1 ’E i teienei, i muri a’era, ’ia hope e rave rahi matahiti, ’ua haere mai ra te hō’ē ta’ata i rotopū i te mau ta’ata o Nephi ra, ’o Serema tōna i’oa.

2 ’E i muri a’era, ’ua ha’amata ihora ’oia i te poro haere i rotopū i te mau ta’ata, i te fa’a’itera’a atu ia rātou ē, ’aita e Mesia. ’E ’ua a’o atu ho’i ’oia i te mau parau tāvaimanino i te ta’ata ; ’e ’ua nā reira ’oia ’ia ti’a iāna ’ia ha’amou i te mau ha’api’ira’a tumu a te Mesia.

3 ’E ’ua rave itoito ’oia i te ’ohipa nō te arata’i ’ē atu i te ’ā’au o te mau ta’ata, ’e e rave rahi ho’i tei arata’i-’ē-hia atu e ana ; ’e ’ua ’ite ’oia ē, e fa’aro’o rahi to’u, tō Iakoba, i te Mesia ’o tē tae mai, ’ua ’imi māite ihora ’oia i te rāve’a ’ia ti’a iāna ’ia haere mai iā’u ra.

4 E ta’ata ’aravihi ho’i ’oia, ’e ’ua ’ite pāpū roa ’oia i te reo o te mau ta’ata ; nō reira, ’ua ti’a iāna ’ia fa’a’ohipa rahi i te mau parau tāvaimanino, ’e e mana rahi ho’i tei roto i tāna parau, mai te au i te mana o te diabolo ra.

5 ’E ’ua mana’o ihora ’oia nō te fa’a’āueue i tō’u fa’aro’o, noa atu ā te mau heheura’a ’e te mau mea e rave rahi ’o tā’u i ’ite nō ni’a i teie mau mea ; ’ua ’ite mau ho’i au i te mau melahi, ’e ’ua ha’api’i mai ho’i rātou iā’u nei. ’E ’ua fa’aro’o ato’a ho’i au i te reo o te Fatu i te paraura’a mai i te parau mau iā’u nei, i terā tau i terā tau ; nō reira, e’ita roa vau e fa’a’āueuehia.

6 ’E i muri a’era, ’ua haere mai ra ’oia iā’u, ’e ’ua parau mai ra ’oia iā’u mai teie te huru, i te nā-’ō-ra’a mai ē : E te taea’e Iakoba, ’ua ’imi māite au i te rāve’a ’ia ti’a iā’u ’ia paraparau atu ia ’oe ; nō te mea ’ua fa’aro’o ’e ’ua ’ite ho’i au ē, tē haere rahi nei ’oe ma te poro haere i te mea ’o tā ’oe i parau ’o te ’evanelia, ’oia ho’i te mau ha’api’ira’a tumu a te Mesia.

7 ’E ’ua arata’i ’ē ho’i ’oe i te tahi pae rahi o teie nei feiā, ’e nō reira ’ua ha’api’o rātou i te ’ē’a ti’a o te Atua, ’e ’aita ho’i rātou i ha’apa’o i te ture a Mose, ’oia ho’i te ’ē’a ti’a ; ’e ’ua fa’ahuru ’ē ho’i i te ture a Mose, ’ia ha’amori rātou i te hō’ē ta’ata tā ’oe i parau ē, e tae mai ’oia ’ia ma’iri e rave rahi hānere matahiti. ’E i teienei, inaha, tē fa’a’ite atu nei au, ’o Serema, ’ia ’oe na ē, e parau fa’ainaina Atua te reira ; nō te mea ’aita roa te hō’ē a’e ta’ata i ’ite i taua mau mea ra ; ’aita ho’i e ti’a iāna ’ia fa’a’ite i te mau mea e tupu a muri atu. ’E ’ua nā reira mai ra Serema i te mārō mai iā’u ra.

8 Inaha rā, ’ua nīni’i mai te Fatu te Atua i tōna Vārua i roto i tō’u ra vārua, ’e nō reira ho’i ’ua fa’aha’amā atu ra vau iāna i roto i tāna ra mau parau ato’a.

9 ’E ’ua parau atu ra vau iāna : E huna ānei ’oe i te Mesia ’o tē tae mai ? ’E ’ua parau mai ra ’oia : ’Āhiri e Mesia tē vai nei, ’aita roa ïa vau e huna iāna ; ’ua ’ite rā vau ē, ’aita e Mesia e vai nei, ’aita ho’i i vai na, ’e ’aita ato’a e vai ē a muri noa atu.

