1 Ut kik’ulman sa’ li chihab’ ajwi’ a’an, ki’ok chi wank jun li pleet, reheb’ laj Nefita rik’ineb’ laj Lamanita. Ut us ta saajin, nim chaq inxaqam; jo’kan naq eb’ lix tenamit laj Nefi kine’xxaqab’ re tinwanq choq’ aj jolominel reheb’, malaj aj jolominel re lix teepeb’ aj pleet.

2 Jo’kan ut, kik’ulman naq sa’ inwaqlaju chihab’ xkohin sa’ xjolomil jun teep aj pleet reheb’ laj Nefita, chixpleetinkileb’ laj Lamanita; jo’kan naq ak numenaq oxib’ cient rik’in waqib’ xka’k’aal chihab’.

3 Ut kik’ulman naq sa’ li rox cient rik’in wuqub’ xka’k’aal chihab’ ke’chal laj Lamanita sa’ qab’een chi numtajenaq xnim xwankileb’, jo’kan naq ke’xxeb’esi lin teep aj pleet; jo’kan naq ink’a’ ke’raj pleetik, ut ke’ok chixsutq’isinkil rib’ sa’ xjayal li ch’och’ sa’ xnim li saq’e.

4 Ut kik’ulman naq koowulak sa’ li tenamit Angola, ut kiqeechani li tenamit, ut kiqakawresi qib’ re xkolb’al qib’ chiruheb’ laj Lamanita. Ut kik’ulman naq kiqak’e xkawilal li tenamit rik’in xnimal qametz’ew; a’b’an us ta wan xk’ihal qakawresinb’il na’aj, ke’chal laj Lamanita sa’ qab’een ut koohe’ralinasi chaq sa’ li tenamit.

5 Ut koohe’ralinasi ajwi’ chaq sa’ li ch’och’ David.

6 Ut koxoob’eeq ut koowulak sa’ li ch’och’ Josue, li wan sa’eb’ li nub’aal sa’ rokeb’ saq’e chire li palaw.

7 Ut kik’ulman naq kiqach’utub’ li qatenamit a’ yaal sa’ junpaat jo’ li kiru, re taaruuq te’qajunaji sa’ junaj chi teep.

8 A’ut k’ehomaq reetal, nujenaq li ch’och’ rik’ineb’ laj elq’ ut laj Lamanita; ut us ta taqsinb’il li nimla sache’k sa’ xb’een intenamit, ink’a’ ke’xjal xk’a’uxleb’ chirix lix maa’us aj b’aanuhomeb’; jo’kan naq kiwan kik’ ut kamsink-ib’ chi jek’inb’il chiru chixjunil lix b’een li ch’och’, xb’aaneb’ laj Nefita ut xb’aaneb’ ajwi’ laj Lamanita; ut tz’aqal jun b’alq’ujik naq kiwan chiru chixjunil lix b’een li ch’och’.

9 Ut anajwan, eb’ laj Lamanita ke’wan jun xreyeb’, ut aj Aaron xk’ab’a’; ut a’an kichal sa’ qab’een rik’in jun teep aj pleet, kaahib’ roxk’aal chi mil xk’ihaleb’. Ut k’ehomaq reetal, laa’in kinxaqab’ wib’ chiru rik’in wiib’ roxk’aal chi mil. Ut kik’ulman naq kinq’ax ru rik’in inteep aj pleet, jo’kan naq ki’eelelik chiwu. Ut k’ehomaq reetal, kib’aanuman chixjunil a’in, ut ak numenaq oxib’ cient rik’in lajeeb’ xka’k’aal chihab’.

10 Ut kik’ulman naq eb’ laj Nefita ke’ok chixjalb’al xk’a’uxl chirix lix maa’usilaleb’, ut ke’ok chi yaab’ak jo’ chanru ajwi’ li profeetil aatin li kixch’olob’ chaq laj Samuel li profeet, xb’aan naq maajun winq naru chixk’uulankil li k’a’ru re, xb’aaneb’ laj elq’, ut laj poqlenel, ut laj kamsinel, ut lix k’anjeleb’ laj eek’, ut li tuulak li wan sa’ li ch’och’.

