1 Ma o lenei, faauta, o’u uso e, e pei ona ou fai atu ia te outou o le a ou vavalo atu, faauta, o la’u valoaga lenei—o mea na fetalai mai ai lenei perofeta o Senosa, e uiga i le aiga o Isaraelu, lea na ia faatusaina ai i latou i se laau olive fanua, o le a faataunuuina lava.

2 Ma o le aso o le a toe saunia ai e ia lona aao i le taimi lona lua e toe aumai ona tagata, o le aso lea, ioe, o le toe taimi lava lea, o le a o atu ai auauna a le Alii i lona mana, e tausi ma teu lona togāolive; ma a mavae lena ona lata lea ona oo mai o le iuga.

3 Ma amuia lava i latou o e sa galulue ma le filigā i lona togāolive; ma le fetuuina lava o i latou o e o le a tutuli ese atu i lo latou lava nofoaga! Ma o le a susunuina le lalolagi i le afi.

4 Ma ua alofa mutimutivale lava lo tatou Atua ia te i tatou, ona e manatua e ia le aiga o Isaraelu, o a’a atoa ma lālā; ma ua faaloaloa mai ona aao ia te i latou i le aso atoa; ma o i latou o ni tagata ua maaa ma faatautee; ae o le toatele o i latou o e e lē faamaaaina o latou loto o le a faaolaina i le malo o le Atua.

5 O le mea lea, o’u uso pele e, ou te aioi atu ia te outou i upu o le mamalu ina ia outou salamo, ma o mai ma le faamoemoe atoa o le loto, ma pipii atu i le Atua e pei ona ia pipii mai ia te outou. Ma a’o faaloaloa mai lona aao o le alofa tunoa ia te outou i le malamalama o le ao, aua le faamaaaina o outou loto.

6 Ioe, i le asō, afai tou te lagona mai lona siufofoga, aua le faamaaaina o outou loto; ona aisea o le a filifili ai e oti outou?

7 Auā faauta, ina ua uma ona fafagaina o outou i le aso atoa i le afioga poto a le Atua, pe tou te fua mai ea ni fua leaga, o le a tatau ai ona tatuu outou i lalo ma lafo i le afi?

8 Faauta, tou te teena ea nei upu? Tou te teena ea upu a perofeta; ma tou te teena ea upu uma ua tautalagia e uiga ia Keriso, ina ua mavae ona tautatala mai o le toatele e uiga ia te ia; ma tetee le afioga poto a Keriso, ma le mana o le Atua, ma le meaalofa a le Agaga Paia, ma tinei le Agaga Paia, ma fai ma tauemuga le fuafuaga tele o le togiola, ua uma ona faataoto mo outou?

9 Tou te lē iloa ea afai tou te faia nei mea, o le a aumai outou e le mana o le togiola ma le toetu, o ia Keriso, ia outou tutū i le maasiasi ma le nofosala matautia i luma o le pa faamasino a le Atua?

10 Ma e tusa ma le mana o le faamasinotonu, ona e lē mafai ona faafitia o le faamasinotonu, o le a outou o ese atu ai i lena lepa afi ma le teiō, lea e lē matineia ona apeafi, ma o lona asu e alu a’e pea i luga e faavavau faavavau lava, o le lepa afi ma le teiō lea o le mafatia e lē gata.

11 E, o lea la, o’u uso pele e, ia outou salamo, ma ia outou ulu atu i le faitotoa vaapiapi, ma tutumau pea i le ala ua lauitiiti, seia oo ina outou maua le ola e faavavau.

12 E, ia outou atamamai! O le a se isi mea e mafai ona ou fai atu ai?

13 Mulimuli lava, ou te faasoifua atu ia te outou, seia ou toe feiloai ma outou i luma o le pa faamasino faamalieina a le Atua, o le pa faamasino lea e taia ai lē ua amioleaga i le mata’u ma le fefe matautia. Amene.