10 ’E ’ua parau atu ra vau iāna : Tē ti’aturi ra ānei ’oe i te mau pāpa’ira’a mo’a ? ’E ’ua parau mai ra ’oia, ’Ē.

11 ’E ’ua parau atu ra vau iāna : ’Aita ïa ’oe i māramarama i te reira ; nō te mea tē fa’a’ite pāpū mai nei ho’i te reira nō ni’a i te Mesia. Inaha, tē parau atu nei au ia ’oe, ’aita roa te mau peropheta i pāpa’i, ’e ’aore rā i tohu, ma te fa’ahiti ’ore i te parau nō ni’a i taua Mesia ra.

12 ’E e ’ere ho’i i te reira ana’e—’ua fa’a’itehia mai iā’u, nō te mea ’ua fa’aro’o ’e ’ua hi’o vau ; ’e ’ua fa’a’ite-ato’a-hia mai iā’u e te mana o te Vārua Maita’i ; nō reira, ’ua ’ite au ē, ’āhiri ē ’aita e tāra’ehara, e mo’e roa te mau ta’ata ato’a.

13 ’E i muri a’era, ’ua parau mai ra ’oia iā’u : ’A fa’a’ite mai na i te hō’ē tāpa’o iā’u nei nā roto i taua mana o te Vārua Maita’i ra, nō reira mai tō ’oe ra ’ite rahi.

14 ’E ’ua parau atu ra vau iāna : E aha ho’i au e ti’a ai iā’u ’ia ’a’a i te Atua nō te fa’a’ite atu ia ’oe na i te tāpa’o i te mea tā ’oe e ’ite nei ē, e parau mau ïa ? E huna rā ’oe i te reira, nō te mea nō ’ō mai ’oe i te diabolo ra. ’Eiaha rā tō’u hina’aro ’ia tupu ; ’āre’a rā mai te mea e tā’iri mai te Atua ia ’oe na, ’ia riro te reira ’ei tāpa’o e ’ite ai ’oe ē, e mana tōna i te ra’i ’e i te fenua ato’a nei ; ’e e tae mai ho’i te Mesia. E te Fatu, ’ia tupu tō ’oe hina’aro, ’eiaha tō’u nei.

15 ’E i muri a’era, i te paraura’a atu vau, ’o Iakoba, i taua mau parau nei, ’ua tae mai ra te mana o te Fatu i ni’a iho iāna, ’e ’ua marua ihora ’oia i raro i te fenua. ’E i muri a’era, ’ua utuutuhia ’oia nō te ārea e rave rahi mahana te maoro.

16 ’E i muri a’era, ’ua parau atu ra ’oia i te mau ta’ata : Ananahi a ha’aputuputu ’āmui mai, nō te mea e pohe au ; nō reira, ’ua hina’aro vau ’ia paraparau atu i te mau ta’ata hou vau e pohe ai.

17 ’E i muri a’era, ’ia ao a’era, ’ua ha’aputuputu ’āmui mai ra te hō’ē pupu ta’ata ato’a ; ’e ’ua paraparau pāpū atu ra ’oia ia rātou, ’e ’ua tātarahapa atu ra ’oia i te mau mea tāna i ha’api’i atu ia rātou ; ’ua fā’i ihora ho’i ’oia i te Mesia, ’e te mana o te Vārua Maita’i, ’e te utuutura’a a te mau melahi.

18 ’E ’ua parau pāpū atu ra ’oia ia rātou ē, ’ua fa’ahemahia ’oia e te mana o te diabolo. ’E ’ua parau ato’a atu ’oia nō ni’a ia hade, ’e nō te ora mure ’ore, ’e nō te fa’autu’ara’a mure ’ore.

19 ’E ’ua nā ’ō atu ra ’oia : tē mata’u nei au nō te mea ’ua rave au i te hara matara ’ore, ’e ’ua ha’avare ho’i au i mua i te Atua ; nō te mea ’ua huna vau i te Mesia, i te nā-’ō-ra’a atu ē, ’ua ti’aturi au i te mau pāpa’ira’a mo’a ; ’e tē fa’a’ite pāpū mau nei te reira nō ni’a iāna. ’E nō te mea ho’i i nā reira vau i te ha’avare i te Atua, ’ua mata’u roa vau ’o te ro’ohia vau e te mea ri’ari’a ra ; tē tātarahapa nei rā vau i te Atua.

