkun me pwetete; nge nengeni, unungen popunapan we a poputa ne mano.

7 Iwe non ewe fansoun ewe mastan ewe atake a kuna, iwe a apasa ngeni noun we chon angang: A enetipengawaei pwe epwe mano seniei ei ira; ina minne, feino me utti ekkewe panen ira seni efoch ira olif mi mwacho, me uweiareto ngeniei; iwe sipwe utti ekkewe popunapen panen ira minne ra poputa ne pwaseno, iwe sipwe aturarenong non ewe ekkei pwe repwe kareno.

8 Iwe nengeni, anon ewe Samonun ewe atake, upwe angeiano chommong me nein ekkei panan mi kukkun me pwetete, iwe upwe pacherenong won pwan efoch ira ian chok ua mochen; iwe ese namot ika pwe ewe waran ei ira epwe mano, upwene tongeni isoni foun iran kewe ngeniei pwisin; ina minne, upwe angei ekkei panan mi kukkun me pwetete, iwe upwe pacherenong won pwan efoch ira ian chok ua mochen.

9 Kopwe angei ekkewe panen ewe ira olif mi mwacho, me pacherenong won pwan efoch ira, non nenian we; iwe ekkei minne ua fen uttir upwe aturarenong non ewe ekkei me kenireno, pwe resap tongeni epipi puunun ai we atake.

10 Iwe non ewe fansoun ewe chon angangen ewe Samonun ewe atake a fori anongonong won kapasen ewe Samonun ewe atake, me pachenong ekkewe panen ewe ira olif mi mwacho.

11 Iwe ewe Samonun ewe atake a mutata pwe epwe tuu fetanei nepekin, me fichi panan, me tumunu, a apasa ngeni noun we chon angang: A enetipengawaei pwe epwene mano seniei ei ira; ina minne, pwe ita upwe isoni waran kewe pwe resap mano, pwe ita upwe isoni ir ngeniei pwisin, ua fen fori ei mettoch.

12 Ina minne, feino soposopono; attona ewe ira, me tumunu, anongonong won ai kewe kapas.

13 Iwe ekkei upwene wanong non epichikin kinikinin ai we atake, ian chok ua mochen, ese pwan auchea ngeniei; iwe ua fori pwe upwe tongeni isoni ngeniei pwisin ekkewe wesewesen panen ewe ira; iwe pwan, pwe upwe tongeni isonano foun iran kewe ngeni ewe fansoun mwirin ei, ngeniei pwisin; pun a enetipengawaei pwe epwene mano seniei ei ira me foun iran kewe.

14 Iwe non ewe fansoun ewe Samonun ewe atake a feino soposopono, me opano ekkewe wesewesen panen ewe ira olif mi mwotuk non epichikin kinikinin ewe atake, ekkoch non ew kinikin me ekkoch pwan non ew kinikin, anongonong won an mochen me met epwe fich ngeni netipan.

15 Iwe non ewe fansoun pwe a fansoun nangatam a wesino, iwe ewe Samonun ewe atake a apasa ngeni noun we chon angang: Feito, sipwene feitiw non ewe atake, pwe sipwene tongeni angang non ewe atake.

16 Iwe non ewe fansoun ewe Samonun ewe atake, me pwan ewe chon angang, ra feitiw ngeni ewe atake pwe repwene angang. Iwe non ewe fansoun ewe chon angang a apasa ngeni noun we masta: Nengeni, neto ikei; nengeni ewe ira.

17 Iwe non ewe fansoun ewe Samonun ewe atake a nengeni me kuna ewe ira non minne ekkewe panen ewe ira olif mi mwacho a fen kapachenong won; iwe a fen appwukata me poputa ne uwani foun ira. Iwe i a kuna pwe a och; iwe foun iran kewe ra usun chok ekkewe wesewesen foun ira.

18 Iwe a apasa ngeni ewe chon angang: Nengeni, ekkewe panen ewe ira mwacho ra kamwochuno chöchönun waran we, pwe waran we a awora pochokun mi watte; iwe pokiten ewe pochokun mi watte an waran we panan kewe mi mwacho ra uwani foun ira mi mwotuk. Iei, ika sise apachanong ekkei panan, ewe ira epwe fen mano. Iwe iei, nengeni, upwe isonano chommong foun ira, minne ewe ira a uwani; iwe foun iran kewe upwe isonano ngeni ewe fansoun mwirin ei, ngeniei pwisin.