11 Chi jo’kan ki’ok chi wank li raho’k ch’oolej ut li yaab’ak sa’ chixjunil li ch’och’ xb’aan li k’a’aq re ru a’in, ut q’axal wi’chik sa’ xyanq lix tenamit laj Nefi.

12 Ut naq laa’in, aj Mormon, kiwil li yaab’ak ut li raho’k ch’oolej, ut lix rahileb’ li raam chiru li Qaawa’, kik’ulman naq ki’ok chi saho’k inch’ool sa’ waam, rik’in naq kinnaw ru li ruxtaan ut xnajtil li royb’enihom li Qaawa’, jo’kan naq kink’oxla naq a’an taaruxtaanaheb’ ru re naq te’wanq wi’chik choq’ jun tenamit tiik xch’ool.

13 A’b’anan k’ehomaq reetal, maak’a’ xyaalal lix sahil inch’ool a’in, xb’aan naq li raho’k ch’oolej xb’aaneb’ maawa’ re xjalb’aleb’ xk’a’uxl, xb’aan xchaab’ilal li Dios; a’an b’an li raho’k ch’oolej reheb’ li k’eeb’ileb’ sa’ tojb’a-maak, xb’aan naq li Qaawa’ moko junelik ta tixkanab’eb’ chi saho’k sa’ xch’ool rik’in li maak.

14 Ut ink’a’ ke’chal rik’in li Jesus chi yot’b’ileb’ xch’ool ut tuulaneb’ xmusiq’; ke’xmajewa b’an li Dios, ut ke’rataw kamk. A’b’anan ke’xyal ru rik’in li yok’leb’ ch’iich’ re xkolb’al xyu’ameb’.

15 Ut kik’ulman naq kichal wi’chik xrahil inch’ool, ut kiwil naq ak numenaq xkutankil li usilal rik’ineb’, re li yu’am a’in ut re ajwi’ li musiq’ej; xb’aan naq kiwil k’iila mil reheb’ chi yok’e’k chaq chi k’utk’u xpo’jikeb’ xch’ool chiru lix Dios, ut ke’tuub’aman chanchan k’ot chiru lix b’een li ch’och’. Ut chi jo’kan ak numenaq oxib’ cient rik’in kaahib’ roxk’aal chihab’.

16 Ut kik’ulman naq sa’ li rox cient rik’in oob’ roxk’aal chihab’, eb’ laj Nefita ke’ok chi eelelik chiruheb’ laj Lamanita; ut ke’taaqeek toj reetal naq ke’wulak toj sa’ li ch’och’ Jaxon, ut toj aran ke’ru chi xaqab’aak sa’ reelelikeb’.

17 Ut anajwan, li tenamit Jaxon nach’ wan rik’in li ch’och’ kixk’ojob’ wi’ chaq laj Ammaron li tz’iib’anb’il esil choq’ re li Qaawa’, re naq ink’a’ te’sachmanq. Ut k’ehomaq reetal, laa’in ak xkohin jo’ chanru li raatin laj Ammaron, ut kink’am chaq eb’ lix perel ch’iich’ laj Nefi, ut kintz’iib’a jun esil jo’ chanru li raatin laj Ammaron.

18 Ut chiruheb’ lix perel ch’iich’ laj Nefi kink’e chi tz’aqal li esilal chirix chixjunil li maa’usilal ut tz’eqb’eetalil; a’b’an chiruheb’ li perel ch’iich’ a’in moko kiwaj ta xk’eeb’al chi tz’aqal li esilal chirix lix maa’usilaleb’ ut lix tz’eqb’eetalileb’, xb’aan naq k’ehomaq reetal, wanjenaq anchal li maa’usilal ut li tz’eqb’eetalil chi k’utk’u rajlal chiru li wilob’aal chalen chaq naq tz’aqal inchihab’ re xk’eeb’al reetal lix na’leb’eb’ li winq.