20 ’E i muri a’era, ’ia oti a’era tāna paraura’a i teie mau parau, ’aita i ti’a iāna ’ia parau fa’ahou ā, ’e ’ua pohe roa ihora ’oia.

21 ’E ’ia ’ite a’era te mau ta’ata i tāna parau i taua mau mea ra ’a fātata ai ’oia i te pohe, ’ua rahi roa ihora tō rātou māere ; ’e ’ua tae mai ra te mana o te Atua i ni’a iho ia rātou, ’ua paruparu ihora rātou ’e ’ua ma’iri ihora rātou i raro i te repo.

22 ’E i teienei, ’ua māuruuru vau, ’o Iakoba, i te reira, nō te mea ’ua ani au i te reira i tō’u Metua i te ao ra ; ’e ’ua fa’aro’o mai ’oia i tā’u ti’aorora’a ’e ’ua pāhono mai ho’i ’oia i tā’u ra pure.

23 ’E i muri a’era, ’ua tupu fa’ahou te hau ’e te aroha o te Atua i rotopū i te mau ta’ata ; ’e ’ua ’imi ihora rātou i te mau pāpa’ira’a mo’a, ’e ’aita rātou i fa’aro’o fa’ahou i te mau parau a taua ta’ata parauti’a ’ore ra.

24 ’E i muri a’era, e rave rahi mau rāve’a i ’ōpuahia nō te fa’afāriu mai ’e nō te fa’aho’i mai i te mau ’āti Lamana i te ’ite i te parau mau ; ’āre’a rā ’ua faufa’a ’ore te reira, nō te mea ’ua ’oa’oa rātou i te fa’atupu i te tama’i ’e i te ha’amani’i i te toto, ’e tē vai ra tō rātou ’ino’ino mure ’ore ia mātou, tō rātou mau taea’e. ’E nā roto i te pūai o tā rātou mau mauha’a tama’i ’ua tītau rātou ’ia ha’amou ia mātou ma te tu’utu’u ’ore.

25 Nō reira, ’ua ha’apūai te mau ta’ata o Nephi nō te ’aro atu ia rātou, ma tā rātou mau mauha’a tama’i, ma tō rātou pūai ato’a, ’e ma te ti’aturi māite i te Atua ’e te papa nō tō rātou fa’aorara’a ; nō reira, ’ua ha’avī ā rātou i tō rātou ra mau ’enemi.

26 ’E i muri a’era, ’ua ruhiruhiā ihora vau, ’o Iakoba ; ’e nō te mea ’ua pāpa’ihia te pāpa’a parau o teie nei feiā i ni’a iho i te tahi atu mau ’api a Nephi, nō reira, tē fa’aoti nei au i teie nei pāpa’a parau, i te fa’a’itera’a atu ē, ’ua pāpa’i au i te reira ma tō’u ’ite ato’a, ’e i te nā-’ō-ra’a atu ē, ’ua ma’iri noa tō mātou taime, ’e ’ua mo’e ’ē noa atu ho’i tō mātou nei ora mai te moemoeā, ’e ’ua riro mātou ’ei feiā mo’emo’e, ’e ’ei feiā ha’eha’a, ’e ’ei feiā orihaere noa, tei ti’avaruhia mai Ierusalema mai ; i fānauhia ho’i i roto i te ’ati ’e i roto i te mēdēbara, ’e ’ua ’ino’inohia e tō mātou mau taea’e, i tupu ai te mau tama’i ’e te mau mārōra’a ; nō reira, ’ua ’oto noa mātou ē hope roa tō mātou pu’e mahana i te ao nei.

27 ’E ’ua ’ite a’era vau, ’o Iakoba, tē fātata mai ra te mahana e haere ai au i raro i tō’u ra mēnema ; nō reira, ’ua nā ’ō atu ra vau i tā’u ra tamaiti ia Enosa : ’A rave i teie nei mau ’api. ’E ’ua fa’a’ite atu ra vau iāna i te mau mea tā tō’u ra taea’e ’o Nephi i fa’aue mai iā’u, ’e ’ua fafau mai ’oia ē, e ha’apa’o maita’i ’oia i taua mau fa’auera’a ra. ’E tē fa’aoti nei au i tā’u pāpa’ira’a i ni’a iho i teie nei mau ’api, ’e e mea iti ho’i tā’u i pāpa’i ; ’e tē parau atu nei au i te feiā e tai’o i teie nei parau, ’a pārahi, ma te ti’aturi e tai’o tō’u mau taea’e e rave rahi i tā’u nei mau parau. E te mau taea’e ē, ’ia ora na ’outou i te Atua.