1 Ut anajwan kik’ulman naq sa’ li rox cient rik’in oxib’ xkaak’al chihab’ eb’ laj Nefita rik’ineb’ lix teep aj pleet koxe’taqe’q chaq sa’ li ch’och’ Sachenaqil, re xpleetinkileb’ laj Lamanita.

2 Ut kik’ulman naq eb’ li teep aj pleet reheb’ laj Nefita ke’sutq’isiik wi’chik chirix, toj sa’ li ch’och’ Sachenaqil. Ut naq toj lub’luukeb’, jun ak’ teep aj pleet reheb’ laj Lamanita kichal sa’ xb’eeneb’, ut ke’wan sa’ jun rahil pleet rik’ineb’, toj reetal naq eb’ laj Lamanita ke’reechani li tenamit Sachenaqil, ut ke’xkamsi naab’al reheb’ laj Nefita, ut ke’xchap naab’al li preex.

3 Ut li jun ch’ol chik ke’eelelik ut ke’xjunaji rib’ rik’ineb’ li wankeb’ sa’ li tenamit Teankum. Anajwan li tenamit Teankum wan sa’ li nub’aal chire li palaw, ut nach’ ajwi’ wan rik’in li tenamit Sachenaqil.

4 Ut a’an xb’aan naq eb’ li teep aj pleet reheb’ laj Nefita ke’taqe’ rik’ineb’ laj Lamanita naq ke’ok chi sak’e’k; xb’aan naq wi ta ink’a’ xb’aan a’an, eb’ laj Lamanita maajun xwankilal kiru raj chi wank sa’ xb’eeneb’.

5 A’b’an k’ehomaq reetal, lix raqb’a-aatin li Dios tixtaweb’ laj maak; ut xb’aaneb’ laj maak naq nak’eeman li tojb’a-maak sa’ xb’eeneb’ laj maak; xb’aan naq a’aneb’ laj maak li neke’eek’asink xch’ooleb’ li ralal xk’ajoleb’ li winq re hoyok kik’.

6 Ut kik’ulman naq eb’ laj Lamanita ke’xkawresi rib’ chi chalk sa’ xb’een li tenamit Teankum.

7 Ut kik’ulman sa’ li rox cient rik’in kaahib’ xkaak’al chihab’ eb’ laj Lamanita ke’chal sa’ xb’een li tenamit Teankum, re te’ruuq chireechaninkil ajwi’ li tenamit Teankum.

8 Ut kik’ulman naq ke’rame’ ru ut ke’tiikisiik chirixeb’ xb’aaneb’ laj Nefita. Ut naq ke’ril laj Nefita naq ke’xtiikisiheb’ chaq laj Lamanita ke’xnima wi’chik rib’ xb’aan tz’aqal lix metz’eweb’; ut xkoheb’ rik’in xnimaleb’ xmetz’ew, ut ke’reechani wi’chik li tenamit Sachenaqil.

9 Anajwan ut kib’aanuman chaq chixjunil li k’a’aq re ru a’in, ut wankeb’ li ke’kamsiik chaq chi mil chi ka’pak’al, reheb’ laj Nefita jo’ ajwi’ reheb’ laj Lamanita.

10 Ut kik’ulman naq ak kinume’ li rox cient rik’in waqib’ xkaak’al chihab’, ut eb’ laj Lamanita ke’chal wi’chik sa’ xb’eeneb’ laj Nefita chi pleetik; a’ut eb’ laj Nefita ink’a’ ke’xjal xk’a’uxleb’ chirix li ink’a’ us ke’xb’aanu chaq; ke’kana b’an sa’ xmaa’usilaleb’ chi rajlal.

11 Ut moko naru ta li ru’uj aq’ej chixch’olob’ankil, chi moko li winq chixtz’iib’ankil chi tz’aqal, resilal li xik’ob’aal kik’ ut kamsink-ib’ li kik’utun, li kiwan sa’ xyanqeb’ li tenamit, eb’ laj Nefita jo’keb’ ajwi’ laj Lamanita; ut li junjunq chi aamej kikawu, jo’kan naq ke’saho’ xch’ool rik’in hoyok kik’ chi rajlal.