19 Iwe non ewe fansoun ewe Samonun ewe atake a apasa ngeni ewe chon angang: Feito, sipwene no ngeni epichikin kinikinin ewe atake, iwe nengeni ika ekkewe wesewesen panen ewe ira rese pwan uwani chommong foun ira, pwe upwe tongeni isonano ekkewe foun iran ngeni ewe fansoun mwirin ei, ngeniei pwisin.

20 Iwe non ewe fansoun pwe ra feino ngeni ian ewe masta a opano ekkewe wesewesen panen ewe ira, iwe a apasa ngeni ewe chon angang: Nengeni ekkei; iwe a kuna ewe aewin pwe a uwani chommong foun ira; iwe a pwan kuna pwe mi och. Iwe a apasa ngeni ewe chon angang: Angei foun iran kewe, me isonano ngeni ewe fansoun mwirin ei, pwe upwe tongeni isoni ngeniei pwisin; pun nengeni, a apasa, ei fansoun nangatam ua fen tumunu, iwe a uwani chommong foun ira.

21 Iwe non ewe fansoun pwe ewe chon angang a apasa ngeni noun we masta: Pwata ka feito ikei pwe kopwe fotuki ei ira, are ei panen ewe ira? Pun nengeni, iei ewe neni mi ngaw nap seni meinisin me non unusen fonuen om we atake.

22 Iwe ewe Samonun ewe atake a apasa ngeni i: Kosap aurouraei; ua fen sinei pwe ina ewe neni me non ewe puun mi ngaw; ina minne, ua apasa ngonuk, ua fen tumunu non fansoun nangatam, iwe ka kuna pwe a uwani chommong foun ira.

23 Iwe non ewe fansoun ewe Samonun ewe atake a apasa ngeni noun we chon angang: Neto ikei; nengeni ua fen fotuki pwan efoch panen ewe ira; iwe ka sinei pwe ei neni me non ewe puun mi ngaw seni ewe aewin. Nge, nengeni ewe ira. Ua fen tumunu non ei fansoun nangatam, iwe a uwani chommong foun ira; iei minne, ionifengeni, me isonano ngeni ewe fansoun mwirin ei, pwe upwe tongeni isoni ngeniei pwisin.

24 Iwe non ewe fansoun pwe ewe Samonun ewe atake a apasa sefan ngeni noun we chon angang: Neto ikei, me nengeni pwan efoch panan, minne ua fen fotuki; nengeni pwe ua fen pwan tumunu, iwe a uwani foun ira.

25 Iwe a apasa ngeni ewe chon angang: Neto ikei me nengeni ewe amuchunon. Nengeni, ei ua fen fotuki non ew neni non ewe puun mi och; iwe uwa fen tumunu non fansoun nangatam, iwe ew chok kinikinin ewe ira a uwani foun ira mi mwotuk, me ewe pwan ew kinikinin ewe ira a uwani foun ira mi mwacho; nengeni, ua fen tumunu ei ira usun chok ekkewe ekkoch.

26 Iwe non ewe fansoun ewe Samonun ewe atake a apasa ngeni ewe chon angang: Uttau ekkewe panan rese uwani foun ira mi och, me oturarenong non ewe ekkei.

27 Nge nengeni, ewe chon angang a apasa ngeni i: Sipwene fichi panan kewe, me tuu fetan nepekin, me tumunu ren pwan ekis fansoun, pwe ita epwe tongeni uwani foun ira mi öch ngonuk, pwe kopwe tongeni isonano ngeni ewe fansoun mwirin ei.

28 Iwe non ewe fansoun ewe Samonun ewe atake me ewe chon angangen ewe Samonun ewe atake ra tumunu meinisin ekkewe foun iran ewe atake.

29 Iwe non ewe fansoun a fansoun nangatam a fen wesino, iwe ewe Samonun ewe atake a apasa ngeni noun we chon angang: Feito, sipwene feitiw ngeni ewe atake, pwe sipwene tongeni angang sefan non ewe atake. Pun nengeni, ewe fansoun a arapeto, me nesoponon a mwitir feito; ina minne, upwe isonano foun ira ngeni ewe fansoun mwirin ei, ngeniei pwisin.

