1 Mo nao i bin hapen se long nambatri handred mo siksti mo tri yia, Ol Man blong Nifae oli go antap wetem ol ami blong olgeta blong faet agensem Ol Man blong Leman, aotsaed long graon Emti.

2 Mo i bin hapen se oli pusum bakegen ol ami blong Ol Man blong Nifae oli go long graon blong Emti. Mo taem we oli taed yet i stap, wan ami blong Ol Man blong Leman we i strong gud i kam long olgeta; mo oli bin gat wan strong faet, inaf blong mekem se Ol Man blong Leman oli tekem bigtaon ia, Emti, mo oli kilimded plante long Ol Man blong Nifae, mo oli tekem plante prisena.

3 Mo ol narafala we oli stap, oli ronwe mo oli joenem ol man we oli stap laef long bigtaon ia, Tiankum. Nao Tiankum bigtaon i stap long ol boda kolosap long so blong solwota; mo i stap kolosap tu long Emti bigtaon.

4 Mo i bin from se ol ami blong Ol Man blong Nifae oli go antap long Ol Man blong Leman we i mekem se oli stat blong kilim olgeta; from sapos i no bin taswe, Ol Man blong Leman oli no save gat eni paoa ova long olgeta.

5 Be, luk, ol jajmen blong God bae oli winim olgeta we oli nogud; mo hem i tru long ol olgeta we oli nogud we olgeta we oli nogud oli kasem panis; from hem i olgeta we oli nogud ia nao, we oli tantanem hat blong ol pikinini blong ol man blong mekem blad i ron.

6 Mo i bin hapen se Ol Man blong Leman oli mekem ol samting rere blong kam agensem Tiankum bigtaon.

7 Mo i bin hapen long nambatri handred mo siksti mo fo yia Ol Man blong Leman oli kam agensem Tiankum bigtaon, blong oli save tekem Tiankum bigtaon tu.

8 Mo i bin hapen se Ol Man blong Nifae oli pusumbak olgeta mo oli ronemaot olgeta. Mo taem we Ol Man blong Nifae oli luk se oli ronem Ol Man blong Leman, oli bin, bakegen tokflas long saed blong paoa blong olgeta bakegen; mo oli go long paoa blong olgeta bakegen mo oli tekem bakegen Emti bigtaon.

9 Mo nao evri samting ia oli bin mekem, mo i gat plante taosen oli ded long tufala saed, Ol Man blong Nifae tugeta wetem Ol Man blong Leman.

10 Mo i bin hapen se nambatri handred mo siksti mo sikis yia i bin pas i go, mo Ol Man blong Leman oli kam bakegen long Ol Man blong Nifae blong faet; be yet, Ol Man blong Nifae oli no sakem sin from nogud fasin we oli bin mekem, be oli stap gohed long ol fasin nogud blong olgeta oltaem.

11 Mo i no posibol blong tang i save eksplenem, o blong man i raetemdaon wan samting we i tokbaot stret nogud samting abaot blad we i ron mo fasin blong kilim man i ded we i stap long medel blong ol pipol, blong Ol Man blong Nifae tugeta wetem Ol Man blong Leman; mo evri hat i kam strong, mekem se oli glad blong mekem blad i ron oltaem.

12 Mo i neva bin gat fasin nogud we i bigwan tumas olsem long medel blong evri pikinini blong Lihae, o iven long ful laen blong Isrel, folem ol toktok blong Lod, olsem we i bin stap long medel blong pipol ia.

13 Mo i bin hapen se Ol Man blong Leman oli tekem bigtaon ia, Emti, mo hemia from namba blong olgeta i bitim namba blong Ol Man blong Nifae.

14 Mo tu, oli maj i go agensem bigtaon ia, Tiankum, mo oli ronem olgeta we oli stap laef long hem oli aot long taon ia, mo oli tekem plante prisena, ol woman tugeta wetem ol pikinini, mo oli givim olgeta olsem ol sakrifaes long ol aedol god blong olgeta.

15 Mo i bin hapen se long nambatri handred mo siksti mo seven yia, Ol Man blong Nifae oli kros from Ol Man blong Leman oli bin sakrifaesem ol woman blong olgeta mo ol pikinini blong olgeta, mekem se oli go agensem Ol Man blong Leman wetem kros we i bigwan tumas, inaf blong mekem se oli winim bakegen Ol Man blong Leman, mo oli ronem olgeta aot long ol graon blong olgeta.

16 Mo Ol Man blong Leman oli no kambak bakegen agensem Ol Man blong Nifae kasem tri handred mo seventi mo faef yia.

17 Mo long yia ia, oli kam daon agensem Ol Man blong Nifae wetem evri paoa blong olgeta; mo oli no save kaontem olgeta from namba blong olgeta i bigwan tumas.

18 Mo stat long taem ia i go, Ol Man blong Nifae oli no save kasem paoa ova long Ol Man blong Leman, be Ol Man blong Leman oli stat blong kilimded olgeta, semmak olsem smolsmol ren blong moning i drae long hot blong san.

19 Mo i bin hapen se Ol Man blong Leman oli kam daon agensem bigtaon ia, Emti; mo i gat wan faet we i strong we i strong tumas we oli mekem long graon ia, Emti, we long faet ia, oli winim Ol Man blong Nifae.

20 Mo oli ronwe bakegen long fored blong olgeta, mo oli kam long bigtaon ia, Boas; mo long ples ia oli stanap agensem Ol Man blong Leman wetem fasin blong no fraet we i bigwan tumas, inaf blong mekem se Ol Man blong Leman oli no winim olgeta kasem taem we oli kam bakegen long nambatu taem.

21 Mo taem we oli kam long nambatu taem, oli ronem mo kilimded Ol Man blong Nifae wetem wan fasin blong kilim man i ded we i bigwan tumas; oli givim ol woman mo ol pikinini blong olgeta bakegen olsem sakrifaes i go long ol aedol.

22 Mo i bin hapen se Ol Man blong Nifae oli ronwe bakegen long fored blong olgeta, oli tekem evri pipol we oli stap laef i go wetem olgeta, olgeta we oli stap long ol bigtaon tugeta wetem ol vilej.

23 Mo nao mi, Momon, from mi luk se Ol Man blong Leman oli rere blong tekem graon ia, from hemia, mi go long hil Sim, mo mi tekemaot evri histri we Amaron i bin haedem wetem Lod.