Te Buka a Iaroma

1 I teienei inaha, tē pāpa’i nei au, ’o Iaroma, i te tahi mau parau ri’i mai te au i te fa’auera’a a tō’u ra metua tāne, ’o Enosa, ’ia pāpa’ihia tō mātou tuatāpapara’a tupuna.

2 ’E nō te mea, e mau ’api iti teie, ’e ’ua pāpa’ihia ho’i teie nei mau mea nā roto i te hina’aro ’ia maita’i tō mātou mau taea’e, te mau ’āti Lamana, nō reira, ’ia pāpa’i ri’i au e ti’a ai ; e’ita rā vau e pāpa’i i te mau mea nō tā’u tohura’a, ’e nō tā’u mau heheura’a. ’E e aha atu ā ho’i tā’u e pāpa’i i tei pāpa’ihia e tō’u ra mau metua ? ’Aita ānei rātou i fa’a’ite mai i te ’ōpuara’a nō te fa’aorara’a ? Tē parau atu nei au ia ’outou na, ’oia ïa ; ’e ’ua nava’i te reira iā’u.

3 Inaha, e mea ti’a ’ia ravehia te ’ohipa rahi i rotopū i teie nei feiā, nō te ’eta’eta o tō rātou ’ā’au, ’e te turi o tō rātou tari’a, ’e te pōiri o tō rātou mana’o, ’e te ’eta’eta o tō rātou ’a’ī ; ’āre’a rā ’ua aroha roa te Atua ia rātou, ’e ’aita ā ’oia i ha’amou ia rātou mai ni’a atu i te fenua nei.

4 ’E e rave rahi te ta’ata i rotopū ia mātou ’o tei fāri’i i te mau heheura’a e rave rahi, ’e ’aita ho’i te tā’āto’ara’a i fa’a’eta’eta i tō rātou ’ā’au. ’E tei te feiā ’ā’au ’eta’eta ’ore ’e te fa’aro’o te auhō’ēra’a i te Vārua Mo’a, ’o tei ha’api’i mai i te mau tamari’i a te ta’ata nei, mai te au i tō rātou fa’aro’o.

5 ’E i teienei, inaha, ’ua hope e piti hānere matahiti, ’e ’ua rahi te mau ’āti Nephi i ni’a i te fenua. ’Ua ha’apa’o rātou i te ture a Mose ’e ’ua ha’amo’a i te mahana sābati i te Fatu. ’E ’aita rātou i ha’avi’ivi’i i te i’oa o te Atua ; ’e ’aita ato’a ho’i rātou i fa’ainaina i te Atua. ’E e mea pāpū maita’i ho’i te mau ture o te fenua.

6 ’E ’ua ha’apurarahia rātou i ni’a i te pae rahi o te fenua, ’e te mau ’āti Lamana ato’a. ’E ’ua rahi roa atu rātou i te mau ’āti Nephi ; ’e ’ua hina’aro roa rātou ’ia taparahi i te ta’ata ’e ’ia inu ho’i i te toto o te mau ’ānimara.

7 ’E i muri a’era, ’ua haere pinepine mai rātou e ’aro ia mātou, te mau ’āti Nephi. ’Āre’a rā e mau ta’ata pūai tō mātou mau ari’i ’e tō mātou feiā fa’atere i te fa’aro’o i te Fatu ; ’e ’ua ha’api’i rātou i te mau ta’ata i te mau ’ē’a o te Fatu ; nō reira, ’ua tama’i mātou i te mau ’āti Lamana ’e ’ua tīahi atu ia rātou i rāpae i tō mātou mau fenua, ’e ’ua ha’amata mātou i te ha’apa’ari i tō mātou mau ’oire ’e tō mātou ato’a fenua ’āi’a.

8 ’E ’ua rahi roa mātou, ’e ’ua purara ho’i mātou i ni’a i te fenua, ’e ’ua rahi tā mātou tao’a i te ’auro, ’e te ’ārio, ’e te mau tao’a maitata’i, ’e te rā’au ma te ’ohipa nehenehe, ’e te mau fare, ’e te mau huru mātini ato’a, ’e te ’āuri, ’e te kapa, ’e te veo, ’e te ’āuri pa’ari, i te hāmanira’a i te mau huru mauha’a ato’a nō te fa’a’apu i te fenua, ’e te mau mauha’a tama’i—’oia ïa, te te’a ’oe’oe, ’e te pūtē te’a, ’e te ohe, ’e te tāvero, ’e te mau mauha’a tama’i ato’a ra.

9 ’E nō te mea ’ua fa’aineinehia mātou ’ia ’aro atu i te mau ’āti Lamana, ’aita rātou i manuia i te ’arora’a mai ia mātou. ’Āre’a rā ’ua fa’ati’ahia te parau a te Fatu ’o tāna i parau i tō mātou ra mau metua, i te nā-’ō-ra’a mai ē : ’Ia ha’apa’o ’outou i tā’u mau fa’auera’a, e manuia ’outou i ni’a i te fenua.

10 ’E i muri a’era, ’ua parau ha’amata’u atu ra te mau peropheta o te Fatu i te mau ta’ata o Nephi, mai te au i te parau a te Atua, ’oia ho’i, ’ia ’ore rātou e ha’apa’o i te mau fa’auera’a, ’e ’ia ’ōfati rātou i te ture, e ha’amouhia ïa rātou mai ni’a atu i te fenua nei.

11 Nō reira, ’ua ’ohipa māite te mau peropheta ’e te mau tahu’a, ’e te mau ’orometua, i te fa’aitoitora’a ma te fa’a’oroma’i rahi i te mau ta’ata ’ia itoito ; i te ha’api’ira’a i te ture a Mose, ’e te tumu i hōro’ahia mai ai te reira ; ’e i te fa’aitoitora’a ia rātou ’ia hi’o i mua i ni’a i te Mesia, ’e ’ia ti’aturi iāna ’o tē tae mai, mai te mea ra ē tei ’ō nei ’oia i teienei. ’E ’ua nā reira rātou i te ha’api’i ia rātou.

12 ’E i muri a’era, nō tā rātou nā reirara’a i ’ore ai rātou i ha’amouhia ai i ni’a i te fenua ; ’ua putapū ho’i tō rātou ’ā’au i tā rātou ra parau, ’o tei fa’aitoito tāmau noa ia rātou ’ia tātarahapa.

13 ’E i muri a’era, ’ua hope e piti hānere ’e toru ’ahuru ma va’u matahiti—’e tē vai noa ra te mau ’arora’a, ’e te mau mārōra’a, ’e te mau pe’ape’a, nō te ārea rahi o taua taime ra.

14 ’E ’aita vau, ’o Iaroma, e pāpa’i rahi fa’ahou, nō te mea e mea iti roa te mau ’api. Inaha rā, e tō’u mau taea’e, e ti’a ia ’outou ’ia tai’o i te tahi atu mau ’api a Nephi ; inaha ho’i, ’ua ’ō’otihia te pāpa’a parau o tā mātou mau tama’i i ni’a i te reira, mai te au i tā te mau ari’i i pāpa’i ra, ’e ’aore rā ’o tā rātou i fa’aue ’ia pāpa’ihia.

15 ’E tē tu’u atu nei au i teie nei mau ’api i roto i te rima o tā’u tamaiti ’o Omoni, ’ia pāpa’ihia te reira mai te au i te mau fa’auera’a a tō’u ra mau metua.