30 Iwe non ewe fansoun ewe Samonun ewe atake me ewe chon angang ra feitiw ngeni ewe atake; iwe ra feito ngeni ewe ira minne wesewesen panan kewe ra pokupokuno, iwe ekkewe panan mi mwacho ra fen kapachenong non ekkewe panan mi mwacho ra fen kapachenong non ei ira; iwe nengeni sokopaten foun ira meinisin ra achouatiw ewe ira.

31 Iwe non ewe fansoun ewe Samonun ewe atake a neni ewe foun ira, ew me ew sokkun anongonong won nampan. Iwe ewe Samonun ewe atake a apasa: Nengeni, ei fansoun nangatam sia fen tumunu ei ira, iwe ua fen isonano ngeniei pwisin chommong foun ira ngeni ewe fansoun mwirin ei.

32 Nge nengeni, non ei fansoun a fen uwani chommong foun ira, iwe ese wor efou minne a och. Iwe nengeni, a wor sokkun meinisin foun ira mi ngaw; iwe ese atufichiei, inamo ren unusen ach angang; iwe iei a enetipengawaei pwe epwene mano seniei ei ira.

33 Iwe ewe Samonun ewe atake a apasa ngeni ewe chon angang: Met sipwe fori ngeni ewe ira, pwe upwe tongeni isoni sefan foun iran kewe mi öch ngeniei pwisin?

34 Iwe ewe chon angang a apasa ngeni noun we masta: Nengeni, pokiten ka fen pacherenong ekkewe panen ewe ira olif mi mwacho ra tumunu waran kewe, pwe ra manau me rese mano; ina minne ka kuna pwe ir mi chiwen och.

35 Iwe non ewe fansoun ewe Samonun ewe atake a apasa ngeni noun we chon angang: Ewe ira ese atufichiei, iwe waran kewe rese atufichiei non fansoun an uwani foun ira mi ngaw.

36 Nge inamo, ngang mi sinei pwe waran kewe mi och, iwe ren pwisin ai popun ua fen isonir; iwe pokiten ar pochokun mi watte ra fen uwa tori ei fansoun, seni ekkewe panan mi mwacho, foun ira mi och.

37 Nge nengeni, ekkewe panan mi mwacho ra fen marita me ra fen apwangapwangano waran kewe; iwe pokiten ekkewe panan mi mwacho ra fen akkufu waran kewe a uwani chommong foun ira mi ngaw; iwe pokiten a fen uwani chommong foun ira mi ngaw ka kuna pwe a poputa ne mano; iwe epwene mwitir an esap chiwen uwaoch, pwe epwene katurunong non ewe ekkei, tiwenon chok ika sipwe fori och mettoch fan itan ach sipwe isoni.

38 Iwe non ewe fansoun ewe Samonun ewe atake a apasa ngeni noun we chon angang: Sipwene feitiw ngeni epichikin kinikinin ewe atake, me nengeni ika wesewesen panan kewe ra pwan uwani foun ira mi ngaw.

39 Iwe non ewe fansoun ra feitiw ngeni epichikin kinikinin ewe atake. Iwe non ewe fansoun ra kuna pwe foun iran wesewesen panan kewe ra pwan ngaw; ewer, iwe ewe aewin me ewe aruwan me pwan ewe amuchunon; iwe ir meinisin ra ngaw.

40 Iwe ewe foun iran ewe amuchunon mi mwacho a akkufu ena kinikinin ewe ira minne a uwani foun ira mi och, pwan mwo ewe panan a pwaseno me mano.

41 Iwe non ewe fansoun ewe Samonun ewe atake a kechiw, iwe a apasa ngeni ewe chon angang: Met ita upwe pwan fen fori ngeni ai we atake?

42 Nengeni, ua fen sinei pwe ekkewe foun iran ewe atake meinisin, tiwenon chok ekkei, ra fen ngaweno. Iwe iei ekkei minne ra fen akkom uwani foun ira mi öch ra pwan ngaweno; iwe iei meinisin ekkewe iran ai we atake ra namotongaw tiwenon chok pwe repwene pokupokutiw me katurunong non ewe ekkei.

43 Iwe nengeni ei amuchunon, panan kewe ra pwaseno, ua fotuki non ew neni mi öch non ewe puun; ewer, pwan mwo ewe minne mi finita ngeniei me nein meinisin ekkewe pwan ekkoch kinikinin ewe fonuen ai we atake.

