1 Iwe non ewe fansoun pwe ekkewe chon Leiman rese feito maun sefan tori pwan engon ier a wesino. Iwe nengeni, ua fen anganga nei kewe aramas, ekkewe chon Nifai, ne amonnata fonuer kewe me ar pisekin maun ren amonnetan ewe fansoun maun.

2 Iwe non ewe fansoun pwe ewe Samon a apasa ngeniei: Afanafan ngeni ekkei aramas—Oupwe aier, me feito rei, me oupwe papatais, me forata sefan ai we mwichefen, iwe oupwe manau.

3 Iwe ua afanafan ngeni ekkei aramas, nge a namotmwan; me rese apareni pwe ewe Samon ewe a fen amanauer, me a awora ngeni ir ew tufichin aier. Iwe nengeni ra apochokunano netiper seni ewe Samon ar Kot.

4 Iwe non ewe fansoun pwe mwirin ei engonun ier a wesino, ukukun, meinisin, wunupuku wone ier seni ewe wareton Kraist, ewe kingen ekkewe chon Leiman a tinato echo toropwe ngeniei, minne a ureniei pwe ra amonneta pwe repwe feito sefan ne maun ngenikem.

5 Iwe non ewe fansoun pwe ua annuku nei kewe aramas pwe repwe ionfengeni inisir me ren ewe fonu Tatakis, ngeni ew teninimw minne a nom won ekkewe kia, arap ngeni ewe aukukkunun aan minne a aaneno ngeni ewe fonu eor.

6 Iwe ikewe am aua annomu nöum kewe sounfiu, pwe am aupwe tongeni akkouno ekkewe sounfiun ekkewe chon Leiman, pwe resap angei nemenem won ew me nein fonuem kewe; iei minne am aua apochokunakemino ne ungeni ir fiti unusen nöum kewe mwichen sounfiu.

7 Iwe non ewe fansoun pwe non ewe wunupuku wone me ew ier ekkewe chon Leiman ra feitiw ngeni ewe teninimw Tatakis pwe repwe maun ngenikem; iwe non ewe fansoun pwe non ena ier am aua akkufur, ina popun pwe ra niwin sefan ngeni pwisin fonuer kewe.

8 Iwe non ewe wunupuku wone me ru ier ra feitiw sefan pwe repwe maun. Iwe am aua pwan akkufur sefan, me nieno chommong chochon me neir, iwe ar kewe mi mano ra katurunong non ewe sat.

9 Iwe iei, pokiten ei auchean mettoch minne nei kei aramas, ekkewe chon Nifai, ra fen fori, ra poputa ne sikaseni non ar pwisin pochokun, me poputa ne akkapon me mwen ekkewe nang pwe repwe angei niwinin chan pwir kewe ekkewe ra fen ninnino me ren ekkewe chon koum ngeni ir.

10 Iwe ra akkapon ngeni ekkewe nang, me pwan ngeni ewe nenien mwottun Kot, pwe repwe feita maun ngeni ekkewe chon koum ngeni ir, me repwe pokureno seni won unungen ewe fonu.

11 Iwe non ewe fansoun pwe Ngang, Mormon, use unusen etiwa seni ei fansoun feino ai upwe emon sou emmwenin sounfiu me emon sou emmwenin ekkei aramas, pokiten ar fofforungaw me angang mi anieput.

12 Nengeni, ua fen emmweni ir, me nukun ar fofforungaw ua fen emmweni ir fan chommong ngeni maun, me ua fen tonger, anongonong won ewe tongen Kot minne a nom rei, ren unusen netipei; iwe nguni a fen unuseu non iotek ngeni ai Kot unusen ewe ran fan iter; nge inamo, ese fiti nuku, pokiten pochokunen netiper.

13 Iwe fan unungat ua fen angasereu seni ne poun ekkewe chon koum ngeni ir, iwe rese fen aier seni ar kewe tipis.

14 Iwe nupwen ra akkapon ngeni mettoch meinisin met mi fen annuk seni ir me ren ach Samon me Chon Amanau Jises Kraist, pwe repwe feita ngeni ekkewe chon koum ngeni ir ne maun, me angei niwinin chan pwir kewe, nengeni ewe mongungun ewe Samon a feito ngeniei, a apasa:

15 Eniwini niwinin tipis ina wisei, iwe ngang upwe ngeni niwinir; iwe pokiten ekkei aramas rese aier mwirin ai ua fen angaser, nengeni, repwe pokupokuno seni won unungen ewe fonufan.

16 Iwe non ewe fansoun pwe use unusen etiwa ai upwe feita ungeni ekkewe chon koum ngeniei; iwe ua pwan mwo fori met ewe Samon a fen annuk ngeniei; iwe ua emon chon pwarata ne pwarano ngeni ewe fonufan ekkewe mettoch minne ua kuna me rongorong, anongonong won pwaratan ewe Ngun minne a fen pwarata usun mettoch repwe feito.

17 Iei minne ua mak ngenikemi, chon Gentile, me pwan ngenikemi, chon imwen Israel, nupwen ewe angang epwe poputa, ita oupwe arap ngeni ami oupwe monneta ne niwin ngeni ewe fonuen ami kewe neuo;

18 Ewer, nengeni, ua mak ngeni unusen nesopun ewe fonufan; ewer, ngenikemi, engon me ruwen einangen Israel, ekkewe oupwe kapung anongonong won ami kewe angang me ren ekkewe engon me ruomon ekkewe Jises a finireta pwe noun chon kuno non ewe fonuen Jerusalem.

19 Iwe ua pwan mak ngeni ekkewe nussun mwirimwirin ekkei aramas, ekkewe repwe pwan kapung me ren ekkewe engon me ruomon ekkewe Jises a finireta me non ei fonu; iwe repwe kapung me ren ekkewe ekkoch engon me ruomon ekkewe Jises a finireta me non ewe fonuen Jerusalem.

20 Iwe ekkei mettoch ewe Ngun a pwarata ngeniei; iei minne ua mak ngenikemi meinisin. Iwe ren ei popun ua mak ngenikemi, pwe oupwe sinei pwe oupwe fokkun uta me mwen ewe neninen mwottun kapung an Kraist, ewer, meinisin aramas ekkewe ra choni ewe unusen aramasen faminien Adam; iwe oupwe fokkun uta pwe oupwe kapung ren ami kewe angang, ika pwe repwe öch are ngaw;

21 Iwe pwe pwan oupwe nuku ewe kapas allimen Jises Kraist, minne epwe nom neimi; me pwe pwan ekkewe chon Jew, ekkewe aramas pwon noun ewe Samon, epwe pwan wor rer ekkoch chon pwarata me nukun i ewe ra kuna me rongorong, pwe Jises, ewe ra nieno, i ewe ennetin Kraist me ewe ennetin Kot.

22 Iwe ua mochen pwe upwe pesei ami meinisin ekis meinisin non ewe fonufan pwe oupwe aier me monneta ne uta me mwen ewe nenien mwottun kapung an Kraist.