1 Iwe iei, nengeni, ami pwi, usun ua apasa ngenikemi pwe upwe osini, nengeni, iei ai osini—pwe ekkewe mettoch minne ei soufos Sinos a apasa, usun ewe imwen Israel, non minne i epwe awewer ngeni efoch ira olif mi mwotuk, epwe fokkun ennetin fisino.

2 Iwe ewe ran minne i epwe poputa angang sefan atun ewe aruwen fansoun pwe epwe aniwinato noun kewe aramas, ina ewe ran, ewer, pwan mwo ewe fansoun soponon, pwe ekkewe chon angangen ewe Samon repwe feino non an manaman, pwe repwe tumunu me fichi panen iran an we atake; iwe mwirin ena ewe nesoponon epwe mwitir feito.

3 Iwe ifa ukukun feiochun ekkewe ra fen achocho ne angang non an we atake; me ifa ukukun anumamauen ekkewe repwe katuruu ngeni pwisin nenier! Iwe ewe fonufan epwe kareno ren ekkei.

4 Iwe ifa ukukun umoumochun ach we Kot ngenikich, pun i a chechemeni ewe imwen Israel, ir me ru waran kewe me panan kewe; iwe a aitieu poun ngeni ir unusen ewe ran; iwe ra ew aramas mi nukumach me afitikoko; nge meinisin resap apochokunano netiper repwe manau non ewe muun Kot.

5 Ina minne, pwi achengicheng, ua tingor ngenikemi non kapas mi fatafatoch pwe oupwe aier, me feito ren unusen netip, me nukuchar ngeni Kot usun an nukuchar ngenikemi. Iwe nupwen poun mi umoumoch a aitieu ngenikemi non saramen ewe ran, ousap apochokunano netipemi.

6 Ewer, ikenai, ika oupwe rongorong mongungun, ousap apochokunano netipemi; pun pwata oupwe mano non ngun?

7 Pun nengeni, mwirin oua fen tumun me ren ewe kapas mi öch an Kot non unusen ewe ran, oupwe uwani foun ira mi ngaw, pwe oupwe pokupokutiw me katurunong non ewe ekkei?

8 Nengeni, oupwe poutano ekkei kapas? Oupwe poutano ekkewe kapasen ekkewe soufos; me oupwe poutano meinisin ekkewe kapas minne a fen porous usun Kraist, mwirin chommong ra fen porous usun i; me amam ewe kapas mi öch usun Kraist, me ewe manamanen Kot, me ewe niffangen Ngun mi Fel, me awesano ewe Ngun mi Fel, me fori ew turunufasen ewe kokkotun ngaseno mi auchea, minne a fen for fan itemi?

9 Ouse sinei pwe ika oupwe fori ekkei mettoch, iwe ewe manamanen ewe ngaseno me ewe manausefan, minne a nom non Kraist, epwe uweikemino pwe oupwe uta fiti ami saw me anoninenin niemam me mwen ewe nenien kapung an Kot?

10 Iwe anongonong won ewe manamanen pungoch, pun ousap tongeni amam pungoch, oupwe suno ngeni ewe noomun ekkei me brimstone, ngetengetin kewe rese tongeni kununo, me otuotun a feita feinfeino chok me esemuch, minne noomun ekkei me brimstone a ariaffou esemuch.

11 O iwe, pwi achengicheng, oupwe aier, me tonong non ewe asamen ewe tit mi aukukkun, me soposopono non ewe aan minne mi chokisikis, tori ami oupwe angei manau esemuch.

12 O oupwe mirit; pwan met upwe apasa?

13 Amuchunon, ua apasa ngenikemi ai kapongen feino, tori ai upwe churikemi me mwen ewe nenien kapung an Kot, minne nenien kapung a weitfengeni ekkewe aramas mi ngaw ren anoninenin aurek me nuokus. Amen.