44 Iwe ka kuna pwe ua pwan pokuetiw ewe minne a epipi ei neni non ewe puun, pwe upwe fotuki ei ira non nenian we.

45 Iwe ka kuna pwe ekis kinikinin we a uwani foun ira mi och, iwe ekis kinikinin we a uwani foun ira mi mwacho; iwe pokiten use utti panan kewe me oturarenong non ewe ekkei, nengeni, ra fen akkufu ewe panan mi öch ina pwata a pwaseno.

46 Iwe iei, nengeni, me nukun ekkewe tumun meinisin minne kich sia tumunu ngeni ai we atake, iran kewe ra ngaweno, pwe rese uwani foun ira mi och; iwe ekkei ua apinukunukur pwe upwe isoni ir, pwe upwe isonano foun iran kewe ngeni ewe fansoun mwirin ei, ngeniei pwisin. Nge, nengeni, ra fen winiti usun chok ewe ira olif mi mwacho, iwe ese chiwen wor namoter nge repwene pokupokutiw me katurunong non ewe ekkei; iwe a enetipengawaei pwe repwene mano seniei.

47 Nge met ita upwe pwan fen fori non ai we atake? Met ua fen aukatiw pei, pwe use chiwen tumunu? Apw, ua fen tumunu, me ua fen tuu fetanei nepekin, me ua fen fichi panan kewe, me ua fen koiasini; me ua fen aitieu pei arap ngeni unusen ewe ran, iwe nesoponon a arapeto. Iwe a enetipengawaei pwe upwene pokuetiw ekkewe iran ai we atake meinisin, me aturarenong non ewe ekkei pwe repwe kareno. Ion ewe a angawano ai we atake?

48 Iwe non ewe fansoun ewe chon angang a apasa ngeni noun we masta: Esap ewe eingeingen om atake—esap panan kewe ra fen akkufu waran kewe minne mi och? Iwe pokiten ekkewe panan ra fen akkufu waran kewe, nengeni ra mwitir mar nap seni pochokunen ekkewe waran, ra pwisin angei ngeni ir pochokun. Nengeni, ua apasa, esap iei ewe popun minne ekkewe iran om we atake ra fen ngaweno?

49 Iwe non ewe fansoun ewe Samonun ewe atake a apasa ngeni ewe chon angang: Sipwene feino ngeni me pokuetiw ekkewe iran ewe atake me aturarenong non ewe ekkei, pwe resap chiwen epipi ewe puunun ai we atake, pun ua fen fori mettoch meinisin. Met ita upwe pwan fen fori ngeni ai we atake?

50 Nge, nengeni, ewe chon angang a apasa ngeni ewe Samonun ewe atake: Witi ekiseno chok mwo om kopwe atai.

51 Iwe ewe Samon a apasa: Ewer, upwe witi ekiseno chok mwo ai upwe atai, pun a enetipengawaei pwe epwe mano seniei ekkewe iran ai we atake.

52 Ina minne, sipwene angei ekkoch panen ekkei minne ua fen fotuki non epichikin kinikinin ai we atake, iwe sipwene pacherenong non ewe ira seni ian ra feito seni; iwe sipwene utti seni ewe ira ekkewe panan minne foun iran a fokkun kipwin, me pachenong ekkewe wesewesen panen ewe ira epwe nenieni nenian we.

53 Iwe ei upwe fori pwe ewe ira esap mano, pwe, ita, upwe tongeni isoni ngeniei waran kewe ren pwisin ai popun.

54 Iwe, nengeni, waran ekkewe wesewesen panen ewe ira minne ua fotuki ian chok ua mochen ir mi chok manau; ina minne, pwe upwe pwan isoni ir ren pwisin ai popun, upwe angei ekkoch panen ei ira, iwe upwe pacherenong non ir. Ewer, upwe pachenong non ir ekkewe panen iner we ira, pwe upwe pwan isoni waran kewe ngeniei, pwe nupwen epwe naf ar pochokun pwe ita repwe tongeni uwani foun ira mi öch ngeniei, iwe epwe tongeni chiwen wor ai pwapwa pokiten ekkewe foun iran ai we atake.

55 Iwe non ewe fansoun ra angei seni ewe wesewesen ira minne a winiti mi mwacho, me pacherenong non ekkewe wesewesen ira, minne ra pwan mwacho.