19 Ut rahilal sa’ inb’een xb’aan lix maa’usilaleb’; xb’aan naq wanjenaq chi nujenaq inch’ool rik’in rahil ch’oolejil xb’aan xmaa’usilaleb’, chiru chixjunil lin kutan; a’b’anan ninnaw naq tinwaklesiiq sa’ roso’jik li kutan.

20 Ut kik’ulman naq sa’ li chihab’ a’in, eb’ lix tenamit laj Nefi jun sut chik ke’taaqeek ut ke’alinasiik chaq. Ut kik’ulman naq koo’alinasiik toj reetal naq koowulak sa’ xjayal lix nim li saq’e sa’ li ch’och’ Xem yeeb’il re.

21 Ut kik’ulman naq kiqak’e xkawilal li tenamit Xem, ut kiqach’utub’eb’ li qatenamit a’ yaal jo’ kiru chiqu, re naq maare taaruuq taqakoleb’ chiru li sache’k.

22 Ut kik’ulman naq sa’ li rox cient rik’in waqib’ roxk’aal chihab’ ke’ok wi’chik chi chalk sa’ qab’een.

23 Ut kik’ulman naq laa’in kiwaatina lin tenamit, ut kinwaklesiheb’ xch’ool rik’in x’anchalil inmetz’ew, re te’xaqliiq chi kaweb’ xch’ool chiruheb’ laj Lamanita ut te’pleetiq re xkolb’al li rixaqileb’, ut lix kok’aleb’, ut lix kab’leb’, ut li rochocheb’.

24 Ut rik’in li waatin ke’waklesiik b’ayaq xmetz’ew, jo’kan naq ink’a’ ke’eelelik chiruheb’ laj Lamanita; ke’xxaqab’ b’an rib’ chiruheb’ rik’in kawil ch’oolejil.

25 Ut kik’ulman naq rik’in jun teep aj pleet lajeeb’ xka’k’aal chi mil rajlankileb’, kiqayal qu rik’in jun teep aj pleet lajeeb’ roxk’aal chi mil rajlankileb’. Ut kik’ulman naq kooxaqli chiruheb’ chi q’axal ink’a’ koo’eek’an, jo’kan naq ke’eelelik chaq chiqu.

26 Ut kik’ulman naq chirix naq ke’eelelik chaq kiqataaqeheb’ rik’in qateep aj pleet, ut kiqak’uleb’ wi’chik, ut kiqaq’axeb’ ru; a’b’anan maak’a’ lix metz’ew li Qaawa’ qik’in; relik chi yaal, kanab’anb’ilo qajunes, jo’kan naq lix Musiq’ li Qaawa’ moko kikana ta qik’in, jo’kan naq q’un qametz’ew kookana chanchaneb’ li qas qiitz’in.

27 Ut kiraho’ inch’ool xb’aan li nimla rahilal a’in re lin tenamit, xb’aan lix maa’usilaleb’ ut lix tz’eqb’eetalileb’. A’b’an k’ehomaq reetal, xookoho chixpleetinkileb’ laj Lamanita ut eb’ laj elq’ re laj Gadianton, toj reetal naq kiqeechani wi’chik lix ch’och’il li qeechanihom.

28 Ut ak kinume’ li rox cient rik’in b’eleeb’ roxk’aal chihab’. Ut sa’ li rox cient rik’in lajeeb’ roxk’aal chihab’ kiqak’e qib’ sa’ aatin rik’ineb’ laj Lamanita ut eb’ laj elq’ re laj Gadianton, li ke’kana wi’ chi jachjo ru lix ch’och’il li qeechanihom.

29 Ut eb’ laj Lamanita ke’xk’e qe li ch’och’ sa’ xjayal lix nim li saq’e, toj sa’ li ka’ch’in ruhil na’ajej li nanume’ sa’ li ch’och’ sa’ xjayal lix tz’e li saq’e. Ut kiqak’e reheb’ laj Lamanita chixjunil li ch’och’ sa’ xjayal lix tz’e li saq’e.