1 Mo i bin hapen se Ol Man blong Leman oli no kam blong faet bakegen kasem we ten yia moa i bin pas i go. Mo luk, mi yusum ol pipol blong mi, Ol Man blong Nifae, blong mekem rere ol graon blong olgeta mo ol tul blong faet blong olgeta agensem taem blong faet.

2 Mo i bin hapen se Lod i talem long mi: “Prij long ol pipol ia—Yufala i sakem sin, mo kam long mi, mo yufala i kasem baptaes, mo bildimap bakegen jos blong mi, mo bae mi sevem yufala.”

3 Mo mi bin prij long ol pipol ia, be i blong nating; mo oli no luksave se i Lod we i bin sevem olgeta, mo i givim long olgeta wan janis blong sakem sin. Mo luk, oli mekem hat blong olgeta i kam strong agensem Lod, God blong olgeta.

4 Mo i bin hapen se afta ten yia ia i pas i go, i mekem se, evriwan, tri handred mo siksti yia stat long taem we Kraes i bin kam long hem, king blong Ol Man blong Leman i bin sendem wan leta long mi, we i letem mi save se oli stap mekem rere blong kam bakegen blong faet agensem mifala.

5 Mo i bin hapen se mi mekem ol pipol blong mi blong oli mas kam tugeta long graon Emti, long wan bigtaon we i stap insaed long ol boda, kolosap long smolfala graon we i lid i go long graon long Saot.

6 Mo long ples ia, mifala i bin putum ol ami blong mifala, blong mifala i save stopem ol ami blong Ol Man blong Leman, blong oli no save tekem eni long ol graon blong mifala; from hemia, mifala i mekem mifala i strong agensem olgeta wetem evri ami blong mifala.

7 Mo i bin hapen se, long nambatri handred mo siksti mo wan yia, Ol Man blong Leman oli kam daon long bigtaon blong Emti blong faet agensem mifala; mo i hapen se long yia ia, mifala i bin winim olgeta, inaf blong mekem se oli gobak long ol graon blong olgeta bakegen.

8 Mo long nambatri handred mo siksti mo tu yia oli bin kam daon bakegen blong faet. Mo mifala i winim olgeta bakegen, mo mifala i kilimded wan bigfala namba blong olgeta, mo mifala i sakem ol dedman blong olgeta long solwota.

9 Mo nao, from bigfala samting ia we ol pipol blong mi, Ol Man blong Nifae, i bin mekem, oli stat blong tokflas long paoa blong olgeta bakegen, mo oli stat blong mekem strong promes long fored blong ol heven se olgeta nomo bae oli pembak blad blong ol brata blong olgeta, we ol enemi blong olgeta oli bin kilimded.

10 Mo oli bin yusum nem blong ol heven, mo tu, tru long jea blong God blong mekem strong promes, se bae oli go antap blong faet agensem ol enemi blong olgeta, mo bae oli katem olgeta aot long fes blong graon.

11 Mo i bin hapen se mi, Momon, i no wantem nating, stat long tetaem ia i go, blong stap wan lida blong ami mo wan lida blong ol pipol ia, from ol fasin nogud mo rabis sin blong olgeta.

12 Luk, mi bin lidim olgeta, i nomata long fasin nogud blong olgeta, mi bin lidim olgeta plante taem blong faet, mo mi lavem olgeta, folem lav blong God we i stap long mi, wetem ful hat blong mi; mo mi bin kapsaetem sol blong mi long prea long God blong mi, blong ful dei from olgeta; be, mi no bin gat fet long samting ia, from hat blong olgeta i strong.

13 Mo tri taem mi bin mekem olgeta oli go fri aot long ol han blong ol enemi blong olgeta, mo oli no bin sakem ol sin blong olgeta.

14 Mo afta we oli bin mekem strong promes wetem nem blong evri samting we Lod blong mifala mo Sevya, Jisas Kraes, i bin talem olgeta se oli no mas yusum, se bae oli go antap agensem ol enemi blong olgeta blong faet, mo olgeta nomo bae i pembak ol blad blong ol brata blong olgeta, luk voes blong Lod i bin kam long mi, i talem:

15 Fasin ia blong pembak i blong mi, mo bae mi pembak; mo from ol pipol ia oli no bin sakem sin afta we mi mekem olgeta oli go fri, luk, bae oli katemaot olgeta aot long fes blong wol.

16 Mo i bin hapen se mi no wantem nating blong go antap agensem ol enemi blong mi; mo mi bin mekem olsem we Lod i givim oda long mi blong mekem, mo mi stanap olsem wan witnes we i stap nating blong soemaot long wol, ol samting we mi luk mo mi harem, folem ol fasin ia we Spirit i bin soemaot, we i testifae long saed blong ol samting we bae oli kam.

17 From hemia, mi stap raet long yufala, Ol Jentael, mo tu, long yufala, laen blong Isrel we bae yufala i stap stat rere blong gobak long graon blong yufala we i kam long ol papa, taem we wok ia bae i stat;

18 Yes, luk, mi stap raet i go long evri en blong wol; yes, long yufala, olgeta twelef laen blong Isrel, we bae yufala i kasem jajmen folem ol wok blong yufala tru long olgeta twelef we Jisas i bin jusum olgeta blong kam ol disaepol blong hem long graon blong Jerusalem.

19 Mo mi stap raet tu i go long smol haf blong pipol ia we i stap laef yet, we bae i kasem jajmen tu tru long olgeta twelef we Jisas i bin jusum long graon ia; mo bae oli kasem jajmen tru long narafala twelef we Jisas i bin jusum long graon blong Jerusalem.

20 Mo ol samting ia Spirit i stap soemaot long mi; from hemia, mi stap raet long yufala evriwan. Mo from stamba tingting ia mi stap raet long yufala, blong mekem se yufala i save se, bae yufala evriwan i mas stanap long fored blong jea blong jajmen blong Kraes, yes, evri sol we i blong evri man blong famli blong Adam; mo yufala i mas stanap blong kasem jajmen from ol wok blong yufala, blong luk sapos oli gud o oli nogud.

21 Mo tu, blong yufala i save bilivim gospel blong Jisas Kraes, we bae yufala i gat long medel blong yufala; mo tu, blong Ol Jiu, ol kavenan pipol blong Lod, bae oli gat ol narafala witnes antap long hem we oli bin luk mo oli bin harem, se Jisas, we oli bin kilim i ded, i stret Kraes ia nao mo i stret God ia nao.

22 Mo mi wantem se mi save winim tingting blong yufala evriwan long evri en blong wol blong yufala i sakem sin mo yufala i rere blong stanap long fored blong jea blong jajmen blong Kraes.