56 Iwe ra pwan angei seni ekkewe wesewesen ira minne ra mwachono, me pacherenong non iner we ira.

57 Iwe ewe Samonun ewe atake a apasa ngeni ewe chon angang: Kosap utti ekkewe panan mi mwacho seni ekkewe ira, tiwenon chok ekkewe ra fokkun kipwin; iwe non ir kopwe pachenong panan anongonong won minne ua fen apasa.

58 Iwe sipwe tumunu sefan ekkewe iran ewe atake, iwe sipwe fichi panan kewe; iwe sipwe uttut seni ekkewe ira ekkewe panan minne resap chiwen uwaoch, ekkewe repwene mano, me aturarenong non ewe ekkei.

59 Iwe ei ua fori pwe, ita, waran kewe repwe tongeni pochokununo pokiten ochur we; iwe pokiten a siwin ekkewe panan, pwe ewe mi öch epwe tongeni akkufu ewe mi ngaw.

60 Iwe pokiten ua fen isoni wesewesen panan kewe me waran kewe, me ua fen pachenong wesewesen panan kewe sefan non iner we ira, me ua fen isoni waran iner we ira, pwe, ita, ekkewe iran ai we atake repwe tongeni uwani sefan foun ira mi och; me ita upwe tongeni pwapwa sefan pokiten foun iran ai we atake, me, ita, upwe tongeni fokkun pwapwa pwe ua fen isoni waran me panan ewe aewin foun ira—

61 Ina minne, feino ngeni, me kokko chon angang, pwe sipwe tongeni achocho ne angang ren ach pochokun non ewe atake, pwe sipwe tongeni amonnata ewe tufich, pwe upwe tongeni uwani sefan ewe wesewesen foun ira, ewe wesewesen foun ira mi öch me ewe a fokkun auchea nap seni ekkoch foun ira meinisin.

62 Ina minne, sipwene feino ngeni me angang ren ach pochokun non ei amuchunon fansoun, pun nengeni ewe nesoponon a arapeto, iwe a iei ewe amuchunon fansoun pwe upwene fichi panen ekkewe iran ai we atake.

63 Pachenong ekkewe panan; poputa ren ewe amuchunon pwe repwe akkom, iwe pwe ewe aewin epwe ewe amuchunon, iwe tuu fetan nepekin ekkewe ira, ekkewe minen nom me ekkewe mi chok kukkun, ewe aewin me ewe amuchunon; iwe ewe amuchunon me ewe aewin, pwe meinisin repwe pwan tumun sefan ren ew amuchunon fansoun.

64 Ina minne, tuu fetanei nepekir, me fichi ir, me koiasinir pwan ew fansoun, ren ew amuchunon fansoun, pun ewe nesoponon a arapeto. Iwe ika pwe ekkei amuchunon ra fen kapachenong pwan non efoch ira iwe repwe mar, me uwani ekkewe wesewesen foun ira, iwe oupwe amonnata ewe tufich fan iter, pwe repwe tongeni mar.

65 Iwe nupwen ra poputa ne mar kopwe wasano ekkewe panan minne a uwani foun ira mi kipwin, anongonong won pochokunen ewe mi öch me nënnën we; iwe kosap wasano unusen ngawan we non ew chok fansoun, pokiten ua nuokus ika waran kewe ra kon pochokun nap seni ewe panan mi kapachenong, iwe ewe panan mi kapachenong epwe mano, iwe epwe mano seniei ekkewe iran ai we atake.

66 Pun a enetipengawaei pwe epwene mano seniei ekkewe iran ai we atake; ina minne kopwe wasano ekkewe mi ngaw anongonong won maritan ekkewe mi och, pwe ewe waran me unungan repwe nonno non pochokun, tori an ewe mi öch epwe akkufu ewe mi ngaw, iwe ewe mi ngaw epwe pokupokutiw me katurunong non ewe ekkei, iwe resap epipi puunun ai we atake; iwe iei upwe pirumweno ekkewe mi ngaw seni ai we atake.

67 Iwe ekkewe panen ewe wesewesen ira upwe pachenong sefan non ewe wesewesen ira;

68 Iwe ekkewe panen ewe wesewesen ira upwe pachenong non ekkewe wesewesen panen ewe ira; iwe iei upwe uweifengeni ir sefan, pwe repwe uwani ekkewe wesewesen foun ira, iwe repwe chok ew.