12 Ut maajun wa wanjenaq chaq jo’ xnimal li maa’usilal a’in sa’ xyanqeb’ chixjunil li ralal xk’ajol laj Lehi, chi moko ajwi’ sa’ xyanqeb’ chixjunil lix junkab’al laj Israel, jo’ chanru li raatin li Qaawa’, jo’ li kiwan sa’ xyanq li tenamit a’in.

13 Ut kik’ulman naq eb’ laj Lamanita ke’reechani li tenamit Sachenaqil, ut a’in xb’aan naq li rajlankileb’ naxq’ax rajlankileb’ laj Nefita.

14 Ut koxe’b’eeq ajwi’ chixpleetinkil li tenamit Teankum, ut ke’ralinasiheb’ chaq li wankeb’ chi sa’, ut ke’xchap k’iila preex, li ixq jo’ ajwi’ li kok’al, ut ke’xq’axtesiheb’ choq’ mayej chiruheb’ lix pak’b’il dioseb’.

15 Ut kik’ulman naq sa’ li rox cient rik’in wuqub’ xkaak’al chihab’, yookeb’ xjosq’il laj Nefita xb’aan naq eb’ laj Lamanita ke’xmayeja chaq rixqilaleb’ ut xkok’aleb’, jo’kan naq xkoheb’ chixpleetinkileb’ laj Lamanita chi numtajenaq nim xjosq’ileb’, jo’kan naq ke’xq’axeb’ wi’chik ru laj Lamanita, ut ke’ralinasiheb’ chaq sa’ lix ch’och’eb’.

16 Ut eb’ laj Lamanita ink’a’ ke’chal wi’chik sa’ xb’eeneb’ laj Nefita toj sa’ li rox cient rik’in o’laju xkaak’al chihab’.

17 Ut sa’ li chihab’ a’an ke’kub’e sa’ xb’eeneb’ laj Nefita chi anchaleb’ xwankil; ut moko ke’k’ehe’ ta sa’ ajl xb’aan xk’ihal li rajlankileb’.

18 Ut chalen sa’ li kutan a’an eb’ laj Nefita maajun chik wankilal ke’xtaw sa’ xb’eeneb’ laj Lamanita; ke’ok b’an chi sachliik chaq xb’aaneb’ chanchan ajwi’ li k’ajob’ chiru li saq’e.

19 Ut kik’ulman naq eb’ laj Lamanita ke’kub’e sa’ xb’een li tenamit Sachenaqil; ut kiwan jun li pleet numtajenaq xrahil li kipleetiman sa’ li ch’och’ Sachenaqil, li ke’q’axe’ wi’ ru laj Nefita xb’aaneb’.

20 Ut eb’ a’an ke’eelelik wi’chik chiruheb’, ut ke’wulak sa’ li tenamit Boaz; ut aran ke’xxaqab’ rib’ chiruheb’ laj Lamanita chi numtajenaq xkawileb’ xch’ool, jo’kan naq eb’ laj Lamanita ink’a’ ke’xq’axeb’ ru toj reetal naq ke’chal wi’chik xkab’ sut.

21 Ut naq ke’chal xkab’ sut, eb’ laj Nefita ke’alinasiik chaq ut ke’kamsiik rik’in jun li kamsiik numtajenaq nim; li rixqilaleb’ ut lix kok’aleb’ ke’mayejaak wi’chik chiruheb’ li pak’b’il dios.

22 Ut kik’ulman naq eb’ laj Nefita ke’eelelik wi’chik chiruheb’, ut ke’xk’am chirixeb’ chixjunileb’ li wankeb’ aran, sa’eb’ li tenamit jo’ ajwi’ li k’aleb’aal.

23 Ut anajwan laa’in, aj Mormon, rik’in rilb’al naq eb’ laj Lamanita okeb’ re chi numtaak sa’ xb’een li ch’och’, jo’kan ut, xkohin sa’ li tzuul Xim, ut kink’am chixjunileb’ li tz’iib’anb’il esil li kixmuq chaq laj Ammaron choq’ re li Qaawa’.