69 Iwe ewe mi ngaw epwe katuruno, ewer, pwan mwo seni unusen ewe fonuen ai we atake; pun nengeni, non ei ew chok fansoun upwe fichi panen iran ai we atake.

70 Iwe non ewe fansoun ewe Samonun ewe atake a tinano noun we chon angang; iwe ewe chon angang a feino me fori usun met ewe Samon a annuku ngeni, me a uweiato pwan ekkoch chon angang; iwe ir mi chok chokukkun.

71 Iwe ewe Samonun ewe atake a apasa ngeni ir: Feino ngeni, me angang non ewe atake, ren ami pochokun. Pun nengeni, iei ewe amuchunon fansoun pwe upwene tumunu ai we atake; pun ewe nesoponon epwene fis, iwe ewe fansoun mwirin ei epwe mwitir feito; iwe ika oua angang ren ami pochokun rei epwe wor ami pwapwa non ekkewe foun ira minne upwe isonano ngeniei ngeni ewe fansoun minne epwe mwitir feito.

72 Iwe non ewe fansoun ekkewe chon angang ra feino me angang ren ar pochokun; iwe ewe Samonun ewe atake a pwan angang rer; iwe ra aneasochisi ekkewe annuk an ewe Samonun ewe atake non mettoch meinisin.

73 Iwe a poputa ne wor sefan ekkewe wesewesen foun ira non ewe atake; iwe ekkewe wesewesen panan ra poputa me mar me fokkun watteno; iwe ekkewe panan mi mwacho ra poputa ne uttutuno me ra katuruno; ra tumunu waran me unungan we pwe repwe nonnofengen, anongonong won pochokunan we.

74 Iwe iei ra angang, ren unusen ar achocho, anongonong won ekkewe annukun ewe Samonun ewe atake, pwan mwo tori ekkewe panan mi ngaw ra katuruu seni ewe atake, iwe ewe Samon a isoni ngeni pwisin i pwe ekkewe ira ra pwan uwa sefani ekkewe wesewesen foun ira; iwe ra pwan winiti usun chok efoch ira; iwe ekkewe foun ira ra nonnofengen; iwe ewe Samonun ewe atake a isoni ngeni pwisin i ekkewe wesewesen foun ira, minne ra unusen auchea ngeni i seni nepoputan.

75 Iwe non ewe fansoun nupwen ewe Samonun ewe atake a kuna pwe an kewe foun ira ra och, me an we atake ese chiwen ngaw, a kokkori noun kewe chon angang, me a apasa ngeni ir: Nengeni, ren ei amuchunon fansoun sia fen tumunu ai we atake; iwe oua kuna pwe ua fen fori anongonong won ai mochen; iwe upwe isoni ekkewe wesewesen foun ira, pwe mi och, pwan mwo usun chok non ewe nepoputan. Iwe oua feioch; pokiten oua fen achocho ne angang rei non ai we atake, me oua fen aneasochisi ai kewe annuk, me oua fen uweiato sefan ngeniei ekkewe wesewesen foun ira, pwe ai we atake ese chiwen ngaw, iwe ekkewe mi ngaw ra katuruno, nengeni epwe wor ami pwapwa rei pokiten ekkewe foun iran ai we atake.

76 Pun nengeni, ren ew fansoun nangatam upwene isonano foun iran ai we atake ngeniei pwisin ngeni ewe fansoun mwirin ei, minne epwe mwitir feito; iwe ren ewe amuchunon fansoun ua fen tumunu ai we atake, me fichi paner, me tuu fetanei nepekin, me koiasini; ina minne ua isonano ngeniei pwisin ekkewe foun ira, non ew fansoun nangatam, anongonong won met ua fen apasa.

77 Iwe nupwen ewe fansoun a feito pwe ekkewe foun ira mi ngaw repwe feito sefan non ai we atake, non ena fansoun upwe fori pwe ekkewe mi öch me ekkewe mi ngaw pwe repwe ioifengen; iwe ekkewe mi öch upwene isoni ngeniei, me ekkewe mi ngaw upwene aturano ngeni pwisin nenian. Iwe mwirin a feito ewe fansoun mwirin ei me ewe nesoponon; iwe ai we atake upwene fori pwe epwene kareno ren ekkei.